ភ្នំពេញៈ រោងចក្រ សហគ្រាសចំនួន ៨១ ភាគរយហើយ ដែលកំពុងអនុវត្តការបើកប្រាក់ឈ្នួលឲ្យកម្មករ ២ លើកក្នុង ១ ខែ ទៅតាមការកំណត់របស់រាជរដ្ឋាភិបាលកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលចេញកាលពីថ្ងៃពុធ ទី ១៦ ខែមករាឆ្នាំ ២០១៩។
ក្រសួងការងារបានឲ្យដឹងថា កន្លងទៅរោងចក្រ សហគ្រាស តែងតែបើកប្រាក់ឈ្នួលប្រចាំខែដល់កម្មករនិយោជិតរបស់ខ្លួននៅចន្លោះថ្ងៃទី ១ ដល់ថ្ងៃទី ៧ នៃខែបន្ទាប់ ដោយរោងចក្រ សហគ្រាស ត្រូវគណនា ចំនួនថែមម៉ោង ចំនួនផលិតផល ដែលការសម្រេចបាន និងប្រាក់លើកទឹកចិត្ដផ្សេងទៀត ក្នុងខែនីមួយ ៗ។
ក្រសួងបញ្ជាក់ថា៖ «គិតត្រឹមរសៀលថ្ងៃទី ១៦ ខែមករា ឆ្នាំ ២០១៩ នេះ ក្រសួងការងារ បានពិនិត្យតាមដានអំពីការបើកប្រាក់ឈ្នួលជូនកម្មករនិយោជិត ២ ដងក្នុង ១ ខែនេះឃើញថា រោងចក្រសហគ្រាសចំនួន ៨១ ភាគរយបាននិងកំពុងអនុវត្ដការបើកប្រាក់ឈ្នួលជូនកម្មករនិយោជិតចំនួន ២ ដង ក្នុង ១ ខែ»។
លោក ហេង សួរ អ្ននាំពាក្យក្រសួងការងារថ្លែងកាលពីម្សិលមិញថា លទ្ធផលបឋមជាង ៨០ ភាគរយនេះ គឺអាចទទួលយកបាន»។
លោកថា៖ «រោងចក្រ សហគ្រាសដែលមិនទាន់អនុវត្តប្រសិនជាក្រសួងទទួលបានបណ្តឹងពីបុគ្គលិក នោះក្រសួងនឹងចុះទៅពិន័យ និងដាក់កំហិតឲ្យអនុវត្តតាមស្មារតីប្រកាស ៤៤២ របស់ក្រសួង»។
យោងប្រកាសលេខ ៤៤២ ស្ដីពីការបើកប្រាក់ឈ្នួលជូនកម្មករនិយោជិត របស់ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ២១ ខែកញ្ញា ឆ្នាំ ២០១៨ បានកំណត់ថា រោងចក្រ សហគ្រាស ផ្នែកវាយនភណ្ឌ កាត់ដេរ និងផលិតស្បែកជើង ប្រមាណ ៥០ ភាគរយ អនុវត្ដការបើកប្រាក់ឈ្នួលលើកទី ១ នៅចន្លោះ ថ្ងៃទី ១៦ ដល់ថ្ងៃទី ១៩ នៃខែមករានេះ និងបើកលើកទី ២ នៅចន្លោះ ថ្ងៃទី ១ ដល់ថ្ងៃទី ៧ នៃខែបន្ទាប់។
ប្រកាសដដែលបន្តថា ចំពោះរោងចក្រសហគ្រាស ដែលកំពុងរៀបចំអនុវត្ដក្រសួងនឹងត្រួតពិនិត្យដើម្បីជំរុញឲ្យអនុវត្ដក្នុងករណីមិនអនុវត្ដក្រសួងនឹងផាកពិន័យតាមច្បាប់ស្ដីពីការងារ។
