ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវដល់គ្រប់ក្រសួងស្ថាប័នពាក់ព័ន្ធ ជាពិសេសប្រជាពលរដ្ឋគ្រប់រូបបន្ថែមការយកចិត្តទុកដាក់ឲ្យបានខ្ពស់លើការបំបៅកូនដោយទឹកដោះម្តាយ ខណៈក្នុងរយៈពេលប៉ុន្មានឆ្នាំចុងក្រោយនេះ អត្រាបំបៅកូនដោយទឹកដោះម្តាយមានការថយចុះគួរឱ្យកត់សម្គាល់។
ការក្រើនរំឭកបែបនេះបានធ្វើឡើងនៅក្នុងសារលិខិតអបអរសាទរទិវាជាតិអាហារូបត្ថម្ភលើកទី ៦ ក្រោមប្រធានបទ «ការបំបៅកូនដោយទឹកដោះម្តាយ គឺជាជម្រើសដ៏ប្រសើរសម្រាប់អភិវឌ្ឍមូលធនមនុស្ស និងសេដ្ឋកិច្ចជាតិ» ដែលតែងប្រារព្ធធ្វើជារៀងរាល់ឆ្នាំនៅថ្ងៃទី ៦ ខែវិច្ឆិកា ។
លោកនាយករដ្ឋមន្ត្រី ហ៊ុន សែន បានថ្លែងក្នុងសារលិខិតនោះថា ទិវាជាតិអាហារូបត្ថម្ភត្រូវបានប្រារព្ធធ្វើឡើងជារៀងរាល់ឆ្នាំក្នុងគោលបំណងអប់រំ និងលើកកម្ពស់ការយល់ដឹងជាសាធារណៈនៅទូទាំងប្រទេសអំពីសារៈសំខាន់នៃអាហារូបត្ថម្ភក្នុងការចូលរួមចំណែកអភិវឌ្ឍមូលធនមនុស្ស បង្កើនប្រសិទ្ធភាពការងារ ជំរុញកំណើនសេដ្ឋកិច្ចជាតិ និងវឌ្ឍនភាពសង្គម។
លោកបានបន្តថា៖ «ការលើកកម្ពស់អាហារូបត្ថម្ភគឺជាបញ្ហាអន្តរវិស័យដែលតម្រូវឱ្យមានកិច្ចសហការល្អ ការសម្របសម្រួល និងការចូលរួមដោយយកចិត្តទុកដាក់ទៅលើការអន្តរាគមន៍ និងការវិនិយោគនៅក្នុងវិស័យពាក់ព័ន្ធនានា ដូចជា វិស័យសុខាភិបាល អប់រំ ការងារ កសិកម្ម អភិវឌ្ឍន៍ជនបទ ទឹកស្អាត និងអនាម័យយេនឌ័រសេដ្ឋកិច្ច និងការងារគាំពារសង្គមជាដើម»។
តាមរបាយការណ៍អង្កេតសុខភាព និងប្រជាសាស្ត្រឆ្នាំ ២០១៤ របស់ក្រសួងផែនការបានឲ្យដឹងថា អត្រាបំបៅកូនដោយទឹកដោះម្តាយតែមួយមុខគត់សម្រាប់កុមារអាយុ ៦ ខែដំបូង បានធ្លាក់ចុះពី ៧៣,៥ ភាគរយ នៅឆ្នាំ ២០១០ មកត្រឹម ៦៥ ភាគរយ នៅឆ្នាំ ២០១៤ ហើយការបន្តបំបៅកូនដោយទឹកដោះម្តាយសម្រាប់កុមារអាយុ ១២ ដល់ ១៥ ខែ ក៏បានធ្លាក់ចុះផងដែរ។
លោកនាយករដ្ឋមន្ត្រីបានបញ្ជាក់ថា៖ «កត្តាទាំងនេះអាចមានហេតុផលមួយចំនួនដូចជា កង្វះខាតចំណេះដឹងអំពីការបំបៅកូនដោយទឹកដោះម្តាយ កង្វះខាតការគាំទ្រពីសំណាក់ក្រុមគ្រួសារក្នុងការបំបៅកូនដោយទឹកដោះម្តាយ ការធ្វើចំណាកស្រុករបស់ម្តាយ ដើម្បីស្វែងរកការងារធ្វើ ការសម្រាកក្នុងអំឡុងពេលលម្ហែមាតុភាពមានពេលកំណត់ខ្លីពេក និងជាពិសេសការរីករាលដាលនៃការផ្សព្វផ្សាយលក់ផលិតផលម្សៅទឹកដោះគោជំនួសទឹកដោះម្តាយដែលធ្វើឱ្យប្រជាជនមានការភាន់ច្រឡំអំពីគុណតម្លៃទឹកដោះម្តាយ ជាក់ស្តែងគឺពុំមានផលិតផលម្សៅទឹកដោះគោណាមួយអាចមកជំនួសទឹកដោះម្តាយបានទេ»។
