ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចធ្វើដំណើរទៅទីក្រុងប៉េកាំងដើម្បីសម្ដែងការគួរសមជាមួយភាគីចិន និងស្វែងយល់ពីការយកចិត្តទុកដាក់លើពលរដ្ឋកម្ពុជាដែលកំពុងរស់នៅ និងសិក្សានៅប្រទេសចិន បន្ទាប់ពីរដ្ឋាភិបាលចិនមិនអាចរៀបចំទទួលដំណើរទស្សនកិច្ចរបស់លោកដែលចង់ទៅទីក្រុងវូហានជាទីដែលមានការផ្ទុះជំងឺកូរ៉ូណា។
កាលពីថ្ងៃអង្គារ លោកនាយករដ្ឋមន្ត្រី ហ៊ុន សែន បានឆ្លើយតបជាមួយនឹងអ្នករិះគន់ដោយបានប្រកាសថា លោកនឹងធ្វើដំណើរទៅកាន់ទីក្រុងវូហានដើម្បីសួរសុខទុក្ខក្រុមនិស្សិតខ្មែរចំនួន ២៣ នាក់ ដែលកំពុងជាប់គាំងនៅទីក្រុងនេះ បន្ទាប់ពីកម្ពុជាបានប្រកាសមិននាំយកនិស្សិតខ្មែរដែលកំពុងស្នាក់នៅទីនោះ មកប្រទេសវិញ។
ជាថ្មីម្តងទៀតបន្ទាប់ពីបញ្ចប់កិច្ចប្រជុំកំពូលពិភពលោកឆ្នាំ ២០២០ នៅប្រទេស កូរ៉េខាងត្បូង លោកនាយករដ្ឋមន្ត្រី ហ៊ុន សែន បានបង្ហោះសារលើទំព័រហ្វេសប៊ុករបស់លោកកាលពីព្រឹកម្សិលមិញថា តាមគម្រោងនៅថ្ងៃទី ៥ កុម្ភៈ លោកគ្រោងនឹងចាកចេញពីប្រទេសកូរ៉េខាងត្បូងឆ្ពោះទៅទីក្រុង វូហាន ខេត្តហឺប៉ី ប្រទេស ចិន ដើម្បីទៅសួរសុខទុក្ខកូនក្មួយនិស្សិតខ្មែរ ២៣ នាក់ ដែលកំពុងសិក្សានៅទីនោះ។
លោកបន្តថា ប៉ុន្តែក្រសួងការបរទេសចិនបានឆ្លើយតបយឺត ហើយថាចិនមិនអាចរៀបចំជូនដល់ការធ្វើដំណើររបស់លោកទៅកាន់ទីក្រុងវូហានបានទេ ព្រោះទីក្រុងនេះបានប្រកាសភាពអាសន្ន បិទមិនឲ្យមានចរាចរណ៍ឆ្លងកាត់នៅក្នុងតំបន់នេះនៅឡើយ ហើយចំពោះនិស្សិតវិញក៏មិនត្រូវបានអនុញ្ញាតឲ្យចេញក្រៅពីទីកន្លែងរស់នៅបានដែរ។
ជាមួយនឹងការបញ្ជាក់ពីមូលហេតុនេះលោក ហ៊ុន សែន បានសរសេរបន្តថា៖ «ដោយសារមិត្តចិនយល់អំពីការព្រួយបារម្ភរបស់ខ្ញុំចំពោះពលរដ្ឋ និងនិស្សិតខ្មែរដែលកំពុងរស់នៅក្នុងប្រទេស ចិន នៅព្រឹកមិញ (ថ្ងៃពុធ) នេះខាងរដ្ឋាភិបាលចិនបានអនុញ្ញាតឲ្យខ្ញុំធ្វើដំណើរទៅកាន់ទីក្រុងប៉េកាំងដើម្បីបានជួបសម្តែងការគួរសមជាមួយភាគីមិត្តចិន និងបានស្វែងយល់អំពីការយកចិត្តទុកដាក់របស់រដ្ឋាភិបាលចិនចំពោះបងប្អូន និងកូនក្មួយសិស្សនិស្សិតខ្មែរយើងដែលកំពុងរស់នៅ និងសិក្សានៅក្នុងទីក្រុងវូហានក៏ដូចជានៅទូទាំងប្រទេសចិន»។
លោកបន្ថែមថា៖ «ខ្ញុំនឹងដឹកនាំគណៈប្រតិភូកម្ពុជាចាកចេញពីប្រទេស កូរ៉េខាងត្បូង ឆ្ពោះទៅកាន់ទីក្រុងប៉េកាំងមុននឹងធ្វើដំណើរវិលត្រឡប់ទៅកាន់ប្រទេស កម្ពុជា វិញ។ ខ្ញុំសូមអរគុណបងប្អូនជនរួមជាតិ និងកូនក្មួយដែលគោរពស្រឡាញ់ខ្ញុំ និងចង់ឲ្យខ្ញុំមានសុខភាពល្អ។ សូមជូនពរបងប្អូនជនរួមជាតិ និងកូនក្មួយសិស្សនិស្សិតដែលកំពុងរស់នៅក្នុងទីក្រុងវូហាន និងនៅក្នុងប្រទេសចិនទាំងអស់ជួបតែសេចក្តីសុខ សំណាងល្អ និងចៀសផុតពីជំងឺទាំងឡាយ»។
