The Phnom Penh Post Search

Search form




Logo of Phnom Penh Post newspaper Phnom Penh Post - លោក​នាយក​រដ្ឋមន្ត្រី​ថា ​នឹង​មិន​ឲ្យ​អាជីវករ​ផ្សារ​លើ​បង់​ថ្លៃ​តូប​ចាប់​ពី​ឆ្នាំ ២០២៥

លោក​នាយក​រដ្ឋមន្ត្រី​ថា ​នឹង​មិន​ឲ្យ​អាជីវករ​ផ្សារ​លើ​បង់​ថ្លៃ​តូប​ចាប់​ពី​ឆ្នាំ ២០២៥

លោក​នាយក​រដ្ឋមន្ត្រី​ក្នុង​ពេល​ចុះ​ជួប​ពលរដ្ឋ​នៅ​កំពង់ឆ្នាំង​កាលពី​ម្សិលមិញ។
លោក​នាយក​រដ្ឋមន្ត្រី​ក្នុង​ពេល​ចុះ​ជួប​ពលរដ្ឋ​នៅ​កំពង់ឆ្នាំង​កាលពី​ម្សិលមិញ។ ហ្វេសប៊ុក

លោក​នាយក​រដ្ឋមន្ត្រី​ថា ​នឹង​មិន​ឲ្យ​អាជីវករ​ផ្សារ​លើ​បង់​ថ្លៃ​តូប​ចាប់​ពី​ឆ្នាំ ២០២៥

កំពង់ឆ្នាំងៈ លោក​នាយក​រដ្ឋមន្ត្រី ហ៊ុន សែន បាន​ប្រកាស​ថា​នឹង​ឱ្យ​អាជីវករ​នៅ​ផ្សារ​លើ​ខេត្ត​កំពង់ឆ្នាំង​លក់ដូរ​ដោយ​មិន​បង់​ថ្លៃ​ជួល​តូប​ចាប់​ពី​ឆ្នាំ ២០២៥ ដល់ ឆ្នាំ ២០៤០ បន្ទាប់ពី​បញ្ចប់​កិច្ចសន្យា​វិនិយោគ​ជាមួយ​ក្រុមហ៊ុន​ឯកជន​ជា​អ្វី​ដែល​លោក​លើក​ឡើង​ថា​ដើម្បី​កាត់​បន្ថយ​ការ​ចំណាយ​របស់​អាជីវករ ខណៈ​ដែល​អ្នក​តាមដាន និង​វិភាគ​សង្គម​យល់​ឃើញ​ថា​ជា​ការ​ស្ដារ​ប្រជាប្រិយភាព។

ការ​សន្យា​នេះ​បាន​ធ្វើ​ឡើង​កាល​ពី​ម្សិលមិញ​ក្នុង​ពេល​ដែល​លោក​ចុះ​ទៅ​ជួប​សួរសុខទុក្ខ​ប្រជាពលរដ្ឋ​ជាមួយ​មន្ត្រី​រាជការ និង​កងកម្លាំង​ប្រដាប់អាវុធ​ក្នុង​ខេត្ត​កំពង់ឆ្នាំង និង​បន្ត​ទៅ​ខេត្ត​ពោធិ៍សាត់​ដើម្បី​ពិនិត្យ​មើល​សមិទ្ធផល​ជាតិ​នានា និង​ដោះស្រាយ​បញ្ហា​ប្រឈម​មួយ​ចំនួន​របស់​ប្រជាពលរដ្ឋ។

ក្នុង​ទំព័រ​ហ្វេសប៊ុក​របស់​លោក​នាយករដ្ឋមន្ត្រី​បាន​លើក​ឡើង​ថា៖ «ក្រោយ​ពី​បាន​ពិភាក្សា​ជាមួយ​អភិបាល​ខេត្ត​កំពង់ឆ្នាំង​រួច​ហើយ​គឺ​បាន​សម្រេច​ថា​ក្រោយ​ពេល​ក្រុមហ៊ុន​ឯកជន​បញ្ចប់​កិច្ចសន្យា​វិនិយោគ​នៅ​ឆ្នាំ ២០២៥ រួច​ហើយ​គឺ​នឹង​ផ្តល់​ឱ្យ​បងប្អូន​អាជីវករ​លក់ដូរ​នៅ​ផ្សារ​លើ​ទីរួមខេត្ត​កំពង់ឆ្នាំង​ដោយ​មិន​តម្រូវ​ឲ្យ​បង់​ថ្លៃ​តូប​ចាប់​ពី​ឆ្នាំ ២០២៥ ដល់​ឆ្នាំ​ ២០៤០»។

