ភ្នំពេញៈ ម្ចាស់ក្រុមហ៊ុន W&D ថា ខ្លួនខាតបង់ប្រាក់ជាង ១ លានដុល្លារ និងបាត់បង់អ្នកបញ្ជាទិញធំៗដល់ទៅ ៣ ក្នុងចំណោមអ្នកបញ្ជាទិញក្រៅប្រទេសចំនួន ១០ ចាប់តាំងពីកម្មករ កម្មការិនីជាង ១ ០០០ នាក់ បានបន្តធ្វើបាតុកម្មតវ៉ា ក្នុងរយៈពេលជាង ២ ខែកន្លងមកនេះ។ លោក Jimmy នាយកគ្រប់គ្រងទូទៅនៃក្រុមហ៊ុន W&D ថ្លែងក្នុងសន្និសីទកាសែត កាលពីម្សិលមិញថា ក្នុងរយៈពេលជាង ២ ខែ គឺនៅខែមករា និងខែកុម្ភៈ ក្រុមហ៊ុនខ្លួន បានខាតបង់ប្រាក់ជាង ១ លានដុល្លារព្រោះតែការយឺតយ៉ាវ ក្នុងការដឹកជញ្ជូន និងមិនអាចប្រគល់ទំនិញឲ្យអ្នកបញ្ជាទិញទាន់ពេលវេលាដោយសារតែមានការតវ៉ារបស់កម្មករ។
លោកបញ្ជាក់ថា៖ «ការខាតបង់ដោយផ្ទាល់ គឺអស់ ៨៥ ម៉ឺនដុល្លារ រួចមកហើយ ក្នុងរយៈពេល ២ ខែនេះ ហើយក្នុងហ្នឹងមានការខាតបង់មិនផ្ទាល់ផ្សេងទៀត មានដូចជាការយឺតយ៉ាវក្នុងការបញ្ចូនទំនិញឲ្យអ្នកបញ្ជាទិញ ដែលការដឹកតាមជើងយន្តហោះហើយនៅពេលយើងទៅដល់យឺត អ្នកបញ្ជាទិញ គាត់ធ្វើការពិន័យបន្ថែមទៀត ដោយយើងមិនទាន់ដឹងច្បាស់ប៉ុន្មាននោះទេ។ ប៉ុន្តែការគណនាត្រួសៗទៅ សរុបប្រហែលជា ១ លាន ២ សែនដុល្លារ»។
លោក កាំង ម៉ូនីកា អគ្គលេខាធិការរង GMAC បានបញ្ជាក់ក្នុងសន្និសីទកាសែតនោះដែរថា ជាការពិតការបញ្ឈប់កម្មករនិយោជិត ដែលមិនចូលធ្វើការ គឺធ្វើតាមនីតិវិធីត្រឹមត្រូវ ហើយក្រុមហ៊ុន គ្មានលក្ខខណ្ឌណា ត្រូវទូទាត់ប្រាក់អត្ថប្រយោជន៍ដល់កម្មករ ដែលបានប្រព្រឹត្តកំហុសធ្ងន់ធ្ងរ ក្រោយរោងចក្របញ្ឈប់នោះទេ។ យ៉ាងណាក្តីលោក ម៉ូនីកា បានអះអាងថា រោងចក្រ នៅតែប្រកាន់ជំហរ ក្នុងការទទួលយកកម្មករឲ្យចូលធ្វើការវិញ បើពួកគេ ដាក់ពាក្យស្នើមកជាថ្មី។
លោកថា៖ «លើកលែងតែកម្មករមួយចំនួនតូច បានប្រព្រឹត្តនូវសកម្មភាពរំលោភទៅលើសណ្តាប់ធ្នាប់សាធារណៈ ការបិទផ្លូវរោងចក្រ រារាំងការធ្វើការងាររបស់កម្មករដទៃទៀត។ អ៊ឹចឹង សម្រាប់អ្នកក្រៅពីហ្នឹង គឺអាចធ្វើការបានវិញ ដោយពិនិត្យមើលតាមនីតិវិធី»។
កម្មករ កម្មការិនីរោងចក្រ W&D ស្ថិតក្នុងខណ្ឌមានជ័យ បានប្រមូលផ្តុំគ្នាតវ៉ា តាំងពីថ្ងៃទី ២៤ ខែ ធ្នូ ឆ្នាំមុន ដើម្បីទាមទារឲ្យថៅកែរោងចក្រ ទូទាត់ប្រាក់បំណាច់អតីតភាពការងារ របស់ខ្លួន មុនអនុវត្តច្បាប់ថ្មី ដែលនឹងបើកប្រាក់បំណាច់អតីតភាពការងារនេះ ជារៀងរាល់ ៦ ខែម្តង។ ក្រោយការតវ៉ាក្រុមហ៊ុនក៏បានប្រកាសបញ្ឈប់កម្មករប្រមាណ ១ ១០៤ នាក់ ដោយសំអាងថា កម្មករទាំងនោះ មិនបានគោរពទៅតាមដីការក្សាការពារ របស់តុលាការ ដែលតម្រូវឲ្យកម្មករទាំងអស់ ចូលធ្វើការវិញ ក្នុងរយៈពេល ៤៨ ម៉ោង។
យ៉ាងណាក្តី វិវាទនេះ នៅតែបន្ត ដោយកម្មករទាំងនោះ នៅតែបន្តការតវ៉ារហូតដល់បច្ចុប្បន្ន ដោយក្រុមកម្មករ បានប្រកាសជំហរថា ពួកគេនៅតែបន្តតវ៉ា និងចង់ឲ្យក្រុមហ៊ុន ទទួលយកកម្មករទាំងអស់ចូលធ្វើការវិញដោយមិនត្រូវរើសអើងឡើយ។