លោក ចាប សោភ័ណ ប្រធានរដ្ឋបាល រោងចក្រ Quality ឲ្យដឹងថា រោងចក្ររបស់លោក បាននិងកំពុងប្រឹងប្រែងអនុវត្ដតាមសេចក្ដីប្រកាសរបស់ក្រសួង និងកំពុងសម្រុករៀបចំបើកប្រាក់ខែកម្មករលើកទី ១ ឲ្យបានត្រឹមថ្ងៃទី ១៩ ខែមករានេះ។ «ប៉ុន្ដែមានបញ្ហាបន្តិចដែរ ព្រោះសេចក្ដីប្រកាសមួយទៀតដែលក្រសួងទើបចេញថ្ងៃ ១៦ នេះ គឺបានសរសេរថា «ប្រាក់ឈ្នួល ៥០ ភាគរយ» ហើយយើងនៅមិនទាន់ច្បាស់ថា ប្រាក់ឈ្នួល ៥០ ភាគរយនេះ ក្រសួងបានសំដៅទៅលើប្រាក់ខែគោល ឬក៏ប្រាក់ឈ្នួល នៃចំនួនថ្ងៃដែលកម្មករបានធ្វើការក្នុងរយៈពេល ២ សប្ដាហ៍ឬយ៉ាងណា»។
អ្នកស្រី ធុល ធី កម្មការិនីរោងចក្រមួយរូប នៅម្ដុំផ្សារត្រពាំងថ្លឹង ក្នុងខណ្ឌពោធិ៍សែនជ័យឲ្យដឹងថា រោងចក្របានជូនដំណឹងថា នឹងបើកប្រាក់ខែលើកទី ១ ដល់កម្មករនៅថ្ងៃទី ១៩ ខែមករានេះ។ «សម្រាប់ខ្ញុំបើកប្រាក់ខែលឿនអ៊ីចឹង ក៏ស្រួលម្យ៉ាងដែរ ព្រោះមិនសូវពិបាករឿងខ្វះលុយកាក់ ដូចកាលមុន ពេលត្រូវការលុយអីត្រូវចាំទាល់តែដល់ចុងខែទើបបានបើក»។
អ្នកស្រី រ័ត្ន នីកា បុគ្គលិក រោងចក្រ Dew Hirft នៅសង្កាត់ ចោមចៅថ្លែងថា៖ «មានអីពេលបើកប្រាក់ខែមួយខែ ២ ដងអ៊ីចឹងម្យ៉ាងដែរ មិនសូវខ្វះលុយចាយ ប៉ុន្ដែមានអ្នកខ្លះគាត់ក៏មិនសូវចង់បើកដែរ ព្រោះឲ្យតែមានលុយដឹងតែចាយអស់ហើយ។ អ៊ីចឹងពួកគាត់ចង់បើកសរុប»។
លោក ណែម សារ៉ន មន្ត្រីសហជីពសេរីកម្មករនៃព្រះរាជាណាចក្រកម្ពុជាប្រចាំខេត្ដកំពង់ឆ្នាំងឲ្យដឹងថា នៅក្នុងខេត្ដកំពង់ឆ្នាំងមាន ៨ រោងចក្រ គឺបានអនុវត្ដបើកប្រាក់ខែ ២ ដងក្នុង ១ ខែ តាមការណែនាំរបស់ក្រសួងរួចហើយ។ លោកបន្ដថា៖ «កម្មករភាគច្រើន គាត់សប្បាយចិត្ដពេលបានបើកប្រាក់ខែ ២ ដងក្នុង ១ ខែបែបនេះ ប៉ុន្ដែក៏មានកម្មករខ្លះ មានបន្ទុកកម្ចីប្រាក់ពីធនាគារ ក៏មិនសូវសប្បាយចិត្ដដែរ ព្រោះខ្លាចចាយលុយអស់ មិនមានលុយបង់ឲ្យធនាគារ»។
លោក ខេន លូ ប្រធានសមាគមរោងចក្រកាត់ដេរកម្ពុជា បានលើកឡើងថា តាមរយៈការចុះសាកសួរ និងការផ្ដល់ព័ត៌មានពីសមាជិករោងចក្រ គឺមានរោងចក្រ សហគ្រាសភាគច្រើន បានអនុវត្ដការបើកប្រាក់ឈ្នួល ២ ដងឲ្យកម្មករនិយោជិតនេះ។
លោកបានបញ្ជាក់ថា៖ «សមាជិករបស់យើង ភាគច្រើនបានអនុវត្ដតាមការណែនាំរបស់ក្រសួងរួចហើយតែសល់តិចតួច យើងកំពុងពន្យល់ដល់រោងចក្រ ឲ្យអនុវត្ដឲ្យបានស្របច្បាប់»៕