The Phnom Penh Post Search

Search form




Logo of Phnom Penh Post newspaper Phnom Penh Post - លោក​នាយក​រដ្ឋមន្ត្រី​នឹង​ទៅ​ទស្សនកិច្ច​នៅ​ប្រទេស​ឡាវ​នា​ចុង​សប្ដាហ៍​នេះ

លោក​នាយក​រដ្ឋមន្ត្រី​នឹង​ទៅ​ទស្សនកិច្ច​នៅ​ប្រទេស​ឡាវ​នា​ចុង​សប្ដាហ៍​នេះ

លោក​នាយក​រដ្ឋមន្ត្រី​នឹង​ទៅ​ទស្សនកិច្ច​នៅ​ប្រទេស​ឡាវ​នា​ចុង​សប្ដាហ៍​នេះ

ភ្នំពេញៈ ប្រមុខ​រាជរដ្ឋាភិបាល​កម្ពុជា​លោក ហ៊ុន សែន នឹង​ដឹកនាំ​គណៈប្រតិភូ​អញ្ជើញ​ទៅ​បំពេញ​ទស្សនកិច្ច​ផ្លូវការ​នៅ​ប្រទេស​ឡាវ​រយៈពេល​ពីរ​ថ្ងៃ​នៅ​ចុង​សប្តាហ៍​នេះ​ដើម្បី​រឹត​ចំណង​មិត្តភាព​រវាង​ប្រទេស​ទាំង​ពីរ និង​លើក​ពី​បញ្ហា​នយោបាយ​ទាំង​ក្នុង​ស្រុក និង​ក្រៅ​ស្រុក​ផង​ដែរ​។

សេចក្តី​ជូន​ដំណឹង​របស់​ក្រសួង​ការបរទេស និង​សហប្រតិបត្តិការ​អន្តរជាតិ​ចេញ​ផ្សាយ​ពី​ម្សិលមិញ​ឱ្យ​ដឹង​ថា​ដំណើរ​ទស្សនកិច្ច​របស់​លោក​នាយក​រដ្ឋមន្ត្រី​ ហ៊ុន​ សែន ធ្វើ​ឡើង​តាម​ការ​អញ្ជើញ​ពី​នាយករដ្ឋមន្ត្រី​នៃ​សាធារណរដ្ឋ​ប្រជាមានិត​ឡាវ​លោក ថងស៊ីង ថាំម៉ាវង្ស ចាប់ពី​ថ្ងៃ​ទី ១២ ​ដល់​ថ្ងៃ​ទី ១៣ ខែ​មីនា​ឆ្នាំ ២០១៦។

បើ​តាម​សេចក្តី​ជូន​ដំណឹង​គណៈប្រតិភូ​​អម​ដំណើរ​នាយក​រដ្ឋមន្ត្រី​រួម​មាន​ប្រធាន​ព្រឹទ្ធសភា​លោក សាយ ឈុំ រដ្ឋមន្ត្រី​ក្រសួង​ការបរទេស​លោក ហោ ណាំហុង រដ្ឋមន្ត្រី​ទទួល​បន្ទុក​ទីស្តីការ​គណៈរដ្ឋមន្ត្រី​លោក សុខ អាន និង​រដ្ឋមន្ត្រី​ក្រសួង​ការពារ​ជាតិ​លោក ទៀ បាញ់។

រដ្ឋមន្ត្រី​ក្រសួង​ការពារ​ជាតិ​លោក ទៀ បាញ់ បាន​ប្រាប់​កាសែត​ភ្នំពេញ​ប៉ុស្តិ៍​បន្ថែម​ថា​ដំណើរ​ទស្សនកិច្ច​នេះ​នឹង​ពិភាក្សា​ផ្នែក​នយោបាយ​ខ្លះ​ និង​ការ​រឹត​ចំណង​មិត្តភាព។

លោក​បញ្ជាក់​​ថា «ជា​ធម្មតា​ប្រទេស​ជិត​ខាង​តែងតែ​មាន​ការ​ជួប​គ្នា​ជា​ប្រចាំ​ដូចជា​ពិភាក្សា​គ្នា​រឿង​នយោបាយ​ក្នុង​ស្រុក នយោបាយ​ក្រៅ​ស្រុក​ដើម្បី​ឱ្យ​មាន​ការ​ឯកភាព​គ្នា​ជា​រឿង​ធម្មតា​ទេ​ពុំ​មាន​អ្វី​ចម្លែក​ទេ»។ យ៉ាង​ណា​ក៏​ដោយ​លោក​បាន​បញ្ជាក់​ថា​ពុំ​ទាន់​មាន​របៀបវារៈ​លម្អិត​នៃ​ដំណើរ​ទស្សនកិច្ច​នោះ​ទេ​ដោយ​រង់ចាំ​វិល​ត្រឡប់​ពី​ប្រទេស​ឡាវ​វិញ​សិន។

ជាមួយ​គ្នា​នេះ​ដែរ​អ្នក​នាំ​ពាក្យ​ទីស្តីការ​គណៈរដ្ឋមន្ត្រី​លោក ផៃ ស៊ីផាន បាន​ថ្លែង​ថា​នៅក្នុង​ដំណើរ​ទស្សនកិច្ច​ដោយ​មាន​ប្រធាន​ព្រឹទ្ធ​សភា​ និង​ជា​អនុប្រធាន​គណបក្ស​ប្រជាជន​កម្ពុជា​លោក សាយ ឈុំ ផង​នោះ​អាច​ជាប់​ពាក់ព័ន្ធ​នឹង​កិច្ចការ​ក្នុង​បក្ស​ច្រើន​។

លោក​ថា​ «ដំណើរ​ទស្សនកិច្ច​ដើម្បី​អបអរ​ស្អី​ខ្ញុំ​អត់​ទាន់​ដឹង​ទេ​ប៉ុន្តែ​មាន​សមាសភាព​ឯកឧត្តម សាយ ឈុំ មួយ​ហើយ​បាន​សេចក្តី​ថា​ប្រហែល​ជា​ពាក់ព័ន្ធ​នឹង​រឿង​បក្ស ឬ​ថា​ពាក់ព័ន្ធ​ការងារ​សភា»។

សម្រាប់​អ្នក​នាំ​ពាក្យ​ក្រសួង​ការបរទេស​លោក ជុំ សុន្ទរី បាន​ថ្លែង​ថា​លោក​ពុំ​មាន​កាលវិភាគ​នៃ​ដំណើរ​ទស្សនកិច្ច​នោះ​ទេ​គ្រាន់តែ​បញ្ជាក់​ថា​ជា​ដំណើរ​ទស្សនកិច្ច​ការងារ។ លោក​ថា​ «បញ្ហា​លម្អិត​ថា​ពិភាក្សា​គ្នា​យ៉ាង​ម៉េច​នោះ​ពុំ​ទាន់​ដឹង​ទេ​ព្រោះ​នាយករដ្ឋមន្ត្រី​កម្ពុជា​មាន​ការ​ជួប​ជាមួយ​នាយក​រដ្ឋមន្ត្រី​ប្រទេស​​ឡាវ​អ៊ីចឹង​ទាល់​តែ​បញ្ចប់​ទស្សនកិច្ច​ទើប​មាន​ព័ត៌មាន​ច្បាស់លាស់»៕

អត្ថបទគួរចាប់អារម្មណ៍