.jpg)
លោក ហ៊ុន សែន ក្នុងពិធីជួបជាមួយគ្រូពេទ្យស្ម័គ្រចិត្តនាវិមានសន្តិភាពថ្ងៃទី ២៥ មីនា។ រូបថត SPM
ភ្នំពេញៈ នាយករដ្ឋមន្ត្រីកម្ពុជាលោក ហ៊ុន សែន បានឆ្លើយតបទៅសមាជិកសភាអាមេរិកលោក ថេដ យ៉ូហូ ដែលធ្លាប់ធ្វើច្បាប់ដាក់ទណ្ឌកម្មមកលើរដ្ឋាភិបាលក្រោមការដឹកនាំរបស់លោកនោះថា លោកបានត្រៀមជាស្រេចដើម្បីផ្លាស់ប្តូរទំព័រថ្មីនៃទំនាក់ទំនងរវាងកម្ពុជា-អាមេរិក ហើយក៏មិនត្រូវយកបញ្ហាដែលធ្លាប់ខ្វែងគំនិតគ្នាមកធ្វើជាឧបសគ្គសម្រាប់កិច្ចសហប្រតិបត្តិការនៃប្រទេសទាំង ២ នោះទេ។
លោក ហ៊ុន សែន បានសរសេរលិខិតឆ្លើយតបទៅលោក ថេដ យ៉ូហូ បន្ទាប់ពីសមាជិកសភារូបនេះបានសរសេរលិខិតថ្លែងអំណរគុណដល់រូបលោកដែលបានអនុញ្ញាតឱ្យនាវាទេសចរណ៍ Westerdam ដែលបានដឹកអ្នកដំណើរច្រើនជាតិសាសន៍ប្រមាណជាង ២ ០០០ នាក់ ចូលចតនៅកំពង់ផែខេត្តព្រះសីហនុ ក្រោយពីនាវានេះត្រូវបានបដិសេធ ការចូលចតនៅប្រទេសមួយចំនួន ដោយសារព្រួយបារម្ភពីការរីករាលដាលនៃវីរុសកូរ៉ូណា។
ក្នុងលិខិតចុះថ្ងៃទី ២៥ ខែមីនា លោក ហ៊ុន សែន បញ្ជាក់ថា៖ «និយាយដល់កិច្ចសហប្រតិបតិ្តការ និងមិត្តភាពរវាងកម្ពុជា និងអាមេរិក ខ្ញុំយល់ថា មានការងារមួយចំនួនដែលយើងអាចឯកភាពគ្នា ហើយក៏មានបញ្ហាមួយចំនួនទៀតដែលមិនឯកភាពគ្នា។ ប៉ុន្តែយើងមិនត្រូវយកបញ្ហាទាំងនោះមកធ្វើជាឧបសគ្គក្នុងទំនាក់ទំនងសហប្រតិបត្តិការ និងមិត្តភាពរបស់ប្រទេសយើងទាំង ២ នោះទេ។ ក្នុងន័យនេះខ្ញុំត្រៀមជាស្រេចដើម្បីធ្វើការផ្លាស់ប្តូរទំព័រថ្មីនៃទំនាក់ទំនងរបស់ប្រទេសយើងទាំង ២»។
ក្នុងលិខិតនោះលោកនាយករដ្ឋមន្ត្រីបានថ្លែងអំណរគុណដល់លោក ថេដ យ៉ូហូ ចំពោះការលើកឡើងនូវពាក្យពេចន៍ល្អៗដែលពាក់ព័ន្ធនឹងកិច្ចការមនុស្សធម៌ដែលកម្ពុជាបានអនុញ្ញាតឱ្យនាវា Westerdam ដែលមានផ្ទុកពលរដ្ឋអាមេរិកប្រមាណ ៦០០ នាក់ ដែលស្ថិតក្នុងគ្រោះអាសន្នបានចូលចត។
លោក ហ៊ុន សែន បញ្ជាក់ក្នុងលិខិតថា៖ «ជាប្រទេសតូចប៉ុន្តែមានចិត្តទូលាយរាជរដ្ឋាភិបាលកម្ពុជាក្រោមការដឹកនាំរបស់ខ្ញុំឱ្យតម្លៃខ្ពស់ទៅលើប្រព័ន្ធពហុនិយមរួមទាំងការសាមគ្គីភាពជាអន្តរជាតិដោយគ្មានការរើសអើង។ ជាពិសេសនៅពេលប្រឈមនឹងការដោះស្រាយបញ្ហាតំបន់ ឬអន្តរជាតិផ្សេងៗ។ ផ្អែកលើគោលជំហរនេះខ្ញុំបានធ្វើការសម្រេចចិត្តដោយមិនស្ទាក់ស្ទើរក្នុងការជួយសង្គ្រោះជីវិតអ្នកដំណើរ និងនាវិកនៅលើនាវា Westerdam»។
