The Phnom Penh Post Search

Search form




Logo of Phnom Penh Post newspaper Phnom Penh Post - រោងចក្រ​ផលិត​ក្រដាស ហារតា បិទ​ទ្វារ​ដោយ​គ្មាន​ពេល​កំណត់

រោងចក្រ​ផលិត​ក្រដាស ហារតា បិទ​ទ្វារ​ដោយ​គ្មាន​ពេល​កំណត់

កម្មករតវ៉ា​នៅ​ខាង​មុខ​រោង​ចក្រ​ដើម្បី​ឲ្យ​ថៅ​កែ​ចេញ​មុខ​ដោះ​ស្រាយ​​។
កម្មករតវ៉ា​នៅ​ខាង​មុខ​រោង​ចក្រ​ដើម្បី​ឲ្យ​ថៅ​កែ​ចេញ​មុខ​ដោះ​ស្រាយ​​។ ហេង ជីវ័ន

រោងចក្រ​ផលិត​ក្រដាស ហារតា បិទ​ទ្វារ​ដោយ​គ្មាន​ពេល​កំណត់

ភ្នំពេញៈ រោងចក្រ​ផលិត​ក្រដាស ហារតា ស្ថិត​ក្នុង ខណ្ឌ​ពោធិ៍​សែន​ជ័យ បាន​សម្រេច​ផ្អាក​ផលិតកម្ម​របស់​ខ្លួន​មួយ​រយៈ​ដោយ​គ្មាន​ការ​កំណត់ ដោយ​សារ​កម្មករ​ជាង ២០០ នាក់​ដែល​បាន​ធ្វើ​ការ​តវ៉ា​ជាច្រើន​ខែ​មក​ហើយ​បាន​បិទ​ច្រក​ចេញ​ចូល​របស់​រោងចក្រ​មិន​ឲ្យ​មាន​ការ​ដឹក​អីវ៉ាន់​ចេញ​ចូល។

លោក សូ ភក្តី ប្រធាន​រដ្ឋបាល​នៃ​រោងចក្រ ហារតា ថ្លែង​ថា រោងចក្រ​បាន​ផ្អាក​ដំណើរការ​ផលិត​របស់​ខ្លួន​តាំង​ពី​ថ្ងៃ ទី​២១ ខែ​មិថុនា រហូត​មក​ដោយ​មិន​ទាន់​បាន​កំណត់​ថ្ងៃ​ដំណើរការ​ពេល​ណា​ឡើង​វិញ​ឡើយ។

លោក​ថ្លែង​ថា៖ «កម្មករ​បាន​ធ្វើ​ការ​បិទ​ផ្លូវ​មុខ​រោងចក្រ​មិន​ឲ្យ​មាន​ការ​ដឹក​អីវ៉ាន់​ចេញ​រហូត​មក​ដល់​ពេល​នេះ ដែល​ជា​ហេតុ​នាំ​ឲ្យ​រោងចក្រ​សម្រេច​ផ្អាក​ដំណើរការ​ផលិត​មួយ​រយៈ​សិន ដែល​ធ្វើ​ឲ្យ​អតិថិជន​បង្វែរ​ការ​បញ្ជា​ទិញ​ទៅ​ក្រុមហ៊ុន​ផ្សេង»។

លោក​ឲ្យ​ដឹង​ថា ក្រុមហ៊ុន​មិន​អាច​ធ្វើ​តាម​ការ​បង្គាប់​របស់​ក្រុម​ប្រឹក្សា​អាជ្ញា​កណ្តាល​បាន​ទេ​ដោយ​សារ​អ្វី​ដែល​ខាង​ក្រុម​ប្រឹក្សា​អាជ្ញា​កណ្តាល​បញ្ជា​គឺ​វា​អយុត្តិធម៌​ធ្ងន់​ធ្ងរ​ណាស់​សម្រាប់​ក្រុមហ៊ុន​ដែល​ឲ្យ​ផ្តល់​ប្រាក់​សំណង​ទៅ​កម្មករ​ករណី​ខាង​ក្រុមហ៊ុន​មាន​ធ្វើ​អី​ខុស​នោះ។ លោក​ថា៖ «ក្រុមហ៊ុន​បាន​ដាក់​ពាក្យ​បណ្តឹង​ប្តឹង​ទាស់​ទៅ​នឹង​ការ​បង្គាប់​របស់​ក្រុម​ប្រឹក្សា​អាជ្ញា​កណ្តាល។ ក្រុមហ៊ុន​មិន​បាន​ប្តូរ​ឈ្មោះ​ដូច​ដែល​កម្មករ​ចោទ​នោះ​ទេ។ តាម​ច្បាប់​ការងារ​មាត្រា ទី៨៧ ការ​ដែល​ក្រុមហ៊ុន​ប្តូរ​តែ​ថៅកែ ឬ​បន្ថែម​ភាគ​ហ៊ុន​ប៉ុណ្ណោះ​គឺ​មិន​ពាក់ព័ន្ធ​នឹង​ប្រាក់​អតីតភាព​ការងារ ឬ​កិច្ចសន្យា​ការងារ​នោះ​ទេ លើក​លែង​តែ​ក្រុមហ៊ុន​ប្តូរ​ឈ្មោះ»។

