ភ្នំពេញៈ ក្រសួងបរិស្ថានលើកទឹកចិត្តមន្ត្រីជំនាញក្នុងស្ថាប័នរបស់ខ្លួនឲ្យចូលរួមដាក់ពាក្យចូលរៀនវគ្គបណ្ដុះបណ្ដាលលើមុខជំនាញចំនួន ៣ នៅសាកលវិទ្យាល័យ Dresden នៃប្រទេសអាល្លឺម៉ង់ ខណៈមានការប្រកាសបើកការបណ្តុះបណ្តាលពីស្ថាប័នអប់រំរបស់ប្រទេសមួយនេះសម្រាប់មន្ត្រីជំនាញគ្រប់គ្រងជាន់ខ្ពស់។
វគ្គបណ្តុះបណ្តាលនេះ សហការរៀបចំឡើងដោយអង្គការ UNEP អង្គការ UNESCO និងក្រសួងបរិស្ថាន ការអភិរក្សធម្មជាតិ និងសុវត្ថិភាពនុយក្លេអ៊ែរនៃសហព័ន្ធអាល្លឺម៉ង់ (German Federal Ministry for the Environment, Nature Conservation and Nuclear Safety) ។
យោងតាមសេចក្ដីជូនដំណឹងស្ដីពី «វគ្គសិក្សាអំពីការគ្រប់គ្រងបរិស្ថានសម្រាប់ឆ្នាំ ២០២០-២០២១» របស់ក្រសួងបរិស្ថានចុះថ្ងៃទី ២៣ មីនា ឆ្នាំ ២០២០ ដែលភ្នំពេញប៉ុស្តិ៍ទទួលបានថ្ងៃទី ៣០ មីនា គឺមុខជំនាញទាំង ៣ ដ៏មានសារៈសំខាន់នោះរួមមាន ការគ្រប់គ្រងធនធានទឹកចម្រុះ (Integrated Water Resources Management) ភាពចល័តប្រកបដោយនិរន្តរភាព (Sustainable Mobility) និងការគ្រប់គ្រងបរិស្ថានសម្រាប់ប្រទេសកំពុងអភិវឌ្ឍន៍ (Environmental Management for developing country)។
បើតាមសេចក្ដីជូនដំណឹងនោះវគ្គសិក្សារយៈពេលខ្លីលើមុខជំនាញស្ដីពីការគ្រប់គ្រងធនធានទឹកចម្រុះនឹងត្រូវធ្វើឡើងចាប់ពីថ្ងៃទី ២៦ ខែសីហា ដល់ថ្ងៃទី ២២ ខែកញ្ញា ២០២០។ មុខជំនាញស្ដីពីភាពចល័តប្រកបដោយនិរន្តរភាពនឹងត្រូវធ្វើឡើងចាប់ពីថ្ងៃទី ១៣ ខែវិច្ឆិកាដល់ថ្ងៃទី ៩ ខែធ្នូ ឆ្នាំ ២០២០។ រីឯមុខជំនាញស្ដីពីការគ្រប់គ្រងបរិស្ថានសម្រាប់ប្រទេសកំពុងអភិវឌ្ឍន៍នឹងត្រូវចាប់ផ្តើមធ្វើពីថ្ងៃទី ១៣ មករា ដល់ ថ្ងៃទី ១៥ កក្កដា ឆ្នាំ ២០២១។
សេចក្ដីជូនដំណឹងបញ្ជាក់ថា៖ «ការចំណាយលើសំបុត្រយន្តហោះទៅមក និងការស្នាក់នៅរួមទាំង ការចំណាយប្រចាំថ្ងៃ និងការធានារ៉ាប់រងសុខភាពជាបន្ទុករបស់រដ្ឋាភិបាលអាល្លឺម៉ង់»។
