ភ្នំពេញ៖ លោកនាយករដ្ឋមន្ត្រី ហ៊ុន សែន កាលពីព្រលប់ថ្ងៃម្សិលមិញ បានបង្ហាញការស្វាគមន៍ និងអបអរសាទរព្រមទាំងបានជូនពរយ៉ាងកក់ក្ដៅជូនចំពោះសាសនិកខ្មែរអ៊ិស្លាមនៅកម្ពុជា មុនពេលពិធីបុណ្យរ៉យ៉ាហ្វ៊ីទ្រី ដែលត្រូវបញ្ចប់ពិធីអំណត់រ៉ាម៉ាដន នៅថ្ងៃទី ១៣ ខែឧសភា សម្រាប់ឆ្នាំ ២០២១ នេះ។
នៅក្នុងសារជូនពររបស់លោកនាយករដ្ឋមន្ត្រី ហ៊ុន សែន ដែលបានសរសេរបង្ហោះលើបណ្ដាញសង្គមរបស់លោកកាលពីព្រលប់ថ្ងៃទី ១២ ខែ ឧសភា ឆ្នាំ ២០២១ បានលើកឡើងថា៖ «ក្នុងនាមរាជរដ្ឋាភិបាលនៃព្រះរាជាណាចក្រកម្ពុជាខ្ញុំ និងភរិយា សូមអបអរសាទរ និងសូមជូនពរជ័យសិរីសួស្ដី សុភមង្គល បវរមហាប្រសើរជូនដល់បងប្អូនសាសនិកខ្មែរអ៊ិស្លាមកម្ពុជាក្នុង និងក្រៅប្រទេស រួមទាំងបងប្អូនសាសនិកអ៊ិស្លាមនៅទូទាំងសកលលោកផងដែរ ដែលបានបញ្ចប់នូវពិធីអំណត់បួសខែរ៉ាម៉ាដនប្រកបដោយជោគជ័យ ហើយនឹងរីករាយស្វាគមន៍ថ្ងៃបុណ្យរ៉យ៉ាហ្វ៊ីទ្រីនៅថ្ងៃព្រហស្បតិ៍ ទី ១ ខែស្ហាវ៉ាល់ ឆ្នាំ ១៤៤២ មូហាំម៉ាត់សករាជ ត្រូវនឹងថ្ងៃ ២ កើត ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ដែលត្រូវនឹងថ្ងៃទី ១៣ ខែ ឧសភា ឆ្នាំ ២០២១»។
ក្នុងសំណេរនោះផងដែរ លោកនាយករដ្ឋមន្ត្រីក៏បានសម្ដែងនូវក្តីនឹករឭក និងអរគុណយ៉ាងជ្រាលជ្រៅបំផុតចំពោះបងប្អូនខ្មែរអ៊ិស្លាមកម្ពុជា ដែលបានចូលរួមចំណែកជាមួយរាជរដ្ឋាភិបាលក្នុងការទប់ស្កាត់ការឆ្លងរីករាលដាលជំងឺកូវីដ ១៩ ដោយគោរពអនុវត្តបានយ៉ាងខ្ជាប់ខ្ជួនទៅតាមច្បាប់ សេចក្តីសម្រេចសារាចរណែនាំ និងវិធានការនានារបស់រាជរដ្ឋាភិបាល។
នៅក្នុងពេលវេលាដែលប្រទេសកំពុងប្រយុទ្ធប្រឆាំងជំងឺឆ្លងកូវីដ ១៩ ដ៏កាចសាហាវនេះ លោកនាយករដ្ឋមន្ត្រី ហ៊ុន សែន ក៏បានអំពាវដល់ពលរដ្ឋក៏ដូចជាអ្នករដ្ឋការនានា ដែលកំពុងស្នាក់នៅ និងបម្រើការងារនៅកម្ពុជាទាំងអស់ឱ្យបង្កើនការប្រុងប្រយ័ត្នទ្វេដង និងអនុវត្តតាមឱ្យបានខ្ជាប់ខ្ជួននូវរាល់វិធានការនានារបស់រាជរដ្ឋាភិបាលក្នុងការការពារពីជំងឺកូវីដ ១៩។
