កំពង់ឆ្នាំង៖ លោកនាយករដ្ឋមន្ត្រី ហ៊ុន សែន បានអនុញ្ញាតឱ្យក្រសួងសុខាភិបាល និងអង្គភាពស៊ីម៉ាក់រៀបចំកម្មវិធីសិក្សាស្រាវជ្រាវ និងអភិវឌ្ឍសុនខជាជំនួយហិតរកអ្នកផ្ទុកវីរុសកូវីដ ១៩ ដើម្បីចូលរួមទប់ស្កាត់ និងប្រឆាំងទៅនឹងការរីករាលដាលជំងឺកូវីដ ១៩ នៅក្នុងសហគមន៍។
លោក ហេង រតនា អគ្គនាយកមជ្ឈមណ្ឌលសកម្មភាចំចាត់មីនកម្ពជា (CMAC) ថ្លែងនៅក្នុងពិធីចុះមកពិនិត្យការងារសុនខនៅវិទ្យាស្ថានបច្ចេកទេស CMAC នៅខេត្តកំពង់ឆ្នាំងនៅថ្ងៃទី ២៤ ខែមីនា នេះថា ក្រុមអ្នកវិទ្យាសាស្ត្រវេជ្ជសាស្ត្ររបស់កម្ពុជា និងក្រុមអ្នកជំនាញសុនខរបស់អង្គភាព CMAC កំពុងសិក្សារួមគ្នាក្នុងការស្វែងរកគ្រប់វិធីសាស្ត្រ ដើម្បីប្រយុទ្ធប្រឆាំងជំងឹកូវីដ ១៩។
លោក ហេង រតនា ថ្លែងថា៖ «គំនិតផ្តួចផ្តើមនេះ បង្ហាញពីការគិតគូររបស់សម្តេចតេជោ»។
បើតាម លោក ហេង រតនា ផ្អែកតាមបទពិសោធជាង ២២ ឆ្នាំ ក្រុមអ្នកបច្ចេកទេសសុនខនៃអង្គភាព CMAC មានទំនុកចិត្តអាចហ្វឺកហ្វឹនសុនខនៅកម្ពុជាក្នុងការហិតរកអ្នកផ្ទុកវីរុសកូរ៉ូណាបាន។ លោកបានត្រៀមសុនខជាច្រើនក្បាលត្រៀមឯកសារហ្វឹកហ្វឺន រៀបចំទីតាំងហ្វឹកហ្វឺន និងអ្នកឯកទេសសម្រាប់ការងារសិក្សាស្រាវជ្រាវនេះ ដោយត្រៀមសហការជាមួយអ្នកវិទ្យាសាស្ត្រវេជ្ជសាស្ត្រនៃក្រសួងសុខាភិបាល។
លោក ហេង រតនា បានថ្លែងថា៖ «ខ្ញុំបានពិភាក្សាការងារនេះជាមួយឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលដោយឯកឧត្តមរដ្ឋមន្ត្រីប្រគល់ភារកិច្ចឱ្យសកលវិទ្យាល័យវិទ្យាសាស្ត្រសុខាភិបាលជាអនុវត្តផ្ទាល់ជាមួយអង្គភាពស៊ីម៉ាក់»។
លោកបានបញ្ជាក់ទៀតថា មានប្រទេសមួយចំនួនដូចជា អាល្លឺម៉ង់ ហ្វាំងឡង់ អូស្ត្រាលី រុស្ស៊ីជាដើម បាននិងកំពុងប្រើប្រាស់សុនខជាជំនួយហិតរកអ្នកផ្ទុកវីរុសកូរ៉ូណាផងដែរ៕