.jpg)
លោក កឹម សុខា ពេលហូបបាយជាមួយម្ដាយ និងភរិយាក្នុងផ្ទះថ្មីៗនេះ។ ហ្វេសប៊ុក Chantha muth
កំពង់ស្ពឺៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានពន្យល់ពីការបន្តឃុំខ្លួនអតីតមេបក្សប្រឆាំងលោក កឹម សុខា នៅក្នុងផ្ទះថា ធ្វើឡើងក្នុងគោលដៅ «មនុស្សធម៌» ដើម្បីរក្សា «សុវត្ថិភាព» របស់ពិរុទ្ធជន និងច្រានចោលការលើកឡើងដែលថាការអនុញ្ញាតនេះ ដោយសារមានសម្ពាធពីសហគមន៍អន្តរជាតិជាអ្វីដែលអតីតមន្ត្រីជាន់ខ្ពស់គណបក្សប្រឆាំងយល់ថា ជារឿងមាន «និន្នាការនយោបាយ»។
អតីតប្រធានអតីតគណបក្សសង្គ្រោះជាតិ (CNRP) លោក កឹម សុខា ដែលកំពុងជាប់ចោទពីបទ «ក្បត់ជាតិ» ឃុបឃិតជាមួយបរទេសប៉ុនប៉ងផ្ដួលរំលំរាជរដ្ឋាភិបាលត្រូវបានគេដោះលែងពីពន្ធគារត្រពាំងផ្លុង (ម៣) ក្នុងខេត្តត្បូងឃ្មុំជិតព្រំដែនជាមួយវៀតណាមកាលពីព្រឹកថ្ងៃទី ១០ កញ្ញា ២០១៨ ប៉ុន្តែឥឡូវនេះត្រូវបានគេដាក់ឲ្យឃុំខ្លួននៅក្នុងផ្ទះ។
យ៉ាងណាក្ដីប្រទេសលោកខាងលិច ពិសេសសហរដ្ឋអាមេរិក និងសហភាពអឺរ៉ុបបានស្នើម្ដងហើយម្ដងទៀតឲ្យទម្លាក់រាល់បទចោទប្រឆាំងនឹងលោក កឹម សុខា ជាអ្វីដែលគេមើលឃើញថាជារឿងនយោបាយ ខណៈមន្ត្រីរដ្ឋាភិបាលថា ជារឿងអនុវត្តច្បាប់។
បើទោះជាច្បាប់កម្ពុជាមិនមានចែងច្បាស់លាស់ពីការឃុំខ្លួនទណ្ឌិត ឬពិរុទ្ធជនក្នុងផ្ទះក៏ដោយ ក៏លោក ហ៊ុន សែន ពន្យល់ដោយមិនបានបញ្ជាក់ចំឈ្មោះ តែសំដៅដល់លោក កឹម សុខា ថាដើម្បីរក្សាសុវត្ថិភាព «ពិរុទ្ធជន» ប៉ុណ្ណោះ។
ថ្លែងក្នុងពិធីជួបសំណេះសំណាលជាមួយកម្មករ កម្មការិនីប្រមាណជាង ២៧ ៤០០ នាក់មកពីរោងចក្រសហគ្រាសចំនួន ២៤ នៅស្រុកគងពិសី ខេត្តកំពង់ស្ពឺកាលពីម្សិលមិញលោកនាយករដ្ឋមន្ត្រីក៏បានព្រលយពីគំនិតចង់ឲ្យមានច្បាប់ដែលចែងពាក់ព័ន្ធនឹងការឃុំខ្លួនពិរុទ្ធជននៅក្នុងផ្ទះផងដែរ។
លោកថ្លែងថា៖ «ជួនកាលគេបន្ធូរបន្ថយខ្លះ សុវត្ថិភាពរបស់ពិរុទ្ធជន។ យើងត្រូវយកចិត្តទុកដាក់បែរជាចាត់ទុកថារឿងនេះទៅជាអន្តរជាតិគាបសង្កត់។ ទេ!...អាហ្នឹងវានៅសិទ្ធិរបស់តុលាការ គេគ្រាន់តែយកមកដាក់ក្នុងដែនដីមួយ»។
