ភ្នំពេញ៖ លោកនាយករដ្ឋមន្ត្រី ហ៊ុន សែន នៅថ្ងៃទី ៩ ខែឧសភានេះ បានផ្ញើលិខិតអបអរសាទរដល់កម្មវិធីចលនានៃក្តីសង្ឃឹមលើកទី៦ និងពិធីប្រកាសគំនិតផ្ដួចផ្តើមបង្កើត «ស្ថាប័នស្រាវជ្រាវឆ្នាំ ២០២២» ដោយបានគាំទ្រដល់អង្គការសហព័ន្ធសន្ដិភាពសកលចំពោះការរៀបចំកិច្ចប្រជុំកំពូល ដែលនឹងប្រារព្ធធ្វើឡើងនៅក្នុងខែវិច្ឆិកា ឆ្នាំ ២០២១។
នៅក្នុងសារលិខិតនោះ លោក ហ៊ុន សែន បានអបអរសាទរចំពោះកម្មវិធីមហាសន្និបាតនៃក្តីសង្ឃឹមលើកទី៦ និងកម្មវិធីប្រកាស «ស្ថាប័នស្រាវជ្រាវឆ្នាំ ២០២២ (THINK TANK 2022)» ជាមួយនឹងថ្នាក់ដឹកនាំស្រលាញ់សន្តិភាពនៅជុំវិញពិភពលោក ដែលរៀបចំឡើងដោយសហព័ន្ធសន្តិភាពសកល (Universal Peace Federation–UPF) ដែលនឹងផ្សព្វផ្សាយដល់អ្នកទស្សនាជុំវិញពិភពលោកជាង ៤០០ លាននាក់។ នេះបើតាមសេចក្ដីប្រកាសព័ត៌មានរបស់រដ្ឋសភាកម្ពុជា។
ក្នុងសារលិខិតអបអរសាទររបស់លោកនាយករដ្ឋមន្រ្ដីបានថ្លែងថា៖ «ខ្ញុំសូមសម្តែងនូវការគាំទ្រ និងអបអរសាទរដល់អង្គការសហព័ន្ធសន្តិភាពសកល ចំពោះការរៀបចំកិច្ចប្រជុំកំពូលឆ្នាំ ២០២១ ស្ដីពីសន្តិភាពនៅឧបទ្វីបកូរ៉េក្នុងខែវិច្ឆិកានាឆ្នាំនេះ។ ខ្ញុំសង្ឃឹមថា យើងនឹងអាចជួបគ្នាដោយផ្ទាល់ក្នុងកិច្ចប្រជុំកំពូលនេះ»។
លោកនាយករដ្ឋមន្រ្ដីបានគូសបញ្ជាក់ថា ការជឿទុកចិត្តគ្នា គឺជាដើមទុនដ៏សំខាន់បំផុតនៅក្នុងដំណើរការនៃការបង្កើតសន្តិភាព និងការផ្សះផ្សាជាតិ។
ដើម្បីទទួលបានការជឿទុកចិត្តនេះ គឺត្រូវការកិច្ចសន្ទនាដ៏ស្មោះត្រង់រវាងអ្នកពាក់ព័ន្ធផ្សេងៗគ្នាទាំងរដ្ឋទាំងស្ថាប័នមិនមែនរដ្ឋ។
លោកបានថ្លែងថា៖ «ខ្ញុំជឿជាក់ថា ស្ថាប័នស្រាវជ្រាវឆ្នាំ ២០២២ ដោយផ្អែកលើប្រាជ្ញារួមគ្នា និងជំនាញរបស់អ្នកជំនាញព្រមទាំងអ្នកអនុវត្តផ្ទាល់មកពីតំបន់ និងពិភពលោកនឹងផ្តល់នូវវិធីសាស្ត្ររួមថ្មីមួយ ឆ្ពោះទៅរកការសម្រេចបាននូវសន្តិភាព និងស្ថិរភាពយូរអង្វែងនៅឧបទ្វីបកូរ៉េ។ យើងចាំបាច់ត្រូវទទួលស្គាល់ថា ការបង្រួបបង្រួមឧបទ្វីបកូរ៉េដោយសន្តិវិធី គឺជាមូលដ្ឋានគ្រឹះនៃសន្តិភាពនៅអាស៊ីបូព៌ា និងពិភពលោកទាំងមូល»។
លោកនាយករដ្ឋមន្រ្ដីបានជំរុញឱ្យមានការលើកកម្ពស់វិធីសាស្ត្របែបពហុវិស័យ និងរួមគ្នាជាធ្លុងមួយ ដើម្បីសម្រេចបាននូវចក្ខុវិស័យនេះ។
បើតាមរដ្ឋសភាកម្ពុជា លោក ហ៊ុន សែន ធ្លាប់បានចូលរួមថ្លែងសុន្ទរកថាគន្លឹះនៅក្នុងកម្មវិធីមហាសន្និបាតនៃក្តីសង្ឃឹមលើកទី១ កាលពីឆ្នាំ ២០២០ ម្តងរួចមកហើយ។
គំនិតផ្តួចផ្តើមសន្តិភាពដែលត្រូវបានសម្ពោធជាផ្លូវការនេះ បានទាក់ទាញចំណាប់អារម្មណ៍របស់មនុស្សរាប់លាននាក់នៅទូទាំងពិភពលោកដោយផ្តោតការយកចិត្តទុកដាក់ទៅលើសន្តិភាពពិភពលោក។
ស្ថាប័នស្រាវជ្រាវឆ្នាំ ២០២២ នឹងជួយជំរុញគំនិតប្រាជ្ញាដល់បណ្តាមេដឹកនាំគំនិត អ្នកជំនាញ និងអ្នកនយោបាយជាប់ឆ្នោតកំពូលៗ ស្របពេលជាមួយនឹងការបន្លឺឡើងនូវសំឡេងរបស់អ្នកដែលយល់ពីតម្លៃនៃសេរីភាព ជំនឿជាក់ សេចក្តីសុខ សុភមង្គលគ្រួសារ និងការរស់នៅដើម្បីជាប្រយោជន៍ដល់មនុស្សយើងទាំងអស់គ្នា៕