ទន្ទឹមនឹងនោះលោកបានណែនាំឲ្យស្ថាប័នពាក់ព័ន្ធបង្កើនការយល់ដឹងជាសាធារណៈអំពីសារៈសំខាន់ និងគុណតម្លៃនៃទឹកដោះម្តាយសំដៅផ្លាស់ប្តូរឥរិយាបថអ្នកពាក់ព័ន្ធ ជាពិសេសមាតា-បិតា និងអាណាព្យាបាលគ្រប់រូបលើការអនុវត្តបំបៅកូនដោយទឹកដោះម្តាយក្នុងអំឡុងពេល ១ ម៉ោងដំបូង ក្រោយពីសម្រាលរួចភ្លាមៗ។
បន្ទាប់មកត្រូវបំបៅកូនដោយទឹកដោះម្តាយតែមួយមុខគត់សម្រាប់កុមារអាយុ ៦ ខែដំបូង និងបន្តបំបៅដោយទឹកដោះម្តាយរហូតដល់កុមារអាយុបាន ២ ឆ្នាំយ៉ាងតិច ឬលើសពីនេះជាមួយនឹងការផ្តល់អាហារបន្ថែមសម្រាប់កុមារអាយុពី ៦ ខែឡើងទៅ ។
លោកនាយករដ្ឋមន្ត្រីបានបញ្ជាក់បន្ថែមថា៖ «ការបំបៅកូនដោយទឹកដោះម្តាយបានផ្តល់នូវអត្ថប្រយោជន៍ជាច្រើនដល់ស្ត្រីដែលជាម្តាយ និងទារកទើបកើត ទាំងផ្នែកសុខភាព និងទាំងសតិបញ្ញាស្មារតីព្រមទាំងបានផ្តល់ដល់ទារកនូវការចាប់ផ្តើមជីវិតដ៏ល្អ ព្រោះទឹកដោះម្តាយមានផ្ទុករាល់សារជាតិចិញ្ចឹមទាំងអស់ដែលទារកត្រូវការ និងជាថ្នាំបង្ការដំបូងបំផុតសម្រាប់ការពារទារកប្រឆាំងនឹងជំងឺផ្សេងៗ»។
លោក មាស ប៊ុនលី មន្ត្រីជំនាញផ្នែកទំនាក់ទំនង អង្គការយូនីសេហ្វកម្ពុជា បានប្រាប់ភ្នំពេញប៉ុស្តិ៍ពីម្សិលមិញថា កម្ពុជាធ្លាប់ទទួលបានភាពជោគជ័យខ្លាំងក្នុងការលើកកម្ពស់ការបំបៅកូនដោយទឹកដោះម្តាយដែលមានប្រមាណ ៧៥ ភាគរយនៅចន្លោះឆ្នាំ ២០០០ ដល់ឆ្នាំ ២០១០។
ប៉ុន្តែលោកថា អត្រានេះបានធ្លាក់ចុះមកវិញ ដែលធ្វើឲ្យមានការបារម្ភខ្លាំង ព្រោះពលរដ្ឋមានការយល់ច្រឡំតាមរយៈការផ្សព្វផ្សាយម្សៅទឹកដោះគោដែលថាវាមានប្រសិទ្ធភាពដូចទឹកដោះម្តាយ ខណៈកត្តាការងារក៏ជាផ្នែកដែលជំរុញឲ្យស្ត្រីបោះបង់ការបំបៅដោះកូនដោយទឹកដោះខ្លួនឯងផងដែរ។
លោកបន្តថា៖ «សម្រាប់យើងមានការព្រួយបារម្ភជាខ្លាំង ប្រសិនបើមាននិន្នាការធ្លាក់ចុះបន្តទៀតនឹងមានផលប៉ះពាល់ទៅសុខភាពកុមារ និងអភិវឌ្ឍរបស់កុមារមែនទែន។ ទឹកដោះម្តាយជាថ្នាំបង្ការដំបូងបំផុត ហើយជាប្រភពនៃអាហារូបត្ថម្ភដែលល្អជាងគេ ព្រោះមានជីវជាតិច្រើនជួយការអភិវឌ្ឍផ្នែកខួរក្បាលរបស់គាត់។ សម្រាប់ម្តាយវិញក៏ទទួលផលប្រយោជន៍ដែរ ដោយបំបាត់ការតានតឹង អាចបង្ការជំងឺមហារីកដោះ ហើយអាចជួយការពារជំងឺផ្សេងៗទៀតសម្រាប់ស្ត្រី» ។
លោក មាស ប៊ុនលី បានលើកឡើងថា ដំណោះស្រាយល្អដែលធ្វើឲ្យប្រសើរឡើងវិញនូវការបំបៅដោះកូនដោយទឹកដោះនោះ គឺត្រូវលើកកម្ពស់ការយល់ដឹងពីសារៈប្រយោជន៍នៃការបំបៅដោះកូនទៅដល់ម្តាយដោយមានការចូលរួមពីក្រុមគ្រួសារ និងសហគមន៍ត្រូវផ្តល់ឱកាសឈប់សម្រាកសម្រាប់ស្ត្រីក្នុងការសម្រាលមាតុភាពឲ្យបានគ្រប់គ្រាន់ និងត្រឹមត្រូវ។ ជាពិសេសនោះលោកចង់ឲ្យមានការគ្រប់គ្រង និងដាក់កំហិតទៅលើការផ្សព្វផ្សាយ និងការចរាចរណ៍ផលិតផលម្សៅទឹកដោះគោ ដើម្បីបង្ហាញថាទឹកដោះម្តាយមានសារៈសំខាន់ជាងម្សៅទឹកដោះទាំងនោះ៕