លោក ប៊ុន សំណាល់ កម្មករដែលត្រូវបានរោងចក្របញ្ឈប់ និងកំពុងបន្តការតវ៉ា បានប្រាប់ភ្នំពេញប៉ុស្តិ៍ថា វាជារឿងមិនសមហេតុសមផលនោះទេ ដែលកម្មករ មិនទទួលបានដំណោះស្រាយរបស់ខ្លួនហើយ ត្រូវបានរោងចក្របញ្ឈប់ ដោយបាត់បង់ប្រាក់អត្ថប្រយោជន៍ផ្សេងៗរបស់ខ្លួនទៀត។
លោកបញ្ជាក់ថា៖ «ក្នុងអំឡុងដែលពួកខ្ញុំធ្វើកូដកម្មហ្នឹងមិនទាន់បានដោះស្រាយនោះទេ ហេតុអ្វីបានចេញដីកា ៤៨ ម៉ោងហើយចេញមក យកមកបញ្ឈប់ពួកខ្ញុំ។ តើពួកខ្ញុំទទួលបានផលអ្វីមួយចំណុចនៅ? ហើយបើក្រុមហ៊ុន ត្រឹមត្រូវអ្នកឯងម៉េចមិននិយាយជាមួយពួកខ្ញុំឲ្យច្បាស់មកហើយនៅពេលបញ្ឈប់ពួកខ្ញុំ បិទប្រកាសឲ្យពួកខ្ញុំចូលធ្វើការ តែមិនយកពួកខ្ញុំទាំងអស់វិញទេ គឺរើសអើងស្ត្រីចាស់ៗ ស្ត្រីពោះធំ និងប្រុសៗអី មិនយកទេ»។
លោក ហេង សួរ អ្នកនាំពាក្យក្រសួងការងារ បណ្តុះបណ្តាលវិជ្ជាជីវៈ ថ្លែងកាលពីម្សិលមិញថា កម្មករនិយោជិត ត្រូវបានបញ្ឈប់ដោយសារយោងតាមនីតិវិធីដោះស្រាយវិវាទការងាររួម។ លោកបន្តថា យោងតាមច្បាប់ក្រោយមានសេចក្តីបង្គាប់របស់ក្រុមប្រឹក្សាអាជ្ញាកណ្តាល និងដីការក្សាការពាររបស់តុលាការ និយោជកអាចបញ្ឈប់ការងារកម្មករនិយោជិត ដែលធ្វើកូដកម្មខុសនីតិវិធី ហើយមិនចូលធ្វើការវិញ តាមសេចក្តីបង្គាប់ និងរក្សាការពារបាន ដោយមិនទូទាត់សំណងអ្វីទាំងអស់។
លោកថា៖ «កន្លងមកក្រសួងបានសម្របសម្រួលជាមួយនិយោជកឲ្យទទួលយកកម្មករនិយោជិតវិញបានជិត ១ ពាន់នាក់ ប៉ុន្តែនិយោជក មិនព្រមទទួលយកអ្នកដែលជាមេខ្យល់ដឹកនាំធ្វើកូដកម្មខុសច្បាប់ ជាអ្នកជេរប្រមាថ និងរារាំងបងប្អូនកម្មករ និយោជិត ដែលមិនមែនជាកូដករ អាចចូលធ្វើការជាធម្មតាកើត»។
ទោះយ៉ាងណាលោក ហេង សួរ បញ្ជាក់ថា ក្រសួង នឹងបន្តសម្របសម្រួលបន្ថែមទៀត ដោយប្រកាន់លើគោលការណ៍ច្បាប់ជាធំ បើទោះបីជាតាមច្បាប់និយោជកមានសិទ្ធិនឹងធ្វើដូច្នោះក៏ដោយ។
ប៉ុន្តែ លោក អាត់ ធន់ ប្រធាន CCAWDU យល់ថា ការអះអាងរបស់ ថៅកែរោងចក្រ និងខាង GMAC គឺគ្រាន់តែជាវិធីសាស្ត្រមួយ គេចវេះពីការទទួលខុសត្រូវរបស់ខ្លួនប៉ុណ្ណោះ ព្រោះថា កន្លងទៅ កម្មករបានព្យាយាមសុំចូលធ្វើការវិញ តែភាគីរោងចក្រមិនទទួល ហើយបានបញ្ឈប់កម្មករដោយសំអាងលើដីការបស់តុលាការដែលបានចេញបន្ទាប់ពីក្រុមហ៊ុនបានប្តឹង។
លោកបន្តថា ទាំងនេះ គឺជារឿងមិនសមហេតុសមផលនោះទេ ហើយភាពអយុត្តិធម៌ ដែលកម្មករកំពុងជួបប្រទះនៅពេលនេះគឺ បង្ហាញឲ្យឃើញថា រដ្ឋាភិបាលនិងតុលាការបានចូលរួមធ្វើបាបកម្មកររបស់ខ្លួន។
លោកបញ្ជាក់ថា៖ «ដំបូងតូចទេ តែបន្ទាប់មក ព្រោះតែបណ្តោយឲ្យក្រុមហ៊ុនធ្វើបាបកម្មករ ដូច្នេះចុងបញ្ចប់ ពលរដ្ឋ (កម្មករ) គាត់គ្មានជម្រើស គាត់បន្តការតវ៉ា ដែលនាំឲ្យរដ្ឋាភិបាលបាក់មុខបាក់មាត់។ ដូច្នេះរដ្ឋាភិបាល គួរតែជំរុញឲ្យក្រុមហ៊ុនទទួលយកកម្មករទាំងអស់ ចូលធ្វើការវិញទៅ ព្រោះកម្មករទាមទារប្រាក់អត្ថប្រយោជន៍របស់គាត់ទេ»៕