The Phnom Penh Post Search

Search form




Logo of Phnom Penh Post newspaper Phnom Penh Post - លីកាដូ​ថា​កំហុស​ជា​ប្រព័ន្ធ​ធ្វើឲ្យ​ស្រ្តី​ទទួល​រង​នូវ​ភាព​អយុត្តិធម៌

លីកាដូ​ថា​កំហុស​ជា​ប្រព័ន្ធ​ធ្វើឲ្យ​ស្រ្តី​ទទួល​រង​នូវ​ភាព​អយុត្តិធម៌

រូប​ស្ត្រី​រងគ្រោះ​នៅក្នុង​របាយការណ៍​របស់​អង្គការ​សិទ្ធិ​មនុស្ស​លីកាដូ​។
រូប​ស្ត្រី​រងគ្រោះ​នៅក្នុង​របាយការណ៍​របស់​អង្គការ​សិទ្ធិ​មនុស្ស​លីកាដូ​។ រូបថត អង្គការ​លីកាដូ

លីកាដូ​ថា​កំហុស​ជា​ប្រព័ន្ធ​ធ្វើឲ្យ​ស្រ្តី​ទទួល​រង​នូវ​ភាព​អយុត្តិធម៌

ភ្នំពេញៈ អង្គការ​លីកាដូ​រកឃើញ​ថា​កំហុស​ឆ្គង​ជាច្រើន​ដែល​មាន​លក្ខណៈ​ជា​ប្រព័ន្ធ​រួម​មាន​អំពើ​ពុករលួយ អាកប្បកិរិយា​រើសអើង​លើ​ស្ត្រី និង​ក្មេងស្រី​ ការ​បកស្រាយ​ច្បាប់​មិន​ត្រឹមត្រូវ និង​កង្វះ​ធនធាន​នានា​បាន​ធ្វើឲ្យ​ជនលើ្មស​នៃ​អំពើ​រំលោភ​សេពសន្ថវៈ​ត្រឹម​តែ​ទទួល​ទោស​ស្រាល​ហើយ​ករណី​ខ្លះ​អាច​នឹង​រួច​ពី​ការ​ដាក់​ទណ្ឌកម្ម​ទាំង​ស្រុង​ថែម​ទៀត។

របាយការណ៍ ៣៦ ទំព័រ​ស្តី​ពី «ការ​រួច​ខ្លួន​ពី​បទល្មើស៖ ការ​អនុវត្ត​ច្បាប់​ចំពោះ​បទល្មើស​រំលោភ​សេពសន្ថវៈ​ក្នុង​ប្រព័ន្ធ​តុលាការ» ចេញ​ផ្សាយ​កាលពី​ថ្ងៃ​ម្សិលមិញ​ស្រប​គ្នា​នឹង​ការ​ប្រារព្ធ​កម្មវិធី​យុទ្ធនាការ​ពិភពលោក​រយៈពេល ១៦ ថ្ងៃ​ទប់ស្កាត់​អំពើ​ហិង្សា​លើ​យេនឌ័រ​ដែល​​ចាប់​ផ្តើម​ពី​ថ្ងៃ​ទី ២៥ វិច្ឆិកា​ដល់ ១០ ធ្នូ។ របាយការណ៍​នេះ​បាន​បង្ហាញ​នូវ​ភ័ស្តុតាង​នៃ​ការ​មិន​បាន​អនុវត្ត​ឲ្យ​បាន​ត្រឹមត្រូវ​នៅ​ក្នុង​ប្រព័ន្ធ​តុលាការ​កម្ពុជា​ក្នុង​ការ​ស៊ើបអង្កេត និង​ផ្តន្ទាទោស​ឲ្យ​បាន​ត្រឹមត្រូវ​លើ​ករណី​ជាច្រើន​នៃ​បទល្មើស​រំលោភ​សេពសន្ថវៈ​ដែល​ពាក់ព័ន្ធ​នឹង​ស្ត្រី និង​កុមារ។

របាយការណ៍​នេះ​ផ្អែក​លើ​ករណី​រំលោភ​សេពសន្ថវៈ និង​ប៉ុនប៉ង​រំលោភ​សេពសន្ថវៈ​ចំនួន ៧៦២ ករណី​ដែល​ត្រូវ​បាន​ស៊ើបអង្កេត​ដោយ​អង្គការ​លីកាដូ​ក្នុង​ឆ្នាំ ២០១២ ២០១៣ និង ឆ្នាំ ២០១៤។ ករណី​ទាំង​នេះ​កើតឡើង​នៅ​ក្នុង​រាជធានី​ភ្នំពេញ និង​ខេត្ត​ចំនួន ១២ ដែល​លីកាដូ​កំពុង​ធ្វើការ​អំឡុង​ពេល​នោះ។

