The Phnom Penh Post Search

Search form




Logo of Phnom Penh Post newspaper Phnom Penh Post - រោងចក្រ SL បដិសេធ​មិន​ទទួល​យក​តំណាង​សហជីព

រោងចក្រ SL បដិសេធ​មិន​ទទួល​យក​តំណាង​សហជីព

រោងចក្រ SL បដិសេធ​មិន​ទទួល​យក​តំណាង​សហជីព

131126_04a
កម្មកររោងចក្រSLដែលបានរងរបួសក្នុងការបង្ក្រាបរបស់សមត្ថកិច្ចនៅស្ទឹងមានជ័យ ម៉ៃ វីរៈ

ភ្នំពេញៈ ដោយ​មិន​គោរព​បញ្ជា​របស់​រដ្ឋាភិបាល​តំណាង​របស់​រោងចក្រ អេស អិល ហ្គាមិន ប្រូសេសស៊ីង បាន​បដិសេធ​មិន​ទទួល​យក​តំណាង​សហជីព​និង​សកម្មជន​ចំនួន ១៩នាក់ ចូល​ធ្វើ​ការ​វិញ​ទេ​នៅ​ក្នុង​អំឡុង​កិច្ច​ប្រជុំ​មួយ​ជាមួយ​ក្រសួង ការងារ កាល​ពី​ម្សិលមិញ។

ការ​បដិសេធ​មិន​ទទួល​យក​រាល់​សមាជិក​សកម្ម​ទាំង​អស់​របស់​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់​ថា ស៊ីខៅឌូ របស់​រោងចក្រ អេស អិល បាន​ធ្វើ​ឡើង​ក្នុង​រយៈ​ពេល​មិន​ដល់​ពីរ​សប្តាហ៍​បន្ទាប់​ពី​ទីស្តីការ​គណៈ​រដ្ឋ​មន្រ្តី និង​ក្រសួង ការងារ ដោយ​មាន​ចំណារ​ពី​លោក​នាយក​រដ្ឋ​មន្រ្តី ហ៊ុន សែន ផង​នោះ បាន​បញ្ជា​ឲ្យ​រោងចក្រ អេស អិល ទទួល​យក​កម្មករ​ទាំង​នោះ​ចូល​ធ្វើការ​វិញ។

លោក សាត សាមុត រដ្ឋ​លេខាធិការ​នៅ​ក្រសួង ការងារ ដែល​បាន​ចូល​រួម​កិច្ច​ប្រជុំ​រយៈ​ពេល​បួន​ម៉ោង បាន​ថ្លែង​ថា៖ «និយោជក​រោងចក្រ អេស អិល បាន​បដិសេធ​ខ្លាំងៗ​មិន​ទទួល​យក​កម្មករ​ទាំង ១៩នាក់ នោះ​ចូល​ធ្វើការ​វិញ»។ «ខ្ញុំ​បាន​ព្យាយាម​អស់​សមត្ថភាព​ពន្យល់​ពួក​គេ​ថា យើង​នឹង​បញ្ជូន​សំណុំ​រឿង​នេះ​ទៅ​តុលាការ​ដើម្បី​ធ្វើ​ការ​សម្រេច»។

លោក Joseph Kee Leung Lee នាយក​ក្រុមហ៊ុន SL International Holdings បាន​បដិសេធ​មិន​ធ្វើ​អត្ថាធិប្បាយ​បន្ទាប់​ពី​កិច្ច​ប្រជុំ​កាល​ពី​យប់​មិញ ដោយ​ប្រាប់​អ្នក​កាសែត ភ្នំពេញ ប៉ុស្តិ៍ ថា លោក​មិន​បាន​ចូល​រួម​នៅ​ក្នុង​កិច្ច​ប្រជុំ​នេះ​ទេ ហើយ​ក៏​មិន​បាន​និយាយ​ជាមួយ​នរណា​ដែរ​នៅ​ពេល​បច្ចុប្បន្ន​នេះ។ អ្នក​គ្រប់​គ្រង​ទូទៅ​របស់​រោងចក្រ អេស អិល មិន​អាច​ទាក់​ទង​បាន​ទេ កាល​ពី​យប់​មិញ។

ដំណឹង​អំពី​ការ​បដិសេធ​មិន​ទទួល​យក​កម្មករ​ទាំង​នោះ​ចូល​ធ្វើ​ការ​វិញ​របស់​រោងចក្រ អេស អិល គឺ​ដូច​ការ​រំពឹង​ទុក​របស់​អនុ​ប្រធាន ស៊ីខៅឌូ លោក គង់ អាទិត្យ ដែល​លើក​ឡើង​ដូច្នេះ​តាំង​ពី​ពេល​នៃ​ការ​ចេញ​សេចក្តី​បញ្ជា​របស់​រដ្ឋាភិបាល។ លោក​បាន​ថ្លែង​ថា៖ «នោះ​មិន​មែន​ជា​រឿង​ភ្ញាក់​ផ្អើល»។ ស៊ីខៅឌូ នឹង​ជំរុញ​ឲ្យ​រដ្ឋាភិបាល​និង​អ្នក​បញ្ជា​ទិញ​មក​ចរចា​ដោះស្រាយ​បញ្ហា​នេះ»។

