.jpg)
ពលករដែលវិលត្រឡប់មកពីថៃក្នុងចំនួនដ៏ច្រើនកាលពីម្សិលមិញ។ រូបថត នគរបាល
ភ្នំពេញៈ លោកនាយករដ្ឋមន្ត្រី ហ៊ុន សែន ឲ្យអាជ្ញាធរខេត្តយកសាលារៀនដែលសិស្សឈប់សម្រាកធ្វើជាមន្ទីរពេទ្យបណ្តោះអាសន្ន ខណៈដែលប្រធានមជ្ឈមណ្ឌលប្រយុទ្ធនឹងជំងឺឆ្លងនៃក្រសួងសុខាភិបាលថ្លែងថា រដ្ឋាភិបាលមិនមានគោលការណ៍អ្វីផ្សេងក្រៅពីឲ្យពលករដែលទើបវិលត្រឡប់មកពីថៃក្នុងចំនួនដ៏ច្រើនដោយសារថៃបិទច្រកព្រំដែនត្រូវស្ថិតនៅដាច់ដោយឡែកដោយការស្ម័គ្រចិត្តនោះទេ។
លោក ហ៊ុន សែន កាលពីម្សិលមិញបានចេញបទបញ្ជាជា សំឡេង ទៅដល់មន្ត្រីពាក់ព័ន្ធអំពីការត្រៀមកន្លែងសម្រាប់ព្យាបាលអ្នកជំងឺ។ លោកស្នើឲ្យអាជ្ញាធរតាមខេត្តទាំងអស់យកសាលារៀនធ្វើជាកន្លែងសម្រាប់ធ្វើជាមន្ទីរពេទ្យបណ្ដោះអាសន្ន។
លោកថ្លែងថា៖ «ខ្ញុំគិតថា ត្រូវប្រើប្រាស់សាលារៀន ហើយសាលារៀនដែលខ្ញុំបានធ្វើកន្លងមកគឺស្អាតៗណាស់គឺនៅទីរួមខេត្ត និងកន្លែងមួយចំនួនគឺយើងយកសាលារៀនតែម្តងអ្វីដែលជាបញ្ហាបន្ទាន់គឺត្រូវជ្រើសរើសទីតាំងណា ១ ឬ ២ ក្នុងខេត្ត ១ ហើយគឺថានឹងរៀបចំប្រព័ន្ធទឹកភ្លើងចូលឲ្យដល់ជាបន្ទាន់ នេះជាកិច្ចការបន្ទាន់នៅតាមខេត្តត្រូវយកចិត្តទុកដាក់»។
លោកបន្តថា៖ «ដោះស្រាយធ្វើម៉េចត្រូវជ្រើសរើសសាលារៀនដែលយើងកំពុងតែបិទយកអគារ ១ ឬ ២ គឺឲ្យមានច្រើនបន្ទប់ រៀបចំបន្ទប់រៀបចំគ្រែដើម្បីដំណើរការតែម្តងដោយប្រើប្រាស់កម្លាំងសរុបដែលអាចយកទាំងកម្លាំងប៉ូលិសកម្លាំងទាហាន និងប៉េអឹមដើម្បីយកមកជួយការងារនេះតែម្តង ហើយជាពិសេសគឺសម្រុកដោះស្រាយបញ្ហាតភ្ជាប់ប្រព័ន្ធទឹក ប្រព័ន្ធភ្លើង ចូលទៅក្នុងសាលាតែម្តង ហើយរៀបចំគ្រែដោះស្រាយគ្រែដើម្បីដាក់សម្រាប់ទទួលអ្នកជំងឺដែលយើងត្រូវមានការចាំបាច់»។
មន្ត្រីប្រចាំនៅច្រកព្រំដែន ចាំយាមក្នុងខេត្តកោះកុងបានឲ្យដឹងថាមុនពេលច្រកនេះត្រូវបានបិទកាលពីព្រឹកម្សិលមិញ ពលរដ្ឋខ្មែរប្រមាណ ១០០ នាក់បានត្រឡប់ចូលមកកម្ពុជាវិញ។ ដោយសារចំនួនតិចដូច្នេះមន្ត្រីចត្តាឡីស័កអាចគ្រប់គ្រងបាន និងបានវាស់កំដៅរបស់ពួកគេគ្រប់គ្នា។
