.jpg)
លោកនាយករដ្ឋមន្ត្រី ហ៊ុន សែន ក្នុងពិធីប្រគល់សញ្ញាបត្រដល់និស្សិតកាលពីម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសយកថ្ងៃ ៩ វិច្ឆិកា រៀបចំពិធីទទួលទានអំបុកខ្មែរនៅទូទាំងប្រទេសដើម្បីការពារជាតិ សាសនា ព្រះមហាក្សត្រ និងបានព្រមានចាំសំពងក្បាលអ្នកដែលមកផ្តួលរំលំរដ្ឋាភិបាលកម្ពុជានៅក្នុងថ្ងៃនោះដែលលោក សម រង្ស៊ី ធ្លាប់បានកំណត់ពេលត្រូវវិលត្រឡប់មកកម្ពុជាវិញជាមួយនឹងការបំផុសពលរដ្ឋឲ្យបះបោរ។
ការថ្លែងរបស់លោក ហ៊ុន សែន បែបនេះបានធ្វើឡើងនៅក្នុងពិធីប្រគល់សញ្ញាបត្រជូននិស្សិតនៃសាកលវិទ្យាល័យប៊ែលធីអន្តរជាតិសរុប ១ ១៨៣ នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញកាលពីម្សិលមិញពោលគឺ បន្ទាប់ពីលោក សម រង្ស៊ី បានអំពាវនាវឲ្យមានការបះបោរក្នុងគោលដៅផ្ដួលរំលំរដ្ឋាភិបាល និងជំរុញឲ្យប្រើប្រាស់ «អំណាចពលរដ្ឋ» ក្នុងការចូលរួមទទួលដំណើរមាតុភូមិនិវត្តន៍របស់លោកនៅថ្ងៃទី ៩ វិច្ឆិកា ខាងមុខនេះ។
លោក ហ៊ុន សែន បានថ្លែងថា លោកត្រៀមសំពងក្បាលអ្នកដែលចង់ផ្តួលរំលំរដ្ឋាភិបាលនៅថ្ងៃទី ៩ វិច្ឆិកា ខាងមុខនេះ និងថាកម្ពុជានឹងរៀបចំពិធីបុណ្យអុំទូក អកអំបុក សំពះព្រះខែឆ្នាំ ២០១៩ នេះដោយមិនមានការលើកលែងឡើយ ទោះបីជាទឹកទន្លេសាបស្រករាក់យ៉ាងណាក្ដី។
លោកបានបញ្ជាក់ថា៖ «យើងត្រូវតែអុំ ព្រោះខ្ញុំក៏ចង់ស្គាល់រសជាតិអារបស់ដែលហៅថាមកផ្តួលរំលំ ហ៊ុន សែន នៅថ្ងៃទី ៩ នេះ ពីព្រោះថ្ងៃទី ៩ គឺជាថ្ងៃបុណ្យជាតិថ្ងៃ ១០ ១១ និង ១២ អុំទូក បើយើងមិនអុំទូក គេថាយើងនឹងចាញ់។ ទោះបីមានតែទឹកតែ ១ ម៉ែត្រក៏អុំដែរដើម្បីសំពងក្បាលអ្ហែង ខ្ញុំបន់ឲ្យតែដល់ថ្ងៃនោះទេ។ ឆ្នាំនេះបើទោះបីទឹកធ្លាក់នៅតែ ១ ម៉ែត្រ ក៏អុំដែរ យកអាទូកតូចៗមកអុំ អាតូច ក៏អុំ អាធំក៏អុំ មកពេញហ្នឹង មកសំពងក្បាលអ្ហែង អ្ហែងមក»។
