.jpg)
លោកនាយករដ្ឋមន្ត្រី ហ៊ុន សែន ក្នុងជំនួបជាមួយលោកប្រធានាធិបតីចិន ស៊ី ជីនភីង នាពេលកន្លងមក។ រូបថត SPM
ភ្នំពេញ៖ លោកនាយករដ្ឋមន្ត្រី ហ៊ុន សែន បានប្រកាសពីម្សិលមិញថា វ៉ាក់សាំងបង្ការកូវីដ ១៩ ដែលជាជំនួយរបស់ចិននឹងមកដល់កម្ពុជានៅថ្ងៃទី ៧ ខែកុម្ភៈ ហើយរូបលោកនឹងទៅទទួលផ្ទាល់នៅអាកាសយានដ្ឋានអន្តរជាតិភ្នំពេញ ប៉ុន្តែលោកបារម្ភពីការឆ្លងចូលពីវៀតណាម ខណៈខេត្តជាប់ព្រំដែនប្រទេសជិតខាងនេះ កំពុងឆ្លងចូលក្នុងសហគមន៍ និងមានទាំងវីរុសបំប្លែងថ្មីផង។
តាមរយៈសារជាសំឡេង លោក ហ៊ុន សែន បានថ្លែងថា៖ «ជូនចំពោះក្រុមការងារវ៉ាក់សាំង ខ្ញុំបានទទួលព័ត៌មានពីបង ម៉ម ប៊ុនហេង ថា វ៉ាក់សាំងនឹងមកដល់ថ្ងៃទី ៧ គឺថ្ងៃអាទិត្យនេះហើយដូចការប្រកាសរបស់ខ្ញុំកន្លងទៅ គឺខ្ញុំបានបញ្ជាក់ថា ពេលវ៉ាក់សាំងមកដល់ ខ្ញុំនឹងទៅទទួល»។
ជាមួយគ្នានេះលោកក៏បានបញ្ជាឱ្យក្រុមការងាររៀបចំកម្មវិធីទទួលវ៉ាក់សាំងនេះនៅឯអាកាសយានដ្ឋានភ្នំពេញ (ពោធិ៍ចិនតុង) ផងដែរ។ ការប្រកាសរបស់លោកនាយករដ្ឋមន្ត្រីនេះ ធ្វើឡើង ១ ថ្ងៃ បន្ទាប់ពីឯកអគ្គរដ្ឋទូតចិនប្រចាំកម្ពុជា លោក វ៉ាង វិនធាន បានថ្លែងពីថ្ងៃ ៣ កុម្ភៈ ក្នុងពិធីសំណេះសំណាលជាមួយគ្រូពេទ្យចាក់វ៉ាក់សាំងការពារជំងឺកូវីដ ១៩ នៅមន្ទីរពេទ្យព្រះកេតុមាលាថា វ៉ាក់សាំងកូវីដ ១៩ ដែលចិនផ្តល់ជូនកម្ពុជាដំបូងមានចំនួន ៦០ ម៉ឺនដូស ហើយការដឹកជញ្ជូនត្រូវធ្វើតាមយន្តហោះពិសេសរបស់ចិនមកដល់រាជធានីភ្នំពេញនៅចុងសប្តាហ៍នេះ។
គួរបញ្ជាក់ថា រដ្ឋាភិបាលចិនបានសម្រេចផ្តល់ជំនួយវ៉ាក់សាំងបង្ការជំងឺកូវីដ ១៩ ឈ្មោះ ស៊ីណូហ្វាម ចំនួន ១ លានដូស ដល់កម្ពុជាដើម្បីចាក់ជូនពលរដ្ឋដោយឥតគិតថ្លៃ ក្នុងនោះ ៦០ ម៉ឺនដូសនឹងមកដល់កម្ពុជាមុន។ ទន្ទឹមនឹងនេះដែរ កាលពីរសៀលម្សិលមិញ លោក ហ៊ុន សែន ក៏បានថ្លែងតាមរយៈសារជាសំឡេងដែរថា ការព្រួយបារម្ភធំបំផុតរបស់កម្ពុជា គឺការផ្ទុះឡើងនៅក្នុងសហគមន៍ប្រទេសវៀតណាម ដែលចាប់ផ្តើមនៅភាគខាងជើង ភាគកណ្តាល ហើយឥឡូវនេះ គឺឈានមកភាគខាងត្បូងដែលមេរោគនេះ គឺជាការបំប្លែងថ្មី។
លោក ហ៊ុន សែន បានប្រកាសឱ្យបណ្តាខេត្តនៅជាប់ព្រំដែនកម្ពុជាវៀតណាមទាំងអស់ចាប់តាំងពីខេត្តកំពតរហូតដល់ខេត្តរតនគិរី ចាត់វិធានការបន្ទាន់ ទប់ស្កាត់កុំឱ្យមានការឆ្លងទៅឆ្លងមករបស់ប្រជាជនទាំង ២ ប្រទេស (កម្ពុជា និងវៀតណាម)។
