.jpg)
លោក ហ៊ុន សែន នាយករដ្ឋមន្ដ្រីកម្ពុជា។ SPM
ភ្នំពេញៈ លោក ហ៊ុន សែន នាយករដ្ឋមន្ដ្រីកម្ពុជានៅព្រឹកថ្ងៃទី ៨ ខែឧសភានេះបានបន្តអំពាវនាវ និងសំណូមពរដល់ម្ចាស់ផ្ទះជួលរួមទាំងអគ្គិសនីកម្ពុជា និងរដ្ឋាករទឹកផងឱ្យផ្អាកយកប្រាក់ថ្លៃជួលជាបណ្តោះអាសន្នពីកម្មករកម្មការិនីដែលរស់នៅក្នុងតំបន់ក្រហម ឬតំបន់បិទខ្ទប់។
នេះបើតាមការថ្លែងសារពិសេសរបស់លោកនាយករដ្ឋមន្ដ្រីទៅកាន់ជនរួមជាតិពាក់ព័ន្ធទៅនឹងការផ្អាកយកថ្លៃឈ្នួលផ្ទះ និងថ្លៃទឹក ថ្លៃភ្លើង របស់កម្មករ កម្មការិនី ដែលកំពុងស្ថិតក្នុងតំបន់បិទខ្ទប់តំបន់ក្រហម នៅថ្ងៃទី ៨ ខែឧសភា ឆ្នាំ ២០២១ នេះ។
លោក ហ៊ុន សែន បានថ្លែងថា ទាក់ទិនទៅនឹងបញ្ហាថ្លៃផ្ទះជួលរបស់កម្មករ កម្មការិនី ក្នុងប៉ុន្មានថ្ងៃកន្លងទៅនេះ ជាពិសេសម្សិលមិញនេះគឺមានការទាមទារយកប្រាក់ថ្លៃឈ្នួលផ្ទះពីកម្មករ កម្មការិនី ខណៈពួកគាត់មិនទាន់បានបើកប្រាក់ខែ ហើយកំពុងស្ថិតនៅក្នុងតំបន់បិទខ្ទប់ តំបន់ក្រហមនៅឡើយ។
លោកនាយករដ្ឋមន្ដ្រីបានបញ្ជាក់ថា៖ «ក្នុងស្ថានភាពបែបនេះខ្ញុំសូមអង្វរករ ចំពោះម្ចាស់ផ្ទះសំណាក់ ផ្ទះជួលទាំងអស់ យោគយល់ដល់ការលំបាករបស់កម្មករ កម្មការិនីរបស់យើង ក្នុងពេលវេលាមួយដែលយើងទាំងអស់គ្នាសុទ្ធតែជួបការលំបាក»។
លោកបានបន្ថែមថា៖ «ក្នុងរយៈពេលកន្លងទៅនេះក៏មានម្ចាស់ផ្ទះមួយចំនួនបានសម្រេចមិនយកប្រាក់ឈ្នួលរបស់កម្មករកម្មការិនីក្នុងចំនួនមួយរយៈ ឬក៏បញ្ចុះថ្លៃ និងមានមួយចំនួនទៀតគឺបានឱ្យប្រើប្រាស់ក្នុងរយៈពេលវែងដែលខ្ញុំបានធ្វើលិខិតថ្លែងអំណរគុណរួចហើយ។ ក៏ប៉ុន្ដែក៏នៅសេសសល់បងប្អូនមួយចំនួនដោយខ្វះការយោគយល់បង្កើតឱ្យមានបញ្ហាឡើង ដែលម្សិលមិញនេះមានការប្រញាប់ប្រញាល់ទៅធ្វើការដោះស្រាយនៅទីកន្លែងនោះ»។
ទាក់ទងនឹងបញ្ហានេះ លោកនាយករដ្ឋមន្ដ្រីបានសូមអង្វរករចំពោះម្ចាស់ផ្ទះសំណាក់ផ្ទះជួលទាំងឡាយសូមផ្អាកជាបណ្ដោះអាសន្ននូវការយកប្រាក់ឈ្នួលពីកម្មករកម្មការិនី ក្នុងពេលដែលកម្មករ កម្មការិនី មិនទាន់បានបើកប្រាក់ឈ្នួលពីថៅកែនៅឡើយ។
លោកបានបន្តថា ប្រសិនបើម្ចាស់ផ្ទះជួលទាំងឡាយអាចនឹងធ្វើទៅបានរួមគ្នាធ្វើ ដើម្បីជួយដល់កម្មករ កម្មការិនីរបស់យើង ។ ឧទាហរណ៍ ការបញ្ចុះថ្លៃប្រាក់ឈ្នួលផ្ទះដែលកម្មករ កម្មការិនីបាននិងកំពុងស្នាក់នៅក្នុងចំនួនប៉ុន្មានភាគរយ ចំនួនតិច ឬចំនួនច្រើន តាមលទ្ធភាពដែលអាចធ្វើទៅបាន ហើយប្រសិនបើម្ចាស់ផ្ទះជួលខ្លះ អាចលើកលែងទៅបានក្នុង ១ ខែ ២ ខែ ឬ ៣ ខែ ក៏សូមធ្វើការលើកលែង។
