The Phnom Penh Post Search

Search form

Logo of Phnom Penh Post newspaper Phnom Penh Post - រោងចក្រ​ព្រងើយ​កន្តើយ​ការ​បញ្ជា​ផ្ទាល់​របស់​រដ្ឋាភិបាល




រោងចក្រ​ព្រងើយ​កន្តើយ​ការ​បញ្ជា​ផ្ទាល់​របស់​រដ្ឋាភិបាល

រោងចក្រ​ព្រងើយ​កន្តើយ​ការ​បញ្ជា​ផ្ទាល់​របស់​រដ្ឋាភិបាល

20140306_08
កម្មករនៅពេលធ្វើការតវ៉ាទាមទារប្រាក់ខែគោល ១៦០ ដុល្លារកន្លងមក

កំពង់ស្ពឺៈ នៅ​ពេល​នគរបាល​ឃុំ​នៅ​ខេត្ត កំពង់ស្ពឺ បញ្ជា​ឲ្យ​រដ្ឋបាល​រោងចក្រ Complete Honour Footwear Industrial (Cambodia) Co. Ltd.បើក​ទ្វារ​រោងចក្រ​ដើម្បី​អនុញ្ញាត​ឲ្យ​កម្មករ​ចាក​ចេញ​កាល​ពី​សប្តាហ៍​មុន​អ្នក​គ្រប់​គ្រង​នៅ​ទី​នោះ​បាន​បដិសេធ​ដោយ​លើក​ឡើង​បញ្ហា​បារម្ភ​ខ្លាច​ក្រុម​សហជីព​បំផ្លាញ​ទ្រព្យ​សម្បត្តិ​រោងចក្រ។

លោក ខេង ចាន់ថុល មេ​ប៉ុស្តិ៍​ឃុំ ជង្រុក ស្រុក កងពិសី បាន​ថ្លែង​កាល​ពី​ថ្ងៃ​អង្គារ​ថា៖ «ក្រុមហ៊ុន​មិន​ស្តាប់​តាម​បញ្ជា​របស់​ខ្ញុំ​ដែល​បញ្ជា​ឲ្យ​បើក​ទ្វារ​ទេ។ ពួក​គេ​បារម្ភ​ថា ក្រុម​សហជីព និង​កម្មករ នឹង​បំផ្លាញ​ទ្រព្យ​សម្បត្តិ​រោងចក្រ»។

នៅ​ក្នុង​បទ​សម្ភាស​ជាមួយ ភ្នំពេញ ប៉ុស្តិ៍ កាល​ពី​ថ្ងៃ​ចន្ទ​កម្មករ​បួន​នាក់​បាន​រាយការណ៍​ថា រោងចក្រ​បាន​ចាក់​សោ​ទ្វារ​រារាំង​មិន​ឲ្យ​កម្មករ​ចូល​រួម​នៅ​ក្នុង​ពហិកា​មិន​ធ្វើ​ការងារ​ថែម​ម៉ោង​រយៈ​ពេល​មួយ​សប្តាហ៍​កាល​ពី​សប្តាហ៍​មុន។

ការ​ធ្វើ​ពហិការ​នេះ គឺ​ដើម្បី​តវ៉ា​ការ​បដិសេធ​របស់​រដ្ឋាភិបាល ដែល​មិន​ព្រម​ដំឡើង​ប្រាក់​ឈ្នួល​អប្បបរមា​ដល់ ១៦០ ដុល្លារ និង​ការ​ឃុំ​ខ្លួន​មនុស្ស ២១នាក់ ដែល​ត្រូវ​បាន​ចាប់​ខ្លួន នៅ​ក្នុង​បាតុកម្ម​កាល​ពី​ខែ មករា ដែល​គាំទ្រ​កូដកម្ម​ទូទាំង​ប្រទេស។

