ភ្នំពេញៈ តំណាងកម្មករម្នាក់ បាននិយាយថា ម្ចាស់ក្រុមហ៊ុនផលិតតុក្កតា រូបខ្លាឃ្មុំសំឡី First & Main ក្នុងខណ្ឌសែនសុខ កាលពីថ្ងៃម្សិលមិញ បានសន្យាបើកប្រាក់ខែ ខែសីហា ពាក់កណ្តាល ឲ្យកម្មករជាង ៣៥០ នាក់ នៅរោងចក្ររបស់ខ្លួន ដែលបានបិទទ្វារ។
អ្នកស្រី ម៉ិច មុំ កម្មករម្នាក់ ក្នុងចំណោមកម្មករជាច្រើន ដែលបានធ្វើជាសាក្សី ជាមួយនឹងការឆ្លើយឆ្លងជាមួយក្រុមមន្រ្តីក្រសួងសង្គមកិច្ច បាននិយាយថា ខណៈដែលមានពាក្យចចាមអារ៉ាមថា រោងចក្រ បានក្ស័យធន ហើយមួយថ្ងៃបន្ទាប់ពីក្រុមហ៊ុន បានរាយការណ៍ពីការបំផ្លាញដោយចេតនា និងការលួច លោក Brad Holes ប្រធានក្រុមហ៊ុន First & Main ដែលមានមូលដ្ឋាននៅអាមេរិក បាននិយាយតាម Skype ដើម្បីដោះស្រាយបញ្ហានេះ។
អ្នកស្រី បានអះអាងបន្តថា៖ «យើង នឹងទៅរោងចក្រនេះនៅព្រឹកថ្ងៃសុក្រ ដើម្បីបើកប្រាក់ខែសម្រាប់ខែសីហា។ ក្រុមមន្រ្តីក្រសួង បាននិយាយថា យើងនឹងទទួលបានប្រាក់ខែពាក់កណ្តាលទៀត នៅក្នុងរយៈពេលមួយ ឬពីរសប្តាហ៍ទៀត»។
អ្នកស្រី មុំ បានបញ្ជាក់ថា លោក Holes មិនបានសន្យាបើកប្រាក់ឲ្យកម្មករ ក្រោយពីឈប់ពីការងារទេ ព្រោះគាត់ មានបំណងបើករោងចក្រវិញ នៅពេលដែលគាត់ មានលុយ។
អ្នកស្រី បានបញ្ជាក់ថា៖ «ប៉ុន្តែកម្មករផ្សេងទៀត និងខ្ញុំ នឹងទៅធ្វើការនៅរោងចក្រផ្សេងទៀត។ យើងទទួលយកសំណើនោះហើយ។ យើងនឹងទៅយកប្រាក់ខែដែលនៅសេសសល់នៅពេលដែលក្រុមមន្រ្តីរដ្ឋបាល ទាក់ទងយើង»។
កម្មករ ៣៥៧ នាក់ នៅរោងចក្រ First & Main ក្នុងខណ្ឌសែនសុខនេះ ត្រូវបានគេប្រាប់ឲ្យឈប់សម្រាកដោយទទួលបានប្រាក់ខែពីថ្ងៃទី ២៦ សីហាកន្លងមក។ ប៉ុន្តែនៅពេលដែលពួកគេ ត្រឡប់មករោងចក្រវិញ កាលពីថ្ងៃចន្ទ រោងចក្រត្រូវបានបិទទ្វារ ហើយមិនអាចស្វែងរកជួបអ្នកទទួលខុសត្រូវក្នុងរោងចក្រនេះ ដើម្បីពន្យល់ពីមូលហេតុ ដែលរោងចក្រនេះត្រូវបិទទ្វារបានឡើយ។ កម្មករបាននាំគ្នាឆោឡោ ស្វះស្វែងរកការជួយអន្តរាគមន៍ពីសហជីព និងស្ថាប័នពាក់ព័ន្ធ។ កម្មករក៏គ្រោងហែក្បួន ទៅក្រសួងការងារផងដែរ ដើម្បីឲ្យក្រសួងនេះ ជួយអន្តរាគមន៍ ទៅថៅកែរោងចក្រ ឲ្យបើកប្រាក់ខែ និងប្រាក់អតីតភាពការងាររបស់ពួកគេ ទៅតាមច្បាប់ការងារ ប្រសិនបើរោងចក្រនេះត្រូវបិទទ្វារឈប់ដំណើរការ។
យោងតាមលោក Holes កម្មករ បានសម្រុកចូលរោងចក្រ ដោយបង្កឲ្យមានការខូចខាតយ៉ាងច្រើន។ លោកបានបញ្ជាក់ថា ពួកគេ បានវាយបំបែកប្រព័ន្ធសុវត្ថិភាព និងបានរារាំងស្រ្តីតំណាងអ្នកគ្រប់គ្រង មិនឲ្យចាកចេញផងដែរ។
អ្នកស្រី មុំ កាលពីថ្ងៃម្សិលមិញ បានបដិសេធថា កម្មករ មិនបានបំផ្លាញរោងចក្រទេ ហើយបានបញ្ជាក់ថា អ្នកស្រី ជឿថា អាចអ្នកខាងក្រៅ បានលួចសម្ភារទាំងនោះ។
លោក Dave Welsh នាយកប្រចាំប្រទេស នៃមជ្ឈមណ្ឌលអាមេរិកដើម្បីសាមគ្គីភាពការងារអន្តរជាតិ (ACILS) បានថ្លែងថា ការិយាល័យរបស់លោក បាននិងកំពុងជួយកម្មករ ដែលមិនមានសហជីពនៅឯរោងចក្រនេះ។
លោក Welsh បានបញ្ជាក់ថា ACILS បានបញ្ជូនបុគ្គលិក១០ នាក់ទៅធ្វើអធិការកិច្ច ដែលត្រូវបានអះអាងថា រោងចក្រ First & Main ត្រូវបានគេបំផ្លាញ ប៉ុន្តែអ្វីដែលគេបានរកឃើញ មិនស្របជាមួយនឹងអ្វីដែលជាការអះអាងរបស់លោក Holes នោះទេ។
លោក បានអះអាងថា៖ «យើង មិនឃើញមានការខូចខាតទេ»។ ទោះជាយ៉ាងនេះក្តី តាមដែលលោក ដឹង កុំព្យូទ័រ ៣ គ្រឿង និងម៉ាស៊ីនស្គែនមេដៃ ត្រូវបានខូចខាត។ លោក Welsh បានបញ្ជាក់ថា របាយការណ៍ជាច្រើនដែលថា រោងចក្រនេះ នឹងបើកប្រាក់ខែឲ្យកម្មករ ក្នុងដំណាក់កាលពីរលើក មិនបានបំពេញតាមកាតព្វកិច្ចរបស់ពួកគេទេ ប្រសិនបើពួកគេ បញ្ឈប់ប្រតិបត្តិការមែននោះ។ លោក បានមានប្រសាសន៍បន្តថា៖ «តួលេខដែលគេផ្តល់ជូន គឺគ្រាន់តែជាប្រាក់ឈ្នួលប៉ុណ្ណោះ។ អ្នកទាំងអស់ត្រូវបានគេផ្តល់សិទ្ធិឲ្យឈប់ប្រតិបត្តិការបាន ប៉ុន្តែធាតុពិតគឺថា ពួកគេ ត្រូវតែបើកប្រាក់អតីតភាពការងារ និងប្រាក់បំណាច់ឆ្នាំដល់កម្មករ»៕ NR
