.jpg)
លោក សម រង្ស៊ី និងលោក ហ៊ុន សែន ឈរក្បែរគ្នានៅឯរដ្ឋសភាជាតិ កាលពីឆ្នាំ ២០១៤។ ហេង ជីវ័ន
តាកែវៈ លោកនាយករដ្ឋមន្ត្រី ហ៊ុន សែន បានថ្លែងសាជាថ្មីថា លោកឈប់និយាយឆ្លើយឆ្លងនយោបាយ ជាមួយអ្នកនយោបាយដែលលោកសំដៅលើលោក សម រង្ស៊ី ដោយថ្លែងថា លោកបានបញ្ជាក់អ្វីៗច្បាស់អស់ហើយ។
លោកបានថ្លែងដូច្នេះក្នុងពេលជួបសំណេះសំណាល ជាមួយកម្មករជិត ២ ម៉ឺននាក់ នៅស្រុកត្រាំកក់ ខេត្តតាកែវកាលពីព្រឹកថ្ងៃពុធម្សិលមិញ។ លោកថ្លែងដូច្នេះថា៖ «នយោបាយ ខ្ញុំអត់និយាយទៀតទេ ពីព្រោះខ្ញុំបាននិយាយអស់ហើយ ហើយសុំឲ្យអ្នកដទៃទៀតស្តាប់បានមិនបានអាពេលមុនក៏តាមដំណើរទៅ ខ្ញុំអត់និយាយតទៅទៀតទេ។ ខ្ញុំមិនតមាត់ជាមួយអ្នកណាទេ»។
លោក ហ៊ុន សែន បានថ្លែងបន្តថា៖ «ខ្ញុំអត់និយាយបញ្ហានយោបាយ មិននយោបាយអីទេ។ អាណាចង់ទៅងាប់ឯណាងាប់ទៅ កុំទៅខ្វល់ពេក។ គិតប្រជាជន ១៦ លាននាក់ នៅក្នុងប្រទេស ធ្វើម៉េចឲ្យប្រជាជន ១៦ លាននាក់ មានបាយទទួលទាន មានសម្លៀកបំពាក់ មានថ្នាំសង្កូវ មានការព្យាបាលជំងឺ ដែលត្រូវតាមដានឲ្យហ្មត់ចត់។ ការពិនិត្យព្យាបាលជំងឺក្នុងចំណោមកម្មករ គឺអត់គិតថ្លៃទេ។ មានផ្ទះសំបែង មានមធ្យោបាយធ្វើដំណើរ មានរបស់ប្រើប្រាស់ សេចក្តីត្រូវការរបស់មនុស្សគឺគិតគូរអាហ្នឹង»។
លោកថា លោកមិនខ្វល់ពីអ្នកណាដែលនិយាយពីចម្ងាយ ១ ម៉ឺនគីឡូទេ លោកសុខចិត្តស្តាប់ចម្រៀងប្រសើរជាង។
លោកនាយករដ្ឋមន្ត្រី បានជំរុញឲ្យកម្មករខិតខំប្រឹងធ្វើការ កុំបង្កបញ្ហាផ្សេងៗដែលធ្វើឲ្យម្ចាស់រោងចក្រ បង្វែរទៅប្រទេសផ្សេងទៀត ដែលមានប្រាក់ចំណូលទាបជាងប្រទេសកម្ពុជា។ លោកបានលើកយកប្រទេសបង់ក្លាដែសមកពន្យល់ ដោយបានប្រៀបធៀបទាំងកម្រិតប្រាក់ចំណូលរបស់កម្មករដែលមានតិចជាងនៅកម្ពុជា ប៉ុន្តែលោកថា បញ្ហានយោបាយ មានស្រដៀងគ្នា។