លោក ចាន់ថុល បាន​ថ្លែង​ថា នគរបាល​បាន​ឆ្លើយ​តប​នឹង​ការ​ទូរស័ព្ទ​ហៅ​ពី​រោងចក្រ ដែល​អ្នក​គ្រប់​គ្រង​រោងចក្រ បន្ទាប់​មក​មិន​ព្រម​ចាក់​សោ​បើក​ទ្វារ។ លោក​បន្ត​ថា៖ «ខ្ញុំ​បាន​ទៅ​ទី​នោះ ដើម្បី​ការពារ​កម្មករ មិន​មែន​ដើម្បី​ហាម​ឃាត់​ពួកគេ​មិន​ឲ្យ​ចាក​ចេញ​ដូច​ដែល​សហជីព និង​កម្មករ​មួយ​ចំនួន​ចោទ​ប្រកាន់​ទេ»។

អ្នក​ជំនាញ​ច្បាប់​លោក សុក សំអឿន កាល​ពី​ថ្ងៃ​អង្គារ បាន​ចោទ​សួរ​ថា ហេតុ​អ្វី​បាន​ជា​អ្នក​គ្រប់​គ្រង​ចង់​រក្សា​ទុក​កម្មករ​នៅ​ក្នុង​រោងចក្រ​ដោយ​ភ័យ​ខ្លាច​ការ​បំផ្លាញ​ទ្រព្យ​សម្បត្តិ នៅ​ពេល​ដែល​នគរបាល​មាន​វត្តមាន​នៅ​ទី​នោះ​ដើម្បី​ការពារ មិន​ឲ្យ​មាន​ហិង្សា ឬ​ការ​បំផ្លាញ​ទ្រព្យ​សម្បត្តិ?

លោក Dave Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិក ដើម្បី​សាមគ្គីភាព​ការងារ (ACILS) បាន​ថ្លែង​ថា ការ​ចោទ​ប្រកាន់​ពី​កម្មករ និង​នគរបាល​ថា អ្នក​គ្រប់​គ្រង​រោងចក្រ Complete Honour ឃាត់​ខ្លួន​កម្មករ​មិន​ឲ្យ​ចេញ​បង្ហាញ​អំពី​និន្នាការ​គួរ​ឲ្យ​បារម្ភ​ក្នុង​ការ​អនុវត្ត​ច្បាប់​នៅ កម្ពុជា ដែល​រដ្ឋបាល​រោងចក្រ​ទំនង​ជា​មាន​អំណាច​គ្រប់​គ្រាន់​មិន​ស្តាប់​បញ្ជា​ពី​នគរបាល​ឃុំ។

លោក​បន្ត​ថា៖ «វា​គួរ​ឲ្យ​បារម្ភ​ណាស់។ គេ​គឺ​និយាយ​អំពី​នីតិរដ្ឋ​ក្នុង​ប្រទេស​នេះ»។

ប៉ុន្តែ លោក រឿន វណ្ណៈ មន្រ្តី​រដ្ឋបាល នៅ​រោងចក្រ Complete Honour បាន​ថ្លែង​ថា ព្រឹត្តការណ៍​កាល​ពី​ថ្ងៃ​អង្គារ គឺជា​ការ​លើក​ឡើង​ខុស​ដោយ​នគរបាល កម្មករ និង​សហជីព។

លោក​ថ្លែង​ថា៖ «អគារ​នីមួយៗ​របស់​រោងចក្រ​យើង​ប្រើ​មាស៊ីន​ត្រជាក់​នៅ​កន្លែង​ការងារ យើង​បិទ​ទ្វារ​ប៉ុន្តែ​មិន​បាន​ចាក់​សោ​ពួក​គេ​ទេ។ ខ្ញុំ​គិត​ថា មន្រ្តី​នគរបាល​ទាំង​នោះ​ប្រហែល​ជា​ច្រឡំ​ហើយ​ឬ​មិន​យល់​អំពី​ថា​តើ​ហេតុ​អ្វី​យើង​បិទ​ទ្វារ»៕ PS

អត្ថបទគួរចាប់អារម្មណ៍