លោកបានគូសបញ្ជាក់ថា៖ «ទោះបីក្នុងកាលៈទេសៈណាក៏ដោយ ជាពិសេសព្រឹត្តិការណ៍សហគមន៍ ២០ កុម្ភៈ ដែលបានឆក់យកជីវិតមនុស្សចំនួន ១៣៦ នាក់រួចមកហើយ នៅក្នុងប្រទេសកម្ពុជា យើងគិតត្រឹមថ្ងៃទី ១២ ខែ ឧសភា ឆ្នាំ ២០២១ គឺយើងមិនត្រូវមានការធ្វេសប្រហែស និងមើលស្រាលចំពោះជំងឺឆ្លងដ៏កាចសាហាវនេះនោះឡើយ ដោយត្រូវអនុវត្តវិធានការសុខាភិបាល ៣ ការពារ ៣ កុំ ជាប់ជានិច្ច»។
លោកបានបន្ថែមថា៖ «សូមបងប្អូនអញ្ជើញទៅចូលរួមក្នុងយុទ្ធនាការចាក់វ៉ាក់សាំងប្រឆាំងកូវីដ ១៩ ដើម្បីបងប្អូនគ្រួសារបងប្អូន និងជាតិរបស់យើង»។
មិនខុសពីឆ្នាំ ២០២០ ទេ ពិធីបុណ្យរ៉យ៉ាហ្វ៊ីទ្រីនេះ គឺតម្រូវឱ្យធ្វើឡើងនៅតាមផ្ទះរៀងៗខ្លួន ហើយបុរសជាមេគ្រួសារមានតួនាទីសំខាន់បំផុត គឺធ្វើជាអ៊ីម៉ាំដល់ស្ត្រីជាប្រពន្ធ និងកូនចៅ។ នេះបើតាមប្រសាសន៍របស់លោក សុះ កំរី ប្រធានគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា។
លោក កំរី បានថ្លែងថា៖ «ជាទូទៅការរៀបចំពិធីបុណ្យរ៉យ៉ាហ្វ៊ីទ្រីនៃការបញ្ចប់ពិធីអំណត់រ៉ាម៉ាដន គឺត្រូវធ្វើឡើងនៅតាមម៉ាស្ជិត្យ (វិហារអ៊ិស្លាម) ប៉ុន្តែដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ ១៩ ក្នុងសហគមន៍ គឺយើងគ្រប់គ្នាចាំបាច់ត្រូវរៀបចំពិធីនៅតាមផ្ទះរៀងខ្លួន។ ដូច្នេះបុរសជាមេគ្រួសារធ្វើជាអ៊ីម៉ាំដល់ស្ដ្រីទាំងអស់រួមទាំងប្រពន្ធ និងកូនចៅ»។
បើតាមលោក សុះ កំរី សាសនិកអ៊ិស្លាមកម្ពុជាបានចាប់ផ្តើមខែបួសរ៉ាម៉ាដនពីថ្ងៃទី ១៣ ខែមេសា ដល់ថ្ងៃទី ១៣ ខែឧសភានេះ ដែលការបួសជាកាតព្វកិច្ចទី២ សម្រាប់សាសនិកអ៊ិស្លាមគ្រប់រូប លើកលែងតែមនុស្សចាស់ ដែលមានជរាពាធ ស្រី្តមានផ្ទៃពោះ ស្ត្រីមានកូនខ្ចី និងស្ត្រីដែលមានរដូវ។ ឆ្នាំនេះ គឺជាឆ្នាំទី២ នៃបុណ្យរ៉ាម៉ាដន ដែលការជួបជុំការថ្វាយបង្គំតាមវិហារអ៊ិស្លាមនានាត្រូវបានផ្អាកដោយសារជំងឺកូវីដ ១៩៕