លោកបានបញ្ជាក់ថា៖ «ប្រជាជនកម្ពុជាដែលឆ្លងចូលទៅក្នុងប្រទេសវៀតណាមក៏ត្រូវធ្វើចត្តាឡីស័កដោយអាជ្ញាធរវៀតណាម ឯប្រជាជនវៀតណាមដែលឆ្លងចូលមកក្នុងកម្ពុជា ក៏ត្រូវធ្វើចត្តាឡីស័កនៅក្នុងប្រទេសកម្ពុជា ផងដែរ»។
លោកថា ប្រការនេះត្រូវពឹងពាក់ទាំងស្រុងទៅដល់អភិបាលខេត្តសហការជាមួយនឹងកងកម្លាំងប្រដាប់អាវុធឈរជើងត្រូវបិទខ្ទប់ឱ្យខាងតែបានការឆ្លងតាមច្រករបៀងទាំងនៅតាមព្រំដែន និងការត្រួតពិនិត្យនៅខាងក្នុងឱ្យបានហ្មត់ចត់ និងតម្រូវឱ្យរៀបចំកន្លែងធ្វើចត្តាឡីស័កឱ្យបានរឹងមាំបំផុត។
លោក ហ៊ុន សែន បានថ្លែងថា៖ «ខ្ញុំសុំដាក់ចេញនូវបទបញ្ជាជាបន្ទាន់ឱ្យអាជ្ញាធរខេត្តនៅតាមព្រំដែនជាមួយនឹងស្ថាប័នដែលមានការពាក់ព័ន្ធទាំងអស់សហការគ្នាហើយក្រសួងសុខាភិបាលត្រូវផ្គត់ផ្គង់ទៅបណ្តាខេត្តដែលនៅជាប់ព្រំដែនកម្ពុជា-វៀតណាម»។
លោកបានសង្កត់ធ្ងន់ថា អ្វីដែលលោកបារម្ភ គឺការឆ្លងទៅឆ្លងមកក្នុងពិធីបុណ្យចូលឆ្នាំប្រពៃណីចិន និងវៀតណាមដែលលោកតម្រូវឱ្យអាជ្ញាធរពង្រាយកម្លាំងជាបន្ទាន់ ដើម្បីទប់ស្កាត់នៅតាមច្រករបៀងនានា។ ប្រសិនបើមានការធ្វេសប្រហែស ប្រទេសកម្ពុជា នឹងខ្ទេចខ្ទាំទៅដោយកូវីដ ១៩ ដែលរុញច្រានពីប្រទេសថៃ ផង និងប្រទេសវៀតណាម ផង។
ប្រមុខរាជរដ្ឋាភិបាលក៏បានបញ្ជាទៅក្រសួងសុខាភិបាលពិនិត្យ និងពិភាក្សាជាមួយខេត្តទាំងនោះ ដើម្បីរៀបចំកន្លែងធ្វើចត្តាឡីស័កឱ្យបានត្រឹមត្រូវ និងធ្វើការផ្គត់ផ្គង់ដូចដែលបានកំពុងធ្វើនៅទិសខាងលិច (ព្រំដែនកម្ពុជា-ថៃ)។
កាលពីម្សិលមិញនេះដែរ លោក ម៉ម ប៊ុនហេង ក៏បានស្នើឱ្យថ្នាក់ដឹកនាំរាជធានី-ខេត្ត បង្កើនការប្រុងប្រយ័ត្ន និងចាត់វិធានការទប់ស្កាត់ និងបង្ការការនាំចូលវីរុសកូវីដ ១៩ នៅតាមច្រកព្រំដែនកម្ពុជា-វៀតណាម ខណៈនៅវៀតណាមមានផ្ទុះថ្មីចូលសហគមន៍។
លោក ម៉ម ប៊ុនហេង បានឱ្យដឹងថា ផ្អែកតាមព័ត៌មានពីគេហទំព័ររបស់វៀតណាមនៅថ្ងៃទី ៣ ខែកុម្ភៈ ថា ប្រទេសវៀតណាម ថ្មីៗនេះបាននិងកំពុងផ្ទុះឡើងវិញនូវការចម្លងកូវីដ ១៩ ក្នុងសហគមន៍ដោយមានទាំងវីរុសកូវីដ ១៩ បំប្លែងថ្មីពីចក្រភពអង់គ្លេសផង។ ពីថ្ងៃទី ២៨ មករា ដល់ថ្ងៃទី ១ ខែកុម្ភៈ វៀតណាមបានរកឃើញករណីវិជ្ជមានតាមបណ្តាខេត្តមួយចំនួន ហើយមានខេត្តខ្លះជាប់ជាមួយកម្ពុជា។
