.jpg)
លោក ហ៊ុន សែនក្នុងពិធីបុណ្យទន្លេនៅខេត្តបាត់ដំបងកាលពីថ្ងៃសៅរ៍។ រូបថត SPM
បាត់ដំបងៈ លោកនាយករដ្ឋមន្ត្រី ហ៊ុន សែន បានផ្ដល់អនុសាសន៍ឲ្យអាជ្ញាធរថ្នាក់ជាតិ និងថ្នាក់ខេត្តរក្សាក្រុងបាត់ដំបងជាក្រុងបេតិកភណ្ឌ រក្សាព្រលានយន្តហោះបែកចាន និងត្រៀមសាងសង់ផ្លូវពីខេត្តបាត់ដំបងទៅខេត្តសៀមរាបដែលនឹងកាត់បន្ថយការធ្វើដំណើរជិត ៧០ គីឡូម៉ែត្រ។
លោក ហ៊ុន សែន បានលើកឡើងនូវអនុសាសន៍ជាច្រើនចំណុចកាលពីល្ងាចថ្ងៃសៅរ៍ក្នុងពេលលោកចូលរួមពិធីបុណ្យទន្លេលើកទី ៦ រៀបចំឡើងនៅខេត្តបាត់ដំបងចាប់ពីថ្ងៃទី ១៣ ដល់ថ្ងៃទី ១៥ មីនា។ លោកប្រាប់ឲ្យអាជ្ញាធរធ្វើការអភិវឌ្ឍទីក្រុងនេះប្រកបដោយការទទួលខុសត្រូវ និងត្រូវរក្សាក្រុងបាត់ដំបងជាក្រុងបេតិកភណ្ឌ ដែលគ្រោងដាក់បញ្ចូលក្នុងបញ្ជីទីក្រុងបេតិកភណ្ឌរបស់អង្គការយូណេស្កូ។ លោកថា អាជ្ញាធរត្រូវរក្សាឲ្យបាននូវផ្ទះបុរាណ ស្ពានបុរាណ ដោយមិនត្រូវឲ្យមានការកែប្រែខុសស្ថានភាពដើមឡើយ។
លើសពីនេះអាជ្ញាធរត្រូវជំរុញការកំណត់អត្តសញ្ញាណគោលដៅទេសចរណ៍អាទិភាពនានាក្នុងខេត្តរួមមានទេសចរណ៍ផ្ទះបុរាណតំបន់ទេសចរណ៍សត្វស្លាប តំបន់សត្វស្លាបបាណន់ រមណីយដ្ឋានភ្នំសំពៅដែលមានប្រចៀវរាប់លានក្បាល និងម្ហូបអាហារប្រចាំខេត្តនេះ។ លោកស្នើឲ្យបន្តកសាងហេដ្ឋារចនាសម្ព័ន្ធចាំបាច់នៅខេត្តនេះដែលបម្រើឲ្យវិស័យទេសចរណ៍ រួមមានផ្លូវថ្នល់ ទឹក ភ្លើងនិងព្រលានយន្តហោះបាត់ដំបង។
ក្រៅពីការអភិវឌ្ឍក្នុងខេត្ត លោកថាផ្លូវ ១ ខ្សែអាចនឹងត្រូវសាងសង់ឡើងដោយតភ្ជាប់ពីខេត្តបាត់ដំបង ទៅសៀមរាបដោយលោកថ្លែងដូច្នេះថា៖ «យើងនឹងខិតខំរៀបចំដើម្បីតភ្ជាប់ផ្លូវរវាងខេត្តបាត់ដំបងជាមួយខេត្តសៀមរាបដែលផ្លូវនោះអាចកាត់បន្ថយការធ្វើដំណើរដែលមុននេះធ្វើដំណើរពីបាត់ដំបងទៅបន្ទាយមានជ័យ ហើយធ្វើដំណើរទៅខេត្តសៀមរាប។ ប្រៀបធៀបនឹងផ្លូវថ្មីយើងអាចចំណេញរហូតដល់ ៦៩ គ.ម ...»។ ផ្លូវនេះអាចនឹងចាប់ផ្ដើមសាងសង់នៅឆ្នាំ ២០២១ បន្ទាប់ពីមានការសិក្សាជាក់លាក់ និងស្វែងរកឥណទានបានហើយអាជ្ញាធរ ត្រូវខិតខំដោះស្រាយបញ្ហាដីធ្លី ដែលរងផលប៉ះពាល់នៅលើផ្លូវមួយនេះ។
