.jpg)
កម្មកររោងចក្រពិនិត្យសុខភាពស្វែងរកមេរោគកូវីដ ១៩ នៅវិទ្យាល័យជម្ពូវ័ន្តកាលពីម្សិលមិញ។ ហេង ជីវ័ន
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអំពាវនាវឲ្យជនរួមជាតិទាំងអស់បន្តការប្រុងប្រយ័ត្ន និងយកចិត្តទុកដាក់ខ្ពស់បំផុតចំពោះសុខភាពដែលជាអាយុជីវិតផ្ទាល់ខ្លួនម្នាក់ៗក្នុងស្ថានភាពដែលប្រទេស កម្ពុជា កំពុងប្រយុទ្ធប្រឆាំងកម្ចាត់ជំងឺឆ្លងកូវីដ ១៩ បើទោះជាប៉ុន្មានថ្ងៃចុងក្រោយមកនេះកម្ពុជាមិនបានរកឃើញករណីថ្មី។
លោក ហ៊ុន សែន បានសរសេរនៅលើទំព័រ Facebook របស់លោកកាលពីថ្ងៃអង្គារថា៖ «រាល់វិនាទី និងជារៀងរាល់ថ្ងៃសូមបងប្អូនជនរួមជាតិចងចាំ និងយកចិត្តទុកដាក់ខ្ពស់បំផុតចំពោះសុខភាពដែលជាអាយុជីវិតផ្ទាល់របស់បងប្អូន ប្តីប្រពន្ធ កូនចៅ និងក្រុមគ្រួសារក្នុងស្ថានភាពដែលប្រទេសជាតិយើងកំពុងប្រយុទ្ធប្រឆាំងកម្ចាត់ជំងឺឆ្លងកូវីដ ១៩»។
លោកនាយករដ្ឋមន្ត្រីក៏បានណែនាំឲ្យប្រជាពលរដ្ឋបន្តយកជាប់តាមខ្លួនរាល់ពេលធ្វើដំណើរនូវម៉ាស់ ទឹកអាល់កុល និងជែលសម្លាប់មេរោគ និងបាក់តេរីផ្សេងៗ ហើយត្រូវប្រើម៉ាស់ពាក់ការពារគ្រប់ទីកន្លែង និងត្រូវដុសលាងសម្អាតដៃមុនពេលប៉ះពាល់ និងក្រោយពេលប៉ះពាល់របស់របរ ឬវត្ថុអ្វីមួយនៅតាមទីផ្សារ និងតាមទីធ្លាសាធារណៈ ដើម្បីការពារខ្លួន។
លោកបានឲ្យដឹងថា៖ «យើងមិនដឹងថាតើរបស់របរ និងសម្ភារទាំងនោះត្រូវបានប៉ះពាល់ដោយអ្នកមានមេរោគឆ្លងកូវីដ១៩ឬទេ? យើងការពារខ្លួនកុំនាំយកមេរោគឆ្លងទៅគេ និងសូមកុំនាំមេរោគពីគេមកយើង និងទៅកាន់ក្រុមគ្រួសារ ហើយត្រូវមានអនាម័យសុខភាពខ្ពស់ជាប្រចាំ ហើយត្រូវស្តាប់តាមការណែនាំរបស់ក្រសួងសុខាភិបាលជានិច្ច»។
ទោះជាកម្ពុជាក្នុងរយៈពេលប៉ុន្មានថ្ងៃចុងក្រោយកម្ពុជាមិនបានបង្ហាញឲ្យឃើញមានអ្នកមានវិជ្ជមានកូវីដ១៩ ក៏ដោយ ក៏រយៈពេល ២ ថ្ងៃចុងក្រោយនេះ មានកម្មករជិត ១៥០០ នាក់នៅរាជធានីភ្នំពេញបានមកពិនិត្យសុខភាព និងធ្វើចត្តាឡីស័ក ១៤ ថ្ងៃក្រោយវិលត្រឡប់ពីបុណ្យចូលឆ្នាំខ្មែរវិញ។
ក្រសួងការងារបណ្តុះបណ្តាលវិជ្ជាជីវៈបានឲ្យដឹងនៅក្នុងសេចក្តីប្រកាសព័ត៌មានកាលពីម្សិលមិញថា នៅថ្ងៃទី ១ នៃការផ្តើមធ្វើចត្តាឡីស័កកាលពីថ្ងៃចន្ទមានកម្មកររោងចក្រចំនួន ១០១៨ នាក់បានមកត្រួតពិនិត្យសុខភាព ក្នុងនោះមានកម្មករចំនួន ៩៥៩ នាក់បានដាក់ឲ្យធ្វើចត្តាឡីស័កនៅផ្ទះ ១៤ ថ្ងៃ។
ក្រសួងថា ចំណែក ៥៩ នាក់ដាក់ឲ្យស្នាក់នៅមណ្ឌលចត្តាឡីស័កកម្រិត ១ និងកម្រិត ២ (វិទ្យាល័យជម្ពូវ័ន្ត) ក្នុងនោះមានចំនួន ១៨ នាក់បានយកសំណាកទៅពិសោធបន្ត។ លោក ហេង សួរ អ្នកនាំពាក្យក្រសួងការងារ កាលពីថ្ងៃម្សិលមិញមិនអាចសុំការអត្ថាធិប្បាយបានទេ ចំពោះលទ្ធផលនៃការយកសំណាកទៅពិសោធ។
លោក ងារ ចិន្តា ស្វាមីកម្មកររោងចក្រម្នាក់ ដែលក្រសួងតម្រូវឲ្យធ្វើចត្តាឡីស័កនៅមណ្ឌលវិទ្យាល័យជម្ពូវ័ន្តបានឲ្យដឹងថា ប្រពន្ធរបស់លោកបានស្នាក់នៅក្នុងមណ្ឌលរយៈពេល ២ ថ្ងៃហើយ បន្ទាប់ពីបានទៅពិនិត្យសុខភាពជាមួយនឹងកម្មករមួយចំនួនទៀតដែលមានអាការសុខភាពល្អ។ លោកថា ការធ្វើចត្តាឡីស័កនេះគឺវិធានការល្អមួយ ដើម្បីការពារការរីករាលដាលជំងឺឆ្លងដែលគ្រប់គ្នាបារម្ភ៕
