ភ្នំពេញៈ មិនខុសពីការរំពឹងទុក គណៈកម្មាធិការជាតិរៀបចំការបោះឆ្នោត(គ.ជ.ប)កាលពីយប់មិញ បានប្រកាសជាសាធារណៈនូវលទ្ធផលផ្លូវការសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី ៦ ដែលបង្ហាញថា គណបក្សប្រជាជនកម្ពុជា កំពុងកាន់អំណាច បានក្រសោបយកអាសនៈទាំងអស់ចំនួន ១២៥ អាសនៈ ដែលធ្វើឲ្យស្ថាប័ននីតិបញ្ញត្តិកំពូលមួយនេះ ក្លាយជាស្ថាប័នឯកបក្ស។
យោងតាមលទ្ធផលផ្លូវការដែលចេញផ្សាយដោយ គ.ជ.ប កាលពីយប់មិញ គឺទិន្នន័យស្ដីពីចំនួនសន្លឹកឆ្នោតដែលគណបក្សនយោបាយនីមួយៗទទួលបានគឺមិនខុសគ្នាពីលទ្ធផលបណ្ណោះអាសន្នដែលគ.ជ.ប បានប្រកាសកាលពីថ្ងៃទី១១ ខែសីហា នោះឡើយ។
ក្នុងនោះគណបក្សនយោបាយសំខាន់ៗ មានដូចជាគណបក្សប្រជាជនកម្ពុជា (CPP) កំពុងកាន់អំណាចទទួលបានសំឡេងឆ្នោតចំនួន ៤ ៨៨៩ ១១៣ សំឡេង, គណបក្សហ្វុ៊នស៊ិនប៉ិច របស់សម្ដេចក្រុមព្រះនរោត្តម រណឫទ្ធិ ស្ថិតនៅលំដាប់លេខរៀងទី ២ ដោយទទួលបានការគាំទ្រចំនួន ៣៧៤ ៥១០ សំឡេង, គណបក្សសម្ព័ន្ធដើម្បីប្រជាធិបតេយ្យ(LDP)របស់លោក ខឹម វាសនា ស្ថិតនៅលំដាប់លំដាប់ទី ៣ ដោយទទួលបានចំនួន ៣០៩ ៣៦៤ សំឡេង និងគណបក្សឆន្ទៈខ្មែរ(KWP)របស់លោក គង់ មុនីកា ស្ថិតនៅលំដាប់ទី ៤ ដោយទទួលបានត្រឹមតែ ២១២ ៨៦៩ សំឡេង ប៉ុណ្ណោះ។
ក្រៅពីនេះ គណបក្សខ្មែររួបរួមជាតិ(KNUP)របស់លោកញឹក ប៊ុនឆៃ ស្ថិតនៅលំដាប់ទី ៥ ទទួលបានសន្លឹកឆ្នោតចំនួន ៩៩ ៣៧៧ សំឡេង, ខណៈគណបក្សប្រជាធិបតេយ្យមូលដ្ឋាន(GDP) របស់លោក យ៉េង វីរៈ ស្ថិតនៅលំដាប់ទី ៦ ដោយទទួលបានសន្លឹកឆ្នោតត្រឹមតែ ៧០ ៥៦៧ ប៉ុណ្ណោះ។ បន្ថែមលើនេះ គណបក្សតូចៗចំនួន ១៤ ផ្សេងទៀត ដែលបានចូលរួមប្រកួតប្រជែង ទទួលបានការគាំទ្រតិចជាង ១ភាគរយប៉ុណ្ណោះ។
ក្នុងចំណោមពលរដ្ឋចំនួន ៨ ៣៨០ ២១៧ នាក់ ដែលមានឈ្មោះក្នុងបញ្ជីបោះឆ្នោត មានពលរដ្ឋចំនួន ៦ ៩៥៦ ៩០០ នាក់ ឬស្មើរនឹង ៨៣,០២ ភាគរយ បានទៅបោះឆ្នោត កាលពីថ្ងៃទី២៩ ខែកក្កដា កន្លងទៅ។
