ភ្នំពេញៈ សារព័ត៌មានហ្វ្រេសញូវ ស្និទ្ធនឹងរដ្ឋាភិបាលបន្តបញ្ចេញឃ្លីបសំឡេងសន្ទនារវាង លោក ជុន ច័ន្ទបុត្រ និងឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ ៧០ ដោយកាត់សំឡេងសន្ទនាជាកង់ៗ។ យ៉ាងហោចណាស់មានឃ្លីបមួយប្រហែលជាត្រូវបានកាត់ត។ លោក ជុន ច័ន្ទបុត្របានថ្លែងថា ការសន្ទនាជាមួយឧត្តមសេនីយ៍ឯក ម៉ៅ សុផាន់ គ្រាន់តែជាការងាររបស់កាសែតក្នុងការជួបជាមួយប្រភពព័ត៌មានប៉ុណ្ណោះ។
គិតមកត្រឹមថ្ងៃអាទិត្យទី ១ ខែមេសានេះ យ៉ាងហោចណាស់ឃ្លីបសំឡេងសន្ទនាចំនួន ៥ រវាងលោក ជុន ច័ន្ទបុត្រ និងឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ ៧០ ត្រូវបានសារព័តមាន ហ្វ្រេសញូវ កាត់យកមកបង្ហោះជាបន្តបន្ទាប់។ ឃ្លីបសំឡេងសន្ទនាលើកទី ១ត្រូវបានបង្ហោះ កាលពីថ្ងៃទី ២៧ មីនា ដែលនៅក្នុងឃ្លីបនោះ មានការនិយាយអំពីកម្មវិធីវិទ្យុមួយជាមួយលោក កែម ឡី។
នៅក្នុងឃ្លីបនោះ លោក ជុន ច័ន្ទបុត្រ និយាយថា លោកបានធ្វើ show មួយជាមួយលោក កែម ឡី ដែល show នោះនិយាយថា៖ «យើងសំណាងហើយដែលគណបក្សប្រឆាំងអត់ឈ្នះឆ្នោត បើគណបក្សឈ្នះឆ្នោតមិនដឹងថា ប្រទេសជាតិដល់ប៉ុណ្ណាទេ។ ហើយលោក សម រង្ស៊ី អឺ.. គឺ អឺ...ផ្តាច់ការជាងលោក ហ៊ុន សែន ទៀតគឺ show ខ្ញុំ»។
នៅថ្ងៃទី ២៨ មីនា ហ្វ្រេសញូវ បានបញ្ចេញការសន្ទនាអំពីការទទួលលោក ជុន ច័ន្ទបុត្រពីព្រលានយន្តហោះ ដោយឲ្យកម្លាំងស្លៀកពាក់ស៊ីវិលក្មេងៗទៅទទួល។ នៅថ្ងៃទី២៩ មីនា ហ្វ្រេសញូវ បានបញ្ចេញសំឡងសន្ទានារដែលក្នុងនោះ លោក ច័ន្ទបុត្រ និយាយថា គណបក្សប្រឆាំងអត់មានគោលការណ៍អ្វីក្រៅពីយកពាក្យយួនទៅប្រើនៅក្រៅប្រទេស ដើម្បីប្រមូលលុយពីខ្មែរនៅក្រៅប្រទេសតែប៉ុណ្ណោះ។
នៅថ្ងៃទី៣០ មីនា នៅក្នុងឃ្លីបទី៤ ដែលបង្ហោះនោះ លោក ជុន ច័ន្ទបុត្រនិយាយថា គោលការណ៍របស់អាស៊ីសេរីមិនរាយការណ៍ពីអាមេរិកាំងទេ ប៉ុន្តែមានកាសែតផ្សេងទៀតដែលរាយការណ៍រិះគន់អាមេរិកាំង។ ចំណែកឃ្លីបវីដេអូចុងក្រោយ ដែលទម្លាយនៅថ្ងៃទី ១ មេសានេះ ហ្វ្រេសញូវបញ្ចេញសំឡេងមួយទៀតដែលទំនងជាមានការកាត់ត។ ក្នុងឃ្លីបនេះ លោកជុន ច័ន្ទបុត្រនិយាយថា លោកធ្វើអ្វីគ្រប់យ៉ាងដើម្បីប្រយោជន៍ជាតិទាំងមូល មិនមែនដើម្បីគណបក្សប្រឆាំងឡើយ។