ក្នុងលិខិតថ្លែងអំណរគុណទៅកាន់លោក ហ៊ុន សែន លោក ថេដ យ៉ូហូ បញ្ជាក់ថា បដិសណ្ឋារកិច្ចរបស់លោក ហ៊ុន សែន ដែលបានផ្តល់កន្លែងមានសុវត្ថិភាពដល់នាវានេះ និងអនុញ្ញាតឱ្យបុគ្គលិកស្ថានទូតអាមេរិកប្រចាំកម្ពុជានាំជនជាតិអាមេរិកជាង ៦០០ នាក់ ទៅកាន់កន្លែងមានសុវត្ថិភាពគឺជាគំរូដ៏ប្រពៃមួយនៃសាមគ្គីភាពអន្តរជាតិ។
លោក ថេដ យ៉ូហូ បញ្ជាក់ក្នុងលិខិតនោះដោយបានថ្លែងអំណរគុណចំពោះទំនុកចិត្តរបស់លោកនាយករដ្ឋមន្ត្រី ហ៊ុន សែន ទៅលើមន្ត្រីរបស់ស្ថានទូតអាមេរិកក្នុងការជួយដោះស្រាយបញ្ហារបស់ពលរដ្ឋអាមេរិក។ លោក យ៉ូហូ សម្តែងនូវក្តីសង្ឃឹមថា សុច្ឆន្ទៈនេះអាចក្លាយជាកិច្ចសហប្រតិបត្តិការ និងមិត្តភាពនាពេលអនាគត។ ទោះបីជាភាគីទាំង ២ អាចមានការខ្វែងគំនិតគ្នាទៅលើកិច្ចការសំខាន់ក្តី លោករីករាយដែលប្រទេសទាំង ២ នៅតែអាចសម្របសម្រួល និងធ្វើកិច្ចសហការប្រតិបត្តិការជាមួយគ្នានៅពេលមានបញ្ហាសំខាន់បំផុត។
លោក ផៃ ស៊ីផាន អ្នកនាំពាក្យរដ្ឋាភិបាលប្រាប់ភ្នំពេញប៉ុស្តិ៍ពីម្សិលមិញថា នេះគឺជាសារមួយដែលស្វាគមន៍ចំពោះការថ្លែងអំណរគុណរបស់លោក ថេដ យ៉ូហូ មកកាន់កម្ពុជា។ សាររបស់លោក ហ៊ុន សែន បញ្ជាក់ពីកម្ពុជាជាប្រទេសតូច តែកម្ពុជាមានចិត្តទូលំទូលាយ។ គំនិតមិនត្រូវគ្នាមួយចំនួនកន្លងមកមិនមែនជាឧបសគ្គនៃកិច្ចទំនាក់ទំនង ភាពជាដៃគូ និងសហប្រតិបត្តិការរវាងកម្ពុជា និងអាមេរិកនោះទេ។
ក្នុងពិធីសំណេះសំណាលជាមួយគ្រូពេទ្យស្ម័គ្រចិត្តកាលពីថ្ងៃទី ២៥ លោកនាយករដ្ឋមន្ត្រី ហ៊ុន សែន ថ្លែងថាលោក ថេដ យ៉ូហូ ដែលធ្លាប់ធ្វើច្បាប់គាបសង្កត់រដ្ឋាភិបាលកម្ពុជាបានសរសេរលិខិតថ្លែងអំណរគុណរដ្ឋាភិបាលនេះចំពោះការធ្វើកិច្ចការមនុស្សធម៌ក្នុងការអនុញ្ញាតឱ្យនាវា Westerdam ចូលចត។ លោក ហ៊ុន សែន ថ្លែងថាលោក Brad Adams នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស (HRW) ដែលតែងតែរិះគន់ការដឹកនាំរបស់លោកមិនបានមើលឃើញពីកិច្ចការមនុស្សធម៌នេះទេ៕