លោក​ថា កម្មករ​មាន​ការ​យល់​ច្រឡំ​ថា ក្រុមហ៊ុន​ដូរ​ឈ្មោះ ពី ហារតា ទៅ​ជា អូជីអាយ តែ​នេះ​គ្រាន់​តែ​ជា​ឈ្មោះ​និមិត្ត​សញ្ញា មិន​មែន​ជា​ស្លាក​យីហោ​របស់​ក្រុមហ៊ុន​ទេ។

លោក ស៊ន បូរ៉ា ប្រធាន​ផ្នែក​ផលិត និង​ជា​ប្រធាន​សហជីព​មិត្ត​កម្មករ​នៃ​រោងចក្រ ហារតា ថ្លែង​ថា កម្មករ​នៅ​តែ​បន្ត​ធ្វើ​ការ​តវ៉ា​រហូត​ទាល់​តែ​រោងចក្រ​ព្រម​ផ្តល់​ប្រាក់​ជំងឺ​ចិត្ត។ លោក​ថា៖ «កម្មករ​បាន​ធ្វើ​ការ​បិទ​ច្រក​ចេញ​ចូល​នៅ​រោងចក្រ​ដើម្បី​ឲ្យ​មាន​ការ​ដោះស្រាយ​ជូន​ពួក​យើង។ កម្មករ​ធ្វើ​ការ​តវ៉ា​ជាច្រើន​ខែ​មក​ហើយ ដែល​កម្មករ​ខ្លះ​គ្មាន​លុយ គ្មាន​កន្លែង​ស្នាក់​នៅ​ខ្លះ​ដេក​នៅ​តាម​ដង​ផ្លូវ»។

លោក​ថា ដោយ​សារ​តែ​ខ្លាច​បាត់​បង់​ប្រាក់​អត្ថ​ប្រយោជន៍​នៅ​ពេល​ដែល​ក្រុមហ៊ុន​បាន​ប្តូរ​ថៅកែ ទើប​កម្មករ​នាំ​គ្នា​ធ្វើ​ការ​តវ៉ា​ដើម្បី​ដោះស្រាយ​នូវ​ប្រាក់​អតីតភាព​ការងារ។

លោក​ថា៖ «ក្រុមហ៊ុន​មិន​បាន​ធ្វើ​តាម​ការ​បង្គាប់​របស់​ក្រុម​ប្រឹក្សា​អាជ្ញា​កណ្តាល​ដែល​បាន​បង្គាប់​ឲ្យ​បង់​លុយ​សង​ជំងឺ​ចិត្ត ហើយ​បាន​ទាំង​ប្តឹង​កម្មករ​ទៅ​តុលាការ​ទៀត»។

យោង​តាម​សេចក្តី​បង្គាប់​របស់​ក្រុម​ប្រឹក្សា​អាជ្ញា​កណ្តាល​ដែល​ចេញ​កាល​ពី​ថ្ងៃ ទី​៣០ ខែ​ឧសភា បាន​សម្រេច​បដិសេធ​ការ​ទាម​ទារ​របស់​ភាគី​កម្មករ​និយោជិត​ឲ្យ​និយោជក​ទទួល​កម្មករ​និយោជិត​មាន​កិច្ចសន្យា​ការងារ​ដែល​មាន​កំណត់​ថិរវេលា និង​មាន​ថិរវេលា​មិន​កំណត់​ឲ្យ​ចូល​ធ្វើ​ការ​វិញ និង​បង្គាប់​ឲ្យ​និយោជក​ទូទាត់​ប្រាក់​ជំងឺ​ចិត្ត និង​ប្រាក់​បំណាច់​បញ្ចប់​កិច្ចសន្យា​ជូន​កម្មករ និង​បង្គាប់​ឲ្យ​និយោជក​ទូទាត់​ប្រាក់​បំណាច់​បណ្តេញ​ចេញ និង​ប្រាក់​ទូទាត់​ជួស​ការ​ជូន​ដំណឹង​មុន​ពេល​ជូន​ពួក​គាត់៕

អត្ថបទគួរចាប់អារម្មណ៍