The Phnom Penh Post Search

Search form




Logo of Phnom Penh Post newspaper Phnom Penh Post - លោកនាយក​រដ្ឋមន្ត្រី បញ្ជា​ឱ្យ​រដ្ឋមន្ត្រី​ ៤ ​ក្រសួង​ចាត់​មន្ត្រី​ជំនាញ​ចុះ​វាយតម្លៃ​ការខូចខាត​ដោយសារ​ទឹកជំនន់




លោកនាយក​រដ្ឋមន្ត្រី បញ្ជា​ឱ្យ​រដ្ឋមន្ត្រី​ ៤ ​ក្រសួង​ចាត់​មន្ត្រី​ជំនាញ​ចុះ​វាយតម្លៃ​ការខូចខាត​ដោយសារ​ទឹកជំនន់

Content image - Phnom Penh Post
កំណាត់​ផ្លូវ​មួយ​ខ្សែ​ដែល​ត្រូវ​ទឹកជំនន់​ជន់​លិច​ធ្វើឲ្យ​ខូចខាត​។ រូបថត ហ្វេសប៊ុក

លោកនាយក​រដ្ឋមន្ត្រី បញ្ជា​ឱ្យ​រដ្ឋមន្ត្រី​ ៤ ​ក្រសួង​ចាត់​មន្ត្រី​ជំនាញ​ចុះ​វាយតម្លៃ​ការខូចខាត​ដោយសារ​ទឹកជំនន់

ភ្នំពេញ: លោកនាយក​រដ្ឋមន្ត្រី ហ៊ុន សែន បាន​បញ្ជា​ឱ្យ​រដ្ឋមន្ត្រី​ក្រសួង​ចំនួន​ ៤ ​ចាត់​មន្ត្រី​ជំនាញ​ចុះ​ទៅ​វាយតម្លៃ​ការខូចខាត​ផ្លូវ​ដោយសារ​ទឹកជំនន់​ជាបន្ទាន់ ដើម្បី​ដាក់​ផែនការ​ជួសជុល និង​ស្ថាបនា​ឡើងវិញ ខណៈ​ក្រសួង​សាធារណការ​ទើប​រកឃើញ​បឋម​ថា មាន​ផ្លូវ​ប្រមាណ​ ៤០០ ​គីឡូម៉ែត្រ​បាន​រង​ការខូចខាត​។

លោក ហ៊ុន សែន បាន​ថ្លែង​ក្នុង​ឱកាស​បើក​ការដ្ឋាន​សាងសង់​ស្ពាន​ឆ្លងទន្លេ​បាសាក់​ភ្ជាប់​ពី​កោះពេជ្រ​ទៅ​កោះនរា​ពី​ម្សិលមិញ​ថា លោក​បាន​បញ្ជា​រដ្ឋមន្ត្រី​នៃ​ក្រសួង​ ៤ ​រូប​រួមមាន ក្រសួង​សាធារណការ និង​ដឹកជញ្ជូន ក្រសួង​ធនធានទឹក និង​ឧតុនិយម ក្រសួង​អភិវឌ្ឍន៍​ជនបទ និង​ក្រសួងកសិកម្ម​ដោយ​ត្រូវឱ្យ​មន្ត្រី​ជំនាញ​ក្រសួង​ទាំង​ ៤ ​នេះ​ចុះ​វាយតម្លៃ​ការខូចខាត​ជាមួយ​មន្ត្រី​ក្រសួង​សេដ្ឋកិច្ច និង​ហិរញ្ញវត្ថុ​។

លោក​បញ្ជាក់ថា​៖ «​និយាយ​ពី​រឿង​ផ្លូវ យើង​ខូចខាត​ទាំង​ផ្លូវជាតិ ផ្លូវ​ខេត្ត ផ្លូវលំ ស្ពាន​មួយចំនួន ហើយ​ទំនប់​ប្រឡាយ​មួយចំនួន​ត្រូវ​បាក់បែក​។ អ៊ីចឹង​ទេ កុំ​ចាំ​មន្ទីរ​រាយការណ៍​! កុំ​ចាំ​មន្ទីរ​កសិកម្ម​ក្តី អភិវឌ្ឍន៍ជនបទ​ក្តី ធនធាន​ទឹក​ក្តី សាធារណការ​ក្តី វាយតម្លៃ​ខូចខាត​ពី​ខាងក្រោម​។ ឥឡូវ​ក្រសួង​នីមួយៗ​មាន​រដ្ឋលេខាធិការ អនុរដ្ឋលេខាធិការ​ច្រើនណាស់​។ ចុះទៅ​! ហើយ​ក្រសួង​សេដ្ឋកិច្ច​ និង​ហិរញ្ញវត្ថុ​ចុះ​ទៅ​ជាមួយ​ទៅ​។ ធ្វើការ​ជាមួយ​ខេត្ត ជាមួយ​មូលដ្ឋាន​! កុំ​បង្អង់​យូរ​ទឹក​ស្រក​ភ្លាម​ចាប់ផ្តើម​ធ្វើ​ភ្លាម ចាប់ផ្តើម​ជួសជុល គឺ​ស្តារឡើងវិញ​បន្ទាន់​»​។