ក្នុង​ចំណោម​ករណី​រកឃើញ​នេះ​មាន ២២៥ ​ករណី​ពាក់ព័ន្ធ​នឹង​ស្ត្រី​ដែល​មាន​អាយុ ១៨ ឆ្នាំ ឬ​លើស​ពី​នេះ​ចំណែក ៥៣៧ ករណី​ទៀត​ពាក់ព័ន្ធ​នឹង​កុមារ​អាយុ​ក្រោម ១៨ ​ឆ្នាំ។ ក្នុង​ចំណោម​ជនរងគ្រោះ​អាយុ​ក្រោម ១៨ ឆ្នាំ​មាន​ករណី ១០ ​ភាគរយ​អាយុ​ក្រោម ៦ ឆ្នាំ ៣២ ភាគរយ​អាយុ​ពី ៦ ​ដល់ ១១ ឆ្នាំ និង ៥៨ ភាគរយ​អាយុ​ពី ១២ ដល់​ ១៧ ឆ្នាំ។

ក្នុង​ចំណោម ៧៦២ ករណី​នេះ​មាន ៤២៤ ករណី​ត្រូវ​បាន​បិទ​នៅ​ពេល​កំពុង​សរសេរ​របាយការណ៍។ ក្នុង​នោះ ១/៣ គឺ​បាន​បិទ​បញ្ចប់​មុន​ពេល​បើក​សវនាការ​ដោយ​ការ​បង់ប្រាក់​សំណង​បញ្ចប់​រឿង​ក្តី​ពី​ជនល្មើស​ជូន​ដល់​ជនរងគ្រោះ​ជា​ថ្នូរ​នឹង​ការ​ដក​ពាក្យ​បណ្តឹង​ហើយ​ករណី​ខ្លះ​បញ្ចប់​ដោយ​ការ​រៀប​អាពាហ៍ពិពាហ៍​ចំណែក ១/៣ ទៀត​បាន​បិទ​បញ្ចប់​​ដោយ​ការ​ផ្តន្ទាទោស​មិន​ត្រឹមត្រូវ​ដែល​នាំ​ឲ្យ​ដាក់​ទណ្ឌកម្ម​ស្រាល​ហើយ​ទោស​ត្រូវ​បាន​ព្យួរ​មួយ​ផ្នែក​ទាំង​ស្រុង​ទៅវិញ។

របាយការណ៍​នេះ​ក៏​បាន​រកឃើញ​ផង​ដែរ​នូវ​ករណី​ជាច្រើន​ត្រូវ​បាន​បិទ​ដោយ​កំហុស​ឆ្គង​ជាច្រើន​ខុសៗ​គ្នា​កើត​ចេញ​ពី​អំពើ​​ពុករលួយ​ផង​ដែរ​រាប់​តាំងពី​ការ​បញ្ចប់​ដោយ​ប្រាក់​សំណង​ចរចា​នៅ​ប៉ុស្តិ៍​នគរបាល​រហូត​ដល់​នីតិវិធី​បើក​សវនាការ។

នាយិកា​អង្គការ​លីកាដូ​លោកស្រី ណាលី ពីឡូក បាន​ឲ្យ​ដឹង​ក្នុង​សេចក្តី​ថ្លែងការណ៍​ថា​គ្រប់​ពេល​ដែល​ជនរងគ្រោះ​មក​ទាក់ទង​មន្ត្រី​សាធារណៈ​អ្នក​ទាំង​នោះ​ហាក់​ដូចជា​ត្រូវតែ​បង់​ប្រាក់​ក្រៅ​ច្បាប់​ហើយ​ប្រសិន​បើ​ជនសង្ស័យ​មាន​ប្រាក់​ជន​នោះ​អាច​នឹង​ទិញ​នូវ​សេរីភាព​របស់​ខ្លួន​មក​វិញ​បាន​។

