.jpg)
មន្ត្រីអាវុធហត្ថឈរក្នុងទីតាំងអារឈើមួយដែលបានបង្ក្រាបថ្ងៃទី ២៩ វិច្ឆិកា នៅកំពង់ស្ពឺ។ រូប សហការី
កំពង់ស្ពឺៈ អាជ្ញាធរខេត្តកំពង់ស្ពឺបានបិទរោងម៉ាស៊ីនអារឈើចំនួន ១០ កន្លែង ស្ថិតនៅភូមិព្រៃខ្លា ភូមិត្រាំកង់ក្នុងឃុំពោធិ៍អង្ក្រង និងភូមិខ្លីថ្មី ភូមិត្រពាំងព្រៃ ក្នុងឃុំពោធិ៍ចំរើន ស្រុកបសេដ្ឋ ដោយតម្រូវឲ្យម្ចាស់រោងម៉ាស៊ីនទាំងអស់ធ្វើកិច្ចសន្យាបញ្ឈប់សកម្មភាពបណ្ដោះអាសន្ន ប៉ុន្តែអាជ្ញាធរមិនបានឃាត់ខ្លួនម្ចាស់អាជីវកម្មទេដែលវិធានការបែបនេះសង្គមស៊ីវិលថា បទល្មើសព្រៃឈើនឹងមិនមានការថយចុះនោះទេ។
លោក វ៉ី សំណាង អភិបាលខេត្តកំពង់ស្ពឺបានថ្លែងថា រោងម៉ាស៊ីនអារឈើទាំងនេះមិនមែនបង្កើតឡើងសម្រាប់អារឈើព្រៃនៅក្នុងតំបន់នោះផ្ទាល់ទេ គឺពួកគេបានទិញដើមស្វាយ ដើមអាកាស្យា ដើមប្រេងខ្យល់ និងដើមឈើក្នុងស្រុកមួយចំនួនទៀតមកកែច្នៃ។ រោងម៉ាស៊ីននេះមិនមែនជាលក្ខណៈខ្នាតធំទេ ដោយគ្រាន់តែអារឈើតូចតាចជាលក្ខណៈគ្រួសារ ប៉ុន្ដែអាជ្ញាធរនៅតែតម្រូវឲ្យម្ចាស់ទីតាំងទាំងនោះសុំច្បាប់ជាមុនសិន។
លោកអភិបាលខេត្តបានបន្តថា ចំណាត់ការនាពេលនេះសមត្ថកិច្ចបានតម្រូវឲ្យម្ចាស់រោងអារឈើទាំងនោះធ្វើកិច្ចសន្យាផ្អាកសកម្មភាពកែច្នៃឈើជាបណ្ដោះអាសន្ន ហើយតម្រូវឲ្យពួកគេប្រញាប់មកសុំច្បាប់ ឬអាជ្ញាប័ណ្ណឲ្យបានត្រឹមត្រូវ ព្រោះបើយោងតាមច្បាប់ ប្រសិនបើពួកគេមានម៉ាស៊ីនគឺច្បាប់តម្រូវឲ្យម្ចាស់ម៉ាស៊ីនសុំច្បាប់។
លោក វ៉ី សំណាង បានបញ្ជាក់ថា៖ «យើងបានធ្វើការអប់រំ ផ្សព្វផ្សាយពីបញ្ហានេះហើយ ដោយពួកគាត់បានឯកភាពធ្វើកិច្ចសន្យាបញ្ឈប់សកម្មភាពអារឈើបណ្ដោះអាសន្នសិន ហើយងាកមកសុំច្បាប់ពីអាជ្ញាធរជំនាញ។ ប៉ុន្ដែភ្លាមៗនោះយើងមិនបានឃាត់ខ្លួនម្ចាស់រោងម៉ាស៊ីនអាជីវកម្មអារឈើទាំង ១០ កន្លែងនោះទេ»។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានថ្លែងកាលពីថ្ងៃទី ១ ខែធ្នូថាលោកបានទទួលព័ត៌មាននេះហើយ ប៉ុន្ដែថាលោកមិនទាន់បានទទួលរបាយការណ៍លម្អិតនៅឡើយទេ ដោយកម្លាំងកងរាជអាវុធហត្ថខេត្តកំពង់ស្ពឺកំពុងធ្វើការងារនេះបន្តទៀត។
លោកបញ្ជាក់ថា៖ «ព័ត៌មានហ្នឹង គឺអ៊ីចឹងហើយ ប៉ុន្ដែមន្ត្រីយើងកំពុងឆែកឆេរ ឬធ្វើការងារថែមទៀត ហើយពួកគាត់មិនទាន់មានអ្វីរាយការណ៍មកថ្នាក់លើទេ។ ខ្ញុំអត់ទាន់បានដឹងថា ចំនួនប៉ុន្មានកន្លែងទេ ព្រោះការងារពាក់ព័ន្ធការងារស៊ើបអង្កេត។ ជាការងារគេកំពុងធ្វើការនៅពេលបានលទ្ធផលបែបណា ទើបពួកគាត់រាយការណ៍មកខ្ញុំបន្តបន្ទាប់ទៀត»។
លោក ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺកាលពីថ្ងៃទី ១ ខែធ្នូ បានថ្លែងយ៉ាងខ្លីថា លោកមិនមានមតិយោបល់អ្វីទេ ដោយលោកនិយាយថា៖ «ខ្ញុំធ្វើការតាមការចង្អុលបង្ហាញពីថ្នាក់លើទេ ខ្ញុំអត់ដឹងទេ»។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) ថ្លែងថា ប្រសិនបើសមត្ថកិច្ចចុះបង្ក្រាបករណីបទល្មើសព្រៃឈើដោយគ្រាន់តែធ្វើកិច្ចសន្យា ឬអប់រំណែនាំនោះ ជនដែលប្រព្រឹត្តបទល្មើសនឹងមិនខ្លាចញញើតច្បាប់ឡើយ។ ពួកគេនៅតែបន្តធ្វើសកម្មភាពកាប់បំផ្លាញព្រៃឈើដដែល។
លោកបន្តថា បើសមត្ថកិច្ចអនុវត្តច្បាប់ស្ដីពីព្រៃឈើ ឬច្បាប់ស្ដីពីតំបន់ការពារអភិរក្សនោះ ទើបអាចបង្ក្រាបបទល្មើសទាំងនោះបានថមថយខ្លះ។ ប៉ុន្ដែបើអនុវត្តច្បាប់គ្មានប្រសិទ្ធភាពដូចសព្វថ្ងៃនេះ គឺបទល្មើសនឹងមិនមានការថយចុះទេ ហើយវាថែមទាំងកើនឡើងទ្វេដងទៀត។
លោកបញ្ជាក់ថា៖ «យើងមានច្បាប់រួចហើយ បើយើងជាសមត្ថកិច្ចអនុវត្តច្បាប់ឲ្យតឹងរ៉ឹងទៅ ជនដែលល្មើសច្បាប់នឹងឈប់បង្កបញ្ហាអ្វីដល់ពេលនេះ។ ប៉ុន្ដែកន្លងមក ខាងមន្ត្រីយើងមួយចំនួនធ្លាប់ជាប់ពាក់ព័ន្ធបទល្មើសនេះដែរ។ អ៊ីចឹង គាត់មិនហ៊ានចុះទៅបង្ក្រាបទេ បើគាត់អនុវត្តច្បាប់ គាត់ខ្លាចជនល្មើសឆ្លើយដាក់មកលើគាត់វិញ»៕