យ៉ាងណាក៏ដោយលោកបានអំពាវនាវដល់ពលរដ្ឋឲ្យនាំគ្នាហូបអំបុកចាប់ពីថ្ងៃទី ៩ ដល់ថ្ងៃទី ១២ វិច្ឆិកា ដើម្បីចូលរួមការពារជាតិសាសនា និងព្រះមហាក្សត្រ និងបានអំពាវនាវដល់ថ្នាក់ដឹកនាំ និងសកម្មជនគណបក្សប្រជាជនទាំងអស់ឲ្យរៀបចំ និងធានាឱ្យបានថា មានអំបុកហូបគ្រប់គ្នាផងដែរ។
លោកបានបន្តថា៖ «ឥឡូវនេះ ខ្ញុំសូមប្រកាសយកថ្ងៃទី ៩ វិច្ឆិកាដែលជាថ្ងៃបុណ្យឯករាជជាតិរបស់យើងតភ្ជាប់ជាមួយនឹងបុណ្យអុំទូក អកអំបុក សំពះព្រះខែធ្វើជាថ្ងៃរួមគ្នាទទួលទានអំបុកខ្មែរទូទាំងប្រទេស។ អ្ហែងធ្វើយុទ្ធនាការផ្តួលរំលំ អញធ្វើយុទ្ធនាការស៊ីអំបុក»។
ជាមួយគ្នានេះលោកនាយករដ្ឋមន្ដ្រីកម្ពុជាក៏បានព្រមានទៅកាន់ក្រុមអតីតបក្សសង្គ្រោះជាតិដែរថា អ្នកដែលចូលរួមធ្វើយុទ្ធនាការម្រាមដៃ ៩ នៅថ្ងៃទី ៩ វិច្ឆិកា នឹងជាប់ពីបទចោទតាមច្បាប់ថ្មីរបស់កម្ពុជា ដោយលោកអះអាងថានោះមិនមែនសិទ្ធិបញ្ចេញមតិទេ ប៉ុន្តែជាការផ្ដួលរំលំរាជរដ្ឋាភិបាល។
លោកបានព្រមានថា៖ «ទង្វើណាក៏ដោយដែលគាំទ្រដល់រដ្ឋប្រហារ ឬផ្តួលរំលំ គឺជាទង្វើខុសច្បាប់ដែលត្រូវដាក់ទោសដោយខានមិនបាន»។
លោក ហ៊ុន សែន បានរំឭកថាការអំពាវនាវឱ្យកងកម្លាំងប្រដាប់អាវុធផ្តាច់ខ្លួន និងការអំពាវនាវឱ្យព្រះមហាក្សត្រដាក់រាជ្យដែលធ្វើឡើងដោយលោក សមរង្ស៊ី គឺជាចេតនាផ្លាស់ប្តូររបបរាជានិយមអាស្រ័យរដ្ឋធម្មនុញ្ញដែលជាទោសក្បត់ជាតិ។
លោកបានបញ្ជាក់បន្ថែមថា៖ «គេមិនមែនត្រឹមតែមកចាប់ ហ៊ុន សែន ឬឱ្យ ហ៊ុន សែន ចុះចេញពីតំណែងទេ គេថែមទាំងអំពាវនាវឱ្យព្រះមហាក្សត្រដាក់រាជ្យ គេចាត់ទុកព្រះមហាក្សត្រជា "អាយ៉ងរបស់ ហ៊ុន សែន" គេប្រមាថព្រះមហាក្សត្រ ដូច្នេះលើកនេះគោលដៅរបស់គេមិនមែន ទម្លាក់ ហ៊ុន សែន ទេ គេដូររបបរាជានិយមអាស្រ័យធម្មនុញ្ញតែម្តង»។
នៅក្នុងឱកាសនោះដែរលោកនាយករដ្ឋមន្ត្រី ហ៊ុន សែន ក៏បានអំពាវនាវឲ្យស្ថានទូតអាមេរិក និងសាលាបណ្ឌិត្យសភាយោធា West Point បកស្រាយពីកម្រិតសញ្ញាបត្រដែលកូនប្រុសច្បងរបស់លោកទទួលបានពីសាលាមួយនេះផងដែរ បន្ទាប់ពីលោក សម រង្ស៊ី បានអះអាងថាជាសញ្ញាបត្រក្លែងក្លាយ ឬសញ្ញាបត្រការទូត។
