The Phnom Penh Post Search

Search form




Logo of Phnom Penh Post newspaper Phnom Penh Post - រោងចក្រ SL រិះគន់​សហជីព ស៊ីខៅឌូ

រោងចក្រ SL រិះគន់​សហជីព ស៊ីខៅឌូ

រោងចក្រ SL រិះគន់​សហជីព ស៊ីខៅឌូ

130917_08
កម្មកររោងចក្រ SL រាប់ពាន់នាក់ធ្វើការតវ៉ានៅខាងមុខក្រសួងសង្គមកិច្ច កាលពីចុងខែមុន ផា លីណា

ភ្នំពេញៈ មន្ត្រី​រោងចក្រ SL garment processing (Cambodia) Co Ltd បាន​អះអាង​ថា សហជីព​ដែល​ដឹក​នាំ​ដោយ​ក្រុម​សម្ព័ន្ធ​សហជីព​ប្រជាធិបតេយ្យ​កម្មករ កាត់​ដេរ​កម្ពុជា (ស៊ីខៅឌូ) មិន​ស្រប​ច្បាប់​ទេ ហើយ​ថា សហជីព​នេះ បាន​ធ្វើ​ឲ្យ​ក្រុមហ៊ុន​បាត់បង់​ប្រាក់​ចំណេញ​ជាច្រើន។

លោក មាស សុថា ម្ចាស់​ភាគ​ហ៊ុន​នៅ​រោងចក្រ SL បាន​ថ្លែង​ក្នុង​សន្និសីទ​កាសែត​កាល​ពី​ថ្ងៃ​សៅរ៍​ថា ក្រុមហ៊ុន​របស់​លោក បាន​ខាត​បង់​ប្រមាណ​ពី ១៣ ម៉ឺន ទៅ ១៥ ម៉ឺន​ដុល្លារ​ក្នុង​មួយ​ថ្ងៃ​។ លោក​បាន​ថ្លែង​ថា៖ «ចំពោះ​ការ​តវ៉ា​ដែល​កម្មករ និង​សហជីព បាន​ធ្វើ​ជាង​មួយ​ខែ​នេះ យើង​បាន​ខាត​បង់​ប្រាក់​ជាង ១ លាន​ដុល្លារ​។ សហជីព ស៊ីខៅឌូ មិន​បាន​ដឹក​នាំ​កម្មករ​ឲ្យ​តវ៉ា ឬ​ក៏​ធ្វើ​បាតុកម្ម​ទេ ក៏​ប៉ុន្តែ​ពួក​គេ​បាន​ធ្វើ​វិច្ឆេទកម្ម ដែល​បង្ក​ឲ្យ​មាន​ការ​បំផ្លាញ​ទ្រព្យ​សម្បត្តិ​ក្រុមហ៊ុន​យ៉ាង​ច្រើន ដែល​នេះ​ជា​អំពើ​ខុស​ច្បាប់​»។ លោក មាស សុថា បាន​អំពាវនាវ​ឲ្យ​កម្មករ ធ្វើ​ការ​ពិចារណា​ឲ្យ​បាន​ដិត​ដល់ និង​កុំ​ជឿ​ពាក្យ​ញុះ​ញង់​របស់​សហជីព ព្រោះ​ពួក​គេ​ជា​អ្នក​ដែល​បំផ្លាញ​អត្ថ​ប្រយោជន៍​កម្មករ។

កម្មករ រាប់​ពាន់​នាក់ បាន​ធ្វើ​ការ​តវ៉ា​ទាមទារ ១១ ចំណុច ពី​រោងចក្រ​កាត់​ដេរ SL ហើយ​រោងចក្រ​នេះ បាន​យល់​ព្រម​ផ្តល់​ឲ្យ​តែ ៧ ចំណុច​ប៉ុណ្ណោះ នៅ​សល់ ៤ ចំណុច​ទៀត ដូចជា ការ​ស្នើ​បណ្ដេញ​លោក មាស សុថា ចេញ​ពី​រោងចក្រ ការ​ផ្ដល់​ប្រាក់​ចំនួន ៣ ដុល្លារ សម្រាប់​អាហារ​ក្នុង​មួយ​ថ្ងៃ ការ​មិន​កាត់​ប្រាក់​ខែ​កម្មករ​ក្នុង​ពេល​តវ៉ា និង​ការ​តម្រូវ​ឲ្យ​ក្រុមហ៊ុន ទម្លាក់​ចោល​បណ្តឹង​នៅ​តុលាការ​ក្រុង។

លោក ឡុង ហ៊ាង តំណាង​មក​ពី​សមាគម​រោងចក្រ​កាត់​ដេរ​នៅ​កម្ពុជា (GMAC) បាន​លើក​ឡើង​នៅ​ពេល​នោះ​ថា ចំពោះ​ចំណុច​ទាំង​បួន ដែល​កម្មករ​ទាមទារ​នោះ គឺ​មិន​ស្រប​ច្បាប់ ដែល​ក្រុមហ៊ុន​មិន​អាច​ទទួល​យក​បាន​ឡើយ។ លោក​បាន​ថ្លែង​ថា៖ «តាម​ច្បាប់ ទោះ​បី​ជា​កម្មករ​តវ៉ា​ស្រប​ច្បាប់ ឬ​ក៏​ខុស​ច្បាប់ ក្រុមហ៊ុន​មាន​សិទ្ធិ​កាត់​ប្រាក់​ឈ្នួល​របស់​ពួកគេ»។

លោក អ៊ុំ វិសាល មន្ត្រី​ផ្នែក​ច្បាប់​នៅ​សហជីព ស៊ីខៅឌូ បាន​បដិសេធ​ចំពោះ​អ្វី​ដែល​លោក មាស សុថា បាន​ចោទ​ប្រកាន់​នេះ។ លោក អ៊ុំ វិសាល បាន​បន្ថែម​ថា៖ «វា​ជា​សិទ្ធិ​របស់​ក្រុមហ៊ុន ក្នុង​ការ​ចោទ​ប្រកាន់​ពួក​យើង ប៉ុន្តែ​ខ្ញុំ​ចង់​សួរ​ពួក​គេ​ទៅ​វិញ​ថា តើ​អ្វី​ដែល​បណ្ដាល​ឲ្យ​កម្មករ​តវ៉ា​ដូច្នេះ​? ពួកគេ​ត្រូវ​តែ​ក្រឡេក​មើល​ក្រោយ​វិញ​រក​ដើម​ចម ដែល​នាំ​ឲ្យ​កម្មករ​ដើរ​ចេញ​ពី​កន្លែង​ធ្វើការ និង​តវ៉ា​ឡើង​ដូច​នេះ»។ លោក​បញ្ជាក់​ថា សហជីព ស៊ីខៅឌូ មិន​បាន​បង្ក​ឲ្យ​កម្មករ​ទាំង​នោះ តវ៉ា​ប្រឆាំង​នឹង​ក្រុមហ៊ុន​នេះ​ទេ ហើយ​បើ​សិន​សហជីព ស៊ីខៅឌូ មិន​ធ្វើ​អន្តរាគមន៍​ឲ្យ​ពួក​គេ​ទេ នោះ​ក៏​នៅ​តែ​មាន​សហជីព​ផ្សេង​ទៀត​ចេញ​មុខ​មក​ជួយ​មិន​ខាន​ដែរ៕ PN

អត្ថបទគួរចាប់អារម្មណ៍