ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចបង្កើតគណៈកម្មការ ដើម្បីត្រួតពិនិត្យការអភិវឌ្ឍនៅកោះកុងក្រៅស្ថិតក្នុងខេត្តកោះកុង ដើម្បីតាមដានសកម្មភាពក្រុមហ៊ុនកោះកុង អេស អ៊ី ហ្សិត ខូអិលធីឌី ដែលរដ្ឋាភិបាលប្រគល់ឲ្យធ្វើការអភិវឌ្ឍផ្តាច់មុខកាលពីឆ្នាំ ២០១៩។
រាជរដ្ឋាភិបាលបានប្រគល់ឲ្យក្រុមហ៊ុនកោះកុង អេស អ៊ី ហ្សិត ខូអិលធីឌី ធ្វើការអភិវឌ្ឍតាមរយៈ សជណ ចុះថ្ងៃទី ១៤ ខែមិថុនា ឆ្នាំ ២០១៩ របស់ទីស្តីការគណៈរដ្ឋមន្ត្រី។ នេះបើតាមសេចក្តីសម្រេចចុះហត្ថលេខាដោយលោក ហ៊ុន សែន កាលពីថ្ងៃទី ៤ មិថុនា ។
សេចក្តីសម្រេចដដែលឲ្យដឹងថា គណៈកម្មការត្រួតពិនិត្យការអភិវឌ្ឍនៅកោះកុងក្រៅមានសមាជិកចំនួន ១០ នាក់ក្នុងនោះលោក សាយ សំអាល់ រដ្ឋមន្ត្រីក្រសួងបរិស្ថានជាប្រធានលោក សុក ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាជាអនុប្រធាន។ សេចក្តីសម្រេចដដែលបញ្ជាក់ថា៖ «គណៈកម្មការនេះមានភារកិច្ចត្រួតពិនិត្យលើគម្រោងអភិវឌ្ឍន៍កោះកុងក្រៅទាំងមូលរបស់ក្រុមហ៊ុនកោះកុង អេស អ៊ី ហ្សិត ខូអិលធីឌី ដែលរាជរដ្ឋាភិបាលប្រគល់ជូនឲ្យអភិវឌ្ឍ...និងធ្វើរបាយការណ៍ស្តីពីលទ្ធផលការងារជូនប្រមុខរដ្ឋាភិបាល»។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងពីម្សិលមិញថា លោកមិនមានអ្វីអត្ថាធិប្បាយបន្ថែមនោះទេ ដោយលោកសូមឲ្យយោងទៅលើសេចក្តីប្រកាសព័ត៌មានរបស់ក្រសួងបរិស្ថានកាលពីថ្ងៃទី ៣ ខែមិថុនា។ តាមសេចក្តីប្រកាសព័ត៌មានរបស់ក្រសួងបរិស្ថានកាលពីថ្ងៃទី ៣ ខែមិថុនា ឲ្យដឹងថា រដ្ឋាភិបាលបានយកចិត្តទុកដាក់ខ្ពស់លើការងារការពារ និងអភិរក្សតំបន់កោះកុងក្រៅ ដោយបានបញ្ជូនក្រុមមន្ត្រីជំនាញទៅធ្វើការសិក្សាស្រាវជ្រាវ រៀបចំឯកសារ និងទិន្នន័យផ្សេងៗទាក់ទងនឹងតំបន់កោះកុងក្រៅនេះតាំងពីឆ្នាំ ២០១៦ មក។
លើសពីនេះក្រសួងបរិស្ថានក៏គ្រោងដាក់តំបន់នេះជា «ឧទ្យានជាតិសមុទ្រ» ព្រោះតំបន់នេះសម្បូរដោយសក្តានុពលផ្នែកធនធានធម្មជាតិ និងជីវចម្រុះ និងមានឆ្នេរខ្សាច់ល្អស្រស់ស្អាតដែលត្រូវការពារ និងអភិរក្សក្នុងឆ្នាំ ២០២១។
កាលពីថ្ងៃទី ១ ខែមិថុនាមានក្រុមយុវជនដែលមានគ្នាជាង ១០ នាក់បានរួមគ្នាជិះកង់ពីខេត្តកោះកុងមកកាន់រាជធានីភ្នំពេញ ដើម្បីដាក់ញត្តិជូនលោកនាយករដ្ឋមន្ត្រីស្នើឲ្យដាក់កោះកុងក្រៅ ទៅជាតំបន់ការពារដោយច្បាប់ និងរក្សាសភាពដើមនៃកោះនេះ។ ប៉ុន្តែពេលធ្វើដំណើរដល់ឃុំត្រពាំងរូងនាខេត្តកោះកុងនៅថ្ងៃទី ២ មិថុនា ក៏ត្រូវអាជ្ញាធរខេត្តនេះធ្វើការរារាំងសកម្មភាពរបស់ពួកគេ និងបានដកហូតកង់ជាង ១០ គ្រឿង។
លោក សួន ចំរើន ជា យុវជនដែលចូលរួមក្នុងយុទ្ធនាការជិះកង់ក្រោមហេតុផល «សង្គ្រោះកោះកុងក្រៅ» ថ្លែងពីម្សិលមិញថាការដែលរដ្ឋាភិបាលបានប្រគល់កោះនេះឲ្យក្រុមហ៊ុនឯកជន ធ្វើការអភិវឌ្ឍគឺជារឿងមួយដែលបង្កការព្រួយបារម្ភ និងពោរពេញដោយមន្ទិលសង្ស័យ។ លោកបន្តថា ចំពោះយន្តការនានាដែលរដ្ឋាភិបាល ជាពិសេសក្រសួងបរិស្ថានបានដាក់ចេញដើម្បីការពារកោះនេះក៏មិនទាន់មានភាពប្រាកដប្រាជានោះដែរ។
លោកបញ្ជាក់ថា៖ «យើងនៅតែមានអារម្មណ៍មួយដែលខ្លាច ព្រោះក្រោមការអភិវឌ្ឍគឺជាពាក្យដែលនាំមុខសម្រាប់បង្ហាញទៅប្រជាពលរដ្ឋថា តំបន់នោះកំពុងត្រូវបានអភិវឌ្ឍ ប៉ុន្តែជាក់ស្តែងវាគឺជាការបំផ្លាញទៅវិញទេ។ វាគឺជាក្តីបារម្ភមួយទៅថ្ងៃអនាគត ព្រោះតែមកដល់ពេលនេះនៅមិនទាន់ដឹងច្បាស់ថា គម្រោងរបស់ក្រុមហ៊ុនកោះកុង អេស អ៊ីហ្សិត ខូអិលធីឌី អភិវឌ្ឍ របៀបម៉េចនោះទេ»។
យុវជន សួន ចំរើន នៅតែអះអាងថា ក្រុមយុវជននឹងនៅតែប្រកាន់ជំហរក្នុងការបន្តយុទ្ធនាការក្នុងពេលខាងមុខ ដើម្បីជំរុញឲ្យរដ្ឋាភិបាលរក្សាកោះនេះឲ្យបាន ខណៈលោកនៅតែបារម្ភចំពោះហានិភ័យដែលអាចកើតមានឡើងគ្រប់ពេលមកលើកោះកុងក្រៅ ដែលជាតំបន់មួយពោរពេញទៅដោយសក្តានុពលធនធានធម្មជាតិ៕