ប៉ុន្តែសមត្ថកិច្ចនៅច្រកអន្តរជាតិដូង ឬឡែមខេត្តបាត់ដំបងដែលសុំមិនបញ្ចេញឈ្មោះបានឲ្យដឹងថា ច្រកព្រំដែននេះត្រូវបានបិទកាលពីថ្ងៃទី ២២ មីនាវេលាម៉ោង ០០។ នៅថ្ងៃបិទនោះពលរដ្ឋប្រមាណជិត ១ ពាន់នាក់បានរង់ចាំនៅមាត់ច្រក ហើយបានសម្រុកចូលកម្ពុជាវិញក្នុងសភាពមួយដែលមន្ត្រីចត្តាឡីស័កមិនអាចគ្រប់គ្រងបាន។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានថ្លែងពីម្សិលមិញថា កម្ពុជាមិនមានគោលការណ៍ប្រមូលអ្នកដែលត្រឡប់ពីក្រៅប្រទេសទៅដាក់នៅដាច់ដោយឡែកនៅកន្លែងណាមួយទេ។ លោកថា ការនៅដាច់ដោយឡែកគឺធ្វើឡើងតាមគោលការណ៍ស្ម័គ្រចិត្ត។
«ខ្ញុំគិតថា ការដែលគាត់ស្ម័គ្រចិត្តនៅដាច់ដោយឡែកនោះគឺល្មមគ្រប់គ្រាន់ដែរហើយ។ សូមបញ្ជាក់ថា ធម្មតាមេរោគនៃជំងឺនេះបើអត់ចេញរោគសញ្ញា ឱកាសនៃការឆ្លងគឺទាបណាស់។ ដូច្នេះបើគាត់ធ្វើយ៉ាងម៉េចនៅឆ្ងាយពីសមាជិកគ្រួសារ យើងប្រើប្រាស់សម្ភារបរិក្ខារ បរិភោគឲ្យដាច់ពីគ្នាទៅមួយរយៈទៅហើយប្រើកន្សែង ក្រមា ដាច់ពីគ្នា។ បើយើងអនុវត្តបានប៉ុណ្ណឹង យើងកាត់បន្ថយបានច្រើន»។
លោកស្នើឲ្យអាជ្ញាធរមូលដ្ឋានរួមមានមេភូមិ មេឃុំ មេប៉ុស្តិ៍ សមាគមនានា និងអ្នកស្ម័គ្រចិត្ត ជួយចុះណែនាំអ្នកដែលត្រូវនៅដាច់ដោយឡែកដោយស្ម័គ្រចិត្តទាំងនោះ ដើម្បីបញ្ចៀសការរាតត្បាតនៅក្នុងសហគមន៍។ «រហូតមកដល់ពេលនេះយើងនៅតែមិនទាន់រកឃើញភ័ស្តុតាងបញ្ជាក់ថា មានការឆ្លងនៅក្នុងសហគន៍នៅឡើយទេ។ ប៉ុន្តែយើងមានការឆ្លងផ្ទាល់ ឆ្លងក្នុងស្រុកមានន័យថា គាត់ឆ្លងពីអ្នកដែលធ្វើដំណើរពីស្រុកក្រៅ»។
លោក ស ខេង រដ្ឋមន្ត្រីក្រសួងមហាផ្ទៃកាលពីយប់ថ្ងៃអាទិត្យបានចេញបទបញ្ជាទៅអភិបាលខេត្តទាំងអស់ឲ្យណែនាំបន្តទៅអាជ្ញាធរមូលដ្ឋានឲ្យចុះពន្យល់ណែនាំដល់ពលរដ្ឋដែលត្រឡប់ពីថៃវិញឲ្យមានការពិនិត្យសុខភាព។ សម្រាប់ករណីសង្ស័យ លោកស្នើឲ្យដាក់អ្នកនោះនៅដាច់ដោយឡែករយៈពេល ១៤ ថ្ងៃដោយមិនឲ្យពួកគេប៉ះពាល់ជាមួយក្រុមគ្រួសាររបស់ពួកគេ។
លោក កែវ សុភត្រា ប្រធានមន្ទីរសុខាភិបាលខេត្តបន្ទាយមានជ័យថ្លែងកាលពីម្សិលមិញថា លោក និងក្រុមការងារកំពុងពិនិត្យសុខភាពពលករប្រមាណជិត ១ ពាន់នាក់ដែលត្រឡប់ពីថៃ។ លោកថា៖ «យើងកំពុងរៀបចំសុំគោលការណ៍សម្ដេចដើម្បីថា ឲ្យគាត់ទៅខេត្តរបស់គាត់ ឬទៅកន្លែងណា? មានគ្នាច្រើនដែរ ប្រហែលជិត ១ ពាន់នាក់។ យើងកំពុងពិនិត្យសុខភាពរបស់ពួកគាត់ទាំងអស់»។
