បន្ទាយមានជ័យៈ លោកនាយករដ្ឋមន្ត្រី ហ៊ុន សែន នឹងចុះជួបសួរសុខទុក្ខប្រជាពលរដ្ឋរាប់ម៉ឺននាក់ ដែលរងផលប៉ះពាល់ដោយសារគ្រោះទឹកជំនន់នៅខេត្តបន្ទាយមានជ័យនៅព្រឹកថ្ងៃទី ២១ ខែតុលា នេះ និងថ្ងៃស្អែក ខណៈខេត្តដែលមានព្រំប្រទល់ជាប់ប្រទេសថៃមួយនេះត្រូវបានទឹកជំនន់ជន់លិចធ្ងន់ធ្ងរជាងគេ និងយូរជាងគេ។
លោក ហ៊ុន សែន បានប្រកាសនៅលើ Facebook Page របស់លោកកាលពីម្សិលមិញថា៖ «ខ្ញុំនឹងបំពេញការងារ ២ ថ្ងៃ នៅខេត្តបន្ទាយមានជ័យគឺថ្ងៃទី ២១ និងថ្ងៃទី ២២ ខែ តុលា ឆ្នាំ ២០២០ មុននឹងត្រឡប់មកភ្នំពេញវិញ ដើម្បីដឹកនាំការប្រជុំគណៈរដ្ឋមន្ត្រីនៅថ្ងៃទី ២៣ ខែ តុលា ឆ្នាំ ២០២០។ ខេត្តបន្ទាយមានជ័យជាខេត្តមួយដែលរងគ្រោះធ្ងន់ជាងគេ និងយូរជាងគេដែលចាំបាច់ត្រូវផ្តល់អាទិភាពសង្គ្រោះផង និងស្តារឡើងវិញក្រោយទឹកជំនន់ផង»។
យោងតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យចេញកាលពីម្សិលមិញបានឱ្យដឹងថា នៅព្រឹកថ្ងៃទី ២១ ខែតុលា នេះ លោកនាយករដ្ឋមន្ត្រីនឹងអញ្ជើញធ្វើជាអធិបតីក្នុងពិធីសួរសុខទុក្ខប្រជាពលរដ្ឋដែលរងផលប៉ះពាល់ដោយសារទឹកជំនន់នៅ ២ ទីតាំង គឺនៅបរិវេណចំណុចទីទួលសុវត្ថិភាពផ្លូវជាតិលេខ ៥ ក្នុងភូមិបត់ត្រង់ ឃុំបត់ត្រង់ និងនៅផ្សារធំថ្មី បុរីជ័យII ក្នុងភូមិចំការតាដោក ក្នុងឃុំឫស្សីក្រោក ស្រុកមង្គលបុរី។
ចំណែកនៅព្រឹកថ្ងៃទី ២២ ខែតុលា លោក ហ៊ុន សែន នឹងជួបសួរសុខទុក្ខពលរដ្ឋនៅ ២ ទីតាំងផ្សេងទៀត គឺនៅបរិវេណផ្សារហង្ស ស៊ីផា ក្នុងភូមិផ្សារថ្មី ឃុំគំរូ ស្រុកថ្មពួក និង ១ កន្លែងទៀត នៅបរិវេណខាងជើងរង្វង់មូលផ្លូវជាតិលេខ ៥៨ ស្ថិតនៅក្នុងភូមិផ្សារកណ្តាល ក្រុងប៉ោយប៉ែត។
