.jpg)
លោក ហ៊ុន សែន ថ្លែងក្នុងជំនួបប្រចាំឆ្នាំជាមួយស្ថាប័នសារព័ត៌មាន នាពេលកន្លងមក។ រូបថត SPM
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញឱ្យដឹងថា អ្នកសារព័ត៌មាន និងជនឱកាសនិយមមួយចំនួនតូចបានកំពុងតែប្រើប្រាស់ស្ថាប័នព័ត៌មានធ្វើសកម្មភាពទុច្ចរិត ដើរតួនាទីជាចៅក្រមកាត់សេចក្តី និងការផ្សាយព័ត៌មានបំភ្លៃការពិត ដើម្បីផលប្រយោជន៍ផ្ទាល់ខ្លួន ដែលជាការប្រាសចាកពីវិជ្ជាជីវៈសារព័ត៌មាន។
លោកនាយករដ្ឋមន្ត្រីបានថ្លែងក្នុងសារលិខិត ១ ច្បាប់ ដែលលោកបានផ្ញើទៅដល់អ្នកសារព័ត៌មានជាតិ និងអន្តរជាតិក្នុងឱកាសទិវានៃពិធីជំនួបរវាងប្រមុខរាជរដ្ឋាភិបាលកម្ពុជាជាមួយនឹងអ្នកសារព័ត៌មានកម្ពុជាលើកទី ៥ ដែលប្រារព្ធឡើងនៅថ្ងៃទី ១៤ ខែមករា ជារៀងរាល់ឆ្នាំ ប៉ុន្តែដោយសារការរីករាលដាលនៃជំងឺកូវីដ ១៩ រាជរដ្ឋាភិបាលកម្ពុជាមិនអាចរៀបចំពិធីជួបជុំគ្នាបានឡើយ។
លោក ហ៊ុន សែន បានថ្លែងថា៖ «ខ្ញុំសូមណែនាំដល់បងប្អូនអ្នកសារព័ត៌មានទាំងអស់ឱ្យប្រកាន់ខ្ជាប់នូវការអនុវត្តឱ្យបានត្រឹមត្រូវតាមវិជ្ជាជីវៈ និងច្បាប់ស្តីពីរបបសារព័ត៌មាន និងគោរពតាមគោលការណ៍ កុំបំពានសិទ្ធិអ្នកដទៃ កុំបំភ្លៃការពិត»។
លោកបានបញ្ជាក់ទៀតថា៖ «ក្នុងរយៈពេល ១ ឆ្នាំកន្លងទៅនេះ មានអ្នកសារព័ត៌មាន និងជនឱកាសនិយមមួយចំនួនតូចបាននិងកំពុងប្រើប្រាស់ស្ថាប័នព័ត៌មានធ្វើសកម្មភាព ទុច្ចរិតជំរិតទារប្រាក់ជាថ្នូរនឹងការមិនចុះផ្សាយ ឬលុបព័ត៌មានក្លែងក្លាយបំភ្លៃការពិត បំប៉ោងសភាពការណ៍ ជេរប្រមាថ ញុះញង់ និងបំពុលបរិយាកាសសង្គមដើម្បីផលប្រយោជន៍ផ្ទាល់ខ្លួនដែលប្រាសចាកពីវិជ្ជាជីវៈសារព័ត៌មានដែលធ្វើឱ្យខូចតម្លៃ កិត្តិយស សេចក្តីថ្លៃថ្នូរ និងកិត្យានុភាពរបស់ស្ថាប័នសារព័ត៌មាន និងអ្នកសារព័ត៌មានដែលអនុវត្តបានត្រឹមត្រូវតាមក្រមសីលធម៌វិជ្ជាជីវៈ»។
លោក ហ៊ុន សែន បានថ្លែងថា៖ «កន្លងមក ខ្ញុំបានលើកឡើងហើយថា ជំងឺកូវីដ ១៩ ជាជំងឺឆ្លងដ៏កាចសាហាវ ប៉ុន្តែការផ្សព្វផ្សាយព័ត៌មានបំពុលសង្គមគឺវាកាចសាហាវ ឆ្លងលឿនជាងការឆ្លងរីករាលដាលនៃជំងឺកូវីដ ១៩ ទៅទៀត ដែលទាមទារឱ្យរាជរដ្ឋាភិបាលចាត់វិធានការចាំបាច់ដើម្បីការពារសេចក្តីសុខសាន្តរបស់ប្រជាជន និងការថែរក្សាសុខសន្តិភាព ការអភិវឌ្ឍនៅកម្ពុជា»។
លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ក៏បានសង្កេតឃើញមានដូចគ្នាទៅនឹងការលើកឡើងរបស់នាយករដ្ឋមន្ត្រីដែលនៅតែមានការប្រើប្រាស់សារព័ត៌មានទាំងផ្លូវការ ទាំងបណ្តាញផ្សព្វផ្សាយសង្គមគឺនៅមានការផ្សព្វផ្សាយព័ត៌មានមិនពិត។
