ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវទៅកាន់ប្រជាពលរដ្ឋដែលជាអ្នកបើកបរត្រូវបើកបរគោរពច្បាប់ចរាចរណ៍ឲ្យបានត្រឹមត្រូវដើម្បីចៀសផុតពីគ្រោះថ្នាក់ដែលអាចធ្វើឱ្យបាត់បង់ជីវិត និងពិការភាព។ ការអំពាវនាវនេះធ្វើឡើងទន្ទឹមគ្នានឹងមន្ត្រីនគរបាលនៅទូទាំងប្រទេសកំពុងត្រៀមចុះតាមគោលដៅដែលបានកំណត់ទុកចាប់ពីថ្ងៃទី ១ ខែឧសភា ដើម្បីពិនិត្យមើលលក្ខណៈបច្ចេកទេសយានយន្ត និងការបើកបរល្មើសច្បាប់។
កាលពីម្សិលមិញលោក ហ៊ុន សែន បានឲ្យដឹងតាមរយៈទំព័រហ្វេសប៊ុករបស់លោកដោយអំពាវនាវឱ្យពលរដ្ឋដែលមុននឹងបើកបររថយន្តនៅតាមដងផ្លូវសាធារណៈត្រូវតែមានបណ្ណបើកបរពិតប្រាកដ ហើយរថយន្តត្រូវបង់ពន្ធ និងថ្លៃសេវាផ្សេងៗឱ្យបានត្រឹមត្រូវ។
ទំព័រហ្វេសប៊ុករបស់លោកនាយករដ្ឋមន្ត្រីដដែលនេះសរសេរថា៖ «ការរឹតបន្តឹង (ចាប់ពីថ្ងៃទី ១ ឧសភា) នេះគឺដើម្បីធានាសុវត្ថិភាពអាយុជីវិតបងប្អូនប្រជាពលរដ្ឋនៅទូទាំងប្រទេស ដើម្បីចៀសវាងគ្រោះថ្នាក់ផ្សេងៗដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិតទៀតផង។ យើងមិនចង់ឃើញករណីគ្រោះថ្នាក់ចរាចរណ៍កើតមាននៅក្នុងក្រុមគ្រួសាររបស់បងប្អូនណាម្នាក់ឡើយ។ សូមបងប្អូនប្រជាពលរដ្ឋ និងក្មួយៗយុវជន បើកបរដោយមានការប្រុងប្រយ័ត្នខ្ពស់ជាមួយនឹងការយោគយល់ដល់គ្នាទៅវិញទៅមកដើម្បីសុខសុវត្ថិភាពទាំងអស់គ្នានៅទូទាំងប្រទេស»។
រដ្ឋាភិបាលបានធ្វើការកែប្រែអនុក្រឹត្យថ្មីដោយត្រូវផាកពិន័យប្រាក់ចំពោះអ្នកល្មើសច្បាប់ចរាចរណ៍កើនទៅដល់ ៣ ឬទៅដល់ ៥ ដងនៃអនុក្រឹត្យចាស់ ដើម្បីកាត់បន្ថយគ្រោះថ្នាក់ចរាចរណ៍ឱ្យបានអតិបរមាក្នុងឆ្នាំ ២០២០ នេះ ខណៈបានអះអាងថាចំនួនគ្រោះថ្នាក់ចរាចរណ៍ស្លាប់ និងរបួសក្នុងឆ្នាំ ២០១៩ បានកើនឡើងយ៉ាងគំហុកបើប្រៀបធៀបទៅនឹងចំនួនគ្រោះថ្នាក់កាលពីឆ្នាំ ២០១៨។
ការផាកពិន័យមិនធ្វើនៅកន្លែងអនុវត្តនោះឡើយ ដោយត្រូវបញ្ជូនយានយន្តល្មើសទៅកន្លែងធ្វើការរបស់សមត្ថកិច្ចនៅជិតបំផុត និងរក្សាទុក ៣ ថ្ងៃទើបឱ្យម្ចាស់ចូលខ្លួនទៅបង់ប្រាក់ពិន័យតាមផ្លូវច្បាប់។
ជាមួយគ្នានេះកាលពីថ្ងៃទី ២៧ មេសាលោក នេត សាវឿន អគ្គស្នងការនគរបាលជាតិបានលើកឡើងនៅក្នុងលិខិតផ្ញើទៅកាន់លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកថា អគ្គស្នងការបានត្រៀមប្រើប្រាស់កម្លាំងសរុបចំនួន ៣ ៩១៩ នាក់ ក្នុងនោះនគរបាលមានចំនួន ៣ ៥០៧ នាក់ និងកម្លាំងសហការចំនួន ៤១២ នាក់ ដើម្បីដាក់ពង្រាយនៅតាមគោលដៅរឹតបន្តឹងច្បាប់ចរាចរណ៍ចំនួន ៥៦៨ ទីតាំងនៅទូទាំងប្រទេស។
នៅក្នុងចំណោមកម្លាំងចំនួន ៣៩១៩ នេះគឺក្នុងនោះជាង ១ ពាន់នាក់នឹងត្រូវដាក់ពង្រាយនៅក្នុងទីក្រុងភ្នំពេញ។
នៅថ្ងៃទី ២៨ ដល់ថ្ងៃទី ២៩ មេសាស្នងការនគរបាលរាជធានីភ្នំពេញបានបើកកិច្ចប្រប្រជុំផ្សព្វផ្សាយស្តីពីការអនុវត្តរឹតបន្តឹងច្បាប់ចរាចរណ៍ផ្លូវគោកដល់មន្ត្រីពាក់ព័ន្ធទាំងអស់ដែលត្រូវចូលរួមផ្ទាល់ក្នុងការចាប់ផ្តើមរឹតបន្តឹងអនុវត្តចរាចរណ៍ចាប់ពីថ្ងៃទី ១ ខែឧសភា។
យោងតាមការចុះផ្សាយរបស់គេហទំព័រអគ្គស្នងការនគរបាលជាតិបញ្ជាក់ថា លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញបានណែនាំឱ្យមន្ត្រីកងកម្លាំងដែលត្រូវរឹតបន្តឹងច្បាប់ចរាចរណ៍ត្រូវមានសីលធម៌ គុណធម៌ អាកប្បកិរិយា និងប្រើប្រាស់សម្ដីឱ្យបានសមរម្យ។
លោក នេត សាវឿន ក៏បានចេញលិខិតដាច់ដោយឡែកមួយនៅថ្ងៃទី ២៨ មេសា ដើម្បីណែនាំទៅដល់កងកម្លាំងចុះរឹតបន្តឹងច្បាប់ចរាចរណ៍ទាំងអស់ ត្រូវអនុវត្តច្បាប់ប្រកបដោយការទទួលខុសត្រូវ តម្លាភាព ស្មើភាព គ្មានការលើកលែង និងមានសីលធម៌វិជ្ជាជីវៈព្រមទាំងមានឥរិយាបថថ្លៃថ្នូរ ទន់ភ្លន់ និងម៉ឺងម៉ាត់។ គ្រោះថ្នាក់ចរាចរណ៍បណ្ដាលឲ្យមនុស្សស្លាប់ ១ ៩៨១ នាក់ និងរបួស ៦ ១៤១ នាក់ក្នុងឆ្នាំ ២០១៩។ បើប្រៀបធៀបក្នុង ២០១៨ មានអ្នកស្លាប់ ១ ៧៦១ នាក់ និងរបួស ៤ ៧៧០ នាក់៕