បើតាមគេហទំព័រក្រសួងមហាផ្ទៃអភិបាលខេត្តជាច្រើនកាលពីម្សិលមិញបានដឹកនាំកិច្ចប្រជុំនៅតាមខេត្តរៀងៗខ្លួនដើម្បីផ្សព្វផ្សាយវិធានការទប់ស្កាត់ជំងឺកូវីដ ១៩។ នៅខេត្តព្រះសីហនុលោក គួច ចំរើន បានដឹកនាំកិច្ចប្រជុំដោយលោកថ្លែងថា៖ «ប្រសិនជាគ្មានការចាំបាច់ទេ ប្រជាពលរដ្ឋគ្រប់រូបគួរតែស្នាក់នៅក្នុងផ្ទះរៀងៗខ្លួន ដើម្បីរក្សាសុវត្ថិភាពផ្ទាល់ខ្លួន និងចៀសឱ្យឆ្ងាយពីជំងឺកូវីដ ១៩ លើកលែងតែអ្នកដែលមានការចាំបាច់។ ក្រៅពីនេះមន្ត្រីរាជការក៏ដោយ ប្រសិនបើគ្មានការចាំបាច់ធំដុំទេ គឺមិនបាច់ជួបជុំគ្នាទេ នាំគ្នាធ្វើការតាមប្រព័ន្ធអនឡាញនាំគ្នាធ្វើការតាមទូរស័ព្ទក៏បានដែរ»។
លោកបញ្ជាក់ថា៖ «ណែនាំឱ្យមន្ត្រីយើងទាំងអស់គ្នាធ្វើជាភ្នាក់ងារសន្តិសុខសម្រាប់ការអប់រំណែនាំ ឬក៏ដាក់កំហិតទៅប្រជាពលរដ្ឋ ឬមន្ត្រីគ្នាឯងណាដែលយើងដឹងថា គាត់មានការសង្ស័យ ឬការពាក់ព័ន្ធនឹងអ្នកដែលអាចឆ្លងជំងឺកូវីដ ១៩ ត្រូវក្តាប់ឱ្យបាន»។
រដ្ឋបាលខេត្តព្រះសីហនុបញ្ជាក់ថា ខេត្តនេះបានរកឃើញករណីវិជ្ជមានកូវីដ ១៩ ចំនួន ៣៣ នាក់ លើភ្ញៀវទេសចរបារាំង និងជនជាតិខ្មែរ។ ប៉ុន្តែខេត្តនេះនឹងមិនបិទខេត្តទេ គឺបិទតែសណ្ឋាគារដែលភ្ញៀវទាំងនោះស្នាក់នៅប៉ុណ្ណោះ។ រដ្ឋបាលខេត្តបន្តថាខេត្តបានត្រៀមអគារនៃមន្ទីរពេទ្យបង្អែកខេត្តមានចំនួន ២១ បន្ទប់ស្មើនឹង ៦០ គ្រែ និងសណ្ឋាគារចំនួន ២ កន្លែងមានចំនួន ១០៦ បន្ទប់ស្មើនឹង ២០២ គ្រែ។ សរុបទាំងអស់គឺមានចំនួន ១២៧ បន្ទប់ស្មើនឹង ២៦២ គ្រែ និងបានត្រៀមទីតាំងមួយចំនួនទៀតសម្រាប់ទុកដាក់អ្នកជំងឺកូវីដ ១៩។
ដោយឡែកនៅរាជធានីភ្នំពេញវិញអភិបាលរាជធានីភ្នំពេញលោក ឃួង ស្រេង បានចេញសេចក្ដីអំពាវនាវមួយកាលពីម្សិលមិញចំពោះពលករដែលត្រឡប់ពីប្រទេសថៃដោយលោកស្នើនូវ ៤ ចំណុច រួមមានការជូនដំណឹងទៅមន្ត្រីខណ្ឌដែលពួកគេរស់នៅ ការនៅដាច់ដោយឡែករយៈពេល ១៤ ថ្ងៃតាមការណែនាំរបស់ក្រសួងសុខាភិបាលទាក់ទងតាមលេខដែលបានផ្សព្វផ្សាយ ឬមន្ត្រីសុខាភិបាលមូលដ្ឋានក្នុងករណីមានសញ្ញាសង្ស័យ និងឲ្យមន្ត្រីមូលដ្ឋានចុះណែនាំពលរដ្ឋដែលទើបត្រឡប់មកវិញឲ្យនៅដាច់ដោយឡែករយៈពេល ១៤ ថ្ងៃ៕
