.jpg)
កញ្ញា ទិត ចិន្តា អាយុ ២៣ ឆ្នាំ ជាកម្មការិនីរោងចក្រ គឺជាមនុស្សទី ២ លាន ដែលបានចាក់វ៉ាក់សាំង នឹងទទួលបានរង្វាន់លើកទឹកចិត្តចំនួនទឹកប្រាក់ ១០ លានរៀល។រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសឧបត្ថម្ភទឹកប្រាក់ចំនួន ១០ លានរៀល ជូនដល់ស្ត្រីជាកម្មការិនីរោងចក្រ ដែល ជាអ្នកចាក់វ៉ាក់សាំងលេខរៀងទី ២ លាននាក់។
លោកនាយករដ្ឋមន្ត្រីបានបង្ហោះសារនៅលើបណ្តាញសង្គមហ្វេសប៊ុករបស់លោកនៅថ្ងៃនេះថា៖ «បន្ទាប់ពីការចាប់ផ្តើមចាក់វ៉ាក់សាំងថ្ងៃ ១០ ខែ កុម្ភៈ ២០២១ ដែលម្ជុលទី ១ បានទៅ ហ៊ុន ម៉ាណែត (អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ) នៅថ្ងៃ ១១ ខែ មេសា ២០២១ យើងបានរកឃើញមនុស្សទី ១ លាន ដែលបានចាក់វ៉ាក់សាំងដែលបានទៅក្មួយ ប៉ាន់ សុវណ្ណរិទ្ធិ ដែលទទួលបានរង្វាន់ ១០ លានរៀលផងដែរ»។
លោក ហ៊ុន សែន បន្តថា៖ «ថ្ងៃនេះ ១៤ ខែ ឧសភា ២០២១ យើងរកឃើញមនុស្សទី ២ លាន ដែលបានទៅក្មួយស្រី ទិត ចិន្តា អាយុ ២៣ ឆ្នាំ ជាកម្មការិនីរោងចក្រដែលនឹងទទួលបានរង្វាន់លើកទឹកចិត្តចំនួនទឹកប្រាក់ ១០ លានរៀលទៀត»។
លោកនាយករដ្ឋមន្ត្រីប្រាប់ទៅកម្មការិនីរូបនេះថា៖ «សូមក្មួយស្រី ទិត ចិន្តា ទទួលយករង្វាន់ពីលោកជំទាវ ឱ វណ្ណឌីន ប្រធានគណៈកម្មការចំពោះកិច្ចលើការចាក់វ៉ាក់សាំង»។
លោក ហ៊ុន សែន ឱ្យដឹងដែរថា ក្នុងចំណោមប្រជាជនទាំងចាស់ ទាំងក្មេង ១៦ លាននាក់ ក្នុងនោះមានពលរដ្ឋដែលទទួលបានវ៉ាក់សាំងកូវីដ១៩ មានចំនួន ២ លាននាក់ហើយ ស្មើនឹង ២០ ភាគរយ ខណៈរដ្ឋាភិបាលត្រៀមចាក់វ៉ាក់សាំងជូនប្រជាជនដែលមានអាយុចាប់ពី ១៨ ឆ្នាំឡើងទៅឱ្យបាន ១០ លាននាក់ ទូទាំងប្រទេស។
លោកបន្តថា៖ «ការចាក់វ៉ាក់សាំងនេះយើងក៏បាននិងកំពុងអនុវត្តយុទ្ធសាស្ត្រផ្ការីក គឺចាក់ពីក្នុងចេញក្រៅ គឺចាក់នៅរាជធានីភ្នំពេញ ដែលមានមនុស្សរស់នៅកុះករជាមុន បន្ទាប់ទៅនឹងចេញទៅបណ្តាខេត្តទៅតាមលំដាប់អាទិភាព»។
លោកបានបញ្ជាក់ថា៖ «ក្នុងយុទ្ធសាស្ត្រពន្លត់ភ្លើងល្អជាងអង្គុយបក់ផ្សែង យើងគ្មានជម្រើសណាឱ្យល្អជាងការខិតខំស្វែងរកវ៉ាក់សាំងចាក់ជូនប្រជាជនយើងនោះទេ»។
លោកបន្តថា៖ «ការឆ្លងក្នុងសហគមន៍ម្តងហើយម្តងទៀត នៅស្ទើរគ្រប់ប្រទេសតម្រូវឱ្យយើងខិតខំរកវិធីទប់ស្កាត់ការឆ្លង និងការបាត់បង់ជីវិតប្រជាជនយើងតាមរយៈការចាក់វ៉ាក់សាំង»៕
វីដេអូ៖