លោក អាទិត្យ បាន​ថ្លែង​បន្ត​ថា ប្រសិន​បើ​រោងចក្រ អេស អិល ដែល​ផ្គត់ផ្គង់​ឲ្យ​អ្នក​បញ្ជា​ទិញ​ឈ្មោះ Gap Inc និង H&M មិន​ទទួល​យក​កម្មករ​ទាំង​នោះ ចូល​ធ្វើការ​វិញ កូដកម្ម​នឹង​បន្ត។ ប្រសិន​បើ​ពួក​គេ​សម្រេច​ចិត្ត​បិទ​រោងចក្រ ពួក​គេ​ត្រូវ​តែ​ផ្តល់​សំណង​ដល់​កម្មករ​ទៅ​តាម​ច្បាប់​ស្តីពី​ការងារ។

កាល​ពី​ពេល​កន្លង​ទៅ​នគរបាល​បាន​បាញ់​គ្រាប់​ពិត​ទៅ​លើ​ក្រុម​កម្មករ​តវ៉ា​រាប់​រយ​នាក់ របស់​រោងចក្រ អេស អិល ដោយ​បាន​សម្លាប់​ស្រ្តី​អ្នក​លក់​បាយ​ម្នាក់ និង​មនុស្ស ៩ នាក់​ទៀត​រង​របួស។

មេធាវី​ពី​មជ្ឈ​មណ្ឌល​អប់រំ​ច្បាប់​សម្រាប់​សហគមន៍​ដែល​ផ្តល់​តំណាង​ផ្លូវ​ច្បាប់​មិន​គិត​ថ្លៃ កាល​ពី​ម្សិលមិញ​បាន​ដោះ​សំណើ​សុំ​នៅ​ក្រៅ​ឃុំ​ទៅ​សាលា​ដំបូង​រាជធានី​ភ្នំពេញ។ នេះ​បើ​តាម​លោក មឿន តុលា ដែល​ជា​អ្នក​គ្រប់​គ្រង​កម្មវិធី​ការងារ​របស់​អង្គការ​នេះ។

កុបកម្ម​បាន​កើត​ឡើង​ក្នុង​អំឡុង​ការ​ហែ​ក្បួន​ពី​រោងចក្រ អេស អិល ១ ក្នុង​ខណ្ឌ មាន​ជ័យ ទៅ​ផ្ទះ​លោក​នាយក​រដ្ឋ​មន្រ្តី ហ៊ុន សែន ដើម្បី​រំឭក​ខួប​បី​ខែ​នៃ​ការ​ធ្វើ​កូដកម្ម​របស់​កម្មករ​ដែល​បាន​ចាប់ផ្តើម​កាល​ពី​ថ្ងៃ ទី១២ សីហា។

កាល​ពេល​នោះ កម្មករ​បាន​ទាមទារ​រោងចក្រ​បណ្តេញ លោក មាស សុត្ថា ម្ចាស់​ភាគ​ហ៊ុន​របស់​រោងចក្រ អេស អិល ដែល​បាន​ជួល​កម្លាំង​កង​រាជ​អាវុធហត្ថ​មក​ឈរ​យាម​នៅ​ក្នុង​រោងចក្រ ដែល​សហជីព​បាន​លើក​ឡើង​ថា នេះ​គឺជា​ការ​បំភិត​បំភ័យ​តំណាង​សហជីព។

ខណៈ​មិន​មាន​ការ​ភ្ញាក់​ផ្អើល​ចំពោះ​សេចក្តី​សម្រេច​របស់​រោងចក្រ អេស អិល ដើម្បី​ប្រឈម​មុខ​នឹង​តុលាការ ជាជាង​ការ​ទទួល​យក​កម្មករ​ទាំង​នោះ​ចូល​ធ្វើការ​វិញ​លោក David Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិកាំង ដើម្បី​សាមគ្គីភាព​ការងារ​អន្តរជាតិ បាន​ថ្លែង​ថា ទង្វើ​នេះ​នឹង​ធ្វើ​ឲ្យ​ប៉ះ​ពាល់​ដល់​ទស្សន​វិស័យ​ពាណិជ្ជកម្ម។

លោក​ថ្លែង​ថា៖ «វា​ពិបាក​មើល​ឲ្យ​ឃើញ​ច្បាស់​ថា​តើ​បញ្ហា​នឹង​ចប់​ឬ​អត់ ប្រសិន​បើ​រោងចក្រ អេស អិល មិន​ព្រម​កែប្រែ​ជំហរ​របស់​ខ្លួន។ វា​ពិបាក​ព្យាករ​ថា ម៉ាក​ក្រុមហ៊ុន​បញ្ជា​ទិញ នឹង​វិនិយោគ​បន្ត​ទៀត​នៅ​ក្នុង​ក្រុមហ៊ុន​មួយ​ដែល​មាន​បញ្ហា​ច្រើន​ខ្លាំង​បែប​នេះ»៕ PS

អត្ថបទគួរចាប់អារម្មណ៍