លោក ហ៊ុន សែន នាយករដ្ឋមន្រ្តីកម្ពុជា ថ្លែងនាពេលកន្លងមក។ ហ៊ាន រង្សី
ភ្នំពេញ៖ ប្រមុខរាជរដ្ឋាភិបាលកម្ពុជា ប្តេជ្ញាបន្តយកចិត្តទុកដាក់ក្នុងការលើកកម្ពស់សុវត្ថិភាព និងសុខភាពការងាររបស់កម្មករនិយោជិតនៅតាមគ្រប់រោងចក្រ សហគ្រាស និងអ្នកបម្រើការងារនៅក្រៅប្រព័ន្ធ ទោះបីកម្ពុជាកំពុងជួបបញ្ហាប្រឈមរីករាលដាលនៃជំងឺកូវីដ ១៩ ក៏ដោយ។
ក្នុងសារលិខិតរបស់លោកនាយករដ្ឋមន្រ្តី ហ៊ុន សែន នាឱកាសខួបអនុស្សាវរីយ៍លើកទី១៣៥ នៃទិវាពលកម្មអន្តរជាតិ ថ្ងៃទី ១ ខែ ឧសភា ឆ្នាំ ២០២១ ដែលចេញផ្សាយនៅថ្ងៃនេះ បានឱ្យដឹងថា តាងនាមរាជរដ្ឋាភិបាល និងក្នុងនាមរូបលោកផ្ទាល់ មានសេចក្តីសោមនស្សរីករាយយ៉ាងក្រៃលែង ដែលបានចូលរួមជាមួយបងប្អូន ក្មួយៗ កម្មករនិយោជិត និយោជក និងជនរួមជាតិទាំងអស់ នៅក្នុងឱកាសខួបអនុស្សាវរីយ៍នេះ ក្រោមប្រធានបទ «សន្តិភាព សុខភាព និង ការងារ»។
លោកបញ្ជាក់ថា៖ «ទោះបីជាស្ថិតក្នុងស្ថានភាពដ៏លំបាកនៃជំងឺកូវីដ ១៩ ក៏ដោយ រាជរដ្ឋាភិបាលនៅតែខិតខំបន្តរក្សាការងារ ដែលមានស្រាប់ និងបង្កើតការងារថ្មីគ្រប់ប្រភេទជូនប្រជាពលរដ្ឋ ដែលនាំឱ្យផលប៉ះពាល់លើចំនួនការងារស្ថិតក្នុងកម្រិតមួយដែលអាចគ្រប់គ្រងបាន»។
ជាក់ស្ដែង រោងចក្រ សហគ្រាសចំនួន ១ ១០៣ បានបើកដំណើរការថ្មី ដែលផ្តល់ការងារដល់កម្មករនិយោជិតសរុបជាង ៦ ម៉ឺននាក់បន្ថែម។
លើសពីនេះ ចំនួនរោងចក្រ សហគ្រាស ដែលបានព្យួរកិច្ចសន្យាការងារបានធ្លាក់ចុះពីចំណុចកំពូលនៅខែមិថុនា ឆ្នាំ ២០២០ ពីចំនួន ៤៣៣ ស្មើនឹងកម្មករ និយោជិតជាង ១៥ ម៉ឺននាក់ មកត្រឹម ១៥០ រោងចក្រ សហគ្រាស ស្មើនឹងកម្មករជាង ២ ម៉ឺននាក់ គិតត្រឹមបំណាច់ ឆ្នាំ ២០២០ និងបន្តធ្លាក់ចុះជាបណ្តើរៗផងដែរ។
លោកបានបន្តថា នៅក្នុងបរិការណ៍នៃវិបត្តិជំងឺកូវីដ ១៩ នេះ ដើម្បីកាត់បន្ថយផលប៉ះពាល់មកលើស្ថានភាពសង្គម សេដ្ឋកិច្ច ដែលបណ្តាលមកពីការឆ្លងនៃព្រឹត្តិការណ៍សហគមន៍ ២០ កុម្ភៈ រាជរដ្ឋាភិបាលក៏បានដាក់ចេញនូវវិធានការបន្តជួយវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប និងវិស័យទេសចរណ៍ផងដែរ។
លោកមានប្រសាសន៍ថា៖ «បន្តផ្តល់ប្រាក់ឧបត្ថម្ភ ៤០ ដុល្លារអាមេរិកក្នុងមួយខែ សម្រាប់កម្មករនិយោជិត ១ នាក់ ដែលបំពេញការងារក្នុងវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប សម្រាប់រយៈពេល ៣ ខែបន្ថែមទៀត ចាប់ពីខែមេសា ដល់ខែមិថុនា ឆ្នាំ ២០២១»។