កាលពី​ចុង​ខែ​កក្កដា​លោក ហ៊ុន សែន បាន​ប្រកាស​ថា​នឹង​ចុះ​ជួប​សំណេះ​សំណាល​ជាមួយ​ពលរដ្ឋ​មន្ត្រីរាជការ កងកម្លាំង​ប្រដាប់​អាវុធ​ទាំង ២៥ ខេត្ត​ក្រុង​ទូទាំង​ប្រទេស។

លោក​បាន​ថ្លែង​ថា៖ «ខ្ញុំ​ត្រូវ​ពិនិត្យ​ទាំង​បញ្ហា​ជឿនលឿន និង​បញ្ហា​ដែល​នៅ​សេសសល់​ដែល​ត្រូវ​បន្ត​ដោះស្រាយ​ព្រោះ​វា​ជាង​ពាក់​កណ្ដាល​អាណត្តិ​ហើយ​អ៊ីចឹង​ត្រូវ​ដើរ​ពិនិត្យ​តាម​ខេត្ត​នានា​បន្ត​ទៀត»។

ប្រធាន​មន្ទីរ​សេដ្ឋកិច្ច និង​ហិរញ្ញវត្ថុ​ប្រចាំ​ខេត្ត​កំពង់ឆ្នាំង​លោក អ៊ូ ជួបកុសល បញ្ជាក់​ថា​នៅ​ពេល​បញ្ចប់​កុងត្រា​អាជីវករ​អាច​បន្ត​ការ​លក់ដូរ​របស់​ខ្លួន​ជា​ធម្មតា​តែ​តម្រូវ​ឱ្យ​បង់​តែ​ថ្លៃ​ភាស៊ី​ប៉ុណ្ណោះ។

លោក​ថា៖ «សម្តេច​គាត់​ចង់​និយាយ​ថា​ពេល​ចប់​ឆ្នាំ ២០២៥ ផ្សារ​នោះ​ក្លាយ​ជា​របស់​រដ្ឋ​ជា​អ្នក​គ្រប់គ្រង​វិញ​ហើយ​ការ​លក់ដូរ​បន្ត​ធម្មតា​តែ​បង់​ភាស៊ី​ពន្ធ​អាករ​ជាប់​ដដែល​ដក​តែ​អាណត្តិ​តូប​ទេ​ពោល​គឺ​ពី​មុន​គាត់​ត្រូវ​បង់​ប្រាក់​ប្រចាំ​ខែ​ដល់​ក្រុមហ៊ុន​តែ​ក្រោយ​បញ្ចប់​កិច្ចសន្យា​លែង​បង់​ថ្លៃ​ជួល​តូប​ហើយ»។

តែ​លោក​បញ្ជាក់​ថា​បច្ចុប្បន្ន​រដ្ឋ​នៅ​បន្ត​យក​លុយ​ថ្លៃ​ភាស៊ី​ពី​ម្ចាស់​តូប​ដដែល​អាស្រ័យ​លើ​ទំហំ​តូប​ចាប់​ពី​ ២០០ ទៅ ៣០០ រៀល។

បើ​តាម​លោក អ៊ូ ជួបកុសល ផ្សារ​លើ​ខេត្ត​កំពង់ឆ្នាំង​មាន​ចំនួន ៦៤៨ តូប​ដែល​បាន​ធ្វើការ​វិនិយោគ​ជាមួយ​ក្រុមហ៊ុន​ឯកជន​ក្នុង​ស្រុក​ពីរ​ដំណាក់កាល​ចាប់​ពី​ឆ្នាំ ១៩៩៥ ដល់​ឆ្នាំ ២០០៦ និង​ដំណាក់កាល​ទី​ពីរ​ចាប់​ពី​ឆ្នាំ ២០០៧ ដល់​ឆ្នាំ ២០២៥។