លោកបានថ្លែងប្រាប់ ភ្នំពេញ ប៉ុស្តិ៍ ម្សិលមិញថា ក្នុងឆ្នាំ ២០២០ អង្គភាពខ្លះដែលជាបុគ្គលដែលលេងតាមបណ្តាញសង្គមបានផ្សាយរឿងខុសដែលទទួលការបំភ្លឺមិនតិចជាង ៤ ដងទេក្នុង ១ ឆ្នាំ ប៉ុន្តែស្ថាប័នខ្លះទៀតមិនមែនផ្សាយព័ត៌មានមិនពិតទេ តែជាការផ្សាយព័ត៌មានបង្ខូចបង្កាច់ក្នុងន័យញុះញង់ អុចអាលជាដើម។
លោក ហ៊ុយ វណ្ណៈ ថ្លែងថា៖ «ចំពោះយន្តការប្រឆាំងទៅនឹងព័ត៌មានក្លែងក្លាយនេះទាំងប្រមុខរាជរដ្ឋាភិបាលទាំងក្រសួងស្ថាប័នពាក់ព័ន្ធគឺបង្កើតនូវយន្តការដើម្បីឆ្លើយតបក្នុងការដោះស្រាយនូវបញ្ហានេះ»។
ចំណែកនាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី បានប្រាប់ ភ្នំពេញ ប៉ុស្តិ៍ ម្សិលមិញដែរថា ជំនួបនេះគ្រាន់តែជាផ្នែកមួយនៃការអញ្ជើញអ្នកសារព័ត៌មានទៅស្តាប់នូវអ្វីដែលលោកនាយករដ្ឋមន្ត្រីលើកឡើងទេ វាមិនមានសកម្មភាពណាមួយដែលនាយករដ្ឋមន្ត្រីស្តាប់យោបល់ពីអ្នកសារព័ត៌មានវិញ គឺមិនមានទេ។
លោក ណុប វី បានថ្លែងឲ្យដឹងថា៖ «អ្វីដែលយើងចង់ឃើញគឺសម្តេចនាយករដ្ឋមន្ត្រីស្តាប់យោបល់របស់អ្នកសារព័ត៌មានរបស់យើងដែលបានចូលរួមក្នុងជំនួបនេះឱ្យបានច្រើនជាងអ្វីដែលជាវេទិកាដែលនាយករដ្ឋមន្ត្រីមានប្រសាសន៍មកកាន់អ្នកសារព័ត៌មាន»។
ជាមួយគ្នានេះដែរលោក ណុប វី បានសង្កេតឃើញ អ្នកសារព័ត៌មានអនុវត្តតួនាទីរបស់ពួកគាត់ គ្រាន់តែមានអ្នកសារព័ត៌មានខ្លះអនុវត្តត្រឹមត្រូវ ហើយអ្នកសារព័ត៌មានខ្លះមិនទាន់អនុវត្តតួនាទីប្រកបដោយក្រមសីលធម៌ វិជ្ជាជីវៈបានពេញលេញនៅឡើយទេ ដែលទាមទារឱ្យមានការរួមគ្នាដើម្បីជួយដល់ការគាំទ្រផ្នែកការបណ្តុះបណ្តាលសមត្ថភាព និងក្រមសីលធម៌បន្ថែមទៀត។
ទន្ទឹមនឹងនេះដែរ លោកនាយករដ្ឋមន្ត្រី ហ៊ុន សែន ក៏បានធ្វើការកោតសរសើរចំពោះស្ថាប័នព័ត៌មាន និងអ្នកសារព័ត៌មានដែលបានខិតខំផ្សព្វផ្សាយព័ត៌មានច្បាស់លាស់ទាក់ទងនឹងការវិវត្តនៃជំងឺកូវីដ១៩ និងសភាពការណ៍វិវត្តនៅក្នុងប្រទេសកម្ពុជាក៏ដូចជានៅក្នុងតំបន់ និងលើសកលលោកទាំងមូល។
គួរបញ្ជាក់ផងដែរថា ការជួបជុំដ៏ធំប្រចាំឆ្នាំរវាងប្រមុខរាជរដ្ឋាភិបាលជាមួយស្ថាប័នព័ត៌មានជារៀងរាល់ឆ្នាំកន្លងមកនេះ គឺក្នុងគោលបំណងបង្កើនសាមគ្គីភាព និងពង្រឹងភាពជាដៃគូរវាងរាជរដ្ឋាភិបាលជាមួយស្ថាប័នសារព័ត៌មាន ដើម្បីលើកស្ទួយសិទ្ធិសេរីភាពខាងការបញ្ចេញមតិ សេរីភាពខាងសារព័ត៌មានដែលគាំពារដោយច្បាប់រដ្ឋ និងធានានូវសុខដុមនីយកម្មនៅក្នុងសង្គម ការថែរក្សាសុខសន្តិភាព និងជំរុញការអភិវឌ្ឍប្រកបដោយចីរភាពយូរអង្វែងនៅក្នុងប្រទេសកម្ពុជា៕
