ភ្នំពេញៈ ជាថ្មីម្ដងទៀតលោកនាយករដ្ឋមន្ត្រី ហ៊ុន សែន បានបន្តអំពាវនាវឱ្យពលរដ្ឋកុំធ្វើដំណើរក្នុងករណីមិនចាំចាច់ ជាពិសេសត្រូវចៀសវាងកន្លែងដែលមានមនុស្សច្រើន ដើម្បីការពារកុំឱ្យឆ្លងពីមនុស្សម្នាក់ទៅមនុស្សម្នាក់ទៀត ខណៈនៅកម្ពុជាទើបរកឃើញអ្នកមកពីបរទេសមានជំងឺកូវីដ ១៩ចំនួន ២ ករណីថ្មី ក្រោយពីស្ងប់ស្ងាត់អស់ជាង ១ ខែ។
លោក ហ៊ុន សែន បានលើកឡើងនៅក្នុងទំព័រហ្វេសប៊ុកកាលពីថ្ងៃទី ២៣ ឧសភាថា ជំងឺកូវីដ១៩ គឺជាជំងឺកាចសាហាវមួយដែលកំពុងបន្តវាយលុកនៅប្រទេសចំនួន ២១៦ ក្នុងពិភពលោកដែលបានធ្វើឱ្យមនុស្សប្រហែល ៥ លាននាក់ឈឺ ហើយក្នុងនោះមានស្លាប់ជាង ៣០ ម៉ឺននាក់។
លោកបន្តថា ប្រជាពលរដ្ឋត្រូវមានការយល់ដឹងខ្ពស់អំពីជំងឺឆ្លងនេះ ដោយត្រូវបង្កើនការធ្វើអនាម័យក្នុងការរស់នៅឱ្យបានល្អ គឺត្រូវពាក់ម៉ាស់ ឬក្រមា ត្រូវដុសលាងសម្អាងដៃឱ្យបានស្អាតជាប្រចាំជាមួយសាប៊ូ អាល់កុល ឬជែលដើម្បីកម្ចាត់មេរោគ។
លោកបានបញ្ជាក់ថា៖ «បើមានការសង្ស័យទៅលើអ្នកណាម្នាក់ ឬចំពោះខ្លួនឯងផ្ទាល់សូមទូរស័ព្ទមកលេខ ១១៥។ សូមកុំចម្លងរោគពីយើងទៅគេ ហើយក៏កុំចម្លងរោគពីគេមកក្រុមគ្រួសារយើងផងដែរ។ កន្លែងណាដែលមិនចាំបាច់ទៅសូមកុំទៅជាពិសេសទីកន្លែងដែលមានក្រុមមនុស្សច្រើន។ សូមស្តាប់ និងធ្វើតាមការណែនាំរបស់ក្រសួងសុខាភិបាលឲ្យបានជាប់ជានិច្ច»។
កាលពីថ្ងៃម្សិលមិញ ក្រសួងសុខាភិបាលបានប្រកាសថា លទ្ធផលធ្វើតេស្ដរបស់វិទ្យាស្ថានប៉ាស្ទ័រសម្រាប់ថ្ងៃទី ២៤ ឧសភាគឺពុំបានរកឃើញអ្នកជំងឺកូវីដ១៩ថ្មីឡើយ ខណៈមន្ត្រីក្រសួងបានផ្ដល់ព័ត៌មានបន្ថែមទៀតពាក់ព័ន្ធស្ដ្រីខ្មែរម្នាក់ ដែលធ្វើតេស្ដវិជ្ជមានជំងឺកូវីដ១៩នៅថ្ងៃទី ២២ ឧសភា បន្ទាប់ពីបានវិលត្រឡប់ពីសហរដ្ឋអាមេរិក និងឆ្លងកាត់ប្រទេសកូរ៉េខាងត្បូងមកដល់កម្ពុជាវិញនៅថ្ងៃទី ៨ ខែឧសភា។
រដ្ឋលេខាធិការ និងជាអ្នកនាំពាក្យក្រសួងសុខាភិបាលលោកស្រី ឱ វណ្ណឌីន បានបញ្ជាក់នៅក្នុងសេចក្ដីប្រកាសព័ត៌មានថា ស្ដ្រីខ្មែររូបនេះត្រូវបានប្រទេសកូរ៉េខាងត្បូងផ្ដល់ដំណឹងមកក្រសួងសុខាភិបាលកម្ពុជានៅថ្ងៃទី ១១ ឧសភាថា ជាអ្នកប្រឈមហានិភ័យខ្ពស់ក្នុងការឆ្លង ដោយសារបានប៉ះពាល់ផ្ទាល់ជាមួយស្ដ្រីជនជាតិកូរ៉េខាងត្បូងម្នាក់ដែលបានឆ្លងជំងឺកូវីដ១៩ក្រោយពីពួកគេធ្វើដំណើររួមគ្នាតាមជើងហោះហើរចាកចេញពីសហរដ្ឋអាមេរិក។
