.jpg)
បុរសត្រូវឃាត់ខ្លួនបន្ទាប់ពីបង្ហោះវីដេអូទាក់ទងកូវីដ ១៩។ រូបថត ហ្វ្រេសញូវ
ភ្នំពេញៈ លោកនាយករដ្ឋមន្ដ្រី ហ៊ុន សែន បន្តអំពាវនាវឱ្យពលរដ្ឋចូលរួមលុបបំបាត់ និងប្រឆាំងព័ត៌មានក្លែងក្លាយដោយធ្វើការឆ្លើយតបទៅលើបញ្ហានេះ ខណៈរដ្ឋមន្ដ្រីក្រសួងព័ត៌មាន និងអ្នកនាំពាក្យក្រសួងយុត្ដិធម៌ប្រាប់មន្ដ្រីឱ្យពិនិត្យលើក្រុមដែលតែងតែផ្សព្វផ្សាយព័ត៌មានមិនពិតលើបញ្ហាវីរុសកូវីដ ១៩ ដើម្បីចាត់វិធានការតាមផ្លូវច្បាប់។
ក្នុងពេលធ្វើជាអធិបតីនៃពិធីប្រគល់សញ្ញាបត្រដល់និស្សិតនៃវិទ្យាស្ថានវ៉ាន់ដាចំនួន ៣ ៤៥៨ នាក់នៅកោះពេជ្រកាលពីម្សិលមិញលោកនាយករដ្ឋមន្ដ្រីបានអំពាវនាវដល់ប្រជាពលរដ្ឋកុំឲ្យមានការភ័យខ្លាចជ្រុលខ្លាំងពេករហូតដល់បាត់បង់ស្មារតីម្ចាស់ការខ្លួនឯងដោយសារជឿទៅលើការបំពុលព័ត៌មានមិនពិតពីក្រុមជនអគតិមួយចំនួនដោយស្នើឱ្យពលរដ្ឋត្រូវមានសេចក្តីក្លាហាន និងមានការពិចារណាឱ្យបានល្អិតល្អន់ត្រឹមត្រូវក្នុងការដោះស្រាយបញ្ហានានារួមទាំងបញ្ហាជំងឺឆ្លងកូវីដ ១៩ នេះផងដែរ។
លោកបញ្ជាក់ថា៖ «ខ្ញុំនៅតែបន្តធ្វើការអំពាវនាវសូមកុំឱ្យយកការភ័យខ្លាច និងការរើសអើងធ្វើជាមូលដ្ឋាន សម្រាប់ដោះស្រាយបញ្ហាត្រូវយកសេចក្ដីក្លាហានរបស់យើង យើងជម្នះគ្រប់បញ្ហាទាំងអស់រាប់ទាំងព័ត៌មានក្លែងក្លាយ»។
លោកបញ្ជាក់ថា៖ «ព័ត៌មានក្លែងក្លាយវាមិនឈ្នះយើងទេ វាស៊ីសងនៅពេលដែលវាបំផុសថា ជំងឺផ្ទុះឡើងនៅក្នុងក្រុងភ្នំពេញអ្នកក្រុងភ្នំពេញប្រាប់ថា អត់ឈឺផង វាចប់បាត់ត្រឹមតែអត់ឈឺហ្នឹង។ អ៊ីចឹងដើម្បីយកឈ្នះទៅលើព័ត៌មានក្លែងក្លាយមានតែបុគ្គលយើងម្នាក់ៗតែប៉ុណ្ណោះដែលអាចឆ្លើយតប ព្រោះមិនមែនមនុស្សទាំងអស់សុទ្ធតែជឿទេ ម្នាក់ៗគឺមានជំនឿខុសៗគ្នា ខ្លះក៏ជឿទៅ ខ្លះក៏មិនជឿ»។
លោកបន្តថា៖ «ចេញមកឱ្យស្រុះគ្នាបញ្ជាក់អំពីការគ្មាន (ការឆ្លង កូវីដ ១៩) ហើយកុំចេះតែចែករំលែកឃើញគេផុសទៅចែករំលែកទៅៗ អាហ្នឹងគឺជារឿងមួយដែលធ្វើឱ្យមានការភ័យខ្លាច។ ការភ័យខ្លាចជ្រុលវានាំទៅដល់មហន្តរាយវិញទេ»។
លោកនាយករដ្ឋមន្ដ្រីបានលើកឡើងពីវិធានការនៅប្រទេសបារាំងថាប្រទេសបារាំងការជួបជុំណា ១ លើសពី ១ ពាន់នាក់ គឺមិនអនុញ្ញាតឱ្យជួបជុំទេនៅបារាំងក៏ដូចជានៅអាល្លឺម៉ង់ផងដែរ។ ចំណែកនៅប្រទេស អ៊ីតាលីបានបង្ខាំងមនុស្ស ១៦ លាននាក់អត់ឱ្យចូលតំបន់នោះ (តំបន់មានការឆ្លងវីរុសកូវីដ ១៩) ហើយក៏មិនឱ្យចាកចេញ។