យោងតាមរបាយការណ៍បច្ចុប្បន្នភាពស្ដីពីផលប៉ះពាល់ទឹកជំនន់ក្នុងខេត្តបន្ទាយមានជ័យដែលភ្នំពេញប៉ុស្តិ៍ទទួលបានកាលពីម្សិលមិញទឹកជំនន់បានបណ្ដាលឱ្យមនុស្ស ១៦ នាក់ លង់ទឹកស្លាប់ និង ១៦ ៥២០ នាក់ទៀត ក្នុងចំណោមមនុស្សជាង ២០ ម៉ឺននាក់ ដែលទឹកជន់លិចផ្ទះសំបែងធ្ងន់ធ្ងរត្រូវបានជម្លៀសចេញទៅកាន់ទីទួលសុវត្ថិភាព។ ក្រៅពីនេះទឹកជំនន់បានជន់លិច និងប៉ះពាល់ដំណាំស្រូវសរុប ៦២ ៣៣៤ ហិកតា ដំឡូងមី ៩ ៨៨០ ហិកតា ដំណាំរួមផ្សំ ៥៤៣ ហិកតា សាលារៀន ១៣៤ កន្លែង ត្រូវបិទទ្វារជាបណ្ដោះអាសន្ន ប៉ះពាល់ដល់ការសិក្សារបស់សិស្សជាច្រើនពាន់នាក់ លិចវត្តអារាមចំនួន ៦០ កន្លែង សាលាឃុំចំនួន ៥ មណ្ឌលសុខភាព ៩ កន្លែង និងលិចកំណាត់ផ្លូវចំនួន ៧៤១ កន្លែងមានប្រវែងជិត ៥០០ គ.ម។
លោក លី សារី អ្នកនាំពាក្យរដ្ឋបាលខេត្តបន្ទាយមានជ័យបានប្រាប់ភ្នំពេញប៉ុស្តិ៍ពីម្សិលមិញថា នៅពេលនេះកម្ពស់ទឹកស្ទឹងមង្គលបុរី និងស្ទឹងសេរីសោភណព្រមទាំងប្រព័ន្ធដៃអូរនានាពិសេសអូរជាប់ព្រំដែនកម្ពុជា-ថៃ ទឹកនៅតែបន្តហក់ឡើងជាបន្តបន្ទាប់ បណ្ដាលឱ្យជន់លិចផ្លូវ និងផ្ទះប្រជាពលរដ្ឋជាច្រើនពាន់ខ្នងដែលរស់នៅតាមទីទំនាបជាប់មាត់ទឹក។
លោកថ្លែងថា៖ «ខេត្តបន្ទាយមានជ័យរបស់យើងខ្ញុំរងការជន់លិចធ្ងន់ធ្ងរ និងយូរជាងគេ ព្រោះភូមិសាស្ត្រខេត្តរបស់យើងខ្ញុំស្ថិតនៅតំបន់ទីទំនាប ដែលមិនគ្រាន់តែទទួលរងនូវឥទ្ធិពលពីជំនន់ទឹកភ្លៀងនៅក្នុងស្រុកប៉ុណ្ណោះទេ តែត្រូវរងឥទ្ធិពលនៃជំនន់ទឹកភ្លៀងពីប្រទេសថៃថែមទៀត»។
បើតាមលោក សារី នៅថ្ងៃម្សិលមិញក្រុងប៉ោយប៉ែតបានរងការជន់លិចខ្លាំងជាងគេដោយសារចរន្តទឹកដែលហូរធ្លាក់យ៉ាងគំហុកពីប្រទេសថៃតាមអូរព្រំដែនបានធ្វើឱ្យបាក់ធ្លាយទំនប់អូរខៃដនដែលមានផ្ទុកបរិមាណទឹកជាច្រើនលានម៉ែត្រគុបហូរជន់លិច និងប៉ះពាល់ភូមិឋានប្រជាពលរដ្ឋ និងហេដ្ឋារចនាសម្ព័ន្ធផ្លូវនៅក្នុងក្រុងនេះស្ទើរគ្រប់ទីកន្លែង។
