.jpg)
លោកស្រី រ៉ូណា ស្មុីត ក្នុងជំនួបជាមួយលោក ស ខេង នៅក្រសួងមហាផ្ទៃ កាលពីម្សិលមិញ។ ហេង ជីវ័ន
ភ្នំពេញៈ នៅក្នុងជំនួបជាមួយលោក ស ខេង កាលពីម្សិលមិញ លោកស្រី រ៉ូណា ស្មុីត បានស្នើឲ្យមានការពង្រឹងទំនាក់ទំនង និងកិច្ចសហប្រតិបត្តិការបន្ថែមទៀតរវាងរដ្ឋាភិបាល និងអង្គការសង្គមស៊ីវិលតាមរយៈការធ្វើវេទិកា ដើម្បីអាចឲ្យអង្គការសង្គមស៊ីវិលចូលរួមផ្តល់មតិយោបល់ផ្សេងៗ។ នេះបើតាមការបញ្ជាក់របស់លោកស្រី រ៉ូណា ស្មុីត ដែលបានប្រាប់អ្នកកាសែត បន្ទាប់ពីជំនួបជាមួយលោក ស ខេង។
លោក ផាត សុផានិត អ្នកនាំពាក្យក្រសួងមហាផ្ទៃ បានប្រាប់អ្នកកាសែតក្រោយជំនួបថា លោកស្រី រ៉ូណា ស្មុីត អ្នករាយការណ៍ពិសេស ទទួលបន្ទុកផ្នែកសិទ្ធិមនុស្សរបស់អង្គការសហប្រជាជាតិ (អសប) ប្រចាំកម្ពុជា បានស្នើឱ្យមានការពង្រឹងបន្ថែមទៀត នូវវេទិកាជួបគ្នារវាងរដ្ឋាភិបាល និងអង្គការសង្គមស៊ីវិល ដើម្បីឱ្យយន្តការនេះអនុវត្តឱ្យបានទៀងទាត់ ធ្វើយ៉ាងណាឱ្យអង្គការសង្គមស៊ីវិលបានចូលរួមផ្តល់មតិ យោបល់ផ្សេងៗ។
លោក ផាត សុផានិត បញ្ជាក់ថា៖ «ជារួម លោកស្រីមើលឃើញជាក់ស្តែង ចំពោះវឌ្ឍនភាពជាមួយនឹងការអនុវត្តភារកិច្ចរបស់រដ្ឋាភិបាលកន្លងមកនេះ ជាពិសេសពាក់ព័ន្ធនឹងការបង្កើតឱ្យមានយន្តការជួបគ្នាច្បាស់លាស់មួយជាប្រចាំ ២ ឆ្នាំម្តងរវាងរដ្ឋាភិបាល និងអង្គការសង្គមស៊ីវិល»។
លោកបញ្ជាក់ថា ចំណុចទាំងអស់នេះគឺជាអ្វីដែលលោកស្រី ស្មុីត បានលើកឡើង ដែលជាការបន្តតាមដានរបស់លោកស្រី ដែលបានជួបលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីលើកមុន។
លោកស្រីស្មុីតបានសម្ដែងភាពវិជ្ជមានចំពោះវឌ្នភាពរបស់រាជរដ្ឋាភិបាលដែលបានធ្វើកន្លងមក និងលើកទឹកចិត្ត ឱ្យបន្តអនុវត្តនូវអ្វី ដែលមិនទាន់អនុវត្តបាន ១០០ ភាគរយ។
លោក ផាត សុផានិត បញ្ជាក់ថា៖ «(លោកស្រី ស្មុីត ស្នើឲ្យក្រសួងមហាផ្ទៃ) ខិតខំធ្វើយ៉ាង ណាឱ្យបន្តអនុវត្តការងារនោះបន្តទៀតដូចជាការខិតខំពង្រីកបន្ថែមនូវច្រកចេញចូលតែមួយ ការខិតខំកសាងបន្ថែមនូវហេដ្ឋារចនាសម្ព័ន្ធពន្ធនាគារ ការដាក់ចេញនូវកម្មវិធីស្តារនីតិសម្បទាអ្នកញៀនគ្រឿងញៀនជាដើម»។