ទាក់ទងនឹងដំណើរទស្សនកិច្ចទៅទីក្រុងប៉េកាំងនេះកាលពីម្សិលមិញក្រសួងការបរទេសកម្ពុជាបានចេញសេចក្តីប្រកាសព័ត៌មានថា ការអញ្ជើញទៅរដ្ឋធានីប៉េកាំងរបស់លោកនាយករដ្ឋមន្ត្រី ហ៊ុន សែន ក្នុងពេលនេះគឺតបតាមការអញ្ជើញរបស់លោក លី កេឈាង នាយករដ្ឋមន្ត្រីនៃក្រុមប្រឹក្សារដ្ឋនៃសាធារណរដ្ឋប្រជាមានិតចិន។
ក្រសួងការបរទេសបានបញ្ជាក់ថា៖ «ក្នុងដំណើរទស្សនកិច្ចនេះ សម្តេចតេជោនាយករដ្ឋមន្ត្រីនឹងមានជំនួបជាមួយលោក លី កេឈាង ដើម្បីពិភាក្សាអំពីកិច្ចសហប្រតិបត្តិការទ្វេភាគីលើវិស័យផ្សេងៗ និងផ្លាស់ប្តូរទស្សនៈគ្នាលើការរីករាលដាលជំងឺឆ្លងផ្លូវដង្ហើមកូរ៉ូណាដែលកំពុងកើតមានឡើងរួមទាំងបញ្ហាមួយចំនួនដែលជាផលប្រយោជន៍រួម និងជួបសម្ដែងការគួរសមជាមួយឯកឧត្តម ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិនផងដែរ»។
សេចក្តីប្រកាសនោះបានបន្តថា ការអញ្ជើញអមដំណើរលោកនាយករដ្ឋមន្ត្រី ហ៊ុន សែន ពីរដ្ឋធានីសេអ៊ូល ប្រទេសកូរ៉េខាងត្បូងទៅទីក្រុងប៉េកាំងប្រទេសចិន រួមមាន លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ មន្ត្រីជាន់ខ្ពស់មួយចំនួននៃរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជា។
និស្សិតខ្មែរម្នាក់ដែលកំពុងរស់នៅទីក្រុង វូហាន លោក ប៉ែន បារាំង បានសរសេរនៅលើទំព័រហ្វេសប៊ុករបស់លោកថា ក្នុងពេលនេះ ប្រសិនបើមាននិស្សិតណាម្នាក់ចេញទៅក្រៅអគារនោះ ខាងរដ្ឋបាលសាលានឹងមិនអនុញ្ញាតឱ្យចូលមកក្នុងអគារវិញទេ ដោយត្រូវទុកអ្នកដែលចេញក្រៅនោះឱ្យនៅកន្លែងដាច់ដោយឡែករយៈពេល ១៥ ថ្ងៃដើម្បីតាមដានសុខភាព។
ដូច្នេះការមិនអញ្ជើញឲ្យលោកនាយករដ្ឋមន្ត្រីមកទីក្រុងវូហានគឺជាការប្រសើរ ខណៈនិស្សិតរូបនេះក៏បារម្ភពីសុវត្ថិភាព និងសុខភាពរបស់លោកនាយករដ្ឋមន្ត្រី ហ៊ុន សែន ដែរនោះ។
លោក ប៉ែន បារាំង សរសេរថា៖ «ជឿកូន លោកពុក (ហ៊ុន សែន) កុំទាន់អញ្ជើញមកសួរសុខទុក្ខខ្ញុំអីក្នុងពេលនេះ ក្រោយចប់ប្រជុំនៅសាធារណរដ្ឋកូរ៉េខាងត្បូងលោកពុកអញ្ជើញធ្វើដំណើរត្រឡប់ទៅផ្ទះវិញចុះ។ សូមគោរពជូនពរលោកពុកធ្វើដំណើរត្រឡប់ទៅផ្ទះយើងវិញប្រកបដោយសុខសុវត្ថិភាព»។
ជំងឺរលាកសួតដែលបង្កឡើងដោយវីរុសកូរ៉ូណាប្រភេទថ្មី (2019nCoV) ត្រូវបានរកឃើញជាលើកដំបូងកាលពីពាក់កណ្តាលខែធ្នូ ឆ្នាំ ២០១៩ នៅទីក្រុងវូហាន (Wuhan) ប្រទេសចិន ហើយគិតត្រឹមថ្ងៃទី ៥ ខែកុម្ភៈ ឆ្នាំ ២០២០ បានសម្លាប់មនុស្សចំនួន ៤៩០ នាក់ និងមានអ្នកឆ្លងជំងឺចំនួន ២៤ ៣២៤ នាក់។ នេះបើតាមសេចក្តីរាយការណ៍របស់សារព័ត៌មាន Cannel News Asia៕