យុទ្ធនាការ​របស់​ប្រធាន​គណបក្ស​ប្រជាជន និង​ជា​ថ្នាក់ដឹកនាំ​រដ្ឋាភិបាល​លោក ហ៊ុន សែន ត្រូវ​បាន​ក្រុម​អ្នក​តាមដាន​ព្រឹត្តិការណ៍ និង​វិភាគ​សង្គម​លោក មាស នី មើល​ឃើញ​ថា​ធ្វើ​ឡើង​ដើម្បី​ស្តារ​ប្រជាប្រិយភាព​ឡើង​វិញ​ខណៈ​ការ​បោះឆ្នោត​ជិត​មក​ដល់​បន្ទាប់​ពី​ការ​បោះឆ្នោត​សកល​កាល​ពី​ឆ្នាំ ២០១៣ គណបក្ស​កាន់​អំណាច​មួយ​នេះ​បាន​បាត់​សន្លឹក​ឆ្នោត​យ៉ាង​ច្រើន​សន្ធឹក​សន្ធាប់​ទៅ​គណបក្ស​សង្គ្រោះ​ជាតិ។

លោក មាស នី ធ្លាប់​បាន​ថ្លែង​ថា៖ «អ្វី​ដែល​ជា​កត្តា​សំខាន់​គឺ​ចង់​ស្តារ​ប្រជាប្រិយភាព​ឡើង​វិញ​គឺ​ការ​ពង្រឹង​ចាប់​ចេញ​ពី​មន្ត្រី​រាជការ​សិន​ព្រោះ​មន្ត្រី​រាជការ​មាន​រាប់​សែន​នាក់​ហើយ​មន្ត្រី​រាជការ​មាន​តួនាទី​សំខាន់​ក្នុង​ការ​ផ្តល់​ការ​គាំទ្រ​ក្នុង​ការ​បោះឆ្នោត​អ៊ីចឹង​បើ​កាលណា​មន្ត្រីរាជការ​គាត់​បាត់បង់​ទំនុក​ចិត្ត​អ៊ីចឹង​គេ​នឹង​មិន​បោះឆ្នោត​ឱ្យ​ដែរ»។

ទោះបី​យ៉ាង​ណា​នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​លោក សន ជ័យ បាន​ស្វាគមន៍​ចំពោះ​ការ​សន្យា​នេះ​ដែល​នឹង​ជួយ​កាត់​បន្ថយ​ការ​ចំណាយ​ខណៈ​លោក​ជំរុញ​ឱ្យ​នាយក​រដ្ឋមន្ត្រី​ជួយ​អន្តរាគមន៍​បញ្ហា​ដីធ្លី​ក្នុង​ខេត្ត​នោះ​ផង​ដែរ។

លោក​បាន​បន្ត​ថា៖ «អាជីវករ​លក់ដូរ​តាម​ផ្សារ​រដ្ឋ​តម្រូវ​ឱ្យ​បំពេញ​កាតព្វកិច្ច​ច្រើន​ណាស់​ទាំង​ភាស៊ី​ផ្សារ​ផង​ថ្លៃ​តូប​ផង​អ៊ីចឹង​ទាំងអស់​នេះ​ជា​មូលហេតុ​ឱ្យ​ទំនិញ​ទីផ្សារ​ឡើង​ថ្លៃ​ដែរ​ព្រោះ​អាជីវករ​ចំណាយ​ច្រើន​ពេក​អ៊ីចឹង​គាត់​ធ្វើ​ម៉េច​រក​មធ្យោបាយ​ឱ្យ​បាន​ចំណេញ​ច្រើន​យក​ទៅ​បំពេញ​កាតព្វកិច្ច​របស់​ខ្លួន»។

លោក​បាន​បន្ថែម​ថា៖ «ទន្ទឹម​នឹង​ការ​ដោះស្រាយ​ជូន​អាជីវករ​ក្នុង​ផ្សារ​ខ្ញុំ​ចង់​ឱ្យ​នាយក​រដ្ឋមន្ត្រី ហ៊ុន សែន គួរ​ពិនិត្យ​មើល​ករណី​ទំនាស់​ដីធ្លី​នៅ​ឡពាង​ដែល​ជា​ទំនាស់​ដ៏រ៉ាំរ៉ៃ​ដ៏ធំ​មួយ​នៅ​ក្នុង​ខេត្ត​នេះ​ជាមួយ​អ្នក​មាន​អំណាច​ដើម្បី​ឱ្យ​ប្រជាពលរដ្ឋ​មើល​ឃើញ​ថា​នាយក​រដ្ឋមន្ត្រី​ពិតជា​យក​ចិត្ត​ទុកដាក់​ជាមួយ​ពួកគេ​ពិតមែន​មិន​ត្រឹម​តែ​អាជីវករ​នោះ​ទេ»៕

អត្ថបទគួរចាប់អារម្មណ៍