ក្រៅពីនោះលោកស្រី ក៏បានលើកយកកិច្ចការការិយាល័យច្រកចេញចូលតែមួយ ដែលជួយពង្រឹងការផ្តល់សេវាសាធារណៈជូនប្រជាពលរដ្ឋឱ្យកាន់តែមានតម្លាភាព និងជួយទប់ស្កាត់ និងកាត់បន្ថយអំពើពុករលួយ និងការសូកប៉ាន់។
លោកស្រីក៏បានជជែកអំពីយុទ្ធនាការប្រយុទ្ធប្រឆាំងនឹងគ្រឿងញៀន និងការអនុវត្តសិទ្ធិ សេរីភាពរបស់អង្គការមិនមែនរដ្ឋាភិបាលជាមួយលោក ស ខេង ផងដែរ។ នេះបើតាមការបញ្ជាក់របស់លោកស្រី ស្ម៊ីត។
លោក ស ខេង បានស្វាគមន៍ចំពោះមតិយោបល់ផ្សេងៗរបស់លោកស្រី ស្មុីត និងបានប្រាប់លោកស្រីថា នឹងចាត់ឲ្យផ្នែកពាក់ព័ន្ធដែលទទួលខុសត្រូវការងារទាំងនេះ ឲ្យបន្តធ្វើការងារជាមួយគ្នាទៀតទាំងការងារជាមួយអង្គការមិនមែនរដ្ឋាភិបាល វេទិកា ការងារច្រកចេញចូលតែមួយ និងការងារស្តារនីតិសម្បទាអ្នកញៀនគ្រឿងញៀនជាដើម។ នេះបើតាមការបញ្ជាក់របស់លោក សុផានិត។
លោកស្រី រ៉ូណា ស្មុីត ក៏បានសរសេរបង្ហោះនៅលើហ្វេសប៊ុកផងដែរថា កាលពីរសៀលថ្ងៃម្សិលមិញ លោកស្រីក៏បានជួបប្រជុំជាមួយលោក មាស វិរិទ្ធ អគ្គលេខាធិការអាជ្ញាធរជាតិ ប្រយុទ្ធប្រឆាំងគ្រឿងញៀនផងដែរ។
ក្នុងជំនួបនេះ លោកស្រីបានទទួលព័ត៌មានសង្ខេប អំពីការអនុវត្តយុទ្ធនាការប្រយុទ្ធប្រឆាំងគ្រឿងញៀន ដែលបានចាប់ផ្តើមចាប់តាំងពីក្នុងខែមករា ឆ្នាំ ២០១៧ «កិច្ចខិតខំប្រឹងប្រែង ដើម្បីគាំទ្រអ្នកប្រើគ្រឿងញៀន ដែលកិច្ចខិតខំប្រឹងប្រែងនេះកាន់តែមានច្រើន តាមរយៈសេវាតាមសហគមន៍ ក៏ដូចជាយុទ្ធសាស្រ្តដែលត្រូវបានបង្កើតឡើងដោយអាជ្ញាធរនានា ដែលធ្វើជាដៃគូជាមួយអង្គការក្រៅរដ្ឋាភិបាល ដើម្បីប្រយុទ្ធប្រឆាំងគ្រឿងញៀន»។
កាលពីថ្ងៃអង្គារ លោកស្រី រ៉ូណា ស្មុីត បានជួបជាមួយលោក ប្រាក់ សុខុន រដ្ឋមន្ត្រីក្រសួងការបរទេស លោកឆាយ ថន រដ្ឋមន្ត្រី ក្រសួងផែនការ លោក ជា សុផារ៉ា រដ្ឋមន្ត្រីក្រសួងរៀបចំដែនដី និងលោក ម៉ម ប៊ុនហេង រដ្ឋមន្ត្រី ក្រសួងសុខាភិបាល ដើម្បីពិភាក្សា និងតាមដានពីវឌ្ឍនភាពការងារមួយចំនួន ដែលក្រសួងទាំងនេះបានធ្វើ បន្ទាប់ពីជំនួបជាមួយលោក ស្រីកាលពីលើកមុន។
តាមគម្រោងលោកស្រី រ៉ូណា ស្មុីត នឹងធ្វើសន្និសីទកាសែតមួយនៅថ្ងៃនេះ ដើម្បីបូកសរុបពីលទ្ធផល ដែលលោកស្រី បានមកបំពេញទស្សនកិច្ចលើកនេះមុននឹងលោកស្រីចាកចេញពីកម្ពុជា៕
