កណ្តាលៈ រោងចក្រកាត់ដេរ ១ ដែលជាក្រុមហ៊ុនកាត់ដេរធំជាងគេនៅក្រុងតាខ្មៅ ខេត្តកណ្តាល និងមានកម្មករប្រមាណ ៣ ០០០ នាក់ប្រកាសបិទភ្លាមៗ កាលពីថ្ងៃទី ២១ មេសា ដោយគ្មានការជូនដំណឹងកម្មករជាមុននោះទេ ហើយលើកហេតុផលថា ការសម្រេចបិទរោងចក្រនេះ ព្រោះគ្មានការបញ្ជាទិញ ខណៈកម្មករបង្ហាញក្តីបារម្ភពីបញ្ហាជីវភាព ដោយសារគ្មានការងារធ្វើ។
អ្នកស្រី សា ម៉ាឌី កម្មករម្នាក់ក្នុងចំណោមកម្មករជាច្រើនទៀតប្រាប់ភ្នំពេញប៉ុស្តិ៍ពីម្សិលមិញថា កាលពីថ្ងៃទី ២១ មេសា អ្នកគ្រប់គ្រងរោងចក្រកាត់ដេរ ប្រឹភីសីសខេមបូឌាហ្គាមិនអិលធីឌី បានប្រកាសប្រាប់កម្មករពីការបិទរោងចក្រមិនដល់ ២ ម៉ោងផង អំឡុងពេលដែលកម្មករកំពុងធ្វើការ។ អ្នកស្រីថា ការប្រកាសបិទរោងចក្រនេះគឺគ្រាន់តែប្រាប់ថា គ្មានអ្នកបញ្ជាទិញ ហើយរោងចក្រ មិនមានលទ្ធភាព ព្យួរការងារកម្មករនោះទេ។
អ្នកស្រីបន្តថា៖ «ក្នុងពេលនោះកំពុងធ្វើការសុខៗក្រោយហូបបាយថ្ងៃត្រង់ហើយ រោងចក្រក៏បានប្រកាសឲ្យយើងឈប់ធ្វើការ និងឲ្យទៅផ្ទះ ហើយប្រាប់ថាចាំមកបើកលុយនៅថ្ងៃទី ៣០ មេសា ដែលជាប្រាក់ខែចុងក្រោយ។ ខ្ញុំមិនដឹងថា គេទូទាត់របៀបម៉េចឲ្យយើងទេ។ រឿងនេះកម្មករយើង ពិបាកទទួលយកណាស់ប្រកាសភ្លាមៗឲ្យយើងឈប់ភ្លាម»។
ចំណែកកម្មករម្នាក់ទៀតដែលប្រាប់ត្រឹមឈ្មោះ ម៉ាក់ ផានុន ប្រាប់ភ្នំពេញប៉ុស្តិ៍ដែរថា កម្មករជាច្រើនមានភាពជ្រួលច្របល់ជាខ្លាំង។ ប៉ុន្តែមិនបានប្រមូលផ្តុំតវ៉ានោះទេ ដោយរង់ចាំការបើកប្រាក់ខែចុងក្រោយនៅចុងខែខាងមុខ។ អ្នកស្រីបន្តថា បើក្នុងករណីដែលការទូទាត់ប្រាក់សំណងមិនបានត្រឹមត្រូវតាមច្បាប់នោះ កម្មករនឹងពិចារណាជាថ្មីទៀតថាសម្រេចតវ៉ាឬយ៉ាងណា ខណៈនេះអ្នកស្រីបារម្ភពីបញ្ហាជីវភាព។
អ្នកស្រីបញ្ជាក់ថា៖ «គេអត់មាននិយាយអីទេ រឿងសំណងជំងឺចិត្តហ្នឹង គឺគ្រាន់តែថា គេនឹងគុណលុយឲ្យយើងនឹងប្រាក់ខែចុងក្រោយហ្នឹង ហើយពេលបើកហ្នឹង ខ្ញុំខ្លាចតែបាត់លុយប្រាក់ខែខ្ញុំផង។ តែមិនដឹងធ្វើម៉េចទេ បើពួកខ្ញុំជាកម្មករអ៊ីចឹង យើងនៅក្រោមគេ គេថាម៉េចមានតែអ៊ីចឹងហ្មង គេបើកបានប៉ុន្មាន យកប៉ុណ្ណឹងហើយបង»។
បើតាមអ្នកស្រី ម៉ាក់ ផានុន ឲ្យដឹងថាពីមុនរោងចក្រនេះមានកម្មកររហូតដល់ ៧ ០០០-៨ ០០០ នាក់ ប៉ុន្តែមួយរយៈចុងក្រោយនេះដោយសារជួបបញ្ហានៃការធ្លាក់ចុះការបញ្ជាទិញ និងកង្វះផលិតភាព ឬវត្ថុធាតុដើមបណ្តាលមកពីជំងឺកូវីដ ១៩ ផងនោះបានធ្វើឲ្យរោងចក្រនេះកាត់បន្ថយកម្មករមកសល់ត្រឹមប្រមាណ ៣ ០០០ នាក់វិញ។
អ្នកស្រី គួច ដាវី ប្រធានផ្នែករដ្ឋបាលរោងចក្រ ប្រឹភីសីស ខេមបូឌាហ្គាមិនអិលធីឌី បដិសេធធ្វើអត្ថាធិប្បាយដោយគ្រាន់តែបញ្ជាក់យ៉ាងខ្លីថាក្រុមហ៊ុនកំពុងបន្តដោះស្រាយបញ្ហានេះ។
លោក ហេង សួរ អ្នកនាំពាក្យក្រសួងការងារបណ្តុះបណ្តាលវិជ្ជាជីវៈប្រាប់ភ្នំពេញប៉ុស្តិ៍ថា បើរោងចក្រនេះទូទាត់សំណងជូនកម្មករមិនបានត្រឹមត្រូវតាមច្បាប់ការងារ កម្មករអាចប្តឹងមកក្រសួង ដើម្បីរកដំណោះស្រាយជូនបាន។
លោក អាត់ ធន់ ប្រធានសហភាពការងារកម្ពុជាថ្លែងថា៖ «បើក្នុងករណីបិទហើយការទូទាត់សំណងត្រូវឲ្យបានត្រឹមត្រូវតាមច្បាប់មិនគួរកេងចំណេញលើគាត់ទេ ព្រោះពេលនេះគាត់ជួបបញ្ហាសេដ្ឋកិច្ចហើយ»៕