បន្ទាប់ពី គជប បានប្រកាសលទ្ធផលផ្លូវការកាលពីយប់មិញ លោកនាយករដ្ឋមន្ត្រី ហ៊ុន សែន បានសរសេរសារបង្ហោះនៅលើហ្វេសប៊ុករបស់លោក ដោយបានថ្លែងអំណរគុណ ដល់សមាជិកសមាជិការគណបក្សប្រជាជនទូទាំងប្រទេស ដែលបានចូលរួមយ៉ាងសកម្ម ទាំងនៅក្នុងពេលយុទ្ឋនាការឃោសនាបោះឆ្នោត និងបានទៅបោះឆ្នោតគាំទ្រគណបក្សប្រជាជនលេខរៀងទី ២០ ធ្វើឲ្យគណបក្សកាន់អំណាចយូrអង្វែងមួយនេះ ឈ្នះឆ្នោតភ្លូកទឹកភ្លូកដី។
លោកសរសេរទៀតថា៖«នេះសបញ្ជាក់ឲ្យឃើញច្បាស់ថា បងប្អូនជនរួមជាតិ មានជំនឿទុកចិត្តឥតងាករេ លើការដឹកនាំដ៏ត្រឹមត្រូវរបស់គណបក្សប្រជាជន ដែលមាន សម្តេចតេជោ ហ៊ុន សែន ជាប្រមុខដឹកនាំដ៏ខ្ពង់ខ្ពស់បំផុត ហើយបងប្អូនបានសម្រេចចិត្តជ្រើសរើសសន្តិភាព ការអភិវឌ្ឍ និងបន្តចាក់ឫសប្រជាធិបតេយ្យជាសំខាន់បំផុត សម្រាប់ប្រទេសជាតិយើងទាំងមូល»។
ទន្ទឹមនឹងនេះដែរ លោក ហ៊ុន សែន ក៏បានអរគុណដល់គណបក្សនយោបាយទាំង ១៩ ផ្សេងទៀត ដែលបានចូលរួមប្រកួតប្រជែងនៅក្នុងការបោះឆ្នោត «តាមបែបលទ្ឋិប្រជាធិបតេយ្យ ដោយស្មើភាព សេរី ត្រឹមត្រូវ និងយុត្តិធម៌។ រាជរដ្ឋាភិបាលអាណត្តិទី ៦ ថ្មីនឹងត្រូវបានរៀបចំបង្កើតនៅសប្តាហ៍ទី ១ នៃខែកញ្ញា ខាងមុខនេះ»។
អ្នកវិភាគនយោបាយ លោក ឡៅ ម៉ុងហៃ បានចោទសួរ ចំពោះលទ្ធផលបោះឆ្នោត ថា តើវាឆ្លុះបញ្ចាំងពីឆន្ទៈពលរដ្ឋយ៉ាងដូចម្ដេច តាមរយៈការលើកឡើង ពីអវត្តមានគណបក្សប្រឆាំងដ៏ធំ និងការរឹតត្បិតនានា មុនការបោះឆ្នោតមកដល់។
លោកថ្លែងថា៖«ខ្ញុំសង្ស័យខ្លាំងណាស់ ពួកគេបានឆ្លុះបញ្ចាំងអំពីសេរីភាពនៃឆន្ទៈរបស់ប្រជាជនកម្ពុជា ដោយគិតតាមរបៀបដែលការបោះឆ្នោតត្រូវបានរៀបចំ ដែលអវត្តមានគណបក្សប្រឆាំង ការហាមឃាត់មន្ត្រីជាន់ខ្ពស់គណបក្ស មិនឲ្យធ្វើនយោបាយ ការឃ្លាំមើលក្រុមមន្ត្រីប្រឹក្សាឃុំ សង្កាត់ អវត្តមានសារព័ត៌មានសេរី និងឯករាជ្យ នៅក្នុងប្រទេស និងទម្រង់ដាក់សម្ពាធផ្សេងៗទៀត ទៅលើអ្នកមានសិទ្ធិបោះឆ្នោត ឲ្យទៅបោះឆ្នោត រួមមានទាំងការគំរាមកំហែង និងការបំភិតបំភ័យនានា»។ (ព័ត៌មានពិស្ដារសូមអានកាសែតភ្នំពេញប៉ុស្ដិ៍នៅថ្ងៃស្អែក)