លោកបានថ្លែងថា៖ «ដូច្នេះសូមអភិបាលរាជធានី-ខេត្តទាំងអស់ ជាពិសេសខេត្តដែលមានព្រំប្រទល់ជាប់ប្រទេសវៀតណាម ដូចជា ខេត្តកំពត តាកែវ កណ្តាល ព្រៃវែង ស្វាយរៀងត្បូងឃ្មុំ ក្រចេះ មណ្ឌលគិរី និងរតនគិរី ត្រូវតែបង្កើនការប្រុងប្រយ័ត្ន និងចាត់វិធានការឱ្យបានម៉ឺងម៉ាត់»។
ចំពោះវ៉ាក់សាំងពីចិន លោក ម៉ម ប៊ុនហេង បានថ្លែងប្រាប់អ្នកសារព័ត៌មានក្នុងពេលលោកដឹកនាំមន្ត្រីចុះពិនិត្យទីតាំងសម្រាប់ទុកវ៉ាក់សាំងកូវីដ ១៩ នៅឃ្លាំងឱសថកណ្តាលចោមចៅថា ការចុះពិនិត្យនេះជាការរៀបចំទុកជាមុន ដើម្បីទទួលវ៉ាក់សាំងកូវីដ ១៩ ពីចិន ដែលប្រមុខរាជរដ្ឋាភិបាលប្រកាសថា ជាទំនិញយុទ្ធសាស្ត្រ។ លោកថា៖ «យើងមកពិនិត្យមើលប្រព័ន្ធត្រជាក់នៅបន្ទប់ដាក់វ៉ាក់សាំងនេះ ដែលនឹងមកនៅចុងអាទិត្យនេះ ដើម្បីទុកដាក់ឱ្យបានត្រឹមត្រូវតាមបច្ចេកទេស ហើយនឹងត្រៀមមធ្យោបាយដឹកជញ្ជូនទៅតាមខេត្ត ឬកន្លែងដែលត្រូវការចាក់វ៉ាក់សាំងជូនដល់បងប្អូនប្រជាពលរដ្ឋយើង»។
លោក ម៉ម ប៊ុនហេង បន្ថែមថា ឃ្លាំងឱសថកណ្តាលចោមចៅនេះ អាចផ្ទុកវ៉ាក់សាំងបាន ៣ លានដូស ដែលជាទីតាំងរបស់ក្រសួង និងកន្លែងស្តុកទុកនៅមន្ទីរពេទ្យព្រះកេតុមាលារៀបចំដោយក្រសួងការពារជាតិ។
ទន្ទឹមគ្នានេះដែរ លោក ម៉ម ប៊ុនហេង ក៏បានចេញលិខិតប្រកាសអនុញ្ញាតឱ្យប្រើប្រាស់នូវវ៉ាក់សាំង Sinopharm Covid-19 ដែលផលិតដោយវិទ្យាស្ថាន Beijing Institute of Biological Products Co.,Ltd នៃសាធារណរដ្ឋប្រជាមានិតចិនក្នុងលក្ខខណ្ឌនៃការប្រើប្រាស់ជាបន្ទាន់ (Emergency Use Authorization) ដោយអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ ១៩ របស់រាជរដ្ឋាភិបាល។
ជុំវិញការចាក់វ៉ាក់សាំងនេះ កាលពី ថ្ងៃទី ៣ កុម្ភៈ រាជរដ្ឋាភិបាលកម្ពុជាបានសម្រេចបង្កើតក្រុមការងារអន្តរក្រសួងគ្រប់គ្រងការអនុវត្តយុទ្ធសាស្ត្រ និងកិច្ចប្រតិបត្តិការចាក់វ៉ាក់សាំងបង្ការកូវីដ ១៩ ក្នុងនោះមានសមាសភាពពីមន្ត្រីជាន់ខ្ពស់នៃក្រសួងសំខាន់ៗមួយចំនួន រួមមាន លោក ម៉ម ប៊ុនហេង រដ្ឋមន្ត្រីក្រសួងសុខាភិបាលជាប្រធាន ក្រសួងការពារជាតិ ក្រសួងមហាផ្ទៃ បណ្ឌិត្យសភានគរបាលកម្ពុជា អគ្គស្នងការដ្ឋាននគរបាលជាតិ និងមជ្ឈមណ្ឌលជាតិគាំពារមាតា និងទារក។
គិតត្រឹមថ្ងៃទី ៤ ខែ កុម្ភៈ ឆ្នាំ ២០២១ កម្ពុជាមានអ្នកមានវីរុសកូវីដ ១៩ ចំនួន ៤៦៧ នាក់ ក្នុងនោះអ្នកព្យាបាលជាសះស្បើយមានចំនួន ៤៥១ នាក់ និងអ្នកកំពុងសម្រាកព្យាបាលមានចំនួន ១៦ នាក់៕
វីដេអូ៖