ការបញ្ជាក់របស់លោក ហ៊ុន សែន ធ្វើឡើងស្របគ្នានឹងលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃដែលធ្លាប់បានពន្យល់ម្ដងរួចមកហើយកាលពីថ្ងៃទី ១៦ ខែកញ្ញាពីនីតិវិធីក្នុងការដូរទីតាំងឃុំខ្លួនលោក កឹម សុខា ពីពន្ធនាគារត្រពាំងផ្លុងមកឃុំក្នុងផ្ទះវិញនេះ។
លោក ហ៊ុន សែន បានបញ្ជាក់ថា៖ «ខ្ញុំនិយាយបន្ដិចដើម្បីឲ្យអ្នកទាំងឡាយភ្លឺភ្នែក ថ្ងៃមុនសម្ដេចក្រឡាហោម ស ខេង បាននិយាយម្ដងហើយ ប៉ុន្តែថ្ងៃនេះ ខ្ញុំគ្រាន់តែបញ្ជាក់ អត់ទាន់រួចទោសទាំងអស់ គ្រាន់តែដូរទីតាំងឃុំឃាំងតែប៉ុណ្ណឹងទេ។ ក្រែងលោវាងាប់ក្នុងគុក វាបង្កើតរឿងដល់រាជរដ្ឋាភិបាល អ៊ីចឹងក្នុងគោលដៅមនុស្សធម៌ និងរក្សាសុវត្ថិភាពពិរុទ្ធជន យើងមិនអាចហៅគេទណ្ឌិតទេ។ អ៊ីចឹងនៅប្រទេសរបស់យើង អត់ទាន់មានច្បាប់ឃុំខ្លួនក្នុងផ្ទះទេ វានៅអាកន្លែងហ្នឹង អ៊ីចឹងទេតុលាការគេកំណត់ តំបន់មួយឲ្យមនុស្សហ្នឹងស្នាក់នៅ ហើយគេអាចចង្អុលឲ្យនៅក្នុងផ្ទះហ្នឹងតែម្ដង»។
លោកបន្ថែមថា៖ «អ៊ីចឹងយើងក៏ត្រូវរៀបចំថ្ងៃក្រោយឲ្យមានច្បាប់ដើម្បីឃុំខ្លួនក្នុងផ្ទះដែរ អាចជាការខ្វះចន្លោះទៅលើបញ្ហាផ្នែកច្បាប់ អ៊ីចឹងទេ ចាប់ផ្តើមស្រែកអ៊ីចេះ ស្រែកអ៊ីចុះ ហើយការធ្វើសកម្មភាពណាមួយ ត្រូវតែពាក់ព័ន្ធជាមួយនឹងសាលដីកាដែលគេកំណត់ បើមិនដូច្នេះតុលាការគេនឹងមានសិទ្ធិដើម្បីយកទៅឃុំឃាំងនៅកន្លែងណាផ្សេងតាមការតម្រូវរបស់តុលាការតាមការតម្រូវឆន្ទានុសិទ្ធិរបស់តុលាការ»។
ទន្ទឹមនឹងនេះដែរលោក ហ៊ុន សែន ក៏បញ្ជាក់ជាថ្មីថា លោកនឹងមិនឱនក្បាលចំពោះមុខបរទេសណាទាំងអស់ដោយឈរលើការរក្សាឯករាជ្យ និងអធិបតេយ្យជាតិ។
លោកថា៖ «ទោះយ៉ាងណាក៏ដោយយើងត្រូវរក្សាឯករាជ្យ អធិបតេយ្យជាតិរបស់យើង គ្មានអ្នកណាមកបញ្ជាយើងបានទេ...ខ្ញុំមិនឱនក្បាលដាក់អ្នកណាទាំងអស់និយាយត្រូវធ្វើការជាមួយគ្នានិយាយមិនត្រូវទៅ។ ផ្អាកសិនទៅទុកទៅបើនិយាយមិនត្រូវគ្នាហើយ ចាំបាច់ទៅនិយាយអីទៀត អ្នកឯងពន្យល់ខ្ញុំ ខ្ញុំពន្យល់អ្នកឯង វាមានទៅ វាមានមក...»។
លោកថា៖ «អត់មាននរណាត្រូវគាបនរណាទេ លើលោកនេះ»។
ប៉ុន្តែលោក អ៊ូ ច័ន្ទរ័ត្ន អតីតតំណាងរាស្ត្រនៃអតីតគណបក្សសង្គ្រោះជាតិថ្លែងថា ជាការពិតក្រុមមេធាវីលោក កឹម សុខា បានធ្វើសំណើច្រើនដងសុំឲ្យបាននៅក្រៅឃុំ។ លោកនៅតែយល់ថា ករណីបន្តឃុំខ្លួនលោក កឹម សុខា ក្នុងផ្ទះគឺជារឿង «នយោបាយ»។