លោកក៏បានប្រាប់អាជ្ញាធរឲ្យរក្សាឲ្យបាននូវព្រលានយន្តហោះបែកចាន ទោះបីជាព្រលាននេះមិនទាន់មានភាពចាំបាច់ក្នុងការប្រើប្រាស់នាពេលបច្ចុប្បន្នក៏ដោយ។ «ដូច្នេះបានជាខ្ញុំស្នើឲ្យឯកឧត្តមអភិបាលខេត្តក៏ដូចជាសុំស្នើឲ្យសម្ដេចក្រឡាហោម ស ខេង យកចិត្តទុកដាក់លើការគ្រប់គ្រងដីធ្លីក្នុងតំបន់នេះចៀសវាងការកសាងសំណង់អគារខ្ពស់ៗ ដែលអាចប៉ះពាល់ដល់ការហោះហើរនៅពេលដែលយើងពង្រីកនូវព្រលានយន្តហោះមួយនេះ»។
លោក ហ៊ុន សែន បន្តថាការវិនិយោគលើព្រលានយន្តហោះ និងផ្លូវថ្មីនេះទាមទារការយកចិត្តទុកដាក់ពីថ្នាក់ជាតិ និងថ្នាក់មូលដ្ឋាន។ នៅថ្នាក់មូលដ្ឋានអាជ្ញាធរយកចិត្តទុកដាក់ក្នុងការគ្រប់គ្រងតំបន់ជុំវិញព្រលានយន្តហោះ និងខិតខំដោះស្រាយបញ្ហាដីធ្លីដែលរងផលប៉ះពាល់នៅលើផ្លូវ ១ ខ្សែដែលតភ្ជាប់ខេត្តបាត់ដំបងជាមួយខេត្តសៀមរាប។
លោក សឿម ប៊ុនរិទ្ធ អភិបាលរងខេត្តបាត់ដំបងថ្លែងថា អនុសាសន៍របស់លោកនាយករដ្ឋមន្ត្រីមានចក្ខុវិស័យវែងឆ្ងាយសម្រាប់ថ្ងៃអនាគត។ លោកថា ព្រលានយន្តហោះបែកចានមានទីតាំងប្រមាណ ៦ គីឡូម៉ែត្រខាងកើតក្រុងបាត់ដំបង។ ព្រលាននេះយន្តហោះនៅតែចុះរត់បាន ប៉ុន្តែហេដ្ឋារចនាសម្ព័ន្ធ និងអគារត្រូវការកែលម្អ។ បច្ចុប្បន្នមានការអាស្រ័យផល និងការសាងសង់លំនៅឋាននៅក្បែរព្រលាន។ «ខេត្តបានបង្កើតគណៈកម្មការមួយដើម្បីចុះស្រង់អត្តសញ្ញាណកម្មមនុស្ស និងពលរដ្ឋ និងដីធ្លីដែលពលរដ្ឋបានអាស្រ័យផល។ គណៈកម្មការនោះគឺដឹកនាំដោយរូបខ្ញុំផ្ទាល់។ រៀបចំបុណ្យទន្លេហើយ ខ្ញុំនឹងដឹកនាំការប្រជុំ ដើម្បីធ្វើការងារនេះឲ្យបានឆាប់រហ័ស»។
ពាក់ព័ន្ធនឹងការរក្សាអគារសល់ពីសម័យមុន ដើម្បីជាសម្បត្តិបេតិភណ្ឌលោកថា មានអគារប្រមាណ ៨០០ ខ្នង។ រដ្ឋបាលខេត្តបានចុះប្រាប់ពលរដ្ឋឲ្យទម្លាក់ស្លាកយីហោ និងសំយាបដែលធ្វើទៅបាំងអគារសល់ពីសម័យអាណានិគមបារាំង និងរុះរើអ្វីដែលធ្វើឲ្យប៉ះពាល់ដល់អគារខុសពីទម្រង់ដើម។ ចំពោះផ្លូវពីបាត់ដំបងទៅសៀមរាបលោកថា ធ្លាប់មានការសិក្សាម្ដងរួចហើយប៉ុន្តែការសិក្សានឹងត្រូវធ្វើឡើងវិញ ដើម្បីបញ្ចៀសឲ្យបាននូវផលប៉ះពាល់ទាំងនោះ៕