លោកថ្លែងថា៖ «បង់ក្លាដែស ដូចស្រុកខ្មែរអ៊ីចឹង។ បោះឆ្នោតឆ្នាំកន្លងទៅនេះ លោកជំទាវ Hasina ឈ្នះភ្លូកទឹកភ្លូកដីដូចគណបក្សប្រជាជនអ៊ីចឹង។ ប៉ុន្តែនៅមានអាក្រុម ២ ហ្នឹង វាប្រកាសផ្តន្ទាទោស។ វាអ៊ីចឹង ឲ្យតែអ្នកណាឈ្នះច្រើនគេអត់ទទួល។ តែយាយហ្នឹង ក៏ដូចខ្ញុំដែរ ទទួលមិនទទួល អញមិនដឹង អញដឹងថា ប្រជាជនអញ បោះឆ្នោត។ គាត់ឈ្នះថ្ងៃ ១ ថ្ងៃ ៣ គាត់ប្រជុំសភា សភាចូលស្បថ គាត់បន្តរឿងរបស់គាត់ទៅ។ គាត់ចាំបាច់ឲ្យអង្គការសហប្រជាជាតិទទួលស្គាល់? ព្រោះអាហ្នឹងគេអត់មានលក្ខខណ្ឌអ៊ីចឹងផង»។
លោក មាស នី អ្នកវិភាគនយោបាយនិងសង្គម បានថ្លែងថា វាប្រហែលជាលើកទី ៤ ហើយដែលលោក ហ៊ុន សែន បានថ្លែងដូច្នេះ ចំពោះលោក សម រង្ស៊ី ប៉ុន្តែលោកថា ការឆ្លើយឆ្លងគ្នា គេចមិនផុតទេ អាចនឹងកើតមានឆាប់ៗនេះទៀត។
លោកថ្លែងថា៖ «វាមិនមែនជាលើកទី ១ ទេ អាចជាលើកទី ៣ ឬទី ៤ ប៉ុន្តែយើងឃើញលោក សម រង្ស៊ី គាត់ញ៉ោះ។ ដូច្នេះពេលខ្លះ យើងឃើញសម្ដេចនាយកទប់អារម្មណ៍មិនបាន។ ដូច្នេះនេះ ជាអារម្មណ៍ធម្មជាតិរបស់មេដឹកនាំទាំង ២ ដែលម្ខាងចូលចិត្តញ៉ោះ ដោយដឹងថា ម្ខាងទៀតមិនអាចទប់អារម្មណ៍បាន»។
ចំណែក លោក គិន ភា អ្នកវិភាគនយោបាយម្នាក់ទៀត និងជាប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជាយល់ថា អ្វីដែលលោកនាយករដ្ឋមន្ត្រីចង់សំដៅលើគឺលោក សម រង្ស៊ី។ ទោះយ៉ាងណា លោកថា អ្វីដែលលោកនាយករដ្ឋមន្ត្រីបានថ្លែងនោះ គ្រាន់តែជាវោហារស័ព្ទនយោបាយប៉ុណ្ណោះ ហើយលោកនឹងឆ្លើយឆ្លងអាស្រ័យលើសាច់រឿងដែលត្រូវឆ្លើយ។
លោកថ្លែងថា៖ «សម្រាប់សម្ដេច ហ៊ុន សែន ដែលគាត់មានប្រសាសន៍នេះ គឺបញ្ជាក់ពីភាពខ្លាំងរបស់គាត់ បញ្ជាក់ថា គាត់មិនទៅចុះញ៉មអ្នកណា មិនឱនក្បាលចំពោះសម្ពាធអន្តរជាតិណាមួយ ឬក៏សម្ពាធអ្នកនយោបាយណាមួយទេ ហើយយើងត្រូវដឹងពីឥរិយាបថរបស់នាយករដ្ឋមន្ត្រី ហ៊ុន សែន។ យើងដឹងថា គាត់ជានាយករដ្ឋមន្ត្រីមួយរូប ដែលឆ្លងកាត់ការដាក់សម្ពាធរាប់សិបឆ្នាំហ៊ុមព័ទ្ធសេដ្ឋកិច្ចផង ហ៊ុមព័ទ្ធនយោបាយផង ប៉ុន្តែគាត់នៅតស៊ូបានរហូតដល់មានគ្រប់គ្រាន់សម្រាប់រដ្ឋាភិបាលរបស់គាត់។ ចុះទម្រាំស្ថានភាពបច្ចុប្បន្ន ដូច្នេះមិនមានការចាំបាច់អីទៅឆ្លើយឆ្លងទៅនិយាយជាមួយអ្នកណាទេ គាត់ចង់បង្ហាញថា គាត់ខ្លាំង គាត់គ្រប់គ្រងអំណាច គាត់គ្រប់គ្រងសភាពការណ៍ និងគ្រប់គ្រងស្ថានភាពនយោបាយនៅកម្ពុជា»៕
