.jpg)
កម្មការិនីរោងចក្រកាត់ដេរឈ្មោះ Yu Fa ធ្វើការតវ៉ាមុខរោងចក្រ កាលពីខែមុន បន្ទាប់ពីថៅកែរោងចក្រជនជាតិចិនតៃវ៉ាន់ បានបិទទ្វាររោងចក្រ ហើយរត់គេចខ្លួន។ ផា លីណា
ភ្នំពេញៈ រោងចក្រ និងអាជីវកម្មនានាក្នុងប្រទេសកម្ពុជានាពេលខាងមុខឆាប់ៗនេះអាចនឹងត្រូវតម្រូវឲ្យដាក់តម្កល់ប្រាក់បំណាច់ជាមុនជារៀងរាល់ខែទៅរដ្ឋាភិបាល ដើម្បីទុកបើកឲ្យកម្មករនិយោជិតនៅពេលដែលថៅកែរត់ចោលរោងចក្រ ឬអាជីវកម្មទាំងនោះ។ នេះបើតាមរដ្ឋមន្ត្រីក្រសួងការងារ លោក អ៊ិត សំហេង ដែលបានប្រកាសកាលពីថ្ងៃអង្គារម្សិលមិញ។
គំនិតនេះ ត្រូវបានស្វាគមន៍ដោយសកម្មជនសិទ្ធិការងារដែលបានអំពាវនាវឲ្យរដ្ឋាភិបាលដោះស្រាយបញ្ហាថៅកែរោងចក្របិទទ្វាររោងចក្រ ហើយរត់គេចខ្លួនដោយមិនបើកប្រាក់ឈ្នួល ឬផ្តល់ប្រាក់សំណងដល់កម្មករ។
នៅក្នុងពិធីសន្និបាតប្រចាំឆ្នាំរបស់ក្រសួងកាលពីម្សិលមិញ លោក អ៊ិត សំហេង បានថ្លែងថា មន្ត្រីក្រសួងកំពុងព្រាងប្រកាសមួយដែលនឹងតម្រូវឲ្យរោងចក្រតម្កល់ប្រាក់បំណាច់នៅបេឡាជាតិរបបសន្តិសុខសង្គម។ បើតាមលោក សំហេង ក្រសួង «មានក្តីបារម្ភជាច្រើន» ចំពោះបញ្ហាថៅកែរត់ចោលរោងចក្រដែលជាបញ្ហាកើតមានជាយូរមកហើយ។
លោក សំហេង ថ្លែងថាប្រសិនបើរោងចក្របិទភ្លាមៗជាយថាហេតុ បសស នឹងសងប្រាក់បំណាច់ទៅកម្មករជំនួសរោងចក្រ។ លោក សំហេង ថ្លែងថា៖ «យើងមិនចង់យកតែលុយរដ្ឋាភិបាលទៅសងនោះទេ»។ «រឿងដែលសំខាន់គឺត្រូវបង្កើតប្រព័ន្ធមួយនៃការបង់ជាទៀងទាត់»។
កាលពីខែមុន រដ្ឋាភិបាលបានប្រកាសថា រដ្ឋាភិបាលបានកំណត់ប្រាក់ចំនួន ៤,៦ លានដុល្លារដើម្បីសងប្រាក់បំណាច់ទៅកម្មករនៅរោងចក្រចំនួន ៩ ដែលថៅកែបានបិទរោងចក្រភ្លាមៗ និងរត់គេចខ្លួន។ ការប្រកាសនេះធ្វើឡើងភ្លាមៗ បន្ទាប់ពីថៅកែរោងចក្រកាត់ដេរឈ្មោះ Yu Fa ជនជាតិចិនតៃវ៉ាន់ក្នុងខណ្ឌពោធិ៍សែនជ័យបានបិទទ្វាររោងចក្រ ហើយរត់គេចខ្លួន ខណៈកម្មករទៅចូលរួមពិធីសំណេះសំណាលជាមួយលោកនាយករដ្ឋមន្ត្រី ហ៊ុន សែន។