លោកនិយាយថា៖«ស្បថចំពោះមុខបងឲ្យស្លាប់ អត់មានទេ។ អត់ត្រូវការអ្វីពីអ្នកឯង អត់ត្រូវការផលប្រយោជន៍ពីអ្នកឯង ឃើញពួកខ្ញុំជិតស្និទ្ធជាងអាស៊ីសេរីជិតស្និទ្ធជាង ធ្វើម៉េចគេត្រូវការយើង គេរត់មករកយើងបង។ គេរត់មករកយើងគេចេះប្រើយើង។ ពួកគណបក្សប្រឆាំងគេចេះប្រើកាសែតណាស់។ យើងណាត់សុំជួបគេបាន។ យើងណាត់សុំជួបរដ្ឋាភិបាលអត់បានទេ គេមើលមកយើងដូចគណបក្សប្រឆាំងបាត់ហើយហ្នឹង»។
នៅចុងបញ្ចប់នៃឃ្លីបចុងក្រោយនេះ ទំនងជាមានការកាត់តសំឡេងលោក ជុន ច័ន្ទបុត្រ ដោយឃ្លីបនេះបានយកសម្តីរបស់លោកច័ន្ទបុត្រ ដែលថ្លែងក្នុងឃ្លីបទី ១ ដែលលោកនិយាយថា៖«យើងសំណាងហើយដែលគណបក្សប្រឆាំងអត់ឈ្នះឆ្នោត បើគណបក្សឈ្នះឆ្នោតមិនដឹងថាប្រទេសជាតិដល់ប៉ុណ្ណាទេ។ ហើយលោក សម រង្ស៊ី អឺ.. គឺ អឺ...ផ្តាច់ការជាងលោក ហ៊ុន សែន ទៀតគឺ show ខ្ញុំ»។
រហូតមកទល់ពេលនេះ ភ្នំពេញ ប៉ុស្តិ៍មិនទាន់អាចសុំការបំភ្លឺពីឧត្តមសេនីយ៍ឯក ម៉ៅ សុផាន់ បាននៅឡើយ។
លោក ជុន ច័ន្ទបុត្រ ដែលកំពុងមានវត្តមាននៅប្រទេស អូស្ត្រាលី បានថ្លែងប្រាប់ភ្នំពេញ ប៉ុស្តិ៍ កាលពីថ្ងៃអាទិត្យថា ជំនួបរបស់លោកជាមួយឧត្តមសេនីយ៍ឯក ម៉ៅ សុផាន់ គឺគ្រាន់តែជាការជួបជាមួយប្រភពព័ត៌មានដែលអ្នកកាសែតតែងធ្វើជាធម្មតាប៉ុណ្ណោះ។
លោក ជុន ច័ន្ទបុត្រ ថ្លែងថា ឧត្តមសេនីយ៍ឯក ម៉ៅ សុផាន់ គឺជាប្រភពព័ត៌មានពីខាងក្នុងរដ្ឋាភិបាលយ៉ាងសំខាន់មួយរបស់លោក ដោយសារតែអ្វីដែលឧត្តមសេនីយ៍ ម៉ៅ សុផាន់ បានផ្ញើរទៅលោកនាយករដ្ឋមន្ត្រីហ៊ុន សែន ដូចជាសំឡេងសន្ទនារបស់អ្នកនយោបាយបក្សប្រឆាំង គឺលោក ម៉ៅ សុផាន់ បានផ្ញើរមកលោកដូចគ្នា តាមរយៈលោក រដ្ឋា វិសាល។
លោក ជុន ច័ន្ទបុត្រ បន្តថា កាលពីលោកមកស្រុកខ្មែរខែមីនា ឆ្នាំមុន លោកបានជួបជាមួយឧត្តមសេនីយ៍ ម៉ៅ សុផាន់ ដោយមានការអនុញ្ញាតពីស្នាក់ការកណ្ដាលរបស់អាស៊ីសេរី ហើយការសន្ទនានោះត្រូវបានគេថតសំឡេងទុកដោយប្រើមានទូរស័ព្ទ Iphone ចំនួន ៣ គ្រឿងនិងប្រដាប់ថតសំឡេងមួយ។ លោកថា អ្វីដែលហ្វ្រេសញូវបានបញ្ចេញត្រូវបានគេកាត់តជាច្រើនកន្លែង។
លោក ច័ន្ទបុត្រ និយាយថា៖ «គាត់ចោទអាស៊ីសេរីថា មិនឯករាជ្យ ឬ គាំទ្រគណបក្សប្រឆាំង ប៉ុន្តែខ្ញុំបានប្រាប់គាត់ថា មិនមែនទេ។ យើងបានចាក់សំឡេងបទសម្ភាសដែលខ្ញុំបានធ្វើជាមួយលោកបណ្ឌិត កែម ឡី ដែលលោកបានរិះគន់ លោក សម រង្ស៊ី»។
