.jpg)
គ្រោះមហន្តរាយបាក់រលំអគារនៅខេត្តកែបកន្លងមក។ ហេង ជីវ័ន
ភ្នំពេញៈ ប្រមុខរដ្ឋាភិបាលកម្ពុជាបានបញ្ជាឲ្យក្រសួង ស្ថាប័ននីមួយៗបង្កើតលេខាធិការដ្ឋានគ្រប់គ្រងគ្រោះមហន្តរាយដើម្បីសម្របសម្រួល និងប្រាស្រ័យទាក់ទងជាប្រចាំជាមួយគណៈកម្មាធិការជាតិគ្រប់គ្រងគ្រោះមហន្តរាយ ខណៈស្ថាប័ននេះស្នើទាហាន ១ ០០០ នាក់ ដើម្បីហ្វឹកហ្វឺនពីវិធីជួយសង្គ្រោះនៅពេលមានគ្រោះមហន្តរាយជាយថាហេតុ។
សារាចរដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ១៤ ខែមករា ឆ្នាំនេះបានឲ្យដឹងថាកន្លងមករាជរដ្ឋាភិបាលបានសង្កេតឃើញថា ក្រសួង ស្ថាប័នមួយចំនួនបានបង្កើតយន្តការគ្រប់គ្រងគ្រោះមហន្តរាយរបស់ខ្លួនរួចហើយ។ ប៉ុន្តែនៅមានមួយចំនួនទៀតមិនទាន់បានបង្កើតយន្តការនេះទេ។
ដូច្នេះដើម្បីសម្របសម្រួលដល់ការដឹកនាំគ្រប់គ្រងគ្រោះមហន្តរាយ លោកនាយករដ្ឋមន្ត្រី ហ៊ុន សែន បានបញ្ជាក្នុងសារាចរនោះថា៖ «គ្រប់ក្រសួងស្ថាប័នត្រូវបង្កើតឱ្យមានលេខាធិការដ្ឋានគ្រប់គ្រងគ្រោះមហន្តរាយដែលជាយន្តការគ្រប់គ្រងគ្រោះមហន្តរាយនៅក្នុងក្រសួងស្ថាប័នរបស់ខ្លួន»។
សារាចរដដែលក៏បានបញ្ជាក់ដែរថាលេខាធិការដ្ឋាននេះមានតួនាទីជាសេនាធិការផ្ទាល់ដល់រដ្ឋមន្ត្រី និងប្រធានស្ថាប័នដែលជាអនុប្រធាន ឬជាសមាជិករបស់គណៈកម្មាធិការជាតិគ្រប់គ្រងគ្រោះមហន្តរាយលើការងារដឹកនាំគ្រប់គ្រងគ្រោះមហន្តរាយក្នុងវិស័យជំនាញរបស់ខ្លួន ដោយសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ។
ទាក់ទងនឹងបញ្ហាគ្រោះមហន្តរាយនេះកាលពីល្ងាចថ្ងៃអង្គារ លោកនាយករដ្ឋមន្ត្រី ហ៊ុន សែន បានថ្លែងក្នុងពិធីជួបជាមួយអ្នកសារព័ត៌មានថា គ្មានប្រទេសណាចង់ឲ្យកើតមានគ្រោះមហន្តរាយដូចជាករណីបាក់រលំអគារនោះទេ ខណៈប្រទេសក្នុងពិភពលោកក៏បានជួបប្រទះនូវគ្រោះបាក់រលំអគារជាញឹកញាប់ដែរនោះ។
លោកបានលើកជាឧទាហរណ៍ដែលកម្ពុជាបានជួបប្រទះករណីបែបនេះដោយលោកចាត់ទុកថាជាបទពិសោធរបស់កម្ពុជា។
