.jpg)
កម្មការិនីរោងចក្រពេលដើរចេញពីធ្វើការនៅរោងចក្រមួយក្នុងរាជធានីភ្នំពេញ កាលពីថ្ងៃអង្គារ។ ហុង មិនា
ភ្នំពេញៈ យ៉ាងហោចណាស់រោងចក្រប្រមាណជា ១០ រោងចក្រ បានស្នើសុំព្យួរការងារផ្នែកខ្លះនៃផលិតផលរបស់រោងចក្រដោយហេតុខ្វះខាតវត្ថុធាតុដើម ហើយអាចប៉ះពាល់ដល់កម្មករប្រមាណ ៣ ពាន់នាក់នឹងអត់ការងារធ្វើជាបណ្ដោះអាសន្ន។ ការអះអាងយ៉ាងដូច្នេះបានធ្វើឡើងនៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងការងារ និងបណ្ដុះបណ្ដាលវិជ្ជាជីវៈ» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកាលពីម្សិលមិញនាទីស្តីការគណៈរដ្ឋមន្ត្រី។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ស្ថិតិនៃការវាយតម្លៃផលប៉ះពាល់ដល់រោងចក្រទាំង ១០ នោះគឺគិតត្រឹមថ្ងៃទី ២៧ ខែកុម្ភៈ និងនៅក្នុងខែមីនាខាងមុខ រោងចក្រ សហគ្រាសប្រហែលជិត ២០០ ទៀត ដែលត្រូវប្រឈមដោយកត្តាកង្វះវត្ថុធាតុដើមសម្រាប់ផលិតដែលនឹងប៉ះពាល់ដល់កម្មករប្រមាណ ១៦ ម៉ឺននាក់ទៀត។
លោក ហេង សួរ បានថ្លែងថា៖ «អាចនឹងក្នុងខែ ៣ ខាងមុខនេះ គឺអាចមានរោងចក្រ សហគ្រាសប្រហែលជិត ២០០ ដែលអាចប្រឈមនឹងកង្វះវត្ថុធាតុដើមដែលអាចប៉ះពាល់ដល់បងប្អូនកម្មករនិយោជិតក្នុងករណីអាក្រក់បំផុតប្រមាណជាខ្ទង់ ១៦ ម៉ឺននាក់»។
លោក ហេង សួរ បានឲ្យដឹងទៀតថា គិតត្រឹមថ្ងៃព្រហស្បតិ៍មានរោងចក្រប្រមាណ ១០ បានចាប់ផ្តើមស្នើសុំព្យួរផ្នែកខ្លះនៃការងារដែលមានកម្មករប្រមាណ ៣ ពាន់នាក់បានរងគ្រោះដែលក្រសួងកំពុងព្យាយាមសម្របសម្រួលជុំវិញករណីការស្នើសុំព្យួររោងចក្រទាំង ១០ នោះដោយនឹងរៀបចំឲ្យកម្មករទាំងអស់អាចចូលរួមវគ្គបណ្តុះបណ្តាលបន្ថែមក្នុងអំឡុងពេលព្យួរការងារ ហើយក៏ដើម្បីទទួលបានប្រាក់អត្ថប្រយោជន៍ ៦០ ភាគរយ ពីរដ្ឋាភិបាលដែរ។
លោក ហេង សួរ ក្នុងសន្និសីទកាសែតម្សិលមិញ។ហេង ជីវ័ន
ប៉ុន្តែពាក់ព័ន្ធនឹងកញ្ចប់ថវិកាដែលរដ្ឋាភិបាលគ្រោងនឹងបញ្ចេញដើម្បីត្រៀមទប់ស្កាត់នោះលោក ហេង សួរ មិនអាចបញ្ជាក់បាននោះទេដោយគ្រាន់តែអះអាងថា រដ្ឋាភិបាលនឹងមានថវិកាគ្រប់គ្រាន់ សម្រាប់ទប់ស្កាត់បាតុភាពផ្សេងៗក្នុងកាលៈទេសៈនេះដោយមិនឲ្យកម្មករទាំងអស់ ជួបប្រទះការលំបាកនោះទេ។
លោកអះអាងថា៖ «រាជរដ្ឋាភិបាលនឹងខិតខំប្រើប្រាស់នូវគ្រប់មធ្យោបាយក្នុងការទំនាក់ទំនងជាមួយអ្នកបញ្ជាទិញរោងចក្រក៏ដូចជាកម្រិតរដ្ឋាភិបាល និងរដ្ឋាភិបាល ដើម្បីធ្វើយ៉ាងណាឲ្យរដ្ឋាភិបាលចិនផ្តល់អាទិភាពនៅក្នុងការផ្គត់ផ្គង់នូវវត្ថុធាតុដើមទាំងនោះមកប្រទេសកម្ពុជាឲ្យបានលឿនបំផុត ដោយធ្វើយ៉ាងណាឲ្យរយៈពេលនៃកង្វះវត្ថុធាតុដើមនេះមានរយៈពេលខ្លី»។