ប៉ុន្ដែលោកនាយករដ្ឋមន្ដ្រីបានថ្លែង ខណៈកំពុងជួបនិស្សិតនឹងភ្ញៀវពេលចែកសញ្ញាបត្រជាង ៣ ៥០០ នាក់ថា នេះគឺជារឿងដែលកម្ពុជានៅតែធ្វើបាន។ លោកក៏បញ្ជាក់ដែរថា កម្ពុជាបានត្រៀមថវិកាប្រមាណ ៨០០ ទៅ ២ ០០០ លានដុល្លារដើម្បីទប់ស្កាត់ជំងឺឆ្លងកូវីដ ១៩ នៅក្នុងប្រទេសកម្ពុជា។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានកាលពីថ្ងៃទី ៩ ខែមីនា បានជំរុញដល់មន្ដ្រីគ្រប់ផ្នែកគ្រប់ជំនាញត្រូវពិនិត្យតាមដានក្រុមដែលតែងតែផ្សព្វផ្សាយព័ត៌មានក្លែងក្លាយ មិនពិត បំពុលសង្គម ដើម្បីមានវិធានការអនុវត្តន៍តាមផ្លូវច្បាប់។
លោកថ្លែងថា៖ «មន្ដ្រីទាំងអស់ត្រូវធ្វើការរួមគ្នាគ្រប់ផ្នែក គ្រប់ជំនាញក្នុងការបន្តធ្វើការប្រយុទ្ធប្រឆាំងនឹងព័ត៌មានក្លែងក្លាយ ដែលកើតមានឡើងនៅក្នុងបណ្តាញផ្សព្វផ្សាយសង្គមដែលនាំឱ្យមានការបំពុលដល់សង្គមធ្វើឱ្យមានការយល់ច្រឡំ ពិសេសបញ្ហាជំងឺផ្លូវដង្ហើមកូវីដ ១៩ ដែលមានផេក និងអាខោនហ្វេសប៊ុកខ្លះបានសរសេរផ្សព្វផ្សាយព័ត៌មានមិនពិតធ្វើឱ្យមានការជ្រួលច្របល់នៅក្នុងសង្គម»។
លោកបញ្ជាក់ថា ស្ថាប័នផ្សព្វផ្សាយរបស់ជាតិត្រូវផ្សព្វផ្សាយឱ្យបានទូលំទូលាយនូវរាល់ព័ត៌មាននិងដំណឹងទាំងឡាយដែលទទួលបានពីក្រសួងសុខាភិបាលព្រោះជាដំណឹងពិតដែលមានការពិនិត្យតាមដាន វាយតម្លៃត្រឹមត្រូវតាមលក្ខណៈបច្ចេកទេសវិទ្យាសាស្ត្រ។
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានបញ្ជាក់ដែរថា៖ «ដើម្បីចូលរួមទប់ស្កាត់នូវព័ត៌មានមិនពិត ដែលកំពុងបង្កការភ័យខ្លាចដល់ពលរដ្ឋយើងនាពេលបច្ចុប្បន្ននេះ ឯកឧត្តមរដ្ឋមន្ត្រីក្រសួងយុត្តិធម៌បានដាក់ចេញនូវបទបញ្ជាឱ្យអយ្យការទូទាំងប្រទេសអនុវត្តនូវវិធានការច្បាប់តឹងរ៉ឹងបំផុតចំពោះអ្នកដែលបង្កើត និងផ្សព្វផ្សាយនូវព័ត៌មានមិនពិតករណីវីរុសកូវីដ ១៩»។
កាលពីថ្ងៃទី ៩ ខែមីនាកម្លាំងនគរបាលខណ្ឌមានជ័យ សហការជាមួយកម្លាំងនគរបាលការិយាល័យប្រឆាំងបទល្មើសបច្ចេកវិទ្យានៃស្នងការដ្ឋាននគរបាលរាជធានីភ្នំពេញបានស្រាវជ្រាវចាប់ឃាត់ខ្លួនបុរសម្នាក់ ក្រោយពីបង្ហោះវីដេអូទាក់ទងនឹងជំងឺវីរុសកូវីដ ១៩។
របាយការណ៍សមត្ថកិច្ចបង្ហាញថា ជនសង្ស័យដែលត្រូវបានឃាត់ខ្លួននេះមានឈ្មោះ កូយ សំអាត អាយុ ៣៥ ឆ្នាំរស់នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មានមុខរបរអ្នកលក់ទំនិញតាម Online។ ជនសង្ស័យបានបង្ហោះវីដេអូឃ្លីបទាក់ទងនឹងវីរុសកូវីដ ១៩ នេះ នៅលើ Account Facebook ឈ្មោះ «Tep Visal»។
លោក ស ថេត ស្នងការនគរបាលរាជធានីភ្នំពេញបញ្ជាក់កាលពីម្សិលមិញថា៖ «ជនសង្ស័យនេះយើងបានកសាងសំណុំរឿងរួចហើយ យើងនឹងបញ្ជូនទៅតុលាការក្នុងថ្ងៃនេះ (១០ មីនា)។ ជនសង្ស័យរូបនេះ គាត់ប្រព្រឹត្ដបទល្មើសលើករណីញុះញង់ឱ្យមានបទល្មើសជាអាទិ៍។ ករណីនេះអាចជាប់ទោសពី ១ ឆ្នាំទៅ ២ ឆ្នាំ តាមមាត្រា ៤៩៤-៤៩៥ នៃក្រមព្រហ្មទណ្ឌ»៕