លោក ហ៊ុន សែន បានថ្លែងថា៖ «ទាក់ទងជាមួយនឹងការរលំអគារនៅតាមបណ្តាប្រទេសនានានៅលើពិភពលោកក្នុងឆ្នាំ ២០១៩ ព្រោះអ្វីគ្រាន់តែបាក់អគារព្រឹបគឺកម្ពុជាត្រូវទទួលការទម្លាក់កំហុស។ ដោយមិនទាន់បានពិចារណា ដកដាក់ៗ ប៉ុន្តែយើងទាំងអស់គ្នាបានគិតទេ យើងមិនចង់ឲ្យកើតព្រឹត្តិការណ៍ហ្នឹងទេ...បើនិយាយរឿងសង្គ្រោះ គឺមិនមែនយើងរកអ្នកណាខុស អ្នកណាត្រូវទេ គឺជារឿងដែលយើងត្រូវសង្គ្រោះជីវិតមនុស្ស ជាអាទិភាពទី ១ តែម្តង»។
ជុំវិញករណីរលំអគារកន្លងមកលោក គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី ១ គណៈកម្មាធិការជាតិគ្រប់គ្រងគ្រោះមហន្តរាយបានចាត់ទុកឧបទ្ទវហេតុទាំងនេះ ជាបទពិសោធថ្មីរបស់កម្ពុជាដែលត្រូវពង្រឹងយន្តការជួយសង្គ្រោះ។
លោក គន់ គីម បានប្រាប់កាសែតភ្នំពេញប៉ុស្តិ៍ពីម្សិលមិញថា ដោយសារកន្លងមកបញ្ញត្តិច្បាប់ដែលមានស្រាប់ មិនទាន់ត្រូវបានអនុវត្តឲ្យបានពេញលេញ ដូច្នេះការចេញសារាចរនេះគឺជាវិធានថ្មីមួយក្នុងការណែនាំឲ្យស្ថាប័នទាំងអស់អាចអនុវត្តបានត្រឹមត្រូវ និងទាន់សភាពការណ៍ក្នុងការបង្ការ និងជួយសង្គ្រោះ។
លោកបញ្ជាក់ថា៖ «អាចនិយាយបានថា ដោយសារតែកន្លងទៅគណៈកម្មាធិការជាតិគ្រប់គ្រងគ្រោះមហន្តរាយយើងមានភាពលំបាកនៅពេលមានបាតុភាពគ្រោះមហន្តរាយផ្សេងៗដែលកើតមានឡើងព្រោះយើងមានតែច្បាប់ តែមិនមានការអនុវត្តបាន។
នៅពេលមានសារាចរបន្ថែមនេះគឺនឹងធ្វើឲ្យក្រសួងស្ថាប័នទាំងនោះខិតខំទំនាក់ទំនងសហការបន្ថែមទៀត»។
បើតាមលោក គន់ គីម នៅពេលខាងមុខនេះគណៈកម្មាធិការជាតិគ្រប់គ្រងគ្រោះមហន្តរាយនឹងប្រជុំមួយជាមួយអគ្គបញ្ជាការកងទ័ព ដើម្បីស្នើសុំកងទ័ពប្រមាណ ១ ០០០ នាក់ ដើម្បីរៀបចំជាក្រុមសង្គ្រោះបន្ទាន់ និងបំពាក់សម្ភារឲ្យបានគ្រប់គ្រាន់ដើម្បីហ្វឹកហ្វឺន និងរៀនសូត្រពីជំនាញជួយសង្គ្រោះនៅពេលមានគ្រោះមហន្តរាយ។
លោកបញ្ជាក់ថា៖ «អ្វីដែលកើតឡើងគឺមានកម្លាំងនេះ ចេញអន្តរាគមន៍។ កម្លាំងនេះរួមចំណែកជាមួយកម្លាំង ៧១១ ដែលមានស្រាប់ ប៉ុន្តែក្រុម ៧១១ នេះនៅមិនទាន់គ្រប់គ្រងដើម្បីជួយសង្គ្រោះក្នុងហេតុការណ៍នានាដែលអាចកើតមានឡើងក្នុងពេលអនាគតនោះទេ»៕