លោកបានថ្លែងថា៖ «ឥឡូវហ្នឹង ខ្ញុំអំពាវនាវដល់ស្ថានទូតអាមេរិកមានតែអាមេរិកទេដែលដឹងពីសញ្ញាបត្រ West Point ឬខាងសាលា West Point អាចបញ្ជាក់រឿងសញ្ញាបត្រហ្នឹងមានមនុស្សម្នាក់ចេញមកអះអាងថា គេរៀនសាលាហ្នឹងប្រឡងអត់ជាប់។ អារឿងហ្នឹងទៅសួរសាលា West Point ទៅ! ទៅសួររដ្ឋាភិបាលអាមេរិកទៅ បើសិនរដ្ឋាភិបាលអាមេរិកទទួលយក ហ៊ុន ម៉ាណែត ដោយមិនចាំបាច់ប្រឡង គឺរដ្ឋាភិបាលអាមេរិកក៏ជារដ្ឋាភិបាលពុករលួយមួយដែរ។ អ៊ីចឹងអ្នកដែលបកស្រាយបញ្ហានេះមិនមែន ហ៊ុន ម៉ាណែត ហើយក៏មិនមែនកម្ពុជានោះទេគឺមានតែស្ថានទូតអាមេរិក និងសាលា West Point របស់អាមេរិកនោះទេ ដែលអាចបកស្រាយបានទៅលើកម្រិតនូវការសិក្សា និងការប្រឡង» ។
លោកបានបន្ថែមថាកូនសិស្សម្នាក់ត្រូវចំណាយប្រាក់រហូតដល់ទៅ ២២ ម៉ឺនដុល្លារ ក្នុងការសិក្សារយៈពេល ៤ ឆ្នាំ និងថាសាលាបណ្ឌិត្យសភាយោធា West Point របស់អាមេរិកផ្តល់អាហារូបករណ៍តែ ១០ កន្លែងប៉ុណ្ណោះ សម្រាប់និស្សិតបរទេសកាលពីឆ្នាំ ១៩៩៩ ដែលលោក ហ៊ុន ម៉ាណែត បានប្រឡងជាប់ហើយពេលនោះមានតែនិស្សិតបរទេស ៨ នាក់ប៉ុណ្ណោះ ដែលបានប្រឡងជាប់។ រីឯកៅអី ២ កន្លែង ត្រូវបានសាលារក្សាទុកដោយសារតែពិន្ទុមិនគ្រប់។
លោក ហ៊ុន សែន បានសម្តែងការហួសចិត្តចំពោះសម្តីរបស់លោក សម រង្ស៊ី ដែលបានវាយប្រហារដល់កូនចៅរបស់លោកបែបនេះ និងថាសកម្មភាពនេះប្រៀបបីដូចជាឆ្កែឆ្កួត ១ ក្បាល។
លោកថា៖ «ប៉ុន្តែយ៉ាងណាក៏ដោយខ្ញុំអត់នឹកដល់ទេថាយើងមកលេងគ្នាអីយើងលេងគ្នាជាមួយចាស់ៗទៅហេតុអ្វីបានជាចាំបាច់អ្វីទៅវាយកូន និងចៅ យើងវាមិនយល់អាកន្លែងហ្នឹង ប៉ុន្តែឆ្កែដែលវាឆ្កួតគឺវាអត់ដឹងវាខាំ...ហើយអានេះវាប៉ះអី វាខាំហ្នឹង»។