ជាមួយគ្នានេះ ម្ចាស់រោងចក្រ សហគ្រាសក្នុងវិស័យនេះត្រូវបន្ថែមចំនួន ៣០ ដុល្លារអាមេរិក សម្រាប់កម្មករនិយោជិត ១ នាក់ ដែលសរុបកម្មករនិយោជិត ១ នាក់ ទទួលបាន ៧០ ដុល្លារអាមេរិកក្នុងមួយខែ។
បន្ថែមពីនេះ រាជរដ្ឋាភិបាលបានបន្តផ្តល់ប្រាក់ឧបត្ថម្ភ ៤០ ដុល្លារអាមេរិកក្នុងមួយខែ ជូនកម្មករនិយោជិត ១ នាក់ ដែលបំពេញការងារក្នុងវិស័យទេសចរណ៍ ដែលមានដូចជា សណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ សម្រាប់រយៈពេល ៣ ខែបន្ថែមទៀត ចាប់ពីខែមេសា ដល់ខែមិថុនា ឆ្នាំ ២០២១។
លោក ហ៊ុន សែន បន្តថា ដើម្បីសម្រួលដល់អាជីវកម្មដែលរងផលប៉ះពាល់ធ្ងន់ធ្ងរក្នុងអំឡុងវិបត្តិកូវីដ ១៩ រាជរដ្ឋាភិបាលសម្រេចបន្តលើកលែងការបង់ពន្ធប្រចាំខែគ្រប់ប្រភេទ ចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយដ្ឋានពន្ធដារ សម្រាប់រយៈពេល ៣ ខែបន្ថែមទៀត ចាប់ពីខែមេសា ដល់ខែមិថុនា ឆ្នាំ២០២១។
ក្រៅពីនេះ រាជរដ្ឋាភិបាលបានបន្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធប្រឆាំងនឹងជំងឺកូវីដ ១៩ សម្រាប់រយៈពេល ៣ ខែបន្ថែមទៀត ចាប់ពីខែមេសា ដល់ខែមិថុនា ឆ្នាំ ២០២១។
ជាមួយគ្នានេះដែរ រាជរដ្ឋាភិបាលបានបន្តណែនាំដល់ក្រសួង ស្ថាប័នទាំងអស់ និងអំពាវនាវដល់បុគ្គល ឯកជនដែលជាម្ចាស់អគារទីតាំងអាជីវកម្ម និងរោងចក្រ សហគ្រាស ជួយសម្រួលដល់ភាគីជួល ដោយចៀសវាងការបញ្ឈប់កិច្ចសន្យា ឬការបណ្តេញចេញតាមរយៈការពន្យារពេលនៃការបង់ថ្លៃឈ្នួល ឬបញ្ចុះថ្លៃឈ្នួល ឬមិនយកថ្លៃឈ្នួលតាមលទ្ធភាពជាក់ស្តែង។
ក្រៅពីនេះ លោកនាយករដ្ឋមន្រ្តី បន្តអំពាវនាវជាថ្មីម្តងទៀតដល់ម្ចាស់រោងចក្រ សហគ្រាស និងបងប្អូន កម្មករនិយោជិត ចូលរួមយុទ្ធនាការចាក់វ៉ាក់សាំងកូវីដ ១៩ ដោយស្ម័គ្រចិត្ត និងអនុវត្តឱ្យបានហ្មត់ចត់បំផុតនូវ វិធានការបង្ការ និងទប់ស្កាត់ការរីករាលដាលនៃជំងឺកូវីដ ១៩ តាមរយៈការអនុវត្តវិធាន «៣ ការពារ» និង «៣ កុំ» និងតាមការណែនាំរបស់ក្រសួងសុខាភិបាល និងក្រសួងការងារ និងបណ្តុះបណ្តាលវិជ្ជាជីវៈ។
ក្នុងសារលិខិតដដែលបានឱ្យដឹងថា ទិវាពលកម្មអន្តរជាតិ ១ ឧសភា កម្ពុជាត្រូវបានប្រារព្ធឡើងជារៀងរាល់ឆ្នាំ ចាប់តាំងពីថ្ងៃរំដោះពីរបបប្រល័យពូជសាសន៍ថ្ងៃទី ៧ ខែ មករា ឆ្នាំ ១៩៧៩ រហូតមកដល់បច្ចុប្បន្ន។
ទោះបីឆ្នាំនេះ ប្រទេសកម្ពុជា និងពិភពលោកទាំងមូលកំពុងប្រឈមនឹងជំងឺកូវីដ ១៩ ក៏រាជរដ្ឋាភិបាលកម្ពុជានៅតែបន្តឱ្យមានការរៀបចំរំឭកនូវទិវាដ៏មានសារៈសំខាន់ជាប្រវត្តិសាស្ត្រនេះដែរ៕
.jpg)