លោក វ៉ាស៊ឹម សុរិយា អ្នកនាំពាក្យ​ក្រសួង​សាធារណការ​ថ្លែង​ពី​ម្សិលមិញ​ថា មន្ត្រី​ជំនាញ​បាន​ចាប់ផ្ដើម​ចុះ​វាយតម្លៃ​ និង​ត្រួតពិនិត្យ​ការខូចខាត​ផ្លូវ​ដោយសារ​ទឹកជំនន់​ចាប់​តាំងពី​ដើម​សប្ដាហ៍​មុន​ហើយ​នឹង​ចុះ​ត្រួតពិនិត្យ​បន្តទៀត ដើម្បី​រង់ចាំ​ពេល​ទឹក​ស្រក ឬ​ស្ងួត​ទឹក​ក្រុម​ការងារ​នឹង​ចុះទៅ​ជួសជុល និង​ស្ថាបនា​តាម​គោលដៅ​ទាំងនោះ​។ បញ្ហា​ទឹកជំនន់​ឆ្នាំនេះ​ធ្វើឱ្យ​ផ្លូវ​សំខាន់​មួយ​ចំនួន​បាន​ខូចខាត​ធ្ងន់ធ្ងរ ដែល​បង្ក​ការរាំងស្ទះ​ដល់​ការធ្វើដំណើរ និង​ការដឹកជញ្ជូន​ទំនិញ​នានា​ជាច្រើន​។

«​យើង​បាន​ចុះទៅ​វាយតម្លៃ​ និង​ត្រួតពិនិត្យ​បណ្ដើរៗ​ហើយ​គឺ​មាន​ទាំង​ឯកឧត្តម​រដ្ឋមន្ត្រី​ចុះ​ផ្ទាល់​រដ្ឋលេខាធិការ និង​អនុរដ្ឋលេខាធិការ​។ អ៊ីចឹង​យើង​បាន​ធ្វើ​បណ្ដើរៗ រកឃើញ​ផ្លូវ​ខូច​ ៤០០ ​គីឡូម៉ែត្រ​ហើយ​យើង​មិន​ទុក​យូរ​ទេ បន្ទាប់មក​យើង​នឹងមាន​ក្រុមការងារ​ផ្សេងៗ​ទៀត​ចុះ​ទៅ​ពិនិត្យ​បន្ដទៀត ដើម្បី​ដាក់​ផែនការ​ចុះ​ធ្វើ​តែម្ដង​»​។

លោក គង់ រតនៈ នាយក​វិទ្យាស្ថាន​សុវត្ថិភាព​ចរាចរណ៍​ថ្លែង​ថា លោក​គាំទ្រ​អនុសាសន៍​លោក​នាយក​រដ្ឋមន្ត្រី​ដែល​តម្រូវឱ្យ​រដ្ឋមន្ត្រី​ទាំង​ ៤ ​ក្រសួង​ធ្វើ​កិច្ចការ​នេះ​ឱ្យ​បាន​លឿន​ប៉ុន្ដែ​ក្នុងនាម​មន្ត្រី​បច្ចេកទេស​ត្រូវតែ​គិតគូរ​ពី​គុណភាព​ និង​បច្ចេកទេស​ជា​ចម្បង​។ «​បើតាម​អនុសាសន៍​អ្នក​នយោបាយ ឬ​ថ្នាក់ដឹកនាំ គាត់​ចង់​បាន​អ្វីៗ​ឱ្យ​លឿន​ដូច​មាត់​គាត់​អ៊ីចឹង ប៉ុន្ដែ​ក្នុងនាម​យើង​ជា​អ្នកបច្ចេកទេស ត្រូវតែ​ធ្វើតាម​បច្ចេកទេស​ដើម្បី​ការពារ​ឱ្យបាន​ជាប់​ល្អ គង់វង្ស​យូរអង្វែង​គឺ​មិនមែន​ធ្វើឱ្យ​តែ​រួច​ពី​ដៃ ឃើញ​ស្អាត​តែ​ ៣ ឬ​ ៤ ​ខែ ហើយ​ខូច​វិញ​ទេ​»​។

បើតាម​របាយការណ៍​គណៈកម្មាធិការ​ជាតិ​គ្រប់គ្រង​គ្រោះមហន្តរាយ​គិត​ត្រឹម​ថ្ងៃទី​ ២៤ ​ខែ​តុលា រាជធានី-ខេត្ត​ ចំនួន​ ២០ ​បាន​រង​ការប៉ះពាល់​ដោយសារ​ជំនន់​ទឹកភ្លៀង​។ ក្នុងនោះ​ពលរដ្ឋ​រង​ផលប៉ះពាល់​ចំនួន​ ១៣៦ ៤៤២ ​គ្រួសារ​ស្មើ​ប្រមាណ ៥៤៥ ៧៦៨ ​នាក់ ពលរដ្ឋ​ត្រូវបាន​ជម្លៀស​ទៅ​ទីទួល​សុវត្ថិភាព​ចំនួន​ ១១ ៨៣៨ ​គ្រួសារ​ ស្មើ​ប្រមាណ​ ៤៧ ៣៥២ ​នាក់ និង​ពលរដ្ឋ​ស្លាប់​ ៤០ ​នាក់​៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