ភ្នំពេញៈ ខណៈនៅសល់ប្រមាណ ២០ ថ្ងៃលទ្ធផលនៃការភ្នាល់គ្នារវាងលោកនាយករដ្ឋមន្ត្រី និងលោក សម រង្ស៊ី រឿងដោះលែងលោក កឹម សុខា នឹងមកដល់នោះ សារចម្រៀងដែលទំនងសំដៅលើលោក សម រង្ស៊ី បានលេចឡើងស្របពេលដែលអ្នកវិភាគខ្លះយល់ថា លោក កឹម សុខា នឹងមិនត្រូវបានដោះលែង ខណៈខ្លះរិះគន់ចំពោះការយកសេរីភាពមនុស្សម្នាក់មកធ្វើជាល្បែងភ្នាល់គ្នានេះ។
ការភ្នាល់គ្នាលើសេរីភាពលោក កឹម សុខា នេះ ធ្វើឡើងកាលពីខែវិច្ឆិកា ដោយលោក សម រង្ស៊ី បានសរសេរលើហ្វេសប៊ុករបស់លោកថា លោកសុខចិត្តចូលមក កម្ពុជាឲ្យគេចាប់ខ្លួន ប្រសិនបើលោក កឹម សុខា មិនទទួលបានការដោះលែងនៅថ្ងៃទី ២៩ ធ្នូឬយ៉ាងយូរត្រឹមថ្ងៃទី ៣ មីនា ២០១៩។លោក សម រង្ស៊ី លើកឡើងដូច្នេះគឺសំអាងលើនីតិវិធីនៃការឃុំខ្លួនបណ្ដោះអាសន្នដែលច្បាប់កំណត់ត្រឹម ១៨ ខែ។
ក៏ប៉ុន្តែលោក កឹម សុខា ត្រូវបានដោះលែងពីពន្ធនាគារត្រពាំងផ្លុងកាលពីថ្ងៃ ១០ កញ្ញា ២០១៨ តែត្រូវដាក់ឲ្យស្ថិតក្រោមការត្រួតពិនិត្យពីតុលាការ។ ឆ្លើយតបនឹងការភ្នាល់របស់លោក សម រង្ស៊ី លោកនាយករដ្ឋមន្ត្រី ហ៊ុន សែន បានទទួលយកលក្ខខណ្ឌនោះដោយថ្លែងថា លោកនឹងចុះចេញពីតំណែង បើលោក កឹម សុខា ត្រូវបានដោះលែងក្នុងអំឡុងពេលនៃការភ្នាល់មែន។
ខណៈសារព័ត៌មាន Fresh News បានចាប់ផ្ដើមរាប់ថយក្រោយទៅរកថ្ងៃកំណត់នៃការភ្នាល់នោះ លោក ហ៊ុន សែន ក៏បានតែងចម្រៀង ១ បទដែរដែលអ្នកវិភាគយល់ថាធ្វើឡើងដើម្បីឌឺដងលោក សម រង្ស៊ី។ ដោយហៅខ្លួនឯងថាជាកវីពីឆ្នេរសមុទ្រនោះ លោក ហ៊ុន សែន សរសេរថា៖ «ទទាយំឆ្លងត្រយងបងអើយអត់ឆ្លើយ (២ ដង) សង្សារបងអើយដល់ពេលហើយឬនៅ? ចិត្តអូនចិត្តដាច់ដោយសារចិត្តបងចិត្តខ្មៅ (២ ដង) ស្ពានក៏បាក់ទឹកក៏ជ្រៅធ្វើម្តេចបានទៅតាមកិច្ចសន្យា»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ចម្រៀងនេះគឺជាភាសាឌឺដងទៅលោក សម រង្ស៊ី។
លោកថ្លែងថា៖ «ចម្រៀងនេះបង្ហាញថា លោក សម រង្ស៊ី នឹងមិនវិលត្រឡប់មកវិញដូចអ្វីដែលគាត់សន្យាក្នុងការភ្នាល់នោះទេ។ខ្ញុំជឿថា គាត់នឹងមិនមកទេ កុំថាឡើយឌឺដងដាក់គាត់ប៉ុនណានោះ សូម្បីតែរុញគូទក៏មិនមកដែរ។ គាត់មិនមានសេចក្ដីក្លាហានហ៊ានប្រឈមនឹងការជាប់គុកដូចលោក កឹម សុខា ទេ។ ជាប្រវត្តិសាស្ត្ររបស់គាត់ មិនដែលប្រឈមមុខច្បាប់ទេ»។
