.jpg)
លោក ប្រាក់ សុខុន ចាប់ដៃលោកស្រី រ៉ូណា ស្មុីត។ ហេង ជីវ័ន
ភ្នំពេញៈ លោកស្រី រ៉ូណា ស្មុីត អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាតិ (អសប) ប្រចាំកម្ពុជា បានមកតាមដាន ពាក់ព័ន្ធនឹងការអនុវត្តមូលដ្ឋានីយកម្ម ការប្តេជ្ញាចិត្តរបស់រដ្ឋាភិបាលកម្ពុជា ក្នុងការរាយការណ៍ដោយស្ម័គ្រចិត្តនៅ អសប និងការធ្វើជំរឿនប្រជាជន ដែលក្រសួងផែនការបានប្រាប់លោកស្រីនៅក្នុងជំនួបកាលពីឆ្នាំមុន និងបញ្ហាមួួយចំនួនទៀត។ នេះបើតាមលោក ថេង បញ្ហាធន ប្រតិភូរាជរដ្ឋាភិបាល ទទួលបន្ទុកអគ្គនាយកផែនការ នៃក្រសួងផែនការ។
លោក បញ្ហាធន បានថ្លែងប្រាប់អ្នកសារព័ត៌មាន ក្រោយជំនួបរវាងលោក ឆាយ ថន ទេសរដ្ឋមន្ត្រី និងជារដ្ឋមន្ត្រីក្រសួងផែនការ ជាមួយនឹងលោកស្រី រ៉ូណា ស្មុីត កាលពីម្សិលមិញ។
លោកបញ្ជាក់ថា រាជរដ្ឋាភិបាលបានអនុម័តក្របខ័ណ្ឌដំណើរការធ្វើមូលដ្ឋានីយកម្ម គោលដៅអភិវឌ្ឍន៍ប្រកបដោយចីរភាពឆ្នាំ ២០១៦-២០៣០ ហើយប្រកាសផ្សព្វផ្សាយដល់ថ្នាក់ជាតិ និងថ្នាក់ក្រោមជាតិ កាលពីខែមីនា ឆ្នាំ ២០១៩។ អ្វីដែលលោកស្រីស្មុីតចាប់អារម្មណ៍នោះ គឺការប្រកាសផ្សព្វផ្សាយដាក់ឱ្យប្រើប្រាស់នូវឯកសារនេះ។ «ដំណើរការនៃការធ្វើមូលដ្ឋានីយកម្មនេះ គឺយើងបានបើកទូលាយឱ្យមានការចូលរួម ពីអ្នកមានចំណែកពាក់ព័ន្ធទាំងអស់ទាំងក្នុងរង្វង់ក្រសួង ស្ថាប័នរាជរដ្ឋាភិបាល ទាំងសង្គមស៊ីវិល ដៃគូអភិវឌ្ឍន៍ ហើយនិងផ្នែកឯកជនគឺបានចូលរួម»។
លោក បញ្ហាធន បញ្ជាក់ថា ក្រសួងបានដំណើការរៀបចំតាមអ្វី ដែលជាការប្តេជ្ញាចិត្តរបស់រាជរដ្ឋាភិបាលទាក់ទងនឹងរបាយការណ៍វាយតម្លៃថ្នាក់ជាតិដោយស្ម័គ្រចិត្តឆ្នាំ ២០១៩។ នៅក្នុងដំណើរការរៀបចំរបាយការណ៍នេះ ក្រសួងបានបើកទូលាយឱ្យមានការចូលរួមពីគ្រប់ក្រសួង ស្ថាប័នរាជរដ្ឋាភិបាល សង្គមស៊ីវិលដៃគូអភិវឌ្ឍន៍ និងផ្នែកឯកជន។
របាយការណ៍នេះ ចុងក្រោយនឹងត្រូវអនុម័តដោយលោកនាយករដ្ឋមន្ត្រី ហ៊ុន សែន មុននឹងរាជរដ្ឋាភិបាលផ្ញើទៅកាន់ អសប ដើម្បីធ្វើការបង្ហាញនៅខែកក្កដាខាងមុខ។ លើសពីនេះ រាជរដ្ឋាភិបាលបានធ្វើជំរឿនប្រជាជនឆ្នាំ ២០១៩ ចប់សព្វគ្រប់ហើយ។ អ្វីដែលជាចំណុចលេចធ្លោនោះ គឺការចូលរួមច្រើនក្នុងការធ្វើជំរឿននេះ។
ក្រៅពីជួបលោក ឆាយ ថន លោកស្រី រ៉ូណា ស្មុីត ក៏បានជួបរដ្ឋមន្ត្រីចំនួន ៣ រូបផ្សេងទៀតរួមមានលោក ម៉ម ប៊ុនហេង រដ្ឋមន្រ្តីក្រសួងសុខាភិបាល លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
