The Phnom Penh Post Search

Search form




Logo of Phnom Penh Post newspaper Phnom Penh Post - រោង​ចក្រ​តូច​ចង្អៀត​ធ្វើ​ឲ្យ​កម្មករ​សន្លប់​ជា​បន្ត​បន្ទាប់

រោង​ចក្រ​តូច​ចង្អៀត​ធ្វើ​ឲ្យ​កម្មករ​សន្លប់​ជា​បន្ត​បន្ទាប់

រោង​ចក្រ​តូច​ចង្អៀត​ធ្វើ​ឲ្យ​កម្មករ​សន្លប់​ជា​បន្ត​បន្ទាប់

ភ្នំពេញៈ កម្មករ​ជា​ច្រើន​នាក់ បាន​ព្យាយាម​រត់​ចេញ​ពី​រោងចក្រ Due Cotton (Cambodia) ក្នុង​ខណ្ឌ​មានជ័យ ធ្វើ​ឲ្យ​មាន​ការ​កកស្ទះ​នៅ​ច្រក​ចេញ​ពី​រោង​ចក្រ ខណៈ​ដែល​កម្មករ​ជាង​ ១០ នាក់​បាន​ដួល​សន្លប់​ជា​បន្ត​បន្ទាប់​ កាល​ពី​ថ្ងៃ​សៅរ៍។ អាជ្ញាធរ​មូលដ្ឋាន​និយាយ​ថា ការ​សន្លប់​នេះ បណ្តាល​ពី​បរិយាកាស ក្នុង​រោងចក្រ​និង​សុខភាព​កម្មករ​ខ្សោយ។

លោក ជួប ស៊ីថា ចៅ​សង្កាត់​ព្រែក​ប្រា ខណ្ឌ​មានជ័យ បាន​និយាយ​កាល​ពី​ថ្ងៃ​ម្សិលមិញ​ថា កម្មករ​១២ ​នាក់ បាន​សន្លប់ ហើយ​ពួក​គេ ត្រូវ​បាន​គេ​បញ្ជូន​ទៅ​ព្យាបាល​ នៅ​គ្លីនីក​ឯកជន។ លោក​បញ្ជាក់​ថា​៖ «ដំបូង​មាន​កម្មករ​ម្នាក់ រាក និង​កម្មករ​ផ្សេង​ទៀត ​មក​ចោមរោម​មើល​បង្ក​ឲ្យ​មាន​បរិយាកាស​អាប់អួ ហើយ​បន្ទាប់​មក កម្មករ​ច្រើន​នាក់​ទៀត បាន​ចាប់​ផ្តើម​សន្លប់ ចំណែក​អ្នក​ផ្សេង​ទៀត បាន​ព្យាយាម​រត់​ចេញ​ពី​រោងចក្រ ធ្វើ​ឲ្យ​មាន​ការ​កកស្ទះ នៅ​ច្រក​ចេញ​នៃ​រោងចក្រ ទើប​នាំ​ឲ្យ​អ្នក​សន្លប់​កើន​ឡើង»។ កម្មករ​ជាង​១០០​នាក់ ត្រូវ​បាន​គេ​អនុញ្ញាត​ឲ្យ​សម្រាក បន្ទាប់​ពី​ដួល​សន្លប់ ​ហើយ​ពួក​គេ​នឹង​ត្រឡប់​មក​ធ្វើ​ការ​វិញ​នៅ​ថ្ងៃ​ចន្ទ​នេះ។

បើ តាម លោក ជួប ស៊ីថា នេះ​ជា​ការ​ដួល​សន្លប់​លើក​ដំបូង​ហើយ ​នៅ​រោងចក្រ Due Cotton (Cambodia)។ លោក ​បញ្ជាក់​ថា​៖«ខ្ញុំ​បាន​ចុះ​ទៅ​រោងចក្រ​ជួយ​កម្មករ​ទាំង​នេះ ​ហើយ​បាន​ពិនិត្យ​មើល​ស្ថានភាព​រោង​ចក្រ​ផង​ដែរ​។ កន្លែង​ធ្វើ​ការ​ គឺ​តូច​ចង្អៀត​សម្រាប់​កម្មករ​១០០​ នាក់​ធ្វើ​ការ​ មិន​មាន​ខ្យល់​អាកាស​គ្រប់គ្រាន់ នៅ​ក្នុង​រោង​ចក្រ ​និង​រួម​ទាំង​សុខភាព​របស់​កម្មករ ទន់​ខ្សោយ ព្រោះ​ពួក​គេ ហូប​មិន​បាន​គ្រប់គ្រាន់»។ លោក​បន្ថែម​ថា នៅ​ថ្ងៃ​ចន្ទ​នេះ​ ​ក្រុម​មន្រ្តី​ជំនាញ​ផ្នែក​បរិស្ថាន នឹង​ទៅ​ពិនិត្យ​មើល​រោងចក្រ​នេះ​ម្តង​ទៀត​។ លោក ​សង្កត់​ធ្ងន់​​ថា​៖ «​យើង​បាន​ស្នើ​ឲ្យ​មន្រ្តី​រោងចក្រ បោស​សម្អាត និង​រៀប​ចំ​កន្លែង​ធ្វើ​ការ ដើម្បី​ឲ្យ​មាន​ខ្យល់​អាកាស​គ្រប់គ្រាន់»។

កាសែត​ភ្នំពេញ​ប៉ុស្តិ៍​ បាន​ទាក់ទង​រោងចក្រ Due Cotton (Cambodia) ទៅ​តាម​លេខ​ទូរស័ព្ទ ដែល​ត្រូវ​បាន​បង្ហោះ​នៅ​ក្នុង​គេហទំព័រ របស់​សមាគម​រោងចក្រ​កាត់​ដេរ​កម្ពុជា​ កាល​ពី​ម្សិលមិញ ប៉ុន្តែ​មាន​ស្រ្តី​ម្នាក់ ដែល​បាន​លើក​ទូរស័ព្ទ ហើយ​និយាយ​ថា ច្រឡំ​លេខ៕ NR

អត្ថបទគួរចាប់អារម្មណ៍