ចំណែកអ្នកវិភាគនយោបាយ លោក ឡៅ ម៉ុងហៃ បានថ្កោលទោសការភ្នាល់គ្នាដោយយកសេរីភាពលោក កឹម សុខា ជាប្រធានបទនៃការភ្នាល់។
លោកថា៖ «វាជារឿងអសីលធម៌ហើយសូម្បីតែលោកនាយករដ្ឋមន្ត្រីដែលជាភាគីនៅក្នុងការភ្នាល់នេះក៏បានហៅការភ្នាល់នេះថា អគុណធម៌»។
លោកបន្ថែមថា គ្មានលទ្ធភាពដែលលោក កឹម សុខា ត្រូវបានដោះលែងទេពីព្រោះបើមានការដោះលែងក្នុងចន្លោះពេលនោះ លោក សម រង្ស៊ី និងលោក កឹម សុខា នឹងអស់សំណើច។
លោក គិន ភា យល់ថា លោក សម រង្ស៊ី មិនចង់ឃើញមានការដោះលែងលោក កឹម សុខា ទេ។ ស្រដៀងគ្នានេះដែរ អ្នកសិក្សាស្រាវជ្រាវបញ្ហាសង្គម មាស នី ក៏យល់ដែរថា លោក សម រង្ស៊ី ធ្វើនេះដើម្បីឲ្យលោក កឹម សុខា បន្តនៅក្នុងឃុំដើម្បីឲ្យមានសម្ពាធពីអន្តរជាតិ ។
ប៉ុន្តែលោកថា៖ «អ្នកដែលរងគ្រោះគឺលោក កឹម សុខា ហើយគ្រោះថ្នាក់មួយទៀតគឺ EBA ត្រូវបានគេដក។ បញ្ហានេះនឹងធ្វើឲ្យគ្រោះថ្នាក់ដល់គណបក្សសង្គ្រោះជាតិក៏ដូចជាពលរដ្ឋកម្ពុជាទាំងមូល។ សង្គ្រោះជាតិប្រឈមនឹងការបែកបាក់ទាំងស្រុងដោយសារការភ្នាល់គ្នានេះ។ យើងក៏ឃើញមានការឌឺដងដាក់គ្នាក្នុងជួរគណបក្សសង្គ្រោះជាតិរវាងអ្នកគាំទ្រទាំងសងខាង ហើយ (លោក ហ៊ុន សែន) មិនមានជម្រើសអ្វីទេក្រៅពីឃុំលោក កឹម សុខា ដើម្បីឈ្នះការភ្នាល់នេះ»។
ប៉ុន្តែលោក ឡៅ ម៉ុងហៃ ថ្លែងថា វាមិនធ្វើឲ្យភាគីទាំង ២ បាក់មុខមាត់ បាត់បង់កិត្តិយស ទេមានភាពក្លាហានវិលត្រឡប់ទៅរកវប្បធម៌នៃការសន្ទនាដែលធ្លាប់ធ្វើឡើងកាលពីឆ្នាំ ២០១៤ ហើយបញ្ចប់ជម្លោះដែលកំពុងកើតមាន។
លោកថា៖ «ពួកគេអាចធ្វើបែបនេះដោយបំណងគឺដើម្បីប្រយោជន៍ជាតិសាសន៍ និងដើម្បីបង្ហាញការលះបង់ដើម្បីជាតិនិងជាកាយវិការគោរពដល់ព្រះពុទ្ធសម្រាប់ថ្ងៃមាឃបូជានៅថ្ងៃទី ១៩ កុម្ភៈនេះ។ អង្គព្រះមហាក្សត្រអាចប្រើបុព្វសិទ្ធិព្រះអង្គដូចមានចែងក្នុងរដ្ឋធម្មនុញ្ញដើម្បីចាប់ផ្ដើមដំណើរការនេះ»។
លោក គិន ភា យល់ថា លោក កឹម សុខា នឹងត្រូវបានដោះលែងនៅថ្ងៃណាមួយ អាស្រ័យលើពេលវេលា។ លោកយល់ថា ពេលមានការដោះលែងជម្រើសលោក កឹម សុខា មិននៅជាមួយលោក សម រង្ស៊ី ទៀតទេគឺលោកអាចមានបក្សថ្មីមួយជាមួយអ្នកដែលស្មោះស្ម័គ្រជាមួយលោក ខណៈដែលលោក សម រង្ស៊ី បន្តនៅក្រៅស្រុក៕