.jpg)
គ្រូពេទ្យស្ម័គ្រចិត្តពេលចូលរួមនៅក្នុងកម្មវិធីជួបជាមួយលោកនាយករដ្ឋមន្ត្រីនៅវិមានសន្ដិភាពកាលពីខែមីនា ឆ្នាំ ២០២០។ រូប ទីស្ដីការគណៈរដ្ឋមន្ត្រី
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រាប់ដល់រដ្ឋមន្ត្រីក្រសួងពាក់ព័ន្ធ ៣ ឱ្យពិភាក្សាគ្នាក្នុងការបង្កើនចំនួនគ្រូពេទ្យបន្ថែមទៀតដើម្បីត្រៀមខ្លួនប្រយុទ្ធនឹងជំងឺកូវីដ ១៩ នៅឆ្នាំ ២០២១ ដោយលោកស្នើឱ្យផ្ដល់លទ្ធភាពបញ្ចូលក្របខ័ណ្ឌដល់គ្រូពេទ្យស្ម័គ្រចិត្ត និងគ្រូពេទ្យកិច្ចសន្យាដែលបច្ចុប្បន្នកំពុងបំពេញការងារប្រយុទ្ធប្រឆាំងនឹងការរាតត្បាតនៃជំងឺកូវីដ ១៩។
ប្រសាសន៍របស់លោក ហ៊ុន សែន ដូចនេះធ្វើឡើងកាលពីថ្ងៃទី ១៥ ធ្នូ នៅពេលលោកធ្វើបច្ចុប្បន្នភាពអំពីស្ថានការណ៍កូវីដ ១៩ នៅកម្ពុជា និងការទិញវ៉ាក់សាំង។ លោកប្រាប់ដល់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ព្រុំ សុខា រដ្ឋមន្ត្រីក្រសួងមុខងារសាធារណៈឱ្យពិភាក្សាគ្នាលើបញ្ហានេះ។
លោកថ្លែងយ៉ាងដូច្នេះថា៖ «ជាលទ្ធភាពខ្ញុំនឹងផ្ដល់អាទិភាពផ្ដល់ក្របខ័ណ្ឌ សុខចិត្តបន្ថយក្របខ័ណ្ឌនៅស្ថាប័នផ្សេង តែបង្កើនឱ្យពេទ្យ។ ប៉ុន្តែសូមឯកឧត្តម ម៉ម ប៊ុនហេង ពិនិត្យជាបឋមបណ្ដុះបណ្ដាលថែមគ្រូពេទ្យដែលមានស្រាប់ បន្ថែមចំនួនគ្រូពេទ្យសម្រាប់បម្រើការប្រយុទ្ធប្រឆាំងកូវីដ»។
បើតាមលោក ហ៊ុន សែន រដ្ឋមន្ត្រីក្រសួងទាំង ៣ ត្រូវពិភាក្សាគ្នាថា តើត្រូវការគ្រូពេទ្យបន្ថែមប៉ុន្មាននាក់ទៀត។
ប៉ុន្តែលោកបញ្ជាក់ថា អ្នកដែលត្រូវបានបញ្ចូលក្របខ័ណ្ឌ ហើយទទួលបានការបណ្ដុះបណ្ដាលត្រូវតែបំពេញមុខងារប្រយុទ្ធនឹងកូវីដ១៩ ទោះបីជាពីមុនមកពួកគេមានជំនាញផ្សេងក្ដី។
លោកបន្តថា៖ «វាមិនងាប់ដល់ប្រទេសកម្ពុជាទេ ក្នុងការដែលយើងបន្ថែមគ្រូពេទ្យ ហើយគ្រូពេទ្យនេះកុំយកចូលមកគ្រាន់តែ ដើម្បីឱ្យបានក្របខ័ណ្ឌហើយទៅសុំអត់ព្រមបម្រើការងារហ្នឹង។
គ្រូពេទ្យស្ម័គ្រចិត្តពេលជួបនាយករដ្ឋមន្ត្រីពីខែមីនា។ រូប ទីស្ដីការគណៈរដ្ឋមន្ត្រី
អត់ទេ អត់ទទួលទេ។ លក្ខខណ្ឌទទួលយកគឺបម្រើ (ប្រយុទ្ធប្រឆាំង) កូវីដទើបឱ្យចូល»។
នៅក្នុងការថ្លែងរយៈពេលជាង ៣ ម៉ោងលោក ហ៊ុន សែន ដាក់ចេញផែនការជាច្រើនសម្រាប់ឆ្នាំ ២០២១ ក្នុងការប្រយុទ្ធនឹងកូវីដ១៩ និងកោតសរសើរវិទ្យាស្ថានប៉ាស្ទ័រកម្ពុជា ជាពិសេសក្នុងការធ្វើតេស្តករណីរាលដាលសហគមន៍ ឬព្រឹត្តិការណ៍ ២៨ វិច្ឆិកា ដោយវិទ្យាស្ថាននេះបានធ្វើតេស្តសំណាកអ្នកពាក់ព័ន្ធព្រឹត្តិការណ៍នេះទាំងអស់។