ទោះយ៉ាងណា សិក្ខាកាមដែលអាចដាក់ពាក្យចូលរួមក្នុងវគ្គសិក្សាលើមុខជំនាញទាំងនេះគឺជាមន្ត្រីជំនាញគ្រប់គ្រងជាន់ខ្ពស់ ដែលរៀបចំ និងអនុវត្តសេចក្តីសម្រេចនយោបាយក៏ដូចជាអ្នកធ្វើសេចក្តីសម្រេចនៅក្នុងក្រសួងអាជ្ញាធររដ្ឋាភិបាលមូលដ្ឋាន។ ក្រៅពីនេះស្ថាប័នមិនមែនរដ្ឋាភិបាលនៃប្រទេសកំពុងអភិវឌ្ឍន៍ (រួមទាំងសេដ្ឋកិច្ចឧស្សាហកម្មថ្មីៗ) ដែលធ្វើការលើការការពារធនធានទឹក ឬជាអ្នកជំនាញគ្រប់គ្រងជាន់ខ្ពស់ដែលមានប្រវត្តិបច្ចេកទេសខាងចរាចរណ៍ និងនគរូបនីយកម្ម។ នេះបើយោងតាមលក្ខខណ្ឌរបស់សាកលវិទ្យាល័យ Dresden ដែលបានចុះផ្សាយជាសាធារណៈនៅលើគេហទំព័រ www.tu-dresden.de/bu/umwelt/cipsem។
ជុំវិញសេចក្ដីជូនដំណឹងនេះលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានប្រាប់ភ្នំពេញប៉ុស្តិ៍ថា វគ្គសិក្សាលើមុខជំនាញទាំង ៣ ខាងលើនេះនឹងជួយពង្រឹងសមត្ថភាពរបស់មន្ត្រីរាជការ។ ជាពិសេសមន្ត្រីជំនាញនៃក្រសួងបរិស្ថានឲ្យស្របទៅនឹងការវិវឌ្ឍថ្មីនៃបច្ចេកវិទ្យាពាក់ព័ន្ធនឹងការគ្រប់គ្រងបរិស្ថានផង និងដើម្បីធ្វើទំនើបកម្មស្ថាប័ននេះផង។
លោកថ្លែងថា ក្រោយពីមានការផ្សព្វផ្សាយនូវដំណឹងនេះមានមន្ត្រីជាច្រើននៃក្រសួងបរិស្ថានចាប់អារម្មណ៍លើវគ្គសិក្សានេះ។ ប៉ុន្តែពេលនេះក្រសួងនៅមិនទាន់ដឹងពីចំនួនអ្នកដែលបានចូលទៅកាន់គេហទំព័ររបស់សាកលវិទ្យាល័យ Dresden នោះដើម្បីបំពេញពាក្យចូលរួមវគ្គសិក្សានោះនៅឡើយទេ។
លោក ភក្ត្រា បញ្ជាក់ថា៖ «ការពង្រឹងសមត្ថភាពមន្ត្រីជំនាញនៃក្រសួងបរិស្ថានមិនមែនផ្ដោតសំខាន់ទៅលើការបញ្ជូនមន្ត្រីឲ្យទៅចូលរួមវគ្គបណ្ដុះបណ្ដាលនៅក្រៅប្រទេស ដើម្បីដកស្រង់បទពិសោធពីក្រៅប្រទេសនោះទេ តែក្នុងក្របខ័ណ្ឌជាតិរបស់យើងក៏ក្រសួងបរិស្ថានបានសហការជាមួយសាលាភូមិន្ទរដ្ឋបាលនៃក្រសួងមុខងារសាធារណៈ បើកវគ្គបណ្ដុះបណ្ដាលមន្ត្រីរបស់យើងទាំងថ្នាក់ជាតិ និងថ្នាក់ក្រោមជាតិផងដែរ»។
បើតាមលោក ភក្ត្រា ក្រសួងបរិស្ថានសហការជាមួយសាលាភូមិន្ទរដ្ឋបាលនៃក្រសួងមុខងារសាធារណៈ បើកវគ្គបណ្ដុះបណ្ដាលមុខជំនាញដល់មន្ត្រីសកម្មនៃបណ្ដាមន្ទីរអង្គភាពក្រោមចំណុះក្រសួងបរិស្ថានតាំងពីឆ្នាំ ២០១៥ មកម្ល៉េះ៕