លោកថា៖ «ខ្ញុំនៅតែជឿថាវាជារឿងដែលមានសម្ពាធ ទើបមានការបន្ធូរបន្ថយឲ្យនៅក្រៅឃុំបានមកនៅក្នុងផ្ទះនេះ»។
លោកបន្តថា៖ «យ៉ាងណាវាប្រសើរជាងមុនដែលបានមកនៅក្នុងផ្ទះទទួលការព្យាបាល ឬក៏នៅជាមួយប្រពន្ធកូនបានជួបជុំម្ដាយជាដើម។ វាគ្រាន់បើជាងមុនបន្ដិច។ បញ្ហាសុវត្ថិភាព វាជារឿងមួយសំខាន់ណាស់ដែរ ប៉ុន្តែវាគ្រាន់តែលេសទេ បើសិនជានៅក្នុងពន្ធនាគារមិនមានសុវត្ថិភាពមានន័យថា ពន្ធនាគារ អសមត្ថភាពក្នុងការការពារជនត្រូវចោទ»។
ប៉ុន្តែលោក សុខ ឥសាន អ្នកនាំពាក្យគណបក្សកាន់អំណាចយល់ថាការឲ្យលោក កឹម សុខា នៅឃុំក្នុងផ្ទះគឺស្របនឹងសំណូមពរជនជាប់ចោទ និងមេធាវីរបស់លោកផ្ទាល់ប៉ុណ្ណោះ។
លោកថ្លែងថា៖ «ចំពោះមតិផ្សេងៗដែលមាននិន្នាការប្រឆាំង ខ្ញុំយល់ថាធ្វើម៉េចក៏មិនត្រូវចិត្តគាត់ដែរ។ យើងមិនទាន់មានច្បាប់ឃុំក្នុងផ្ទះទេ ប៉ុន្តែអាចធ្វើបានទៅតាមសំណូមពរសាមីជនដែលជាជនជាប់ចោទ យើងចង់សម្រួលបញ្ហាសុខភាពគាត់ ដើម្បីកុំឲ្យមានបញ្ហា...»។
អ្នកវិភាគនយោបាយលោក ហង្ស វិទូ យល់ឃើញថាការបាននៅក្រៅពន្ធនាគាររបស់លោក កឹម សុខា ជារឿងល្អ ប៉ុន្តែការឃុំគាត់ក្នុងផ្ទះបែបនេះគឺគ្រាន់តែល្អមើលប៉ុណ្ណោះ។
លោកថ្លែងថា៖ «ខ្ញុំយល់ថាការឃុំខ្លួនលោក កឹម សុខា នៅក្រៅ [ពន្ធនាគារ] នេះ ទី ១ គឺជារឿងមួយដែលល្អហើយដែលធ្វើឲ្យគាត់មានសេរីភាពជាងមុន គ្រួសាររបស់គាត់អាចមើលថែរក្សាគាត់បានទី ២ ខ្ញុំយល់ឃើញថា ក្រោយពីមានការដោះលែងលោ កឹម សុខា យើងឃើញថាសុខភាពរបស់គាត់អី ចាប់ផ្តើមមានសភាពធូរស្រាលជាងមុន ក៏ប៉ុន្តែអ្វីដែលធ្វើឲ្យមានបញ្ហានៅត្រង់ថា ការដោះលែងគាត់បែបនេះ វាធ្វើឲ្យមានការទិះតៀនពីក្រមសីលធម៌ និងមើលទៅមិនសមភ្នែក ប្រៀបដូចជា ការដោះលែងឲ្យតែល្អមើល។ តាមពិតគាត់គ្មានសេរីភាពពេញលេញ»។
លោកបន្តថា៖ «ការដោះលែងបែបនេះនឹងមិនបានបន្ទូរបន្ថយស្ថានការណ៍ឲ្យធូរស្បើយជាងមុនទេ ប៉ុន្តែផ្ទុយទៅវិញ វាអាចធ្វើឲ្យសហគមន៍អន្តរជាតិក៏ដូចជាពលរដ្ឋគាត់អាចរិះគន់ក្នុងន័យថា ការធ្វើនេះគឺធ្វើគ្រាន់តែល្អមើល។ ខ្ញុំគិតថា រដ្ឋាភិបាលគួរតែបន្ធូរបន្ថយជាងនេះ ... មិនមែនគ្រាន់តែប្ដូរទីតាំងទេ។ មិនមែនយាមកាមគាត់ឲ្យគាត់មានអារម្មណ៍ថា ដូចនៅក្នុងមន្ទីរឃុំឃាំងនោះទេ»៕