កាលពីថ្ងៃអង្គារលោក អ៊ិតសំហេង បានទទួលស្គាល់ថារោងចក្រកាត់ដេររហូតដល់ ២០ រោងចក្រប្រឈមមុខនឹងបញ្ហាដូចគ្នានេះចាប់តាំងពីឆ្នាំ ២០១៦ ប៉ុន្តែបានអះអាងថារោងចក្រទាំងអស់ត្រូវបានដោះស្រាយនៅសល់តែរោងចក្រចំនួន ៩ ។ លោកបានថ្លែងថា៖ «ប្រសិនបើមានរោងចក្រច្រើនជាងនេះបិទទ្វារ រដ្ឋាភិបាលនឹងពិនិត្យ ហើយដោះស្រាយបញ្ហានេះ»។
ក្រសួងមិនទាន់បានបង្ហាញនៅឡើយទេថា តើរោងចក្រចំនួន ៩ ណាខ្លះដែលស្ថិតនៅក្នុងបញ្ជីរបស់ក្រសួង។
អ្នកស្រី ដឹក ឌឿន ដែលជាកម្មការិនីរោងចក្រអាយុ ៣៥ ឆ្នាំដែលធ្វើការនៅរោងចក្រ Yu Fa ដែលឥឡូវនេះបានបិទទ្វារបានថ្លែងថា កម្មករពិតជាចង់ដឹងខ្លាំងណាស់ថា តើពួកគេស្ថិតនៅក្នុងបញ្ជីនោះឬអត់?។
បើតាមអ្នកស្រី ឌឿន កម្មកររោងចក្រ Yu Fa បានយល់ព្រមទទួលយកប្រាក់ប្រមាណ ១៣០ ដុល្លារម្នាក់ៗក្នុងមួយខែ ដែលជាប្រាក់បានមកពីការលក់សម្ភារដែលនៅសេសសល់របស់រោងចក្រ។ ទោះយ៉ាងណាក្តីវាគ្រាន់តែជាចំនួន ២ ភាគ ៣ នៃប្រាក់ខែដែលរោងចក្រជំពាក់ពួកគេសម្រាប់ការងារខែចុងក្រោយ ហើយគ្មាននរណាម្នាក់ទទួលបានប្រាក់បំណាច់ទេ។ អ្នកស្រី ឌឿន បន្តថា៖ «ខ្ញុំបានរួមចំណែកជាច្រើននៅក្នុងរោងចក្រនេះក្នុងរយៈកាល ៩ ឆ្នាំកន្លងមក ប៉ុន្តែម្ចាស់រោងចក្របានបិទទ្វារ ហើយខ្ញុំបាត់បង់ប្រាក់អតីតភាពការងារ»។
លោក Will Conklin នៅមជ្ឈមណ្ឌលសាមគ្គីបានអបអរចំពោះគំនិតដែលតម្រូវឲ្យមានការតម្កល់ប្រាក់បំណាច់។ លោកបានថ្លែងថា៖ «វាជាការអនុវត្តស្តង់ដារមួយនៅក្នុងក្រុមហ៊ុនជាច្រើនដែលពួកគេកំណត់ទុកប្រាក់បំណាច់ជាការកំណត់សម្រាប់ពេលបិទទ្វារ»។ «ប៉ុន្តែវាមិនមែនជាការអនុវត្តនៅក្នុងវិស័យកាត់ដេរ។ វាជារឿងល្អដែលចាប់ផ្តើមការងារនេះ»។
នាយកអង្គការ Central លោក មឿន តុលា ថ្លែងថានៅមានការងារជាច្រើនទៀតដែលត្រូវធ្វើ រួមមានដំណើរការសម្រាប់កម្មករទទួលបានប្រាក់បំណាច់របស់ពួកគេ និងរបៀបដែលក្រសួងនឹងធ្វើឲ្យប្រាកដថារោងចក្រនឹងបង្កើនប្រាក់តម្កល់ នៅពេលកម្មករនិយោជិតថ្មីត្រូវបានជួល។ ទោះយ៉ាងណាក្តី លោក តុលា បានថ្លែងបន្តថាសរុបទៅ «នេះជាដំណឹងល្អសម្រាប់កម្មករ។ ខ្ញុំស្វាគមន៍ [គំនិតនេះ]»៕ PS