លោកសួរថ្លែងថា៖ «ក្នុងរយៈពេលនេះការរំខាននៃចង្វាក់ផលិតកម្មនៅប្រទេស ចិន គឺពិតជាបានធ្វើឲ្យប៉ះពាល់ទៅដល់ចង្វាក់ផលិតកម្មនៅក្នុងពិភពលោកយើងទាំងមូលតែម្តង ជាពិសេសនៅក្នុងតំបន់អាស៊ីរបស់យើងតែម្តងដែលក្នុងនោះសូម្បីតែប្រទេស កូរ៉េ ក៏បានផ្អាកចង្វាក់ផលិតកម្មមួយចំនួន ដោយសារតែកង្វះវត្ថុធាតុដើមពាក់កណ្តាលសម្រេចដែលតែងតែទទួលយកពីប្រទេស ចិន ដែលលោកសង្ឃឹមថាកម្ពុជានឹងមានអាទិភាព ដើម្បីទទួលបាននូវវត្ថុធាតុដើមនេះមុនគេ។
លោក អាត់ ធន់ ប្រធានសហភាពការងារកម្ពុជាបានឲ្យដឹងថា បញ្ហាប្រឈមទាំងនេះ គឺជាក្តីបារម្ភមួយដែលផលប៉ះពាល់ខ្លាំងបំផុតនោះ គឺកម្មករទទួលរងនូវក្តីលំបាក ព្រោះគ្មានការងារធ្វើ។ ម្យ៉ាងប្រាក់ឧបត្ថម្ភបណ្ដោះអាសន្នចំនួន ៦០ ភាគរយ ដែលផ្តល់ជូនកម្មករក៏មិនអាចជួយកម្មករបានទាំងស្រុងនោះដែរ ហើយប្រាក់នេះអាចបន្តជួយកម្មករបានតែក្នុងរយៈពេលខ្លីប៉ុណ្ណោះ ព្រោះថាបើផលវិបាកទាំងនោះបន្តអូសបន្លាយរយៈពេលវែងនោះវិធានការទាំងនោះនឹងមិនអាចទ្រាំទ្របានទេ។
លោកថ្លែងថា៖ «ឃើញថានេះគឺជាវិធានការចម្រុះដែលរោងចក្រចេញ ៤០ ភាគរយ ហើយរដ្ឋាភិបាលចេញ ២០ ភាគរយ សរុបបាន ៦០ ភាគរយ ផ្តល់ជូនដល់កម្មករដែលវាអាចដោះស្រាយបញ្ហាបានមួយអន្លើក្នុងរយៈពេលខ្លីដែរ។ ប៉ុន្តែអ្វីជាបញ្ហាចោទ គឺឲ្យកម្មករទៅរៀនយកបទពិសោធ ដែលកត្តានេះក្នុងរយៈពេលខ្លីអាចទៅរួច បើក្នុងរយៈពេលវែងគឺពិបាកហើយ ព្រោះក្រុមហ៊ុនបើគ្មានការងារធ្វើតើបានប្រាក់ ៤០ ភាគរយ មកពីណា?»។
លោក ធន់ ថ្លែងថា៖ «ខ្ញុំចង់ឃើញវិធានការជាក់លាក់ផ្សេងទៀត ដើម្បីធ្វើការទប់ស្កាត់ផលវិបាកទាំងនេះឲ្យបានទាន់ពេលវេលា ខណៈខ្ញុំសង្កេតឃើញវិស័យជាច្រើនទៀតដូចជាទេសចរណ៍កំពុងតែជួបប្រទះដែលធ្វើឲ្យសណ្ឋាគារជាច្រើនបានបិទទ្វារ ព្រោះតែគ្មានភ្ញៀវទេសចរមកទស្សនា»។
គិតត្រឹមឆ្នាំ ២០១៩ ក្រសួងការងារបានចុះបញ្ជិកាសហគ្រាស គ្រឹះស្ថានបានចំនួន ១៤ ០៦០ និងមានកម្មករនិយោជិតប្រមាណ ១៤៣៣ ៩៣៥ នាក់ ដោយក្នុងនោះសហគ្រាសគ្រឹះស្ថានក្នុងវិស័យកាត់ដេរមានចំនួនជាង ១ ២០០ ស្ថាប័ន។
លោក ម៉ៃ ចាន់ កម្មកររោងចក្រក្នុងតំបន់ 7NG ស្ថិតក្នុងខេត្តកណ្តាលបានប្រាប់ភ្នំពេញប៉ុស្តិ៍ពីម្សិលមិញដោយបង្ហាញក្តីបារម្ភខ្លះៗ ជុំវិញព័ត៌មាននៃការព្យួរការងាររបស់កម្មករ ខណៈដែលលោកមើលឃើញថា ការជួយរបស់រដ្ឋាភិបាលគឺអាចជួយកម្មករបានមួយផ្នែកប៉ុណ្ណោះ ស្របពេលដែលកម្មករភាគច្រើនសុទ្ធតែជំពាក់បំណុលនៅធនាគារ។
បើទោះជាបច្ចុប្បន្នរោងចក្រដែលលោកកំពុងធ្វើការមិនទាន់ប្រកាសពីការព្យួរការងារ ប៉ុន្តែលោក ម៉ៃ ចាន់ ថ្លែងថា៖ «ខ្ញុំសូមអំពាវនាវទៅដល់សម្តេចឲ្យគាត់រកដំណោះស្រាយដើម្បីឲ្យផលិតកម្មនៅតាមរោងចក្រនៅកម្ពុជាឲ្យដំណើរការដូចដើមវិញ ព្រោះដឹងស្រាប់ហើយកម្មករស្រុកខ្មែរយើងប្រឈមមុខទៅនឹងការជំពាក់គេច្រើន។ អ៊ីចឹងគ្មានអ្វីសំណូមពរច្រើនទេ មានតែសុំទៅដល់សម្តេច ជួយគិតគូរទៅដល់កម្មករ-កម្មការិនីនៅស្រុកខ្មែរ ដើម្បីឲ្យពួកគាត់ មានលទ្ធភាពដោះស្រាយបញ្ហាជីវភាព និងដោះស្រាយបំណុលដែលខ្ចីធនាគារ»៕
វីដេអូ៖
