.jpg)
លោកនាយករដ្ឋមន្ត្រី ហ៊ុន សែន នាពេលកន្លងមក។ ហេង ជីវ័ន
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីម្សិលមិញបានអះអាងឲ្យដឹងថា រាជរដ្ឋាភិបាលកម្ពុជាមិនបានរំលោភបំពានសិទ្ធិសេរីភាពរបស់អ្នកសារព័ត៌មានតាមការចោទប្រកាន់របស់ក្រុមអ្នកសារព័ត៌មានមួយក្រុមទាំងក្នុងស្រុក និងក្រៅស្រុករួមទាំងមន្ត្រីទូតមួយចំនួនផងដែរដែលតែងតែទាមទារឲ្យតុលាការទម្លាក់បទចោទ។
លោក ហ៊ុន សែន ថ្លែងថា អ្នកសារព័ត៌មានរូបនោះបានយកប្រពន្ធខ្លួនឯងទៅឲ្យបរទេសសេពកាម ហើយថតខ្លួនឯងទៀត និងបានទៅមានសហាយប្រពន្ធគេទៀតដែលមិននឹកស្មានដល់ ខណៈពេលដែលមានស្ថានទូតខ្លះ ស្ថានទូតមួយចំនួនបានស្នើឲ្យមានការទម្លាក់ការចោទប្រកាន់ពួកគេ ដោយចោទថា កម្ពុជារំលោភសិទ្ធិសេរីភាពសារព័ត៌មានទៅវិញ។
លោកនាយករដ្ឋមន្ត្រីបានថ្លែងទៅកាន់និស្សិត និងមន្ត្រីនៅក្នុងពិធីចែកសញ្ញាបត្រដល់និស្សិតនៃសាកលវិទ្យាល័យ CUS ប្រមាណជិត ៧ ពាន់នាក់កាលពីថ្ងៃពុធ ទី ១១ ខែធ្នូ ដោយមិនបញ្ចេញឈ្មោះអ្នកសារព័ត៌មានរូបនោះ ប៉ុន្តែអះអាងថាតុលាការត្រូវធ្វើការកាត់ទោស អ្នកសារព័ត៌មានម្នាក់ដែលបានប្រព្រឹត្តបទល្មើសជួញដូរផ្លូវភេទដែលទង្វើនោះមិនអាចអត់ឱនឲ្យបាន។ ការកាត់ទោសនេះមិនមែនកាត់ទោសអ្នកសារព័ត៌មានទេ តែជាការកាត់ទោសទៅលើបុគ្គលដែលបានប្រព្រឹត្តបទល្មើសផ្លូវភេទ។
លោក ហ៊ុន សែន ថ្លែងថា៖ «អ្នកសារព័ត៌មាននេះ វាលើសពីសត្វតិរច្ឆានទៀត។ ប្រពន្ធខ្លួនឯងវាយកឲ្យបរទេសសេពកាម។ រួចហើយវាអ្នកថតខ្លួនឯង ហើយមួយទៀតបានទៅសហាយប្រពន្ធគេមួយដែលគេមានប្តីគេនៅខេត្តកំពតហើយវាថតទៀត ខ្ញុំមិនចង់បញ្ចេញឈ្មោះទេ។ ហើយវាធ្វើអ៊ីចឹងមិនឲ្យយើងកាត់ទោសម៉េច។ ពីមុនខ្ញុំចោទសួរហេតុអ្វីមិនលើកលែងការចោទប្រកាន់ឲ្យគ្នាទៅ។ គេអត់កាត់អារឿងសារព័ត៌មាននោះទេ គេកាត់អារឿងអ្នកឯងថតនេះ ហើយកុំថា អារឿងហ្នឹងជារឿងឯកជនណាចេះចុះ ដោយសាររឿងនេះគឺជាការបំពាន»។
លោក អ៊ួន ឈិន អតីតអ្នកសារព័ត៌មានវិទ្យុអាស៊ីសេរីដែលបាននិងកំពុងរង់ចាំសាលក្រមរបស់តុលាការក្រុងភ្នំពេញដែលនឹងសម្រេចថា តើគេមានទោស ឬគ្មានទោសទាក់ទងនឹងបទចោទអំពីអំពើចារកម្មឲ្យសហរដ្ឋអាមេរិក និងបទផលិតវីដេអូអាសអាភាស។ លោក ឈិន ត្រូវបានតុលាការដោះលែងឲ្យនៅក្រៅឃុំបណ្ដោះអាសន្ននាពេលបច្ចុប្បន្ន។
លោក អ៊ី រិន្ទ អ្នកនាំពាក្យនៃសាលាដំបូងរាជធានីភ្នំពេញបានថ្លែងឲ្យដឹងកាលពីម្សិលមិញថា ករណីលោក អ៊ួន ឈិន ចៅក្រមជំនុំជម្រះបានចាត់ឲ្យចៅក្រមស៊ើបសួរពិនិត្យឡើងវិញ ហើយចៅក្រមស៊ើបសួរបាននិងកំពុងតែដំណើរការតាមនីតិវិធីរបស់តុលាការ ហើយសាលាដំបូងរាជធានីភ្នំពេញ មិនអាចបញ្ជាក់នីតិវិធីបានទេដោយសារត្រូវរក្សាការសម្ងាត់នៃការស៊ើបសួរ។
លោក រិន្ទ ថ្លែងថា៖ «ត្រូវការធ្វើការស៊ើបសួរនឹងរកភ័ស្ដុតាងបន្ថែមទៀត (ព្រោះ) ករណីនេះធ្លាប់បានបើកសវនាការហើយក៏ប៉ុន្តែនៅពេលនោះចៅក្រមជំនុំជម្រះបានចាត់របៀបទៅចៅក្រមស៊ើបសួរវិញឲ្យធ្វើការស៊ើបសួរបន្ថែមទៀត ហើយឥឡូវចៅក្រមស៊ើបសួរកំពុងតែដំណើរតាមនីតិវិធី»។
លោក ហ៊ុន សែន បានថ្លែងទៅកាន់លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជាឲ្យយកឃ្លីបវីដេអូចំនួន ២ ឃ្លីបដែលលោក អ៊ួន ឈិន បានថតទុកទៅឲ្យទូតណាដែលចោទថា កម្ពុជាបំពានសិទ្ធិសេរីភាពអ្នកសារព័ត៌មាន ដើម្បីឲ្យពួកគេបានយល់ដឹងពីរឿងពិតប្រាកដដើម្បីកុំឲ្យមានការសង្ស័យតទៅទៀត។
លោក ហ៊ុន សែន ថ្លែងថា៖ «សួរថា តើករណីហ្នឹង តើយើងបំពានលើសេរីភាពសារព័ត៌មានទេ? យើងកាត់ទោសរឿងនេះ ដូច្នេះទូតណានិយាយ គួរតែយកអាវីដេអូហ្នឹងទៅឲ្យទូតហ្នឹងមើលតែម្តងទៅ ហើយយកទាំង ២ ឃ្លីប»៕
