ភ្នំពេញៈ សុគន្ធ អាយុ ៨ឆ្នាំ បានចំណាយពេលសើ្ទរ ៧ឆ្នាំ ដំបូងនៃជីវិតក្នុងពន្ធនាគារ។
មិនដូចក្មេងដទៃដែលមានសេរីភាពរត់លេងតាមចិត្ត សុគន្ធ បានចំណាយពេលជាច្រើននៃជីវិតដំបូងនៅក្នុងបន្ទប់ពន្ធនាគារដែលក្តៅ កខ្វក់ គ្មានអនាម័យ និងចង្អៀត ជាកន្លែងដែលម្តាយខ្លួនបានជាប់ពន្ធនាគារ ពីបទជួញដូរគ្រឿងញៀន។
ក្នុងគុកនាឆ្នាំដំបូងៗ សុគន្ធ បានឃើញផ្ទាល់ភ្នែកនូវរឿងរ៉ាវជាច្រើននិងដិតជាប់នៅក្នុងអារម្មណ៍ រួមទាំងរឿងដែលម្តាយគេបានកាត់ខ្សែទម្លាក់សពស្រ្តីជាប់ឃុំម្នាក់ដែលចងកសម្លាប់ខ្លួន។
អង្គការសិទ្ធិមនុស្ស លីកាដូ បានបង្ហាញអំពីសាច់រឿងរបស់ សុគន្ធ ពីម្សិលមិញ នៅក្នុងកិច្ចប្រឹងប្រែងទាញចំណាប់អារម្មណ៍ទៅលើផលប៉ះពាល់ដែលអាចកើតមានលើកុមារនៅក្នុងពន្ធនាគារដោយកត់សម្គាល់ថា នៅត្រឹមខែ កក្កដា ឆ្នាំនេះកុមារចំនួន ៥១ នាក់កំពុងរស់នៅជាមួយម្តាយក្នុងពន្ធនាគារនានា។
បើទោះជាច្បាប់ពន្ធនាគារ ខែ ធ្នូ ឆ្នាំ ២០១១ បានបន្ថយអាយុកុមារដែលអនុញ្ញាតឲ្យស្នាក់នៅក្នុងពន្ធនាគារពីអាយុ ៦ឆ្នាំ ទៅ ៣ឆ្នាំ ក្តី ក៏មានក្មេងៗជាច្រើនដែលមានអាយុច្រើនជាងនោះនៅតែដាក់ក្នុងពន្ធនាគារ។ នេះបើតាម លីកាដូ បានរាយការណ៍។
របាយការណ៍អង្គការនេះបានបង្ហាញទៀតដែរថា ខណៈមាន «អត្ថប្រយោជន៍មិនអាចបដិសេធបាន» អំពីការទុកកុមារឲ្យនៅជាមួយ ម្តាយរបស់ខ្លួននៅពេលម្តាយជាប់ឃុំ ពន្ធនាគារ នានាមិនបានផ្តល់បរិយាកាសសមស្របសម្រាប់កុមារ និងមិនអាចមានសមត្ថភាពបំពេញបាននូវតម្រូវការជាមូលដ្ឋានរបស់កុមារឡើយ។ មកដល់ពេលនេះ មិនមានការវាយតម្លៃពីគ្រួសារអ្នកទោស ត្រូវបានធ្វើឡើងដោយអាជ្ញាធរដើម្បីកំណត់ថា កុមារគួរអនុញ្ញាតឲ្យរស់នៅជាមួយម្តាយក្នុងពន្ធនាគារឬក៏បើអាចឲ្យនៅជាមួយគ្រួសារឬមានជម្រើសផ្សេង។
លោក ង៉ែត សុគន្ធ អ្នកគ្រប់គ្រងផ្នែកពន្ធនាគាររបស់អង្គការ លីកាដូ បានថ្លែងថា៖ «ការពិតនៅក្នុងពន្ធនាគារកម្ពុជា គឺមានភាពពិបាកណាស់សម្រាប់អ្នកទោស ហើយសម្រាប់កុមារ វាអាចបង្កផលប៉ះពាល់ច្រើន»។ លោកបន្តថា៖ «កុមារទាំងនេះជាញឹកញាប់ត្រូវបំផ្លាញដោយសង្គម ប៉ុន្តែ បញ្ហាអាក្រក់ជាងនេះនៅតែមាន។ ពួកគេជាញឹកញាប់មិនត្រូវបានអើពើដោយអាជ្ញាធរដែលទទួលខុសត្រូវ»។
លោក បេ ទាឡេង នាយកប្រតិបត្តិនៅអគ្គនាយកដ្ឋានពន្ធនាគារក្រសួង មហាផ្ទៃថ្លែងថា អាជ្ញាធរដឹងថា មានកុមារលើសអាយុបន្តនៅក្នុងពន្ធនាគារ។
លោកថ្លែងថា៖ «យើងពិតជាចង់ឲ្យក្មេងទាំងនោះនៅក្រៅពន្ធនាគារ ប៉ុន្តែនៅខាងក្រៅមិនមាននរណាទទួលខុសត្រូវមើលថែពួកគេដោយមនោសញ្ចេតនាយើងអនុញ្ញាតតាមការសុំពីម្តាយ»។
លោក បន្ថែមថា កុមារលើសអាយុត្រូវបានឲ្យទៅរៀននៅសាលាខាងក្រៅពន្ធនាគារ ហើយអាជ្ញាធរកំពុងពិភាក្សាជាមួយអង្គការក្រៅរដ្ឋាភិបាលដើម្បី ជួយកុមារក្នុងពន្ធនាគារបន្ថែមទៀត។
រដ្ឋផ្តល់ថវិកាឲ្យអ្នកទោសម្នាក់ៗគឺ ២ ៨០០ រៀល ក្នុង ១ ថ្ងៃខណៈកុមារមកនៅនឹងម្តាយឲ្យ ១ ៤០០ រៀល៕ PS