លោកស្រី រ៉ូណា ស្មុីត បានប្រាប់ភ្នំពេញប៉ុស្ដិ៍ថា ក្នុងជំនួបជាមួយ លោក ឆាយ ថន លោកស្រីបានពិភាក្សាអំពីវឌ្ឍនភាព នៃគោលដៅអភិវឌ្ឍន៍ប្រកបដោយចីរភាព និងវឌ្ឍនភាព នៃការធ្វើជំរឿនប្រជាជនកម្ពុជា។
លោកស្រីបញ្ជាក់ថា៖ «វាមានសារៈសំខាន់ណាស់ សម្រាប់កិច្ចការរបស់ក្រសួងផែនការក្នុងការធានាថា គោលដៅអភិវឌ្ឍន៍ប្រកបដោយចីរភាព ត្រូវបានឆ្លើយតប ហើយក៏ធានាថា មិនទុកឱ្យប្រជាជនណាម្នាក់នៅឯកោនៅក្នុងការអភិវឌ្ឍរហ័សរបស់ប្រទេសនេះ»។
លោកស្រីបញ្ជាក់ទៀតថា រដ្ឋមន្ត្រីក្រសួងផែនការ បានពន្យល់លោកស្រីលម្អិត អំពីការងារដែលបានអនុវត្តជាមួយអ្នកពាក់ព័ន្ធរបស់ខ្លួន ដើម្បីព្រមព្រៀងទៅលើគោលដៅអភិវឌ្ឍន៍ប្រកបដោយចីរភាព។ មួយវិញទៀត លោករដ្ឋមន្ត្រី ក៏បានប្រាប់ផងដែរ អំពីផែនការរបស់ក្រសួងដែលរាយការណ៍អំពីរបាយការណ៍វាយតម្លៃថ្នាក់ជាតិ នៃការអនុវត្តគោលដៅអភិវឌ្ឍន៍ប្រកបដោយចីរភាពដោយស្ម័គ្រចិត្តនៅ អសប នៅខែកក្កដាខាងមុខ។
ចំណែកនៅក្នុងជំនួបជាមួយលោក ម៉ម ប៊ុនហេង លោកស្រីបានប្រាប់ថា លោកស្រីបានស្វែងយល់អំពីវឌ្ឍនភាព នៃវិស័យសុខាភិបាល និងសូចនាករសុខភាព នៅក្នុងប្រទេស កម្ពុជា និងក៏មានការពិភាក្សាអំពីបញ្ហាព្យាបាលអ្នកប្រើប្រាស់គ្រឿងញៀន បញ្ហាមួយចំនួនផ្សេងទៀត និងការជោគជ័យមួយចំនួនរបស់ក្រសួងសុខាភិបាល។
លោកស្រីបានសរសេរនៅក្នុងទំព័រហ្វេសប៊ុក ថានៅក្នុងជំនួបជាមួយ លោក ម៉ម ប៊ុនហេង «យើងបានពិភាក្សាក្នុងចំណោមបញ្ហាផ្សេងៗ អំពីការចូលរួមរបស់ក្រសួងសុខាភិបាលក្នុងសេវាស្តារនីតិសម្បទាអ្នកប្រើប្រាស់គ្រឿងញៀន ការទទួលបានប្រកបដោយសមភាព នូវសេវាសុខាភិបាលដោយគ្មានការរើសអើង និងកិច្ចខិតខំប្រឹងប្រែងរបស់អាជ្ញាធរនានា ក្នុងការប្រយុទ្ធប្រឆាំងនឹងឱសថក្លែងបន្លំ និងឱសថស្ថិតនៅក្រោមបទដ្ឋានក្នុងប្រទេស កម្ពុជា»។
នៅក្នុងជំនួបជាមួយលោក ប្រាក់ សុខុន លោកស្រីក៏បានពិភាក្សាអំពីវឌ្ឍភាពមួយចំនួនរបស់ក្រសួងនេះផងដែរ ហើយនៅក្នុងជំនួបជាមួយលោក ជា សុផារ៉ា លោកស្រីពិភាក្សាអំពីបញ្ហាដែលលោកស្រីបានចុះទៅធ្វើទស្សនកិច្ចនៅមូលដ្ឋាន និងបញ្ហាផ្សេងទៀតទាក់ទងនឹងការផ្តល់បណ្ណកម្មសិទ្ធិដីធ្លី។
បើតាមលោក បញ្ហាធន នៅជំហានបន្ទាប់ លោកស្រី រ៉ូណា ស្មុីត ចង់ឃើញ និងរង់ចាំមើល ថាតើកម្ពុជានឹងយកអនុសាសន៍ដែលផ្តល់ឱ្យដោយមន្ត្រី អសប និងបណ្តាប្រទេសផ្សេងៗ មកអនុវត្តតាមរបៀបណា និងផ្សព្វផ្សាយដល់ប្រជាជនដល់កម្រិតណា បន្ទាប់ពីកម្ពុជាបង្ហាញរបាយការណ៍នៅ អសប នៅក្នុងខែកក្កដាខាងមុខ៕
