.jpg)
លោក កឹម សុខា ពេលចែកអំណោយពីថ្ងៃ ១៧ តុលា។ រូប Kem Sokha Page
ភ្នំពេញៈ លោកនាយករដ្ឋមន្ត្រី ហ៊ុន សែន ប្រាប់ឱ្យអាជ្ញាធរសម្រួលដល់លោក កឹម សុខា និងគណបក្សនយោបាយនានាក្នុងការចុះចែកអំណោយដល់ជនរងគ្រោះពីទឹកជំនន់ដោយមិនប្រកាន់និន្នាការនយោបាយ ខណៈតាមខេត្តជាច្រើននៅកម្ពុជាកំពុងរងផលប៉ះពាល់ដោយទឹកជំនន់បង្កពីទឹកភ្លៀង។
តាមរយៈសារជាសំឡេងផ្ញើទៅកាន់អាជ្ញាធរថ្នាក់ខេត្តទាំងអស់លោកបានប្រាប់ឱ្យសម្រួលដល់អ្នកនយោបាយ គណបក្សនយោបាយ និងសប្បុរសជនទាំងអស់ដែលចុះចែកអំណោយដល់ពលរដ្ឋរងគ្រោះ។ លោកមានប្រសាសន៍ថា តាមព័ត៌មានដែលលោកទទួលបានអាជ្ញាធរមួយចំនួនបានសម្រួលដល់ដំណើរការចែកអំណោយរបស់លោក កឹម សុខា។ ប៉ុន្តែអាជ្ញាធរមួយចំនួនអាចមានការទើសទាល់។ លោកបញ្ជាក់ថា កិច្ចការដែលរដ្ឋាភិបាលកំពុងធ្វើនេះជាកិច្ចការមនុស្សធម៌ដែលមិនប្រកាន់បក្ខពួកនយោបាយទេ ប៉ុន្តែដើម្បីការរស់រានមានជីវិត និងការគាំពារដល់ពលរដ្ឋទាំងអស់។
លោកបានបញ្ជាក់ដូច្នេះថា៖ «នៅពេលគាត់ ក្រុមគាត់ចុះទៅចែកអំណោយនៅមូលដ្ឋាន សុំបង្កលក្ខណៈឱ្យគាត់បានធ្វើការជាមួយនិងចូលរួមជាមួយប្រជាជនជាមួយអាជ្ញាធរមូលដ្ឋានយើងដើម្បីចែកអំណោយជូនប្រជាពលរដ្ឋមិនថាតែឯកឧត្តម កឹម សុខា ទេ គ្រប់គណបក្សនយោបាយ បើទោះបីជាគណបក្សនយោបាយយ៉ាងណាក៏ដោយនៅពេលដែលយកអំណោយទៅជូនប្រជាពលរដ្ឋសូមសម្រួលដើម្បីឱ្យពួកគាត់បានជួបជាមួយប្រជាពលរដ្ឋហើយផ្ដល់ជំនួយឱ្យប្រជាពលរដ្ឋ។ នេះជាកិច្ចការដែលយើងធ្វើរួមគ្នា គ្រប់បណ្ដាបក្សនយោបាយ គ្រប់អ្នកនយោបាយ គ្រប់សប្បុរសជនដែលចង់ចូលរួម»។
កាលពីយប់ថ្ងៃព្រហស្បតិ៍លោក ហ៊ុន សែន បានចុះសួរសុខទុក្ខជនរងគ្រោះដោយទឹកជំនន់នៅភ្នំពេញ។ ក្នុងឱកាសនោះលោកបានថ្លែងថា ទាំងព្រះសង្ឃ ពលរដ្ឋ អាជ្ញាធរ និងកងកម្លាំងប្រដាប់អាវុធបានធ្វើសកម្មភាពព្រមៗគ្នាស្រុះគ្នា ដើម្បីជួយដល់ជនរងគ្រោះ។
លោកថ្លែងថា៖ «នោះហើយជាចំណុចពិសេសចំណុចខ្លាំងនៃរដ្ឋាភិបាលហ៊ុនសែន។ អ្នកឯងចង់និយាយពីប្រទេសអាមេរិកពីប្រទេសបារាំង ប្រទេសកាណាដា ជារឿងរបស់អ្នកឯង។ ក៏ប៉ុន្តែនៅទីនេះ យើងបានជួប ហើយយើងបានធ្វើការរួមគ្នា ដោយមិនថាអ្នកណានៅនិន្នាការបក្សណា យើងអត់គិតទេ យើងគិតធ្វើយ៉ាងណាឱ្យប្រជាជនរបស់យើងបានរស់រានមានជីវិត»។