ដើម្បីការពារសុវត្ថិភាព និងចៀសវាងការខូចខាតផ្លូវធ្ងន់ធ្ងរ រដ្ឋបាលក្រុងប៉ោយប៉ែតកាលពីម្សិលមិញបានសម្រេចផ្អាកការធ្វើចរាចរណ៍រថយន្តធុនធំទាំងអស់ជាបណ្តោះអាសន្ននៅលើកំណាត់ផ្លូវជាតិលេខ ៥ ចាប់ពីចំណុចអាស្រមលោកយាយ ម៉ៅ ទៅដល់ផ្លូវបំបែកកូនដំរីទៅស្រុកម៉ាឡៃ និងផ្លូវលំនានាក្នុងភូមិសាស្ត្រទីប្រជុំជនក្រុងប៉ោយប៉ែត។
លោក ញឹម ភឿង នាយករដ្ឋបាលក្រុងប៉ោយប៉ែតបានប្រាប់ ភ្នំពេញ ប៉ុស្តិ៍ ថា ដោយសារលំហូរទឹកពីការបាក់ទំនប់អូរខៃដនបានធ្វើឱ្យជន់លិចកំណាត់ផ្លូវជាតិលេខ ៥ ប្រវែងជាង ១ គីឡូម៉ែត្រ និងមានទឹកហូរកាត់ខ្មួលខ្មាញ់ដែលសូម្បីតែម៉ូតូក៏មិនអាចបើកបរឆ្លងកាត់នៅក្នុងចំណុចភូមិសាស្ត្រខាងលើនេះ ដោយគ្មានការឈរចាំជួយអន្តរាគមន៍ពីកម្លាំងសមត្ថកិច្ចបានឡើយ។ ជាមួយគ្នានេះ ផ្ទះពលរដ្ឋចំនួន ២ ៨០០ គ្រួសារ ឬស្មើ ៨ ៨០០ នាក់ នៅក្នុងក្រុងនេះបានរងការជន់លិច និងត្រូវជម្លៀសទៅកាន់ទីទួលមានសុវត្ថិភាព។
លោកថ្លែងថា៖ «ដើម្បីសុវត្ថិភាព និងចៀសវាងការខូចខាតផ្លូវធ្ងន់ធ្ងរ យើងចាំបាច់ត្រូវបិទកំណាត់ផ្លូវជាតិលេខ ៥ ចាប់ពីចំណុចអាស្រមលោកយាយម៉ៅ ទៅដល់ផ្លូវបំបែកកូនដំរីទៅស្រុកម៉ាឡៃ និងផ្លូវលំនានាក្នុងភូមិសាស្ត្រទីប្រជុំជនក្រុងប៉ោយប៉ែតជាបណ្ដោះអាសន្នសិន»។
ឆ្លើយតបចំពោះបញ្ហាប្រឈមដែលបង្កឡើងដោយជំនន់ទឹកភ្លៀង អាជ្ញាធរក្រុងប៉ោយប៉ែតបានប្រើប្រាស់អស់ពីលទ្ធភាពទាំងកម្លាំង និងមធ្យោបាយ ដើម្បីជួយសង្គ្រោះប្រជាពលរដ្ឋពីគ្រោះទឹកជំនន់ទៅកាន់ទីទួលសុវត្ថិភាព ព្រមទាំងផ្ដល់ជំនួយសង្គ្រោះបឋម ដែលរួមមាន ស្បៀងអាហារ គ្រឿងឧបភោគ បរិភោគ ថ្នាំពេទ្យ និងសម្ភារប្រើប្រាស់មួយចំនួនទៀតដល់ប្រជាពលរដ្ឋរងគ្រោះ។
យោងតាមការព្យាករអាកាសធាតុរបស់ក្រសួងធនធានទឹកដែលបានចេញផ្សាយកាលពីម្សិលមិញ ភ្លៀងនឹងបន្តធ្លាក់រហូតដល់ថ្ងៃទី ២៧ ខែ តុលា ឆ្នាំ ២០២០ ពិសេសនៅក្នុងតំបន់ភូមិភាគឦសាននៃប្រទេសកម្ពុជា នឹងមានភ្លៀងធ្លាក់ច្រើន ដែលនឹងធ្វើឱ្យកម្ពស់ទឹកនៅតាមដងទន្លេមេគង្គហក់ឡើងជាបន្តបន្ទាប់ផងដែរ៕