លោកក៏កោតសរសើរដល់មជ្ឈមណ្ឌលប្រយុទ្ធប្រឆាំងជំងឺរបស់សហរដ្ឋអាមេរិក (CDC) អង្គការសុខភាពពិភពលោក (WHO) និងអង្គការដៃគូផ្សេងទៀតដែលបានរួមចំណែកក្នុងកិច្ចការនេះ។
ភ្នំពេញប៉ុស្តិ៍មិនអាចសុំការបញ្ជាក់ពីសំណាក់លោកស្រី ឱ វណ្ណឌីន អ្នកនាំពាក្យក្រសួងសុខាភិបាលអំពីចំនួនអ្នកស្ម័គ្រចិត្តសរុបដែលកំពុងបំពេញការងារនេះទេកាលពីម្សិលមិញ។ ប៉ុន្តែកាលពីចុងខែមីនាលោក ហ៊ុន សែន បានជួបជាមួយបុគ្គលិកពេទ្យ និងនិស្សិតពេទ្យចំនួន ៤២២ នាក់ ដែលបានស្ម័គ្រចិត្តចូលរួមក្នុងបេសកកម្មប្រយុទ្ធនឹងកូវីដ ១៩។
មន្ត្រីជាន់ខ្ពស់មួយរូបនៃក្រសួងមុខងារសាធារណៈបានថ្លែងក្នុងលក្ខខណ្ឌមិនបញ្ចេញឈ្មោះថា ការផ្ដល់ក្របខ័ណ្ឌដល់គ្រូពេទ្យស្ម័គ្រចិត្តនេះ ក្រសួងសុខាភិបាលជាអ្នកសម្រេច ហើយក្រសួងមុខងារសាធារណៈជាអ្នកពិនិត្យគោលការណ៍ថា តើចំនួនដែលត្រូវផ្ដល់នោះ សមរម្យ ឬមិនសមរម្យ។ ចំណែកក្រសួងសេដ្ឋកិច្ច និងហិរញ្ញវត្ថុនឹងពិនិត្យទៅលើការចំណាយ សម្រាប់ការបញ្ចូលក្របខ័ណ្ឌនេះក្នុង ១ ឆ្នាំៗ។
លោកបញ្ជាក់ថា ក្រុមគ្រូពេទ្យស្ម័គ្រចិត្តដែលបានចូលរួមប្រយុទ្ធនឹងកូវីដ ១៩ បច្ចុប្បន្នទទួលបានប្រាក់កិច្ចសន្យា និងប្រាក់លើកទឹកចិត្តផ្សេងទៀត។ ប៉ុន្តែពេលបានចូលក្របខ័ណ្ឌ ពួកគាត់នឹងមានលំនឹងជាងមុន។ វាអាស្រ័យលើការពិភាក្សារវាងក្រសួងទាំង ៣ ថា តើការបន្ថែមចំនួនគ្រូពេទ្យ និងការបញ្ចូលក្របខ័ណ្ឌសម្រាប់អ្នកស្ម័គ្រចិត្តនឹងធ្វើឡើងនៅពេលណា។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាគាំទ្រដល់កម្មវិធីផ្ដល់ការងារស្ម័គ្រចិត្ត ព្រោះការងារបែបនេះអាចបណ្ដុះបណ្ដាលអ្នកជំនាញវ័យក្មេង និងផ្ដល់បទពិសោធសម្រាប់ពួកគេ ក៏ដូចជាធ្វើឱ្យពួកគេត្រៀមខ្លួនរួចរាល់សម្រាប់ការងារអចិន្រៃ្តយ៍។
យ៉ាងណាក៏ដោយលោកចង់ឃើញមានដំណើរការជ្រើសរើសធ្វើឡើងដោយមានតម្លាភាពផ្អែកលើស្មារតីនៃអ្នកស្ម័គ្រចិត្តម្នាក់ៗ។ ម្យ៉ាងទៀតស្ថាប័នរដ្ឋាភិបាលគួរតែវាយតម្លៃតម្រូវការជាក់ស្ដែងសម្រាប់ការដាក់បញ្ចូលក្របខ័ណ្ឌទាំងនេះ។
លោកថ្លែងថា៖ «វាកាន់តែសំខាន់ថែមទៀតក្នុងការពង្រឹងប្រសិទ្ធភាពនៃកម្លាំងការងារបច្ចុប្បន្នដែលក្រសួងនីមួយៗមានស្រាប់។ ការប្រមូលធនធានគឺជាគន្លឹះក្នុងការធានាបានថា មានបុគ្គលិកគ្រប់គ្រាន់នៅកន្លែងធ្វើការ ដើម្បីផ្ដល់សេវាសាធារណៈ ជាពិសេសនៅតំបន់ដាច់ស្រយាល»៕
វីដេអូ៖