លោកស្រី​ថា៖ «ពេល​ខ្លះ​ហាក់​ដូចជា​អាជ្ញាធរ​មិន​បាន​យក​ចិត្ត​ទុក​ដាក់​លើ​ភាព​យុត្តិធម៌​នោះ​ទេ​ផ្ទុយ​ទៅវិញ​ករណី​រំលោភ​សេពសន្ថវៈ​ត្រឹម​តែ​អាច​ជា​មធ្យោបាយ​សម្រាប់​អ្នក​ទាំង​នោះ​ក្នុង​ការ​រក​ប្រាក់​តែ​ប៉ុណ្ណោះ»។

ដោយ​បដិសេធ​ឆ្លើយតប​នឹង​ការ​ចោទ​ប្រកាន់​របស់​លីកាដូ​អ្នក​នាំ​ពាក្យ​ក្រសួង​យុត្តិធម៌​លោក ជិន ម៉ាលីន បាន​អះអាង​ថា​របាយការណ៍​នោះ​ហាក់​មិន​មាន​ទិន្នន័យ និង​មូលដ្ឋាន​ស្រាវជ្រាវ​នោះ​ទេ។

ត្រង់​ចំណុច​នេះ​ លោក គូស​បញ្ជាក់​ថា៖ «យើង​ទទួល​ស្គាល់​ថា​ធ្លាប់​មាន​ការ​ចោទប្រកាន់​ក្នុង​ប្រព័ន្ធ​តុលាការ​តាម​បណ្តឹង​ពាក់ព័ន្ធ​នឹង​អំពើ​ពុករលួយ​ហើយ​ក៏​មាន​ព្រះរាជអាជ្ញា និង​ចៅក្រម​មួយ​ចំនួន​ធ្លាប់​បាន​ទទួល​ទោស​កំហុស​របស់​ខ្លួន និង​រង​ទោស​ទណ្ឌ​ផង​ដែរ។ អ៊ីចឹង​ហើយ​បើ​លីកាដូ​មាន​មូលដ្ឋាន​ទិន្នន័យ​ច្បាស់​លាស់ និង​ភ័ស្តុតាង​ជាក់លាក់​ចោទ​ឲ្យ​ចំ និង​ច្បាស់លាស់​ហើយ​ស្នើ​មក​យើង​គឺ​ក្រសួង​នឹង​ពិចារណា​ហើយ​ចាត់​វិធានការ»។

លោក ជិន ម៉ាលីន ​បញ្ជាក់​ថា​ការ​អនុវត្ត​ច្បាប់ និង​នីតិវិធី​របស់​តុលាការ​ក្នុង​ការ​ដោះលែង ឬ​ផ្តន្ទាទោស​ជនល្មើស​ក្នុង​ករណី​រំលោភ​សេពសន្ថវៈ​គឺជា​ឆន្ទានុសិទ្ធិ​របស់​តុលាការ​ហើយ​ភាគី​ពាក់ព័ន្ធ​គឺ​មាន​សិទ្ធិ​ប្តឹង​ទៅ​តុលាការ​ជាន់​ខ្ពស់​ក្នុង​ករណី​មិន​យល់​ព្រម។

អ្នក​នាំពាក្យ និង​ជា​ព្រះរាជ​អាជ្ញារង​សាលា​ដំបូង​រាជធានី​ភ្នំពេញ​លោក លី សុផាន់ណា បាន​បដិសេធ​ឆ្លើយតប​តាម​ទូរស័ព្ទ​កាលពី​ម្សិលមិញ​ដោយ​ទាមទារ​​ឲ្យ​ដាក់​លិខិត​រដ្ឋបាល​ជា​ផ្លូវការ​ទើប​​លោក​អាច​ផ្តល់​សម្ភាសន៍​បាន​។

របាយការណ៍​របស់​លីកាដូ​ក៏​បាន​ដាក់​ការ​ព្រួយបារម្ភ​ចំពោះ​ការ​មិន​ដាក់​ទណ្ឌកម្ម​ដល់​ជនល្មើស​ដែល​រឹតតែ​ធ្វើឲ្យ​សាធារណជន​មិន​ទុក​ចិត្ត​ទៅ​លើ​ប្រព័ន្ធ​យុត្តិធម៌​កាន់តែ​ខ្លាំង​ឡើង និង​អាច​បង្ហាញ​ថា​អំពើ​រំលោភ​សេពសន្ថវៈ​មិនមែន​ជា​អំពើ​ល្មើស​ថែម​ទាំង​ធ្វើ​ឲ្យ​ជនរងគ្រោះ​មិន​ហ៊ាន​រាយការណ៍​ពី​បទល្មើស​ទៀត​ផង៕

អត្ថបទគួរចាប់អារម្មណ៍