លោកនាយករដ្ឋមន្ដ្រីបានបញ្ជាក់យ៉ាងដូច្នេះថា៖ «ពិតហើយខ្ញុំដឹងថា ម្ចាស់ផ្ទះគឺខ្ចីលុយធនាគារយកមកសាងសង់នូវផ្ទះជួលទាំងនោះ បងប្អូនពិតជាមានការលំបាកដូចគ្នា ដែលម្ខាងជាកូនបំណុល ម្ខាងទៀតជាម្ចាស់បំណុល។ ប៉ុន្ដែសង្ឃឹមថា ម្ចាស់ផ្ទះជួលទាំងអស់នឹងអាចយោគយល់បាននូវការលំបាករួម»។
បើតាមលោកនាយករដ្ឋមន្ដ្រី ស្ថានភាពនេះមិនមែនតែនៅទីក្រុងភ្នំពេញទេ បើអាចធ្វើបានសូមធ្វើនៅគ្រប់ទីកន្លែងទាំងអស់នៅទូទាំងប្រទេសនៅក្នុងតំបន់ដែលមានការបិទខ្ទប់។
លោកបានបញ្ជាក់ថា៖ «ខ្ញុំនិយាយនេះគឺក្នុងតំបន់បិទខ្ទប់ ហើយកម្មករ កម្មការិនី មិនទាន់បានបើកប្រាក់បៀវត្សរ៍ ប្រាក់ខែ ប្រាក់ថ្លៃឈ្នួលរបស់ខ្លួននៅឡើយសូមឱ្យមានការយោគយល់»។
ជាមួយគ្នានេះលោកនាយករដ្ឋមន្ដ្រីក៏បានបញ្ជាក់ដែរថា សម្រាប់ការបង់ថ្លៃទឹក ថ្លៃភ្លើង ក៏សូមឱ្យអាជ្ញាធរអគ្គិសនី ក្រុមហ៊ុនអគ្គិសនីកម្ពុជា ក៏ដូចជារដ្ឋាករទឹកស្វយ័តរាជធានីភ្នំពេញ ផ្ដោតការយកចិត្ដទុកដាក់ទៅលើបញ្ហាផ្ទះជួលរបស់កម្មករជាមុន ដែលអាចរកដំណោះស្រាយណាមួយ ដើម្បីឱ្យកម្មករ កម្មការិនីដែលរស់នៅតាមផ្ទះជួលនេះទទួលបានការអនុគ្រោះនៅក្នុងការយកថ្លៃទឹកថ្លៃភ្លើងដែលជាការរួមចំណែកជាមួយម្ចាស់ផ្ទះជួលដោះស្រាយបញ្ហារួមរបស់កម្មករកម្មការិនី។
លោកនាយករដ្ឋមន្ដ្រីបានបន្ថែមថា សកម្មភាពនេះមិនរីករាលដាលទៅដល់អ្នកដែលមានផ្ទះហើយប្រើម៉ាស៊ីនត្រជាក់យ៉ាងច្រើននោះទេ។ សូមម្ចាស់ផ្ទះ អ្នកដែលមានបង្ហោះតាមហ្វេសប៊ុកទាក់ទងនឹងការទាមទារទៅលើការអនុគ្រោះថ្លៃទឹកថ្លៃភ្លើង រាជរដ្ឋាភិបាលបានសិក្សាហើយ អ្នកដែលបានបង្ហោះលើហ្វេសប៊ុក ដើម្បីកាត់បន្ថយនេះ មិនមែនកម្មករ កម្មការិនីនោះទេ ក៏ប៉ុន្ដែបែរជាអ្នកដែលប្រើម៉ាស៊ីនត្រជាក់យ៉ាងច្រើន មានស៊ីមានចុក សម្បូរហូរហៀរទៅវិញទេ។
លោកបានបញ្ជាក់ទៀតថា៖ «ប៉ុន្ដែអ្វីដែលខ្ញុំចង់និយាយនេះ គឺកុំឱ្យបែកវាលបែកកាល គឺសំដៅឆ្ពោះទៅរកតែផ្ទះជួល កម្មករ កម្មការិនី តែប៉ុណ្ណោះ សម្រាប់ទាំងម្ចាស់ផ្ទះ សម្រាប់ទាំងក្រុមហ៊ុនអគ្គិសនីកម្ពុជា និងរដ្ឋាករទឹកស្វយ័តរាជធានីភ្នំពេញ។ នេះជាសំណូមពរទី ១ ដែលខ្ញុំសង្ឃឹមថា ម្ចាស់ផ្ទះជួលទាំងអស់នឹងធ្វើការពិនិត្យ ហើយសូមមេត្ដាចូលរួមចំណែកនូវការលំបាកនេះជាមួយកម្មករ កម្មការិនី របស់យើងដែលកំពុងជួបការលំបាកនៅក្នុងតំបន់បិទខ្ទប់ តំបន់ក្រហម ហើយនៅក្នុងតំបន់ផ្សេងទៀត ដែលគាត់មិនទាន់ទទួលបៀវត្សរ៍ណាមួយពីការងាររបស់កម្មករ កម្មការិនី នៅឡើយទេ»។
ជុំវិញបញ្ហានេះរាជរដ្ឋាភិបាលក៏កំពុងតែប្រមូលផ្ដុំ ដើម្បីជួយដឹកស្បៀងអាហារទៅផ្គត់ផ្គង់ដល់កម្មករ កម្មការិនី ដែលរស់នៅតាមផ្ទះជួលទាំងនោះបន្ថែមទៀតផងដែរ៕