ទាក់ទងនឹងការផ្តល់ការការពារសន្តិសុខវិញ លោក ជុន ច័ន្ទបុត្រ និយាយថា លោកមិនជឿថា វាជាការបារម្ភពិតប្រាកដទេ។ លោកយល់ថា វាគ្រាន់តែជាការទិញទឹកចិត្តប៉ុណ្ណោះ។
លោក ច័ន្ទបុត្រ បន្តថា៖«ខ្ញុំនិយាយម្តងហើយម្តងទៀតថា ទេ! អាស៊ីសេរីបានរៀបចំការពារសុវត្ថិភាពខ្ញុំហើយ ខ្ញុំសូមអរគុណច្រើន។ខ្ញុំគិតថា ពួកគេចង់ទិញខ្ញុំ គឺទិញទឹកចិត្តខ្ញុំ»។ លោកច័ន្ទបុត្រ បន្ថែមថា ឧត្តមសេនីយ៍ ម៉ៅ សុផាន់ បាននិយាយត្រង់ជាមួយគាត់ថា «គាត់ចង់ឲ្យខ្ញុំធ្វើការឲ្យលោកនាយករដ្ឋមន្ត្រី ប៉ុន្តែខ្ញុំនិយាយថា អត់ទេ ខ្ញុំមានការងារហើយ ហើយជាការងារប្រពៃ ខ្ញុំអាចនៅឯករាជ្យបាន»។
លោក ជុន ច័ន្ទបុត្រ ពន្យល់ថា ចំពោះការមិនផ្សាយព័ត៌មានអំពីសហរដ្ឋអាមេរិក ជាគោលការណ៍វិទ្យុអាស៊ីសេរីមិនរាយការណ៍ព័ត៌មាននៅក្រៅប្រទេសទេ គឺរាយការណ៍តែព័ត៌មានពាក់ព័ន្ធនឹងប្រទេសកម្ពុជាប៉ុណ្ណោះ។
ការបន្តទម្លាយសំឡេងសន្ទនារបស់លោក ជុន ច័ន្តបុត្រនេះមានឡើងក្រោយពេលដំណើររបស់លោកនាយករដ្ឋមន្ត្រី ហ៊ុន សែន ទៅចូលរួមជំនួបកំពូល អាស៊ាន-អូស្ត្រាលី កាលពីខែមុន ដោយលោកនាយករដ្ឋមន្ត្រីហ៊ុន សែន ថាលោក ជុន ច័ន្ទបុត្រ ធ្លាប់ជាចារកម្មរបស់លោក។
លោក Rohit Mahajan ប្រធានកិច្ចការសាធារណៈរបស់វិទ្យុអាស៊ីសេរីនៅបានប្រាប់ភ្នំពេញ ប៉ុស្តិ៍តាមអ៊ីម៉ែលថា លោក ជុន ច័ន្ទបុត្រ មិនបានបំពានគោលការណ៍របស់អាស៊ីសេរីទេ ក្នុងការជួបជាមួយប្រភពព័ត៌មាន។ លោកថា លោកជុន ច័ន្ទបុត្រ បានរាយការណ៍គ្រប់ជំហានទៅកាន់អាស៊ីសេរី អំពីទំនាក់ទំនងជាមួយឧត្តមសេនីយ៍ ហ៊ុន ម៉ាណែត និងជាជាមួយឧត្តមសេនីយ៍ ម៉ៅ សុផាន់។
លោក ហង្ស វិទូ អ្នកវិភាគមួយរូបយល់ថា ការលួចថតសំឡេងហើយយកវាមកទំលាយនេះគឺជាការរំលោភលើសិទ្ធិឯកជន និងជាបទបរិហាកេរ្តិ៍។ លោកថា នៅការទម្លាយនេះហាក់ដូចជាការរៀបចំដោយសារព័ត៌មានណាមួយទម្លាយឯកសារដើម្បីបរិហាកេរ្តិ៍ជាសាធារណៈ។
លោក ថ្លែងថា៖«ខ្ញុំយល់ឃើញថា នយោបាយនៅស្រុកខ្មែរយើងចូលចិត្តតែរឿងលាបពណ៌ដើម្បីបន្សាបនយោបាយ។ ទាំងគណបក្សប្រឆាំងទាំងគណបក្សកាន់អំណាច ចូលចិត្តលាបពណ៌គ្នាទៅវិញទៅមក។ បើយើងចាក់គេ គេចាក់យើងវិញ។ គណបក្សប្រជាជនកម្ពុជាព្យាយាមបន្សាបឥទ្ធិពលអាស៊ីសេរី ហើយអាស៊ីសេរីក៏ព្យាយាមបន្សាបឥទ្ធិពលគណបក្សកាន់អំណាច»៕