លោកបញ្ជាក់ថា អាទិភាពនៅពេលនេះគឺធ្វើយ៉ាងណាឱ្យប្រជាជនបានរស់សិន គឺសិទ្ធិរស់រានមានជីវិត មុននឹងនិយាយដល់សិទ្ធិមនុស្សផ្សេងទៀត ឬនិយាយពីប្រជាធិបតេយ្យ។ ការជួយសង្គ្រោះនាពេលនេះមិនប្រកាន់អ្នកណាបោះឆ្នោតឱ្យអ្នកណាទេ គឺធ្វើដោយគ្មានការរើសអើងនយោបាយអ្វីទាំងអស់។
ចាប់ពីចុងខែកញ្ញា លោក កឹម សុខា បានធ្វើដំណើរទៅខេត្តមួយចំនួនដូចជា ខេត្តពោធិ៍សាត់ព្រះសីហនុ បាត់ដំបង និងភ្នំពេញ ដើម្បីចែកអំណោយដល់ជនរងគ្រោះដោយទឹកជំនន់។ នៅក្នុងសប្ដាហ៍នេះលោកនឹងចុះទៅខេត្តបន្ទាយមានជ័យ និងខេត្តកំពង់ស្ពឺបន្តទៀត។ នេះបើតាមលោក មាជ សុវណ្ណារ៉ា អតីតមន្ត្រីគណបក្សសង្គ្រោះជាតិដែលបានចុះទៅជាមួយលោក កឹម សុខា ក៏ដូចជាទំព័រហ្វេសប៊ុករបស់លោក កឹម សុខា។
កាលពីថ្ងៃទី ១៦ តុលា លោក កឹមសុខា បានថ្លែងអំណរគុណដល់សប្បុរសជនខ្មែរទាំងក្នុង និងក្រៅប្រទេសដែលបានចូលរួមជាសម្ភារ និងថវិកាតាមរយៈលោកដើម្បីចែកជូនដល់ជនរងគ្រោះដោយទឹកជំនន់ដោយលោកបានប្រគល់ថវិកាសប្បុរសនេះ ៥ ពាន់ដុល្លារដល់រាជរដ្ឋាភិបាល។ ជាការឆ្លើយតបលោកនាយករដ្ឋមន្ត្រី ហ៊ុន សែន បានសរសេរលិខិតថ្លែងអំណរគុណចំពោះការចូលរួមនេះ។
លោក មាជ សុវណ្ណារ៉ា ថ្លែងថា លោកមិនដឹងពីចំនួនទឹកប្រាក់ពិតប្រាកដដែលទទួលបានពីសប្បុរសជនតាមរយៈលោក កឹម សុខា ទេ ប៉ុន្តែលោកប៉ាន់ប្រមាណថា មានរាប់ម៉ឺនដុល្លារដែរ។ ថវិកាទាំងនេះលោក កឹម សុខា បានទិញតង់ ត្រីខ មី អង្ករ ចែកជូនដល់គ្រួសាររងគ្រោះរាប់ពាន់គ្រួសារ។
អ្នកវិភាគនយោបាយលោក ឯក សុវណ្ណារ៉ា បានថ្លែងថា ការចុះចែកអំណោយរបស់អ្នកនយោបាយពេលនេះគឺជាសកម្មភាពមនុស្សធម៌ដែលមិនគួរមានការរារាំងទេ ព្រោះវាជួយសម្រាលបន្ទុករបស់រដ្ឋាភិបាលក្នុងការរែកអំរែកនេះតែម្នាក់ឯង។
លោកថា៖ «ប្រសិនបើឈរនៅលើគោលការណ៍អត្ថប្រយោជន៍រួមជួយរំលែកបន្ទុកគ្នាទៅវិញទៅមក វាជាមធ្យោបាយមួយឈរលើស្មារតីជាតិ ស្រឡាញ់ប្រជាពលរដ្ឋ ដែលជាកិច្ចការមនុស្សធម៌។ បើមើលលើទិដ្ឋភាពនយោបាយ វាអាចមានការធូរស្បើយដែរ បើអ្នកនយោបាយចេះអធ្យាស្រ័យគ្នាចេះយោគយល់គ្នា ហើយការពារអត្ថប្រយោជន៍រួមទាំងអស់គ្នា»៕
វីដេអូ៖