អ្នកស្រី EmilyZeeberg អ្នកនាំពាក្យសា្ថនទូតអាមេរិកប្រចាំកម្ពុជាបានឲ្យដឹងតាមរយៈអ៊ីមែលពីម្សិលមិញថា និសិត្សបញ្ចប់ការសិក្សាពីសាកលវិទ្យាល័យ មហាវិទ្យាល័យ ឬវិទ្យាស្ថានសិក្សាជាន់ខ្ពស់នៅសហរដ្ឋអាមេរិកតែងទទួលបានបរិញ្ញាបត្រ ឬសញ្ញាបត្រ ប្រសិនបើពួកគេបំពេញតាមតម្រូវការនៃស្ថាប័នទាំងនេះហើយថា ប្រទេសកំណើតនៃនិស្សិតទាំងនោះមិនមែនជាកត្តាកំណត់នោះទេ។
ទាក់ទងនឹងការព្រមានវាយសំពងអ្នកប៉ុនប៉ងផ្ដួលរំលំរាជរដ្ឋាភិបាល និងអំពាវនាវឲ្យពលរដ្ឋទទួលទានអំបុក លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា លោកនាយករដ្ឋមន្ត្រីមានសិទ្ធិក្នុងការព្រមាន ហើយបានចាត់ការអំពាវនាវឲ្យពលរដ្ឋទទួលទានអំបុកថាយុទ្ធសាស្ត្រនយោបាយដើម្បីស្វែងរកថា តើរវាងរាជរដ្ឋាភិបាល និងអតីតគណបក្សប្រឆាំង ប្រជាជនជ្រើសរើសមួយណា ហើយថា នោះមិនមែនបំពានសិទ្ធិសេរីភាពពលរដ្ឋនោះទេ។
លោកថា៖ «ក្នុងនាមនាយករដ្ឋមន្ត្រីក្នុងតំណែងកើតចេញពីការបោះឆ្នោតគាត់ចាំបាច់ត្រូវតែត្រៀមខ្លួន មានវិធានការចំពោះជនទាំងឡាយណាដែលប៉ុនប៉ងផ្តួលរំលំរដ្ឋាភិបាលស្របច្បាប់ ហើយការប្រកាសហូបអំបុកគឺជាការសាកល្បងជាមួយនឹងសារនយោបាយជាមួយលោក សម រង្ស៊ី ថាតើរវាងអ្នកទៅទទួលលោក សម រង្ស៊ី និងអ្នកទទួលទានអំបុក អ្នកណាមានការគាំទ្រច្រើនជាង?»។
ទោះជាយ៉ាងណា អ្នកនាំពាក្យសមាគមអាដហុកលោក ស៊ឹង សែនករុណា បានថ្លែងថាសារព្រមានរបស់លោក ហ៊ុន សែន និងសារអំពាវនាវរបស់លោក សម រង្ស៊ី អាចធ្វើឲ្យពលរដ្ឋកាន់តែបារម្ភពីការប្រឈមមុខដាក់គ្នារវាងអ្នកគាំទ្ររាជរដ្ឋាភិបាល និងអតីតគណបក្សប្រឆាំង ហើយបានរំឭកពលរដ្ឋឲ្យប្រុងប្រយ័ត្នចំពោះការអំពាវនាវពីអ្នកនយោបាយ។
លោកថា៖ «អ្វីដែលខ្ញុំមានការព្រួយបារម្ភនោះគឺដោយសារតែម្ខាងគាត់អំពាវនាវឲ្យពលរដ្ឋធ្វើសកម្មភាព ខណៈពេលដែលម្ខាងទៀតអំពាវនាវឲ្យមានការបង្ក្រាប និងចាប់ខ្លួនដែលវាអាចធ្វើឲ្យមានការប៉ះទង្គិចគ្នា ចាប់ខ្លួន និងឃុំខ្លួន។ ពលរដ្ឋត្រូវមានការគិតពិចារណានៅក្នុងការអូសទាយរបស់អ្នកនយោបាយដើម្បីចៀសវាងការប្រឈមផ្សេងៗ»៕
