ភ្នំពេញៈ គណៈកម្មាធិការដោះស្រាយបញ្ហាកូដកម្មបាតុកម្ម របស់ក្រសួងសង្គមកិច្ច បានជូនដំណឹងពីការដាក់លក់ឡាយឡុង សម្ភាររបស់ក្រុមហ៊ុន First & Main(Cambodia)នៅក្នុងខណ្ឌសែនសុខ រាជធានីភ្នំពេញ បន្ទាប់ពីថៅកែប្រកាសបិទក្រុមហ៊ុននេះចាប់ពីថ្ងៃទី២៤ កញ្ញា។
សេចក្តីជូនដំណឹងនេះ ត្រូវបានគេបិទនៅលើជញ្ជាំងរបស់ក្រុមហ៊ុន ដើម្បីជូនដំណឹងដល់កម្មករ កម្មការិនី អំពីការបិទទ្វាររបស់ក្រុមហ៊ុន ហើយថៅកែរោងចក្រលោក ប្រេដ ហូល បានផ្តល់សិទ្ធិទៅឲ្យប្រធានគណនេយ្យចាត់ចែងលក់ឡាយ ឡុងទ្រព្យសម្បត្តិរបស់ក្រុមហ៊ុន យកប្រាក់សម្រាប់បើកថ្លៃឈ្នួលឲ្យកម្មករនិយោជិតដែលក្រុមហ៊ុននៅ ជំពាក់។
សេចក្តីជូនដំណឹងនេះ បញ្ជាក់ថា៖ «សូមបងប្អូនកម្មករមេត្តាយោគយល់ ហើយរង់ចាំការដោះស្រាយរបស់គណៈកម្មាធិការក្នុងការបើកប្រាក់ឈ្នួលជូនបងប្អូនកម្មករ នៅពេលដែលលក់ទ្រព្យសម្បត្តិរបស់ក្រុមហ៊ុនរួចរាល់»។
សេចក្តី ជូនដំណឹងដដែល បានបន្តថា គណៈកម្មាធិការនឹងជូនដំណឹងដល់បងប្អូនកម្មករនៅពេលក្រោយ អំពីកាលបរិច្ឆេទនៃការបើកប្រាក់ឈ្នួល។
អ្នកនាង ម៊ិច មុំ តំណាងកម្មករ ម្សិលមិញនិយាយថា កម្មករបានមកប្រមូលផ្តុំគ្នានៅមុខក្រុមហ៊ុនកាលពីថ្ងៃចន្ទ ចាំបើកប្រាក់ឈ្នួល៥០ភាគរយ ដែលក្រុមហ៊ុនបានសន្យាបើកឲ្យ ប៉ុន្តែ ត្រូវខកខានវិញដោយមិនដឹងមូលហេតុ។
ម៉ិច មុំ បន្តថា ៖ «មានកម្មករប្រមាណ១០០នាក់ នៅមិនទាន់បានប្រាក់ឈ្នួលចុងក្រោយ៥០ភាគរយ ដោយកាលពីថ្ងៃចន្ទក្រុមហ៊ុនមិនទាន់បានបើកតាមការសន្យានោះទេ»។ នាងអះអាងថា ក្រុមមន្រ្តីមកពីក្រសួងសង្គមកិច្ច បានប្រកាសប្រាប់កម្មករថា ពួកគេនឹងលក់សម្ភារនៅក្នុងក្រុមហ៊ុន យកលុយបើកឲ្យកម្មករ ព្រោះថៅកែព្រមឲ្យលក់ឡាយឡុង។
អ្នកនាង ម៊ិច មុំ និយាយថា៖«យើងយល់ព្រម ហើយយើងត្រូវរង់ចាំមួយសប្តាហ៍ទៀតទម្រាំតែលក់សម្ភាររួចរាល់។ យើងត្រូវការប្រាក់ឈ្នួលជាមុនសិន មុនពេលនឹងគិតពីប្រាក់អត្ថប្រយោជន៍ផ្សេងៗទៀតត្រូវទទួលបាន។
អ្នកតំណាងក្រុមហ៊ុន ប្រាប់ថា ពួកយើងក៏អាចទទួលប្រាក់អត្ថប្រយោជន៍ផ្សេងទៀតដែរ ប្រសិនបើពួកគេនៅសល់ប្រាក់ក្រោយពីបើកប្រាក់ជូនកម្មកររួច»។
អ្នកនាង មុំ បន្តទៀតថា កម្មករ ត្រូវការជំនួយពីអង្គការ ACILS ដើម្បីកម្មករទទួលបានប្រាក់អត្ថប្រយោជន៍ផ្សេងៗក្រោយពីទទួលបាន ប្រាក់ឈ្នួលពេញ។
លោក កែរ សុខសិទ្ធិនី សមាជិកគណៈកម្មាធិការសម្រាប់ដោះស្រាយបញ្ហា កូដកម្ម បាតុកម្មក្រសួងសង្គមកិច្ច កាលពីម្សិលមិញប្រាប់ថា ថៅកែជនជាតិអាមេរិករូបនេះ ពុំមានថវិកាដំណើរការអាជីវកម្មបន្តទេ។ គាត់បានស្នើឲ្យគណនេយ្យករលក់ទ្រព្យសម្បត្តិទាំងអស់ក្នុងក្រុមហ៊ុនដើម្បីបើកប្រាក់ឲ្យកម្មករ។
លោកបញ្ជាក់ ថា៖ «ខ្ញុំព្យាយាមជំរុញក្រុមហ៊ុននេះឲ្យដោះស្រាយឲ្យបានឆាប់តាម ដែលអាចធ្វើទៅបានដើម្បីបើកប្រាក់ជូនកម្មករមុនថ្ងៃភ្ជុំបិណ្ឌ ក្នុងខែតុលា»។
លោក កែរ សុខសិទ្ធិនី មានប្រសាសន៍ថា ក្រសួងនិងក្រុមហ៊ុន នឹងស៊ើបអង្កេតលើសម្ភារដែលបានបាត់ តើមានតម្លៃប៉ុន្មាន។
លោកបន្តថា៖«យើងនឹងស្នើឲ្យក្រុមហ៊ុនសន្តិសុខសងការបាត់បង់នោះ បើយើងដឹងអំពីតម្លៃព្រោះក្រុមសន្តិសុខដែលក្រុមហ៊ុនជួល មិនបានការពារក្រុមហ៊ុនឲ្យបានល្អ»។ លោកបញ្ជាក់បន្ថែមថា ក្រុមហ៊ុនសន្តិសុខ ត្រូវតែទទួលខុសត្រូវ៕ NR