លោកស្រីបន្តថា ចំពោះមនុស្សចំនួន ៦៧ នាក់ទៀតដែលធ្វើដំណើរតាមយន្តហោះជាមួយស្ដ្រីខ្មែររូបនេះចេញពីប្រទេសកូរ៉េខាងត្បូងមកកាន់ទីក្រុងភ្នំពេញគឺមានខ្មែរចំនួន ២៩ នាក់ជនជាតិកូរ៉េខាងត្បូង ៣៣ នាក់រួមទាំងជនជាតិរុស្ស៊ី ស្វ៊ីស និងអូទ្រីស។ ប៉ុន្តែអ្នកទាំងនោះមិនទាន់មានបញ្ហាសុខភាពឡើយ ដោយសារតែកន្លែងអង្គុយក្នុងយន្តហោះត្រូវបានគេរៀបចំគម្លាតសុវត្ថិភាពបុគ្គល។
លោកស្រី ឱ វណ្ណឌីន បន្ថែមទៀតថា មុនមកដល់ប្រទេសកម្ពុជាវិញ ស្ដ្រីខ្មែរដែលឆ្លងជំងឺកូវីដ១៩នោះ គឺការពារក្រុមគ្រួសារពីការចម្លងជាយថាហេតុ ដោយបានបញ្ជូនកូនចំនួន ២ នាក់ និងក្មួយម្នាក់ទៅនៅខេត្តកំពង់ចាមដែលជាស្រុកកំណើតបណ្ដោះអាសន្ន ហើយបានប៉ះពាល់ផ្ទាល់តែជាមួយប្ដីប៉ុណ្ណោះ នៅពេលធ្វើចត្តាឡីស័កនៅក្នុងផ្ទះដែលស្ថិតនៅក្នុងសង្កាត់ទឹកថ្លា រាជធានីភ្នំពេញ។
លោកស្រីថា៖ «លទ្ធផលនៃការស្រាវជ្រាវបានបង្ហាញថា អ្នកដែលមានហានិភ័យខ្ពស់ និងប៉ះពាល់ផ្ទាល់គឺមានតែស្វាមីគាត់ទេដែលក្រុមការងារបានធ្វើតេស្ដគាត់រួចហើយ ដោយបង្ហាញថា លទ្ធផលអវិជ្ជមាន រីឯអ្នកផ្សេងទៀត គឺស្ថិតក្នុងហានិភ័យទាបចំនួន ៥៣ នាក់ និងហានិភ័យមធ្យមចំនួន ១៤ នាក់»។
កម្ពុជាបានរកឃើញករណីឆ្លងជំងឺកូវីដ១៩ កើនដល់ ១២៤ នាក់ក្នុងនោះ ១២២ នាក់ត្រូវបានព្យាបាលជាសះស្បើយ និងគ្មានករណីស្លាប់ទេ។ មុនរកឃើញការឆ្លងថ្មីចំនួន ២ ករណីចុងក្រោយនៅថ្ងៃទី ២១ និងថ្ងៃ ២២ ឧសភា លើបុរសជនជាតិខ្មែរដែលវិលត្រឡប់មកពីប្រទេសហ្វីលីពីន និងស្ដ្រីខ្មែរវិលមកពីសហរដ្ឋអាមេរិកគឺក្រសួងសុខាភិបាលបានប្រកាសថាគ្មានករណីឆ្លងថ្មីអស់ជាង ១ ខែ។
លោកស្រី ឱ វណ្ណឌីន បានបញ្ជាក់ប្រាប់ភ្នំពេញប៉ុស្តិ៍បន្ថែមកាលពីម្សិលមិញដែរថា កម្ពុជាមិនទាន់មានករណីឆ្លងនៅក្នុងសហគមន៍នៅឡើយទេ។
ទាក់ទងនឹងករណីកូវីដ១៩នេះ ក្រសួងសុខាភិបាលបានក្រើនរំឭកជាប្រចាំទៅដល់ពលរដ្ឋដោយមិនឲ្យធ្វេសប្រហែសឡើយ។ ទន្ទឹមនឹងនេះក្រសួងបានអំពាវនាវឲ្យបន្តការពារខ្លួនពីការឆ្លងតាមរយៈការពាក់ម៉ាស់ លាងដៃសម្លាប់មេរោគជាមួយសាប៊ូ អាល់កុល ឬជែល និងជាពិសេសត្រូវរក្សាគម្លាតសុវត្ថិភាពសង្គមដោយមិនត្រូវជួបនៅតាមកន្លែងស៊ីផឹក និងត្រូវបន្តផ្អាកការរៀបចំមង្គលការជាដើមថ្វីដ្បិតអ្នកជំងឺភាគច្រើនត្រូវបានព្យាបាលជាសះស្បើយ និងពុំមានអ្នកស្លាប់ក្ដី។
កាលពីកន្លងមកលោកស្រី ឱ វណ្ណឌីន ធ្លាប់បានព្រមានថា វិស័យសុខាភិបាលកម្ពុជានឹងជួបការលំបាក ប្រសិនបើកម្ពុជាឈានដល់ដំណាក់កាលឆ្លងទៅដល់សហគមន៍ ខណៈជំងឺនេះអាចឆ្លងពីមនុស្សម្នាក់ទៅមនុស្សម្នាក់ទៀតបានគ្រប់ពេលវេលា គ្រប់កាលៈទេសៈ និងគ្រប់ទីកន្លែង៕